Jamita Evangelium Minggu Dung Ari Natal – 29 Desember 2024

Mandok Mauliate  Siala Asi Ni Roha Ni Debata      

 (Mengucap SyukurAtas Kasih Karunia Allah)

1 Timoteus 1: 12-17   

 

 

1)     Huria nahinaholongan dibagasan Jesus Kristus, Mandok mauliate ima respon ni hta angka na porsea siala na tahilalahon denggan ni basaNa sudena. Angka haburjuonNa naeng tangkas tahamauliatehon sian nasa roha. Na nimaksud ni Ap.Paulus mandok mauliate dison ima hamauliateon ni roha siala naung nialaman dohot Tuhan i angka pambahenanNa ndang ala ni barita manang na nidok halak. Adong do nanihilalahon Ap.Paulus i sandiri ido na patoguhon haporseaonna. Sian sude angka panghobasionna, di arsak manang di las ni roha pe, sehat manang na marsahit pe sude do dihilalahon ibana siala panogunoguon ni Tuhan i ndang adong na marisuang.

Ido alana sai marlas niroha Ap.Paulus; las nirohana i na ro sian roha parbagasan na manogihon dohot patoguhon rohana di na laho mandalani ariari ni ngoluna, las ni roha i na mian nian di ganup angka halak na porsea. Angka na boi mandok mauliate ima angka na porsea i na tangkas mananda asi dohot holong ni roha ni Tuhan i dibagasan ngoluna. Adong pengalaman pribadi ni angka na porsea i raphon Tuhan i.

2)     Dibagasan turpuk on, mandok mauliate di si Paulus siala dihagaleon nang na terbatas ngoluna i, sai dilehon Tuhan dope hagogoon laho manghobasi ulaon na pinasahatNa. Molo marnida parngoluonna na uju i, ai ndang pantas ibana gabe naposo ni Tuhan i. Ai na uju i, halak na jahat do ibana, na olo mangaleai, manggosagosa halak Kristen. Dutangkup jala dibunu ibana angka siihuthon Kristus hatiha i. Marhite na mangasahon Patik mangogo do roha ni si Paulus na laho patigorhon uhum i. Alai ala asi ni roha ni Jesus Kristyus, dipillit do ibana gabe apostel jala gabe sisean ni Kristus i laho marbarita tu torop halak.

Mandok mauliate ma si Paulus sala asi ni roha na balga i na sian Tuhan i. Ai uhuman ma na pastina aeonna molo ala ni dosana i, jala sai marulakulak do didok ibana dirina pardosa godang. Ndang onding bohi ni Debata sian si Paulus, dipatarehon do tanganNa i tu si Paulus jala manghindat ibana sian gambo lisop ni dosa i.

3)     Huria ni Tuhanta , molo tarimangrimang i parngoluon ni si Paulus on songon parngoluonta, ise ma hita diadopan ni Tuhan i? Barani do hita mandok na boi hita manghobasi Tuhan i siala ni halobianta, hagogoonta, habadiaonta nang haburjuonta? Tontu ndang i. Ndang na i sude dibereng Debata. Dipillit Debata do halakNa na tonodoNa na gabe ulaulaNa di sangkapNa. Molo sian standar ni habadiaon do ndang tama si Paulus sipilliton. Marlas ni roha ma hita naung dipillit jala dihaporseai laho mangulahon panghobasion ni Tuhan i. Saluhutna i ndang ala nihagogonta alai ala ni asi ni roha ni Tuhanta sambing do i.

4)     Songon naung mardalan angka pesta Natal di hurianta, di lunggu, di STM, di keluarga, sai gok las niroha ma hita disi. Asa tangkas ma parningota ari hatutubu ni Jesus i manghorhon hamauliateon ni rohanta tu Tuhanta na mangalehon dalan haluaon di hita jolma pardosa on. Ala ni i mandok mauliate ma hita ala naung dihuphupi dosanta, ala naung disesa Jesus dosanta, ala naung dipatama hita gabe anakhonNa. Amen 

Jamita Natal II, 26 Desember 2024

“Nunga Dipabotohon Jahowa Haluaon Tu Hita”

Psalmen 98: 1 -9

 

