Jamita Evangelium Minggu I Dung Epiphanias – 11 Januari 2026

JAHOWA MANOGU TANGANMU

Allah Menyatakan Keselamatan

Jesaya 42: 1 – 9

 

1. Huria ni Tuhanta na hinaholongan dibagasan Jesus Kristus. Nunga masuk hita tu Minggu Epiphanias. Masuk dope i di rangkaian Pesta Natal. Epiphanias marlapatan: hapapatar, penyataan, penampakan, membuat menjadi jelas. Marhite Epiphanias on ma dipapapar asa lam tangkas tatanda, ise do Tuhanta Jesus Kristus i. Marhite i ma lam mura hita mambuat haputusan taringot tu Jesus jala lam tangkas pangihutho-nonta di Ibana.

Sahalak salesman (penjual), patoranghon tu angka calon panuhor taringot tu produk na naeng gadisonna, tung tangkas dipaboa kegunaan, spesifikasi, cara mamake, halobian, dna ni produkna i. Tujuanna, asa tertarik halak laho manuhor jala ummura mambahen pilihan taringot tu produk i. Hira songon i ma di turpuk on. Songon na patandahon si Saul gabe raja (1 Sam. 9, 15-17), songon i ma dipatandahon Debata tu hita sada Figur, sada Halak naginoaranNa: Naposo ni Debata (Hamba Allah). Dilehon do Naposo ni Debata on laho patoguhon roha ni bangso Israel na di habuangan.

Ise do nidokna Naposo ni Debata i? Hea do diklaim donganta parugamo Silom, na martudutudu tu nabi nasida si Muhammad do on. Alai hira sude do penafsir mandok, ndang adong hadomuan ni turpuk on tusi. Adong do mandok, halak Israel do natinuduna. Na deba mandok si raja Koresy. Ndang apala tingkos sudena i. Molo boti, ise do nidokna "Naposo ni Debata on? Martudutudu do on tu Mesias naung nibagaba-gahon ni Debata, ima, Tuhan Jesus Kristus.

Hamu angka dongan! Dimulai Debata do hataNa dison dohot pandohan: Ida ma ... lihatlah! Sian hata "hen", marlapatan: "satutu nitutu na". Ndada holan mamereng manang mananda asal boti (sepintas lalu). Tetapi simak dengan sebaik-baiknya. Sedetil-detilnya. Tu aha i? Asa tangkas tatanda. Unang sala panandaonta, unang asal boti pananda-onta di Naposo ni Debata i.

Alani i, tangkas ma tasulingkit jala taparateatehon nidok ni turpuk on. Ai torop nuaeng jolma dohot ruasta na mananda Debata dohot Jesus "holan sekedar", holan di kulit luar. Bahkan ndang saotik na mananda holan sian sudut material. Holan sian pasupasu manang tanda halongangan binahenNa.

Nuaeng, ise ma huroha Naposo ni Debata i? Nunga nidok nangkin, ima Tuhanta Jesus. Sian dia ma i taboto? Na opat Injil i do paboahon, uju tardidi Tuhanta Jesus di aek Jordan, disuru Debata do TondiNa songgop tu Jesus jala didok Debata do: On do Anakku, Haholongan i; halomoan ni rohangku do Ibana! (Tumangkas, tajaha ma di Mateus 3, 16-17; Markus 1, 10-11; Lukas 3, 22; Johannes 1, 32-34). Di Mateus 12, 18, dikutip do ay. 14 on jala dihonahon tu Tuhanta Jesus. Ima patangkashon, Jesus Kristus do Naposo ni Debata on.

Hamu angka dongan! Aha ma ulaon ni Naposo ni Debata i? Tajaha ma ay. Ib, ay. 3b dohot 4b, ulaonNa ima manariashon uhum tu angka bangso parbegu (menyatakan hukum kepada bangsa-bangsa membawa keadilan bagi setiap bangsa). BIS:

1. Marlapatan do i, ia tugas ni Tuhanta Jesus ima patuduhon tu sandok jolma dalan (jalan hidup) nahinalomohon ni Debata, dalan na mamboan jolma tu haluaon. Ima naung pinasingkop ni Jesus marhite hamatean dohot haheheon nang hananekNa tu banuaginjang laho mangungkap dalan tu banuaginjang. I do ala barani Jesus mandok di Johannes 14, 6: Ahu do dalan i.... ndang adong na sahat tu Ama i ia so marhite sian Ahu". HataNa ma gabe pangajarion tu sude jolma asa ditanda jolma dalan na sintong asa sahat tu banuaginjang i.

Laos i ma nang tugasta, paboahon, patuduhon laos mangarahon sude jolma, bangso, houm, marga dohot inganan asa manjalo Dalan i jala mardalan di dalan ni Tuhan Jesus, asa sude malua jala tolhas tu banuaginjang i. Di jaman na lam maju on mansai torop dope angka na lilu i, asa ditanda jala dijangkon nasida Sipalua i, asa malua nasida. Tapake ma hamajuon ni tehnologi informasi komunikasi, dunia digital, media sosial, daring, virtual laho marbarita nauli. Tapahembang ma program digital mission/digital evangelism.

