Jamita Minggu PASKAH I - 31 Maret 2024

MARLAS NI ROHA MIDA HATUAONNA I   

 (Bersukacita Karena Keselamatan)

Jesaya 25: 6 – 9   

 

a)      Ditinga bonagso Israel, ia si Jesaya on tarbarita do songon sahalak panurirang bolon sian angka panurirag na di Padan na Robi. Digoari do ibana “pidong rajawali ditonga ni angka panurirang”. Sian parhataanna pe mansai bidang jala ndang pola maol ibana laho mangkritik angka dosa ni panggomgomi na berperan besar di tonga ni bangso i laho mangulahon dosa na dos pangalahona. Udut ni i ma muse, pandohanna mansai polin jala boi antusan ni saluhut jolma manang sian horong dia pe i. A;ai ndang holan panrhataanna na polin jala tangkas, alai parbinotoanna di Hata ni Debata mansai bidang. Na ro do si Jesaya dohot konsep na imbaru, na mangalo parngoluon ni parugamaon ni bangso Israel na mamereng holan tu dirina sambing na gabe marnampuna padan haluaon i, asa nasida mamereng bangso sileban i ima sipelebegu na ingkon uhuman ni Debata jala disiaphon. Asa marhite i ma si Jesaya mamuha simalolong nasida ia haluaon i na parjolo dipasahat tu bangso Israel i, alai di na mangihut muse haluaon i ingkon sahat ma tu saluhut bangso jala gabe tu saluhut jolma. Hapataran ni Debata ndada holan tu bangso Israel, alai dohot do gabe Debata ni saluhut angka bangso.

b)      Ia turpukta on ima na masuk tu horong I ( 1- 39) na paboahon barita na so uli iama panguhuman na naeng ro siala Bangso Israel na so mangulahon hatigoran di sude uhum dohot angka patik ni Debata siala manomba dohot mamelehon dohot manomba tu angka debata sileban. N masa ma panguhuman i siala naung hansit roha ni Tuhan i. Jala dalan ni Debata manguhum Israel ima manjou angka bangso sileban laho mangalengsehon Bangso israel, nang na sian utara nang sian selatan pe. Nang pe songon i,  sai mulak do roha ni Debata mangorom sangkapNa molo mulak bangso i tu Debata jala marhamubaon ni roha. Siala ni i na boi talapati sian turpuk on ima molo tajaha sian Buku 2 Rajaraja 20: 1 – 11 ima konteks ni turpukta Jesaya 25: 6-9. Uju ro Bangso Asyur manaban bangso Israel Utara gabe mabiar ma angka jolma na di bangso Israel selatan tarlumobi uju ro Raja Sanherib tu Israel Selatan mandobo huta Jerusalem. Asa malua bangso Israel Selatan sian halelengse i songon Bangso siarel Utara, ala ni ima Raja Hizkia na sian Harajaon Jehuda (Israel Selatan) manggarar guguan tu Asyur 300 talenta perak dohot 30 talenta sere; jala dibuat si Hiskia sude perak na sian Bagasjoro ni Debata dohot sian parartaon ni Bagas ni Raja jala diputihi do angka sere na di pintu na Bagas Joro ni Debata ( 2 Rajaraja 18: 13 – 16). Na binuat ni si Hiskia mansai arga jala jaloona ma uhuman. Ala naung digadehon ibana do hasangapon ni bangso Israel jala mangaleai habadiaon ni Debata.