A. Patujolo

Ia turpukta on ima na manghalashon haluaon bolon marhite ende pujipujian, ima songon alus ni haporseaon nijolma i dung dibolus angka na masa i. Nunga mulak tangke tu songkina, nunga mulak bangso i sian tano habuangan Babel, sumuang tu tanona hian, Kanaan. Ai mamungka sian taon 586 sM tartaban do nasida tu huta Babel hirahira 70 taon lelengna. Ai uju i dipapatu raja Nebukadnesar na tarbarita i do bangso i. Disurbu huhut di lengsehon do huta Jerusalem, songon i nang bagasjoro i, diboan jala ditaban mardongan rante do angka uluan dohot pomparan, panungganei dohot bisuk nibangso, so adong n atading pangisi ni Jerusalem, asing ni angka na suda gogo na so margellok. Nian, diparhatopot bangso i do, uhum ni Debata do na masa nasailaon, hombar tu hata panurirangon na pinasahat ni angka na poso ni Debata (isarana; deutrao jesaya, jeremia nang Hesekiel). Nunga salpu be angka gora dohot sitaonon ni bangso i. Ala ni disosohon parpsalm i ma asa marolopolop huhut marsuraksurak nasida mamuji haluaon na pinatupa ni Debata, marhite ende pujipujian nang angka uninguningan pe.

 

B. Hatorangan

Panandaon na tangkas di Debata jahowa mambahen ungkap ni roha parpsalmen on mangendehon Jahowa. Mansai godang do angka na binahen ni Debata Jahowa dipardalanan ni ngolu ni parpsalmen on nang dibagasan ngolunta. Angka dia ma i ? ima :

1)     “Mangendehon ende na imbaru” (ay.1a). Pandohan “na imbaru” martudutudu do i tu pengalaman/panghilalaan na imbaru do tongtong pambahenan ni Debata di bangsona. Taendehon ma ende na imbaru ala nunga tajanghon Jahowa na patupahon halongangan dohot manumpahi ngolunta. Ditumpahi Ibana do sude ulaonta jala lobi sian na tinagam jala tapingkiri. Ende n aimbaru ndada pola martudutudu i tu “gubahan baru” alai ende na imbaru boi patupaonta molo tajanghon Debata mangaraja i ngolunta. Molo tapaloas Debata manguluhon ngolunta asa dapot hita ma angka inspirasi na kreatif jala na imbaru mandongani ngolunta.  

2)     “Nunga dipambahen Ibana angka halongangan” (ay.1b). Mansai godang do nabinahen ni Debata angka halongangan di portibi on. Ditogutogu do manisia i asa unang marmara. Dung madabu jolma na parjolo di tu bagasan dosa, dilehon Debata do bagabaga ni Debata di haroro ni Sipalua i, ima hatutubu ni Jesus Kristus tu portibi on. Sahat tu na manaon hau pinarsilang i, mate do Jesus jala hehe muse di ari patoluhon laho manghamonanghon hita jolma pardosa on.

3)     “Nunga ditumpahi siamunNa i” (ay.1c). Tung  na gogo do tangan ni Debata. Dipalua do Israel sian parhatobanon Misir marhite tangan na gogo. Molo adong na mangambati sikapNa i, tanganNa na gogo i do manaluhon, mangaropuhi. Laos tanganna na gogo i do manoro, mangarampas, dohot paluahon hita sian tangan ni sibolis. Gariada tahe, didok di Kolose 2: 15 “Dipupusi do angka hamuliaon dohot panggomgomion, patar do dipatotondurhon nasida, dipaebangkon do nasida na talu i.” Jala nuaeng, hasosorang ni Sipalua i ima Jesus Kristus i mangalehon dalan haluaon tu hita jolma pardosa i.

4)     “Nunga dipabotohon hatuaonNa”(ay.2a). Hatuaonta las ni rohanta holan dibagasan Jesus Kristus naung tubu i. Dibagasan Ibana halauonta, ndada marhite pambahenannta, manang marhite patik, holan dibagasan Jesus Kristus do dalan hangoluanta na manongtong i. Sada do tanganta manjalo i, ima tangan haporseaon. Ima tanda ni asi n roha (kasih setia-khesed) ni Debata. Ido na ingkon endehonon ni sdue hita, ima ala na olo Debata mangalehon haluaon na songon i di hita. Ai soada na songon i di ugamo na asing. Angka naung manjala, manjanghon jala mandai haluaon dibagasan Jesus Kristus i sai tongtong ma rohana mamujimuji jala mangendehon Debata Jahowa.

