Bahan Jamita Minggu IV Dung Ephipanias, 2 Pebruari 2014

Ulahon Lomo Ni Roha ni Debata

Mika 6 : 1 – 8

A.        Patujolo

Ia Panurirang Mika marharoroan do sian huta Maresa, Moresyet ( 35 km tungkan Dangsina ni huta Jerusalem), jala namangula di Harajaon Jehuda (Israel dangsina) uju panggomgomion ni tolu halak raja, ima Raja Jotam (745-748), Raja Ahas (741-724), dohot Raja Hizkia (725-697) manang dung taon 745-697, dungkon salpu panghobasion ni Panurirang Jesaya mangula di Harajaon Jehuda. Di masa ni si Mika godang do hamaolon na niadopan ni bangso Jehuda di partingkian i, na godang nasida mangadopi parsorion ala pambahenan ni angka na tumimbo hajongjonganna ditongatonga ni masyarakat, isara ni angka halak na mora, termasuk  mai na ro sian angka panurirang pargapgap, malim, panguhum ni Israel, nang angka induk ni parugamoon nasida (Mik.3:1), na so parduli tu angka jolma na torop (rakyat kecil) ala holan na naeng mangalului na ringkot tu dirina do nasida marhite ‘na pahosing uhum’, papeol uhum- melakukan ketidak-adilan (Ptds. Mik.2:1-2; 3:2). Suang songon i muse na lam mangerbang pangulahonon nasida marhite na manomba angka ganaganaan, gabe lam tubu ma kemerosotan moral ditongatonga ni bangso Jehuda. godang do  panghorhon hasesega ni Jehuda sian bagasan ni harajaon i di tingki panggomgomi Ahab; i ma sian boruna na margoar  si Atalia, soripada ni Jehuda (841-835s.M; 2 Raja 11). Si Atalia na manomba debata Baal gabe dalan hasesega ni haporseaon si Ahas (2 Raja 14). Jala oraora on dohot  do sahat tu Harajaon Israel dangsina.

Angka i ma na naeng paingoton ni Panurirang Mika di na jinou ni Debata Ibana, asa tung tangkas ditanda bangso Jehuda paboa na olo dope Debata manghaholongi nasida molo tung olo paubahon rohana, jala asa tung tarida hasintonganna paboa na targoar nasida bangso na pinillit ni Debata marhite na tongtong rade, unduk tu angka tona ni Debata jala ditanda hahuranganna, asa unang be mangulahon angka na so dihalomohon Debata, i ma mambahen na so patut maradophon donganna jolma (pat. Mik.3:11). Naeng ma pasidingonna i sian ngoluna, asa unang gabe tubu rimas ni Debata maradophon nasida.

B. Hatorangan

     1.       Ayat 1- 2 : Angka dolok manghatindanghon asi ni roha ni Debata na manongtong i tu tongatonga bangso Israel, sian haruruar ni bangso i sian bangso  Misir tu tano Kanaan (ptds. Jes 1 : 2). Umbahen na niuhum Debata bangsoNa i siala nunga manghalupahon denggan basa ni Debata, na so umboto mandok mauliate jala na so hot marhaporseaon tu Debata Jahowa.

     2.       Ayat 3 – 4 : di ayat on manghatai do Debata dompak bangsona i, na marisihon : sai songon na kejam do Debata di roha ni bangso  i jala marsala. Hape soada dapot nasida hasalaan ni binahen ni Debata tu bangsoNa i. Alai huroha, ndang tolap do pe bangso Israel laho manjalo angka pasupasu ni Debata na paluahon nasida sian angka bangso parbegu, malua sian angka mara. Sian si Musa dohot Aron na pinajongjong Debata laho manguluhon bangsoNa haruar sian parhatobanon Misir tu tano nabinagabagahon ima Tano kanaan.

     3.       Ayat 5 : Dipangido Debata do tu bangso i asa marningot denggan basaNa na mangalengsehon hajahaton ni si Balas, ima raja Moab, na gabe pasupasu tu nasida, ditingki i Panurirang Bileam na niupa si Balas laho mamburai bangso i hian, dipaksa laho pasahathon pasupasu tu bangso Israel dohot hamonangan maradophon angka musu nasida, di tingki maringan di Sitim ( 4 Musa 22-24).

