Jamita Evangelium PASKAH 1 (Parningotam Ari Haheheon Ni Tuhan Jesus) – 5 April 2026

HEHE JESUS DI ARI PATOLUHON

Yesus Bangkit Pada Hati Ketiga

I Korint 15 : 1 – 11   

 

a.                        Huria ni Tuhanta na hinaholongan dibagasan Jesus Kristus. Impola ni Barita na Uli di huria na parjolo i on do: Naung mate do Kristus ala ni dosanta, hombar tu na tarsurat i Naung tartanom do Ibana, gabe dipahehe di ari patoluhon, hombar tu na tarsurat i. Jadi taringot tu hamatean dohot haheheon ni Jesus do Barita na Uli i. Jesus na hehe sian na mate i do na sar baritana, jala na margogo situtu do Debata na patupahon haheheon sisongon i. Ndang margogo hukum-hukum alam laho membatasi huaso ni Debata. Alai Debata na manompa sandok portibi on dohot isina ro di ang-ka hukum-hukum alam na marlangku disi, Debata do nampu-na saluhutna i, jala unduk tu tona ni Debata. Jesus na hehe sian na mate i do isi ni Barita na Uli i, jala disi do letak ni sude hagogoon ni Debata. Haheheon ni Jesus i do nang na mangalehon hagogoon tu angka parba-rita na Uli. Haheheon ni Jesus i do na paluahon jolma, i ma di bagasan Barita na Uli i na taringot tu hamatean dohot haheheon ni Jesus. Haheheon ni Jesus i do bona ni Padan na Imbaru ni Debata tu saluhut hajolmaon, i ma tu angka na manghaporseai Barita na Uli i.

b.                       Huria na hinaholongan, ai ndang tarpauli ojahan na asing, dungkon ni naung ojak i, i ma Jesus Kristus. On do jamita ni apostel Paulus i ma pasahathon tona na jinalona sian Jesus, taringot tu hama-tean dohot haheheonNa i. Angka na tinonahon ni Debata _ do na jinamitahon ni apostel i, jala ndada tona ni jolma dijamitahon ibana manang pingkiranna sandiri, alai taringot tu hamamate ni Jesus ala ni dosanta. Ndada ala ni dosa ni sahalak umbahen na mate Jesus i, alai ala ni "dosanta" i ma dosa ni portibi on, ala ni dosa ni saluhut jolma. Ala ni i do umbahen na tartanom Ibana, alai na dipahehe do Ibana di ari patoluhon.  Ngolu ni Jesus do sintuhu ni Barita na Uli i. Barita na Uli taringot tu hamatean dohot haheheonNa i do las ni roha ni angka na olo porsea na manangihon jamita haluaon i. Tu bagasan hamatean dohot haheheonNa i do ojak huria ni Korin-tus, jala ndang jolma na mangolu ojahan ni huria i, manang angka Parhalado, jala ndang terletak di kepemimpinan ojahan ni huria ni Debata, alai tung ingkon di bagasan hamatean dohot haheheon ni Jesus sandiri do. I do na boi tiopon ni angka na porsea di tingki na porsea i ibana, jala ingkon di bagasan haheheon ni Jesus i saluhut panggulmiton ni hu-ria i. Haheheon ni Jesus i do na marhuaso manogu tu baga-san haluaon, ai i do parhiteanta gabe malua. Ndada jolma manang sahalak pangula ni huria na manogu jolma tu bagasan haluaon, alai Barita na Uli taringot tu hamatean dohot hahe-heon ni Jesus i na paluahon jolma sian dosana be. Tugas ni angka na porsea ro di angka pangula ni huria, i ma manga-rahon torop jolma laho manangihon Barita na Uli i.

c. Huria ni Tuhanta, ndada hata na magopo Barita na Uli taringot tu hamate-an dohot haheheon ni Jesus i, alai tung hagogoon ni angka parbarita na Uli ro di angka na porsea do i laho manogu torop jolma laho mananda habalgaon ni Debata marhite haheheon ni Jesus i. Dipasahat apostel Paulus tona on, ala adong dope deba sian tongatonga ni halak Korintus na man-dok, na so adong haheheon ni angka naung mate (ayat 12), Marhite i naeng dohonon ni apostel Paulus, tu angka na man-soadahon haheheon ni Jesus sian na mate, na mansoadahon saluhut isí ni Barita na Uli i do ibana disi. Rumar do sandok jamita ni angka apostel, nang jamita ni angka parhalado pe di taon on molo so hehe Kristus sian na mate, jala rumar ma nang haporseaon ni halak Ko-rintus nang huria pe di tingki on (ayat 13-14). Alai tutu do Jesus hehe sian na mate, jala na marhuaso do gogo ni haheheon ni Jesus i saleleng ni lelengna laho paluahon jolma na olo porsea. Ndada na pingsan Jesus di udean, ai ndang inganan ni angka na pingsan i, tung inganan ni angka naung mate do.