5)     “luhut ujung ni portibi on” (ay.2b-3). Ia haluaon i ndada holan tu Israel, alai dohot do tu angka parbegu, ndada lokal alai universal. Nunga sahat tu bangso Batak, pola nunga lobi 163 taon, jala sahat tu angka bangso parbegu di liat portibi on naung manjalo Jesus Kristus i gabe sipaluana.

6)     “Mangolophon Jahowa” (ay.4-8). Boha do mangolophon dohot mangendehon Jahowa ? ragam do jala marmansam; boi do marhite soara na hohom manghuling di roha; alai boi do marhite soara na marsurak; boi do marhite na marende; marhite na mamalu angka uninguningan (alat-lat musik) na marragam (arbab, sarune). Alai ndang holan jolma, ingkon sandok tano on do. Marhite soarana diendehon angka pidong do Jahowa, angka laut marhite pardoromna, angka alogo marhite pangombusna, dohot na asing. Sandok portibi on tahe ingkon gabe pentas kemuliaan (gloria theatron) di Jahowa. Asa, ndang holan sada ragam dalan mangendehon Jahowa. Ingkon paloasonta dohot heheanta do angka kreativitas ni sude ruas (na metmet sahat tu na matua) laho mengekspresikan pamujionna di Jahowa. Holan i tutu, ndang sai ingkon di sude inganan dohot partingkian i; adong be ma angka partingkian na tontu tu angka i.

7)     “Na ro do Ibana muse manguhum saluhut bangso” (ay.9). Ndang adong tung sada sian jolma dohot sian na tinompa i na boi luput (malua) sian paruhuman ni Debatanta i. Alai, diboto hamu do ise na manontuhon disi? Holan Tuhan Jesus do. Ibana do sitiop anak hinsu ni banuatoru (Pangk.1:18). Bolan Ibana do na layak mamuha buku hangoluan i (Pangk.5:5ff). Ai Ibana do Birubiru i na mandok: :Na tama do Ho manjalo buku i jala mangungkap angka sahapna, ai naung tarbunu do Ho jala marhitehite mudarmu ditobus Ho do tu Debata jolma sian saluhut marga, hata, houm dohot bangso” (pangk.5:9). Ndang arta manang hamoraon manang hasangapon ni jolma. Holan Tuhan Jesus Kristus do. Ala ni i, dohot ma hita mangendehon ende na imbaru di Ibana.

 

C. Sipahusorhusoron.

Naeng enetonta ‘pesan teologi’ niturpuk on marhite topik ni minggunta Pesta Natal II-hon on mandok: “Nunga Dipabotohon Jahowa Haluaon Tu Hita” ima hasosorang Sipalua i, ima Jesus Kristus i. Gumodang ma taparrohahon angka na masa di humaliang huhut itabilangbilangi jala italapati anggiat taida pangulaon ni Debata paluahon hita sian ragam ni hamagoan. Laho patulushon i itapaumbuk ma pesan teolohi na hinangham ni turpuk on tu panghaporseaonta di pangulaon ni Debata:

1)     Mangendehon haluaon na pinatupa ni Debata. Halongangan bolon do ngolunta sian ari tu ari. Ai hira so mansohot do angka mara na sonson di portibi on. Didok na pistar, molo lam godang hita marende, dilehon i do di hita godang manfaat. Lam timbo do intelektualitas ni angka na malo marmusik. Pintor sonang do roha, mago arsak molo dung binege ende na uli, tarlobi molo marende. Tamba do semangat molo karejo hita huhut marende (songon angka tentara). Musik adalah bahasa dunia, na boi pasadahon portibi na marmansammansam on. Marhite musik do ummura hita pasahathon angka ide-ide manang mangapil sesuatu (isarana goar goar ni buku Bibel i, manang maretong tu angka dakdanak).

2)     Pangiar soaram mamuji hasintongan ni Debata. Angka na mamuji Debata ima na manada Debata dohot pasupasuNa. Hitunglah berkat Tuhan yang baru, naung tajalo ganup ari, ima na mandorong hita asa mangendehon ende na imbaru siganup ari. Ala ni i godang ma hita marende, andorang so diorai manang andorang boi dope hita marende (bernyanyilah sebelum bernyanyi itu dilarang, atau sebelum anda tidak bisa lagi bernyanyi). Rumang ni pamujion i manggombarhon “suasana pesta”, adong soara ni ogung, arbab, sarune, dna, ndang “suasana hikmat”. Atik na ringkot nama pareahanta angka rumang ni pamujionta na “lebih meriah” angkup ni na adong hian, ima na “hohom”, “hikmat.” Nian, ndang apa di rumang parduruna manontuhonsa, alai nang pe songon i tongtong adong pangontak ni rumang parduru dohot parbagasan, ai si sada hasadaon do i.