     4.       Ayat 6 – 7 : Digombarhon Panurirang Mika, ia bangso Israel na manomba debata Baal i gabe mabiar tu Debata jala marhamubaon ni roha siala uhuman sian Debata (ptds. Jer.26: 18-19 di Jehuda). Sasintongna nunga sala  mangantusi nasida taringot tu peleannasida i tu Debata, di dok rohanasida boi subuton roha ni Debata marhite peleannasida i na marlobilobi i, jala lobi sian na niaturhon si Musa hian. Tujuanna asa paombunhon rimas ni Debata dompak nasida, jala pola do gabe rumar pelean nasida  sahat tu na mamelehon anak dohot boru nasida songon na dihasomalhon angka bangso parbegu na dihumaliangna ( ptds, 2 Raja 16: 3; 17:17), Nang pe nunga apala diorai pangalaho i na mangaleai Debata Jahowa dibagasan Patik ni si Musa (ida;  3 Musa 18 : 21; 5 Musa 18 : 10; ptds. 1 Musa 22). Alai leleng dung marujung partingkian ni si Musa nunga madabu nasida tu pangalaho na mangasahon pingkiran, hapistaran, jala ndang dihalomohon be Hata ni Debata. ( 2 Musa 13:13)

     5.       Ayat 8 : on ma alus ni Panurirang Mika tu angka jolma na sai mangasahon pelean na marlobilobi (diluar na niaturhon ni patik ni si Musa) tu adopan ni Debata sian hamubaon ni roha na sasintongna. Sada sipaingot alai marisihon haholongon; molo pelean na sasintongna dibagasan partangiangan nasida i naeng ma dohot mamelehon ngolunasida, na gabe pelean na mangolu tu Debata Jahowa. (ptds BE HKBP No. 204: 2, Rom 6 : 13; 12: 1; 1 Ptr.2: 5). Molo didok “ale jolma...”ndang na mandok tu sude jolma na diportibi on, alai bangso ni Debata na mangadop tu habadiaonNa. Diigil Debata do tu bangsoNa asa : -mangulahon uhum (berlaku adil; hata heber ‘mispat’) dohot;  -holong ni roha di habasaon (mencintai kesetiaan), na marlapatan dohot tu na unduk dohot holong tu padan ni Debata (hata heber padan : hesed). Hasatiaon i dipatuduhon ditonga ni keluarga; haholongan di na mardongan saripe, natoras tu ianakhon, tu masyarakat nang tu panggomgomi, jala tarlumobi tu Debata Jahowa; - marpangalaho haserepon (hidup dengan rendah hati) di adopan ni Debata. Lapatanna naeng angka na porsea i panggomgomhon diri nang ngoluna tu adopan ni Debata, tuang saluhut na jinalona naeng ma uhir jala ingot di roha nang haporseaonna sian Debata do saluhutna i. Ndang tarula jolma i agia aha pe ia so Debata na mamasumasu dohot na manumpahi ulaonna. Ndang margogo jolma i mamuhai angka ulaonna ia so Debata na jumolo mamuhai. (ptds. 5 Musa 10 : 12).

     C.      Sipahusorhusoron

     1.       Di masa ni Panurirang Mika; lumbalumba na maralo tu keadaan na tongon dialami bangso i do, nidok ni panurirang Mika uju i. Ai tongon denggan dope pandaraman umum ni bangso i tagan torop dope na marsomba tu bagasjoro ni Samaria nang na di Jerusalem. Asa adong ma du apnurirangon na berkembang uju i ditongatonga ni bangso Israel. Na sada mandok: aman, dame do soada mara, na sadanai mandok: nunga jonok, ro nama jea. Ala tarhira leleng do asa masa nanilumbahon ni Panurirang ni Debata, ima deba sialana , gabe hurang parduli bangso i tu ham,ubaon ni roha. Lalap di parlalapan, hape dung jumpang tingkina binuhul ni Debata, tulus ma uhum, mangae ma bangso i. Ala ni i di hita na porsea dibagasan Jesus Kristus unang tarimpu na soada masa sogot molo lemba hita umbege singotsingot na palumba hita di angka hahuranganta. Ingkon na lam ringgas do hita manangihon hata ni Debata ganup ari, asa malua hita sian uhum ni Debata. Sotung tapingkir na mardalan hita didalan hinalomohon ni Debata, gabe lemba hita mamareso pangalahonta, maon tarboto naung manimbil hita.