c)      Ia taboto do 1 talenta dos do argana tu 3000 syikal manang adong ma i 34 kg. Lapatanna, digarar si Hiskia do hademahon na so hot, ima arga 10.200 kg perak (= 10,2 ton) dohot 1.020 kg sere (= 1,02 ton) manang 1.020.000 gram. Jala molo diargahon di hepeng, 1 talenta dos do i tu 6.000 dinar jala 1 dinar dos do i tu upa ni parkarejo 1 ari (Mat.20:2). Molo taparetonghon tu arga ni perak sajo ? Molo upa ni parkarejo parsadarian nuaeng on Rp.150.000/ hari, taetong ma (10.200 kg)= 10.200.000 gram x Rp.1.141.000/gram= Rp.11.638.200.000.000 (sebelas triliun enam ratus tiga puluh delapan milyar dua ratus juta) ipe holan perak, ndang dope sere na boi lobi sian i dope halihalina. Molo nuaeng arga ni sere 1 gram : Rp.1.249.000,-/gram x 1.020 kg ( 1.020.000 gram): Rp.1.273.980.000.000,- ( satu triliun dua ratus tujuh puluh tiga milyar sembilan ratus delapan puluh juta rupiah). Pungu sude Rp.12.912.180.000.000 ( dua belas triliun sembilan ratus dua belas milyar seratus delapan puluh juta rupiah). Mansai balga do argana i, ido alana diuhum Debata si Hiskia gabe marsahit jala disuru Debata do panurirang Jesaya laho pasahathon ia ngoluna tinggal sadari nari nama. Mambege i, dipaeleng si Hiskia ma bohina tu dinding, jala martangiang ma ibana dohot tumatangis. Disolsoli si Hiskia do hasalaanna jala dipangido do asi ni roha ni Debata. On ma sada pangalaho na mansai borat situtu adopan ni sasahalak na patuduhon panolsolion ni roha jala marhamubaon ni roha. Ndang tolapna mangadop tu langit dohot habadiaon ni Tuhan i siala diboto ibana do hasalaanna, mansai balga pangalaosionna i.

d)      Molo songon i do panolsolion ni si Hiskia marhite tangiang dohot iluilu asa gabe ro ma asi ni roha ni Tuhan i jala paluahon ibana, jala boi do masa songon i dibagasan ngolunta. Molo tasolosoli sude angka dosa pangalaosionta i sai lehonon ni Tuhan i do asi ni rohaNa  tu hita asa malua hita.  

e)      Janji dari Yesaya 25:8 ini adalah kematian ditelan. Dalam terjemahan LAI teks ini menyebutkan bahwa Tuhan akan meniadakan, melenyapkan, dan menghapuskan kematian. Dalam terjemahan aslinya, teks ini menyebutkan bahwa kemenangan akan membungkus, menelan, dan menghayutkan kematian. Ini merupakan janji yang besar, yang menjadi pangkal iman Kristen melalui kebangkitan Yesus Kristus yang menjadi fakta di dalam sejarah. Tuhan tidak hanya melakukan pemulihan hubungan antara anda dengan diriNya, tetapi Ia juga akan bertindak melembutkan hati semua orang yang bermaksud jahat terhadap anda. Dan ketika hal seperti ini menjadi realita dalam kehidupan, maka kita akan berkata, sungguh benar firman Tuhan: "Ia akan meniadakan maut untuk seterusnya, dan Tuhan Allah akan menghapuskan airmata dari pada segala muka; dan aib umatNya akan dijauhkanNya dari seluruh bumi, sebab Tuhan telah mengatakannya. Pada waktu itu orang akan berkata: sesungguhnya inilah Allah kita, yang kita nanti-nantikan, supaya kita diselamatkan. Inilah Tuhan yang kita nanti-nantikan; marilah kita bersorak-sorak dan bersukacita oleh karena keselamatan yang diadakanNya". Marlas ni roha ma hita mida hatuaonna i. Amen.

Jamita Jumat Agung - 29 Maret 2024

Dibungka Jesus Do DI Hita Dalan na Imbaru  

 (Yesus Membuka Jalan Yang Baru Dan Yang Hidup)

Heber 10: 16 – 25  

 

a)      Dihita nahinaholongan sian najolo sahat di partingkian on sai luluan ni jolma do patupa angka na ummuli jala na dumenggan boha do asa singkop. Manang di angka materi nang angka ulaon na pinatupana hasingkopon i do na sai dilojongi jolma. Alai di portibi on ndang adong na singkop holan Tuhanta i do na boi paradehon na singkop na sempurna di ngolunta. Jala ido na pinatorang panurat Heber on pelean na pinelehon ni Jesus ndang adong boi dipatudos tu pelean ni angka binatang na pinelehon ni angka malim.