2. Sian ay. 2-3 dipapatar ma tu hita, Tuhanta Jesus ma Naposo ni Debata laho pasauthon sangkap haluaon ni Debata, mamboan panghirimon tu angka naung ginosagosa ni dosa dohot sibolis, laos mamboan hatiuron tu angka naung nilinggoman ni haholomon (ay. 6c; pat. Joh. 1, 4-5; Joh. 8, 12). Tung mansai lambok do i ditarias-hon, dipasahat tu jolma, so mamaksa manang ise. Sama sekali bukanlah dengan kekerasan. Jala sude nahinatahonNa i ndada mamonggolhon arung naung marosak manang mangintopi sumbu na marnehetnehet. Alai, dilului do jala lambok do panjouNa tu birubiru na lilu i, diubati jala dijangkon do mulak. Sude Hata ni Tuhan Jesus mamboan halambohon, haneangon, kelegaan tu sude angka naung mandele. Ai didok Jesus do: Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna (Mat. 11, 28-29).

Laos i ma siulaonta. Torop di lambungta angka na lilu, na mandele, na gale, na marsahit, na pogos, naung putus asa. Tung gabe naposo ni Debata ma hita, mangasahon hagogoon parsuruon ni Tuhanta Jesus laho manjou, mangarahon, patoguhon, menyemangati, memotivasi nasida asa hehe dibagasan las ni roha mangula angka ulaonna di dalan ni Tuhanta i. Tugasta ma gabe panondang (ay. 6c + 7c) laho mangusir angka haholomon na manghuphupi roha ni angka jolma nuaeng. Tarlobi di era Revolusi Industri generasi pao-pathon on. Tahamauliatehon do i nian songon pasupasu ni Debata. Alai mansai potensial do i mamboan hagolapon tu angka jolma molo so malo (bijak) manang so manat mangadopisa, na boi mambahen mintop haporseaon ni jolma. Disi ma hita ingkon ro manhaporseaon, dalan, pikiran ni sude jolma, asa dipake angka hamajuon i laho pasolhothon dirina tu haluaon na dibagasan Jesus i.

 

3. Jala di ay. 34 didok, ndang boi mansohot ulaon i saleleng so sude bangso manjalo uhum natinariashonNa i.Ndang boi mandele angka na porsea manariashon hasintongan i. Ingkon torus do ulahononta sahat tu haroro ni Tuhan Jesus paduahalihon. Ndang boi mandele, ndang jadi togang manang gongga. Apapun jangan pernah mengha-langi atau menunda kita melakukan tugas itu, termasuk penganiayaan atau penolakan. Gariada uju diboan hita tu paruhuman ala ni goar ni Jesus, ingkon pakeonta do i songon kesempatan sian Debata laho paboahon uhumNa i. Setiap keadaan, tempat dan waktu adalah kesempatan emas dari Tuhan untuk memberitakan Injil Kristus.

 

4. Jala di ay. 5 dilehon di hita kepastian, sian Debata do Tuhanta Jesus i. Gariada tahe, Debata do Ibana, naung rap dohot Debata manompa langit dohot tano on di mula ni mulana (Joh. 1, 1 ff). Haluaon nabinoan ni Tuhanta Jesus i, ima haluaon naung sinangkapan ni Debata sian mula ni mulana. Ala ni i, unang adong na ragu-ragu di hadirion ni Jesus i. Jala di ay. 8 didok, ndang dilehon Debata tu manang ise. Lapatanna, holan Jesus do dalan haluaon i (pat. Johannes 14, 6). Holan di Jesus do uhum hasintongan, ima haluaon i. Ndang dapot hita i di na asing.

5. Ingkon tarida do ulaon ni Naposo ni Tuhan i di realitas ni ngolu ni jolma. Ima nidokna di ay. 6c7, songon nidok ni Tuhanta Jesus di Lukas 4, 18-19. Dia ma i?

a. Di ay. 6b, ingkon gabe panondang ma hita tu angka na di haholomon, songon naung pinatorang nangkin.

b. Di ay. 7a, mamuha angka mata ni halak na mapitung. Parnidaan (penglihatan) do sada na rumingkot di hita, ai molo sega parni-daan, golap ma sude, ate! (pat. Mateus 6, 22). Ima na ingkon siurupan. Dipamalum Jesus do angka na mapitung, na martihas, na marsahit, naginosagosa ni sibolis. Ima tugasta nuaeng. Ima patupa ulaon diakonia sosial, dalanta mamaritahon barita nauli, tanda naung songgop harajaon ni Debata. Ndada holan nagajari, mangurupi nasida asa dipake angka hamajuon i laho patiurhonmapitung secara fisik, alai gumodang ma tu na buta rohani (mapitung di partondion), angka naung lilu, ala so siida be dalan hasintongan, ala nunga dipapitung sibolis dohot portibi on. Olo do mapitung ala ni parungkilon; alai boi do dipapitung arta, haulion, kerakusan, kenikmatan duniawi, dlna. Tung dohot ma hita gabe naposo ni Debata mangungkap simalolong ni tondina asa tiur diida dalan haluaon i.

 Antong, nunga dipapatar Debata be tu hita, naung ro NaposoNa dibagasan Tuhan Jesus mamaritahon uhum hasintongan, ima haluaon ni sandok bangso. Didok Topikta: JAHOWA MANOGU TANGANMU(Allah Menyatakan Keselamatan), dohot ma hita gabe naposoNa mamaritahon i tu sude jolma manogu angka torop jolma mananda holong ni Jesus i. Amen