3)     Marhite Pesta Parningotan Hatutubu ni Tuhanta Jesus Kristus na paduahon on (Natal II) lam las ma rohanta mamuji muji Debata. Ditogutogu panindangion ni parpsalmen on do hita asa itahangoluhon ende na imbaru di Debata tu sandok na tinompa. Ima pamujion na patujolohon panandaon, pangokuon di haluaon na pinatupa ni Debata di ngolunta sandiri sinuaeng. Laos huhut do itahangoluhon ma unok ni haporseaon na mandok: Paluaon ni Debata do hita sian ragam ni hasusaan. Malua sian parhatobanon ni na deba nang dosa ai nunga ro Tuhan Jesus manaluhon dosa i. Amen. (Pdt.Ebenezer Munthe, M.Th)

Jamita Evangelium Natal I, 25 Desember 2024

Manomba Jesus Anak Ni Debata

(Menyembah Yesus Anak Allah) 

Hener 1: 5-12

==============================

 

1. Huria ni Tuhanta dibagasan Jesus Kristus, ia panurat Heber on na naeng patoranghon tu hita ia Jesus ima Anak ni Debata na marhuaso manjanghon nasa na adong. Marhite on na patuduhon ia Jesus Kristus i na marhuaso doshon Debata Ama i. Jala taingot ma na nidok Jesus di Mateus 11: 27 7 Saluhutna i, nunga dipasahat Damang tu Ahu; asa ndang adong na tumanda Anak i dungkon ni Ama i; Ama i pe, ndang adong na tumanda i, ia so holan Anak i, angkup ni na pinodaan ni Anak i, mangihuthon lomo ni rohana.
2. Jala di Mateus 28: 18 - Dung i didapothon Jesus ma nasida, didok ma: Nunga sahat tu Ahu nasa huaso na di banua ginjang dohot na di tano on.Di pangantusion ni halak Jahudi holan Debata do na marhuaso di surgo dohot di portibi on, ndang adong na asing na boi dipatudoshon dohot Debata i.
3. Dipatorang panurat buku on do muse ia Debata na marmahani bangso Israel bungkas sian Misir tu tano Kanaan, laos songon i do Jesus na marmahani nasida dipardalanan ni hpaorseaon nasida. (ptds. 13:6,8). Jesus do panondang hamuliaon ni Debata jala gombaran ni Debata na manuhuk saluhut nasa na adong, HataNa na gok huaso. Marhite pandohan di ay.3 songon sillam dohot suman di hadirionNa na paboahon ia Jesus sada sian haataran ni Debata na so tarida i (ptds. Joh.14: 9; Kol.1:19). Aing ni i adong do huaso ni Jesus na mansai balga na dosohon dohot Debata Ama i. Dituhuk Ibana do sude marhite hataNa na gok huaso. Sian i sahat ma hita na mangantusi taringot tu panompaon, na ditompa Debata do langit dohot tano on marhite HataNa asa saluhut na hita diarahon laho marnida Jesus na gok huaso i.
4. Godang do parsorionta songon jolma hita di portibi on, ala ni i diarahon panurat on do hita asa mananda ise do Jesus Kristus i dibagasan ngolunta. Molo tajaha di Hebere 1: 1 – 3 Ibana ma na manompa,  panean, pasingkophon, panggomgomi ni hangoluan, sillam ni hamuliaon ni Debata. Diburi Ibana do dosa ni manisia na hundul disiamun ni Debata.
5. Hasangapon ni Jesus na dumao timbona sian salauhut surusuruan, na paboahon, dumao timbona, dohot ulina. Asa sirangonta do parasingan ni surusuruan dohot Kristus i.ima:

1)      Na ditompa do surusuruan i, Jesus dohot do Panompa. Jolma ditompa songon tondi na diborhon dohot daging, alai surusuruan i  na ditompa songon tondi na polin so pola mardaging. Molo binatang na ditompa dohot daging jala martondi alai ndang adong tiruan sian Debata.