b)      Jesus Kristus mamelehon diriNa holan sahali i do laho manesa sude dosa ni jolma jala hot ro di saleleng ni lelengna (10:12,14). Alai angka pelean na sian angka binatang na pinamasa ni angka malim na pinatupa siganup ari jala marulakloni hape so boi manesa dosa (10:11) alai holan laho paingothon jolma do do angka dosa-dosana. Boasa holan Jesus do pelean na tama ? Naparjolo, siala Jesus do Anak ni Debata- Anak na manongtong. Songon asa Anak ni Debata, ima na patuduhon haunduhonNa tu Ama i marhite hasereponNa manaon na porsuk i pola sahat tu na mate di hau pinarsilang songon sada pelean hasesaan ni dosa (Joh.18-19). Songon Anak ni Debata, na partimbo do Jesus asa sian nasa panurirang di Padan na robi. Jala tumimbo sian angka surusuruan manang si Musa i pe. Alai gabe pangoloi do Ibana tu Ama i na gabe pelean hasesaan ni dosa. Napaduahon, Ala Jesus ima Malim Bolon na tumimbo sian angka malim na adong di Padan na Robi (ay.21), marhite Jesus halak na porsea di Ibana dipalua sian dosa dohot sian habiaranna di hamatean. Songon sahalak malim Bolon, dilehon Jesus do haluaon tu sude jolma na so boi lehonon marhite angka ulaon pelean adat manang aha pe ditongatonga ni halak Jahudi. Angka na binahen nasida pelean di ruhut hajahudion nasida holan gombaran sambing do i di haluaon i.

c)      Sadari on tataringoti do Haluaon na pinatupa ni Debata na singkop dibagasan hamatean niKristus di hau pinarsilang i. Di hasatiaonNa dohot haunduhonNa di Ama i, sai burju do Ibana mamorsan silang i. Sian on boi do manggora roha nang haporseaonta asa tatiru sikap ni Jesus na sai satia jala unduk di Debata nang pe ingkon bolusonta angka hamaolon dohot panaritaan na boi siadopanta. Jala di sadari on do tataringoti haburjuon nang asi ni roha ni Debata na BALGA i tu saluhut jolma ndada holan tu halak Kristen alai dohot nang di duruni ha Kristenon i, jala na manghosomi halak Kristen i pe, rela do Tuhanta i tu angka na di huria dohot tu angka na tarhurung, tu na mora tu halak na pogos. BALGA tutu pambahenan ni Tuhanta i asa marhite parningotan on manjou hita jala manosoi hita laho manghaholongi jala patupahon na denggan tu saluhut jolma (ay.24).

d)     Domu tu parningotan Ari hamamate ni Tuhanta Jesus on: dibuha Jesus do di hita dalan na imbaru, na ingkon sibolusonta asa marlas ni roha hita mandalanisa. Laos di partingkian on do tangkas jaloonta Sakramen Ulaon Nabadia. Taihuthon ma dibagasan roha na polin jala mandok mauliate di haluaon na singkop i na binasabasahonNa tu hita. Tapangan ma roti i na paboahon na olo hita manganton daging ni Kristus, tajanghon panobusion ni dosanta na sian Ibana. Tainum ma anggur i paboa na olo hita manginum mudar ni Kristus parhitean ni hasesaan ni dosanta. Amen.

Jamita Minggu Palmarum (Maremare) 24 Maret 2024

Ida Ma Na Ro Ma Rajami Manopot Ho

 (Lihat Rajamu  Datang Kepadamu)

Mateus 21: 1 - 11

 

 

a)      Hamuna angka dongan nahinaholongan, ia turpukta on ima manaringoti pardalanan ni Tuhanta Jesus Kristus bongot tu Jerusalem. Alai diujungna gabe di parsilanghon do Ibana, mate, jala hehe sian hamatean. Dina bongot i Jesus tu Jerusalem diihuti angka halak na marendeende mamuji dohot mangolophon Ibana songon Raja Hadameon. Andorang mamasuhi Jerusalem, mansai bahat do na ginuruhon ni Jesus saleleng dipardalanan sian Galilea. Mansai godang do angka halongangan, songon na pamalum na marsahit, pahehe na mate jala mangalehon marribu halak mangan; Jala jamitaNa pe marhahonaan tu Harajaon ni Debata jala ringkotna i na masihaholongan.