     2.       Mansai lomos do roha mamereng na masa sinuaeng on ditonga ni bangsonta Indonesia on na hampir mirip dohot na masa di ting Panurirang Mika, na mambahen jut roha ni Debata; ima pangalaho korupsi di pigapiga pangula politik, jala sipajongjong uhum, jala sahat tu angka uluaon ni ugamo (Mik.3:11). Ngolu on tung mansai doras do perubahan, nang pe binereng sai hira lam tu magona do, ala ni i do angka na porsea tarjou laho haruar sian ‘partabunianna’ di pudi ni sikap haserepon dohot partondion na marpengpeng. Unang ma marpangalensem hita, berengon songon na badia jala ringgas marminggu nang di partangiangan alai ndang diulahon na ni haporseaonna dohot polin. Naeng ma tarida parsitutuonta mangihuthon Debata dipardalanan ni ngolunta. (jaha buku Selamat Berkarunia: “Republik Suap”, dan Selamat Menabur : “Belajar Menjadi Bijaksana” oleh Andar Ismail.)

    3. Kasih Allah tampak nyata dalam pribadi Yesus saat Dia berada di bumi. Ketaatan-Nya saat meninggalkan surga dan menjadi manusia tercermin saat Dia membungkuk untuk membasuh kaki para murid-Nya. Dia menyembuhkan orang sakit, tetapi justru dibalas dengan kebencian yang pahit. Dia mati seperti seorang penjahat di atas salib orang Romawi. Ketabahan dan perbuatan-perbuatan baik-Nya ini mencerminkan kasih Allah, karena Yesus berkata, “Siapa saja yang telah melihat Aku, ia telah melihat Bapa” (Yoh. 14:9). Secara fisik, Yesus memang sudah tidak lagi bersama kita – kini. Dia duduk di sebelah kanan Allah di surga. Jadi, jika hari ini kasih Allah harus diwujudkan, maka itu harus terjadi melalui orang-orang kristiani. Apakah hal itu sedang terjadi melalui Anda? Tuhan mengajak kita untuk mengikuti teladan yang sudah Ia beri, menyatakan kasih, setia dan keadilan bagi semua orang. Amen.

Bahan Jamita Minggu III Dung Ephihpanias, 26 Januari 2014

Hasadaon Dibagasan Silang ni Kristus

1 Korint 1 : 10 – 18

      A.      Patujolo

Ditongos Apostel Paulus do surat na tu huta Korint hirahira taon 54 dung Kristus. 18 bulan ma lelengna Apostel Paulus manaburhon boni ni Barita Nauli di l uat on. On ma pardalanan na paduahalihon di ibana mamaritahon hata ni Debata. Ia huta on ima huta na ribur, sada pelabuhan internasional jala parpunguan ni sandok halak na ro sian ganup luat. Godang do na laho martigatiga dohot na mangalului parbinotoan. Bangko do i tutu molo ribur sada luat tontu godang ma angka namasa di luat i, isarana angka hagaoron, parsiguluton dohot angka na asing. Angka na uli na denggan pe tong do jumpang disi. Ala ni i tung marsitutu do Apostel Paulus pasahathon hata  ni Debata asa unang madabu angka jolma i tu ulaon na so hinalomohon ni  Debata.