2)      Halak Israel porsea, ia surusuruan i ima na manggulmit na jonok dohot Debata, alai Jesus Kristus ndangna jumonok dohot Debata, alai Iaban do Debata, oknum napaduahon sian Debata Sitolusada.

3)      Surusuruan didok do angka anak ni Debata,alai Jesus Kristus ima Anak sasada ni Debata. Nang di Buku 1 Musa nang di Buku ni si Job dipaboa do angka surusuruan i angka anak ni Debata, alai ia Jesus Kristus ima Anak sasada Debata na ro sian Debata. Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana (Joh.3:16). Jadi hak istimewa na asong di Jesus na so dapot hita di angka surusuruan i.

4)      Angka surusuruan i do digoari na manghobasi angka parangan na badia  ni Tuhan Debata, alai Krisus do Raja ni saluhut surusuruan i. Angka surusuruan i na berfungsi balga laho manghaliangi harajaon ni Debata huhut marsoara, nabadia, nabadia, nabadia huhut marsialusalusan (Jes.6: 1 – 6).

5)      Surusuruan ima eksekutor ni panguhuman ni Debata marhite prinsip ni hatigoran dohot hasintongan,alai Kristus i sandiri do hasintongan dohot hatigoran ni Debata.

E. Refleksi

1)      Ia angka surusuruan i ima pardisurgo na ditompa Debata na mangula laho manghobasi di HarajaonNa. Ndang adong na istimmewa na dilehon Debata tu nasida, ia so songon parangan na ditugashon laho manghobasi asa ndang mangalobii hajongjonganna sian Kristus i sandiri na gabe Anak ni Debata sandiri.

2)      Tungkot Harajaon ni Debata ima tungkot ni hasintongan na gok hatigoran dohot huaso na so marbatas dilehon Debata marhite Jesus Kristus, na patuduhon ia pamarentaon ni Kristus sai tongtong do dibagasan dame dohot las ni roha. Manang ise pana dibagasan huasoNa sai dapotan hatigoran dohot hasintongan do, siala harajaonNa i mangatasi angka hajahaton.

3)      Huria na sai manghajongjonghon Harajaon ni Debata ditonga ni portibi on sai marsiajar sian dasor ni harajaon ni Kristus. Harajaon na patujolohon hatigoran dohot hasintongan, ndang adong na papeol uhum disi dinalaho mangulahon angka tugas dohot tanggung jawab. Tungkot ni HarajaonNa ima tungkot hasintongan na marmusuu tu hageduhon nang angka na so tigor na maralo tu parange na ginjang roha, egois, na mangulahon korupso dohot nepotisme na so saurdot dohot lomo ni roha ni Debata.

4)      Tu hita na porsea dilehon do huaso ni Kristus i, asa unang ma tapergunahon tu angka na so marlapatan, manang holan mangahut tu diri, pamorahon diri, mangangkupi halak, mongkus dihuaso di huria, manang jabatan pemerintahan dohot na asing. Molo nunga adong huaso ni Kristus i, asa mangula jala marpangalaho songon Kristus i ma hita, na mangula angka ulaon na bertanggungjawab, na satia, marsitutu mangulahon na denggan. Tasomba ma Jesus naung sorang i marhite ulaon na hombar tu HataNa. Amen.

Jamita Evangelium, Parpunguan Bodari, 24 Desember 2024

HALALAS NI ROHA GODANG TU SALUHUT BANGSO 

(Lukas 2:8-14)

==============================

 

1. Huria ni Tuhanta dibagasan Jesus Kristus, Sadari on las ni rohanta mamestahon ari parningotan hatutubu ni Jesus Kristus Sipalua i. HasosorangNa tu portibi on mamboan las ni roha bolon tu angka surusuruan, pardisurgo, angka parmahan, angka halak majusi nang hita slauhutna siihuthon Ibana.

Marhite Topik naung sahat tu hita paboa: Halalas ni roha godang tu saluhut bangso” paboa las ni roha ala hasosorang ni Jesus Kristus i 2024 taon na salpu di portibi o di huta Betlehem. Dibaritahon surusuruan i do paboa “Sadari on nunga tubu Sipalua i,ima Jesus Kristus di huta ni si Daud”. Lapatan ni “sadari on” ima:

1)      Asa namasa hatutubu ni Jesu si ndada holan na masa di hatiha i alai sahat tu partingkian sisaonnari on pe hot do pe hasosorangNa i. Jesus na sorang i ndada di na uju i, alai, dipartingki an on ro do Ibana tu parngoluonta.