d.                       Huria ni Tuhanta, rapot godang do na mambuktihon naung mate Jesus, jala sahalak na burju na margoar si Josep na sian . Arimatia, sahalak na tigor na maimaimahon harajaon ni Debata, ma-ngido tu si Latus asa diloas ibana laho pature BANGKE NI JESUS naung mate i. Jala tangkas do i dipaijur ibana sian hau silang, jala dibaluti tu dagangan na halus, jala dipeak-hon tu bagasan tanoman na niliang tu batu. Tutu do mate Jesus ala ni dosanta, ala ni dosa ni portibi on. Alai dipahehe Debata do Jesus di ari patoluhon, HOMBAR TU NA TARSURAT I. Hamamate ni Jesus i pe hombar do tu na tarsurat i, jala dipahehe do Ibana muse HOMBAR TU NA TARSURAT I. Digohi Debata do bagabagaNa tu hajolmaon di tingki na mate i Jesus hombar tu na tarsurat i di angka bagabaga ni panurirang. Hombar tu sangkap ha-tuaon ni Debata (= rencana keselamatan Allah) dipahehe do muse Jesus i di ari patoluhon, hombar tu na tarsurat i. Dung hehe Jesus DIPATANDAHON DO DIRINA (= dipa-taridahon) tu si Kepas, tu na sampulu dua i, tu lobi limaratus halak jala torop sian nasida mangolu dope di tingki ni apostel Paulus; songon i nang tu si Jakobus naung gabe porsea dung hehe Jesus. Jala dipataridahon do dirina nang tu si Saulus sandiri pe, jala ibana sandiri manggoar na tubu ibana di na so tingkina. Tutu do i, ai hira na sinoro do ibana sian silelei Sisean ni Jesus gabe Apostel na mamaritahon barita haluaon i, na taringot tu hamatean dohot haheheon ni Jesus. Ndada na tubu ibana di na so tingkina, alai tingki hamama-suk ni apostel i tu panandaon di Tuhan i, hira halak na sinoro ibana. Haheheon ni Jesus i na marhuaso manangkup apostel Paulus tu panandaon na sintong taringot hamamate dohot haheheon ni Jesus.

e.                        Huria na hinaholongan, Apostel Paulus sandiri pe nunga maruli hagogoon sian barita na uli taringot tu hamamate dohot haheheon ni Jesus i. Nunga ditanda Apostel Paulus huaso ni haheheon ni Jesus na mangatasi saluhut batas ni gogo ni pingkiran ni hajolmaon, ro di angka batas-batas ni hukum-hukum alam na tinompa ni Debata. Barita na Uli jala isi ni sandok jamita i ma Haheheon ni Jesus sian na mate. Jesus naung hehe sian na mate i do na papatarhon diriNa sandiri tu torop halak. Diongkuhon si Paulus dison na so tama ibana nian goaron apostel, ala naung dilele ibana huria ni Debata di tingki na so marhamubaon i dope ibana. Serep ni roha ni halak na mananda diri ma on. Alai nuaeng, ninna ibana, gumodang do na niula ni ibana sian angka apostel na asing. Didok ibana pe i, tong do mangasahon asi ni roha ni Debata. Ndang sian haboionna sandiri i, jala di na marojahan tu asi ni roha ni Debata dipaboa do tekad ni sandok halak na porsea asa rade patupahon parjamitaon asa gabe porsea natorop.

f.   Huria ni Tuhanta na hinaholongan, haheheon ni Tuhan Jesus na itahaporseai i naeng gabe ojahan ni ngolunta laho hehe sian ngolunta na robi tu ngolu na imbaru, i ma ngolu na marparbuehon hata ni Debata. Jotjot do hita mate di bidang harohaon dohot partondion ala ni pangalisat ni sibolis. Ala ni i taharingkothon do tongtong haporseaon di haheheon ni Jesus laho manghirpasi haheheonta sian hagaleon ni tondinta. Ndang jadi be hita tahuton manang beha pe ancaman na taadopi di ngolu on na naeng mangalisathon ngolunta, ai nunga hehe Tuhan i, na mamboan tu hita hahihinsat sian ngolu na tarpodom.

g.                        Songon si Paulus na mangongku na so tama nian goaron apostel, songon i do hita naeng ma mangongku sebagai halak na so talup nian di jolo ni Debata molo marningot pangalaosionta tu Debata. Alai mangasahon asi ni roha ni Debata na manobus dosanta, dipatau do hita gabe naposoNa laho pararathon barita na uli taringot haheheon ni Tuhan Jesus. Mangongku do si Paulus sebagai na ummetmet sian angka apostel, laos songon i do hita diajari gabe halak na serep marroha di jolo ni Debata dohot di jolo ni jolma. Di hasereponta i do hita gabe mampu laho manjalo pasupasu ni Debata.

h.                       Huria ni Tuhanta, ia ugamo ni halak Kristen ima ugamo haheheon, jala Jesus na hehe sian na mate i do naung mangolu nuaeng ro di saleleng ni lelengna, na mangalehon pos ni roha di angka sihirimon ni halak Kristen. Haheheon ni Jesus i do na manggohi sandok bagabaga ni Debata tu angka na porsea. Haheheon ni Jesus i do patumonaan ni haheheon sogot i.  Jesus naung hehe sian na mate, naung mangolu di ari patoluhon, i do ojahan ni huria ni Debata. Ndada ojak huria di Jesus na mate, alai tung di bagasan Jesus naung hehe sian na mate i do. Na tarjou do ganup halak na porsea di Jesus asa tongtong mian di bagasan haheheon. ni Jesus. Ingkon mian di bagasan haheheon ni Jesus i do saluhut panggulmiton (= ruang gerak) ni huria ni Debata. Dipatuduhon Jesus naung hehe i do dirina tu torop halak, jala patuduonna dope dirina marhite jamita dohot lan dalan na asing tu torop halak di portibi on. Amen.