Di huta Korint uju i, nunga masa parbolatbolatan,  hinorhon ni fanatisme ni angka jolma, nang ruas ni Huria i, manghaholongi sadasada halak guru manang pangajari, na mansai sangap di tingki i, ai tergolong do halak on tu na pistar di parbinotoan di parugamaon dohot dipengetahuan umum, gabe adong ma na manggoari dirina “pengikut ni si Apollos, si Paulus dohot si Petrus. Boi do jumpang on, ala nunga dirajumi halak Junani na pistar, ala gaya bahasana na menarik, naung  mempengaruhi warga masyarakat dohot warga gereja di tingki i. Boi do muse masa parbolatabolaton on, ala adong guruguru Kristen (sian Jahudi) na ro sian Jerusalem (1 Kor.7:18), na so apala sadalan dohot guru-guru  Kristen (na sian sipelebegu hian). Apostel Paulus mandapot laporan taringot tu parbolatbolatan i sude sian keluarga Kloe ( 1 Kor.1: 11).

     B.      Hatorangan

1)    Dijolo ni turpuk on tongtong do dipatujolo ni rohana hamauliateon tu Debata na margogoihon ibana mangula angka ulaon i, lumobi siala ni Huria Korint, na jongjong hinorhon  ni asi ni roha ni Debata sambing, jala na dipasahat  Debata godang asi ni roha-Na dilehon tu Huria i, marhitehite ruas na marragam i, na marharoroan sian berbagai suku, latar-belakang dohot parbinotoan. Adong na rumingkot dipatujolo Apostel Paulus asi ni roha ni Debata na jinalo ni Huria Korint, ima:

Ø Naparjolo; Ala naung mamora huria i dibagasan Ibana ima Kristus i; angka parbinotoan ni Hata ni Debata dohot di pangantusion di parbinotoan na umum. Lapatanna, diongkui Apostel Paulus do na magodang do huria i di saluhutna, di kuantitas dohot lumobi di kualitas sesuai dohot perkembangan zaman.

Ø Napaduahon; ala naung hot jala marsihohot Huria i di panindangion di Kristus ( Ibana do Sipalua di hajolmaon sian dosa dohot hamatean). Tarida do sian i, asing ni songon ahli Teologia nang ahli hukum si Paulus, laos dohot do do ahli sosial-masyarakat do ibana, na mangantusi situasi sosial dohot kondisi ni huria Korint. Jala mamangke situasi dohot kondisi i asa memotivasi ruas ni hhuria dohot pangituaina, asa tongtong mangaradoti hasadaon (Koinonia), jala asa setia manghatindanghon haluaon na pinatupa ni Jesus Kristus di angka situasi na mungkin mamboan manang panghorhon hurang masiantusan angka ruas ni huria i dohot na gabe marbolatbolat.

2)    Hasadaon boi pinamasa hinorhon ni hasadaon ni roha dohot pingkiran ni angka na porsea (ay.10-11). Asa tupa hasadaon dibagasan pamatang ni Kristus, dipaingor Apostel Paulus do huria i dibagasan goar ni Jesus Kristus asa saroha nang sapingkiran. Mansai gomos do dipaingot Apostel Paulus, ndada ala ibana na pingothon jala ndada tu ibana asa didok hatana i slsi holsn ala ni Kristus sambing do. “sahata” na marlapatan ima hasadaon ni ruas ni huria dibagasan barita i jala Bari Nauli na polin, ima Barita na so marlaok dohot habisuhon ni jolma  ( 2: 1- 5). Dung i, apostel Paulus mamangke hata “sahata” na martujuan asa ruas ni Huria na di Korintus marhasadaon dibagasan pamingkiran ia angka silehonlehon na marasing na sian Debata di nasida i naeng ma pangkeon i laho rup manumpahi ganup marsadasada songon pamatang ni Kristus.