2)      Hasosorang ni Jesus mansai ringkot situtu tapestahon siganup ari. Boi do tadok holan di Bulan Desember ma tapestahon. Alai unang lupa hita parngoluontya dohot Jesus Kristus i ndada holan dibagasan pesta nataldi Bulan Desember i alai sai tongtong ma tapestahon siala “sadari on” naung sorang Jesus i di rohanta, di panghataionta, diparangeta, di panggulmiton ni ngolunta ganup marsadasada.

3)      Hasosorangg ni Jesus i ndang mansohot di uju i sambing. Pangantusion ia Jesus na sorang i na uju i boi do mambahen husaoNa i holan di na uju i sambing. Hape Jesus naung sornag 2024 taon salpu hot do di pamingkiron, dipoda, nang hatana i mangolu jala marhuaso sadari on., asa molo mangatusi huaso na holan na uju i do , boi gabe kecewa hita, jala ndang maju be haKristenonta. Asa manganatusi Jesus di partingkian on, sadari on, ima na mambahen hita maju mangalangka manandinghon ngolu na robi mandapothon ngolu na dibagasan Jesus Kristus.

 

B. Barita las ni roha na gabe partingkian na mansai ringkot diparngoluon ni angka parmahan i, jala laos barita las ni roha nang barita na uli na gabe pangkirimon tu saluhut bangso nang saluhut manisia di portibi on. Ala ni i didok dibagasan turpuk on “unang ho mabiar, ai barita halalas ni roha godang do na hubaritahon tu saluhut bangso”(ay.10). Na gabe sungkunsungkun, tu ise do Jesus sorang? Didok Lukas di turpuk on; sadari on naung sorang dihamu, pandohan “di hamu” ima na martudu tu angka halak na langsung manghilalahon na masa i, ima:

1)      Tu natorsNa ima si Josep dohot si Maria, nang pe natoras ni Jesus nasida nadua, ala ringkot do di nasida Jesus i dibagasan ngoluna. Dohot do tu angka parmahan, na sorang do Jesus di tonga ni angka parmahan na mangula hatiha di laho manjaga angka dorbiana. Angka parmahan i mangharingkothon Sipalua, asa sorang di tonga nasida.

2)      Patuduhon tu angka na so terlibat secara langsung di na masa i, angka ise ma nasida ? ima angka jolma na di Padan na rob ii, na so rnag do Jesus di halak Jahudi naung adong andorang sorang Jesus i. Naung monding do nasida di ragam na masa, asa dohot do tu nasida Jesus sorang, ai ringkot do di nasida Sipalua i, ima Jesus Kristus i. Jala ala pinompar ni si Daud do Ibana.

3)      Tu saluhut bangso, na sorang do Jesus tu saluhut bangso, na marlapatan angka bangso i mangharingkothon Jesus Sipalua i. Asa andorang so manaek Jesus tu Banuaginjang, dipasahat Ibana do tona: “Laho ma hamu podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia!

3)(Mat.28:19).

4)      Tu saluhut jolma pardosa. Sian na tarsurat di bibelta i paboahon naung madabu tubagasan dosa do jolma i. Rom 3: 23 Ai ndang adong imbar ni i: Tung saluhut do nasida mardosa jala ndang dapot pujion ni Debata nasida.

4)Ala ni i sorang Jesus tu saluhut jolma pardosa. Ise ma sian hita na so mardosa ? saluht do mardosa, ndang na ro Jesus tu na so mardosa.

c. Hatutubu ni Jesus ima Sipalua i dihata Indonesi “Juruselamat” na sorang do dihamus adari on Sipalua i (Juruselamat), siala dipalua do hita sian: uhuman ni dosa, sian huaso ni dosa, siam pangalaho dosa. Ibana ma Tuhan na marhuaso di portibi on dohot di surgo i dohot di banuatoru (Mat.28:18). Nunga ro si parmonang i, las ma rohanta. Songon topik na sahat tu hita: “Halalas Ni roha tu saluhut Bangso”. Na monang do hita marhite Jesus Kristus na sorang i, ala monang hita maralohon sibolis i las ma rohanta, soang ma rohanta. Halals ni roha godang i ala naung sorang Kristus di bagasta be, diluatta nang di bangsonta. Tapasahat ma halalas ni roha godang i naung tubu Kristus i tu saluhut portibi on. Selamat Ari Natal.Amen.