Alai ndada ni parasingan ni silehonlehon i na mangarongom hasadaon ni pamatang ni Kristus di Korint, alai dohot do  nang parbadaan na tajom di angka horong na adong hian i. Dapot do informasi i sian keluarga ni si Kloe na tinanda ni ruas di Korint. Sian informasi i ma tarbege parsalisian ganup horong na so denggan be baritana. Sibonsiri ima; na so adong sikap “sahata” dohot “sapingkiran”. Ala ni i masa ma parsalisian dibagasan pangajarionna (bindu 1-4), pangalangkupon (bindu 5-6), taringot tu pardongansaripeon (bindu 7), parsalisian taringot tupantangpantang di sipanganon tu pelean debata sileban (bindu 8), parasingan di na patupa Ulaon na Badia (bindu 11), moru haholongon (bindu 13), na so olo pasidohot diulaon partangiangan (bindu 14), jala sahat tu na manangsihon haheheon ni Kristus (bindu 15). Sian pamuhai pe dapot ni roha apostel i do na naeng sidohononna tu huria i, dimasa na kritis do huria i, nunga ingkon hatop niubatan. Ala ni i ma margogo do si Paulus paingothon molo ganup angka na porsea i sahata jala sapingkiran, dapotna do hasadaon dibagasan pamatang ni Kristus jala boi torus ditambortambori asa lam tu dengganna.

3)    Hasadaon ni pamatang ni Kristus boi dipahot molo angka na porsea i ndang olo terjebak di semangat fanatisme ni kelompok (12-18). Torop do halak na di huta Korint na manengahon parbinotoanna. Molo tajaha di 1 Korint 1: 18 dohot na manguduti, begeonta ma baritana; molo lam timbo parbinotoan ni sasahalak, lam niargaan ni masyarakat ma ibana. Angka halak na pistar i ma na gabe daya magnet jala daya tarik na mansai luarbiasa di halak korint hatiha i, ala ido na boi palashon roha nijolma hatiha i jala dietong do i songon sada hiburan sambing. Sian i pe boi natusanta angka halak Korint ima na berlatarbelakang budaya na timbo jala kritis. Jala sipareon nasida pe boi dohonon ndang holan tu na manangihon jamita ganup minggu, alai dohot do angka ceramah na sian angka na malo jala na pistar. Jala dosohon tu fenomena nuaeng on do masa di tonga huta Korint hatiha i, ima na adong deba marlomo ni roha (ngae-fans berat) tu angka parjamita nang angka na pistar hatiha i. Pangalaho i ma sibonsiri ni na marhoronghorong ruas ditonga huria Korint. Jala apostel Paulus mamereng, ido sibonsiri parbolatbolatan ditonga ni huria.

     Boi do sigatanta taringot tu angka golongan manang kelompok na masa hatiha i:

v Horong Paulus; didok rohanasida holan si Paulus do siihuthononnasaida di Korintus. Paulus do ama di nasida. Gumodangan do anggotana marharoroan sian halak non-Jahudi na lomo rohana di jamita ni apostel Paulus taringot tu haluaon ni halak Kristen jala ujung ni patik i. Ia horong on sai marusaha do manguba haluaon i gabe sada dalan asa marlomo ni roha nasida di haKristenonnasida. Lupa do nasida ia haluaon na jinalo nasida nadada asa marlomo ni roha mangulahon dosa, alai sabalikna asa merdeka do nasida unang sai mangulahon dosa be. Na  deba penafsir mandok ia nasida on ima sian angka halak na mangulahon harorangon, pangalangkupon dohot na mangallang pelean tu debata sileban.

v Horong Apolos United. Gumodangan do nasida na malo jala parbinoto jala na manghalomohon filsafat. Mansai lomo do rohana molo dibaritahon barita na Uli i pasidohot filsafat na tarbarita. Mansai las do rohanasida di angka jamita ni si Apolos na boi ber –retorika (sebuah teknik pembujuk-rayuan secara persuasi untuk menghasilkan bujukan dengan melalui karakter pembicara, emosional atau argumen/logo). Jala didok nasida do ia Apolos do na berperan di na laho pagodanghon ruasni huria di Korint, ala nasida do na mangajar dohot na pauliulihon ruas i asa lam mangerbang jala lam balga. Angka na malo mandok ia horong on, boi do ra sian angka halak na manirpang sian ulon na badia jala na mangalanggar angka hahomion ni parmingguon.

v Horong ni si Petrus (Peter’s Community). Molo angka anggotana gumodangan sian halak Jahudi. Mansai lomo do rohana pangajarion na mandok ia angka na porsea ingkon hot do mangulahon ruhutruhut ni patik i. Nasida ma na sai mangharingkothon uhum, na ringkot legalis, alai ihut tu na mangorui angka silehonlehon ni Debata jala na mangarajumi barita taringot tu silang, i ma haotoon.

v Horong siihuthon Kristus (Christ Fans Club). Sian goar i pe nunga mura tandaonta angka siginjang roha, na mandok dibagasan rohana dirina do na bonar jala na sintong sian horong na asing siala adong hubungan na khusus dohot Kristus. Dirohana holan nasida do na marnampunasa Kristus ndang dohot na asing. Didok angka penafsir; boi do ra nasida na so porsea tu haheheon ni pamatang ala dilapati nasida do Kristus i sian hajolmaonNa sambing.

Sude na horong i ndada sian goar goar ni horong i alai sian tongatonga ni ruas i do i tubu, sabalikna angka goar tokoh i ndang parbinoto di na masa i, ia holan ruas no na manghilala tudia horongna. Alai gabe manalai do pangalaho i, ia na diulaon angka tokoh siihuthonoon ni angka horong tung sosadia dope i martimbanghon na niulahon ni Kristus tu tongatonga ni ruas ni huria i. I do umbahen dipaingot apostel Paulus asa manat molo sahalak uluan unang ma mambuat hasangapon ni Tuhan i. Adong do na manghalomohon Apostel Paulus, jala dididi ibana do na deba jolma, jala boi do gabe halomoan ni ruas i ibana, alai didok ibana ndada i na gabe tujuanna. Ia tujuan na sasintongna ima laho mambaritahon Barita Nauli i do asa unang marisuang silang ni Kristus i. Sadar do apostel i na dipangke do ibana laho pararathon Barita Na uli i doshon songon si Apolos dohot si Petrus. Holan Kristus do naung mangulahon sasudena tu ruas ni huria i.

    C.      Sipahusorhusoron

 Ø  Dipartingkian nuaeng diangka huria boi do tubu diroha ni angka ruas ni huria parjamita hasoloan ni rohana. Sude ruas dipaingot asa unang terjebak holan laho mengagumi sahalak tokoh gereja nang parhalado nang pandita pe i. Asa ingkon lam bagas do ruas i marpanatap, nasida na dilehon Debata di angka asiasiNa asa mangula marhobas ditongatonga ruas ni huria i.

 Ø  Tajagahon ma hasadaon ditonga ni huria; unang masa parbolatbolatan, parbadaan, pargutugutuon. Asa umbiaran ma ruas tu Tuhan Debata na mangalehon AnakNa na sasada i Jesus Kristus laho paluahon hita sian dosa nang hamatean i. Songon hasadaon ni Debata Ama dohot AnakNa Jesus Kristus songon tangiang ni Jesus tu angka na hinonghopNa i (Joh.17:21 “Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu” ), songon i ma hasadaon ni ruas ni huria, na sahata, saroha, sapingkiran jala tarlumobi satondi, saluht na i sian Tondi na sasada i Tondi ni Jesus Kristus i.

 Ø  Silang ni Kristus i do hagogoon ni Debata di pamaritaon Barita Nauli i; Silang i do na gabe sarana na dipangke Debata laho paluahon jolma jala bongot tu hasadaon na manongtong dibagasan Kristus. Holan marhite uhuman na parpudi do na manirang hita; ise do na bongot tu hamatean na salelengnilelengna dohot ise do na bongot tu hangoluan na salelengnilelengna. Ia silang i ndada sada masa na kebetulan, ndada sada haotoon manang kegagalan manang tragedi ni hajolmaon. Alai silang i ima klimaks manang puncak ni sangkap ni Debata, songon naung binaritahon di Rom 4: 25 “Ai dipasahat do Ibana ala ni pangalaosionta i, jala dipangolu siala hatigoranta”. Jala lapatan ni silang i boi idaonta dibarita ni haheheonNa. Molo so sian haporseaon, Kristus na tarsilang i tong do gabe haotoon manang gabe partuktuhan dihita. Marhite silang ni Kristus i gabe sada barita nauli pasadahon sude jolam asa marhaporseaon di Ibana na manghophop hita jolma pardosa on jala asa panean di hangoluan na so ra suda i. Amen