b)      Pardalanan tu Jerusalem; dungkon sahat tu huta Betfage, disosoi Jesus do dua siseanNa laho mangalului sada halode dohot anakna na tarihot disi. Dung dapot na dua siseann i halode i, diboan ma halode dohot anakna i tu Jesus. Dungi dihunduli Jesus ma tu atas halode i jala mamuhai mardalani tu Jerusalem. Pardalanan i diihuthon angka sisean ni Jesus dohot bahat jolma na manhatindanghon na masa i. Dipardalanan i godang do angka jolma na mangihuthon Jesus paradehon angka abit nang angka bulung ni hau palma di dalan i songon tanda penghormatan nasida tu Jesus. Laos diendehon nasida do angka ende pujian huhut marsuraksurak mangolophon haroro ni Jesus. Pardalanan tu Jerusalem mansai ringkot do di Jesus siala diboto Ibana do tingkiNa laho manggohi na dipadanhon Debata. Marhite namasa on huhut do naeng lehonon ni Jesus pangajarion dohot patupa halongangan, songon na pamalum namarsahit dohot na mangalehon mangan godang halak. Dibagasan pardalanan i pe godang do diadopi Ibana angka hamaolon nang angka ambatambat songon angka alona na sai manggugai dohot mangambati sangkapNa. Alai torus do Jesus mardalan dohot pos ni roha nang hasatiaon tu sangkap ni Debata Ama i. Disaluhutna i, pardalanan tu Jerusalem na laho patuduhon.

c)      Panjangkonon di Jesus songon Raja Hadameon. Uju Jesus dohot angka siseanNa i sahat tu Jerusalem, mansai godang do jolma na marpungu dohot na mangolophon Ibana huhut paherbang angka abitna be dungi angka dangka ni hau palma nang angka bulung ni hau pe di dalan sidegeonNa. Mansai gogo do soara nasida mandok: “Hosana di Anak ni si Daud! Pinasupasu ma na ro marhitehite goar ni Tuhan i! Hosana ma di ginjang”. Angka na sida na manganggap Jesus songon sahalak uluan na boi mamboan hadameon dohot hatigoran tu nasida luhut. Dungkon sahat tu Jerusalem, Jesus dohot angka na mangihuthon Ibana sahat tu Bagas Joro ni Debata.. Disi ma Jesus manghophop na targoar hatigoran dohot na mangusir angka partigatiga na mambuat paruntungan dohot mangasahon Bagas Joro i laho gabe tu paruntunganna sandiri. Pambahenan ni Jesus on mambahen angka jolma na ro i lam porsea ma tu Jesus jala mamereng Ibana songon sahalak panurirang na dipasahat Debata. Mansai bahat do jolma marlomo ni roha tu Jesus huhut mambahen Ibana songon raja. Di  marsogot ari na i, uju mulak Jesus tu Jerusalem, torop do halak na manghilalahon Jesus i huhut mamaritahon ia Jesus do raja na ro i na mamboan hadameon dohot hatigoran. Dipapos roha n i torop jolma laho manolopi Jesus manjou angka jolma huhut dipareak angka abit dohot angka bulung ni hau nang ranting ni palma di ddalan i songon tanda hormat nasida. Diboto Jesus do panjangkonon ni natorop i di Ibana songon raja hadameon ima sada sian dalan ni sangkapNa. Alai ndang olo Ibana dinilai songon raja ni haportibion. Naeng do di rohaNa asa angka siihuthon Ibana i mangantusi ia harajaonNa i ndada  ndada sian portibi on, jala naniulaNa i ima laho holan mamboan hatigoran dohot hadameon di poribi on. DI Mateus 21: 5, dipaboa na nangkok Jesus di atas ni halode songon raja na ro i dohot haserepon ni roha jala gok haholongon. Ndang hoda nangkohanNa manang hoda porang songon angka raja ni portibi on hatiha i. Ia hagogoonNa i ndada sian pardagingon nang haportibion, alai huaso nang hagogoon na sian Debata do. Marhite na manjanghon Jesus songon raja hadameon, togihononNa do torop jolma tu pardamean na togu dohot Debata. Diajarhon Jesus do hasintongan, haholongna, nang hatigoran, jala manguluhon angka jolma tu haluaon. Ala ni , minggunta ima Minggu Palmarum ima partingkianta laho pahusorhusorhon pambahenan ni Jesus na mamelehon diri huhut manjanghon Jesus songon raja hadameon.

d)     Tudutudu pangalaho na masa i. Hamamasa i mansai godang mamboan pangantusion na simbolis. Isarana hau palma na dipauli gabe gabagaba di dalan na paboahon simbol hamonangan nang hamuliaon. Hape na masa i, dihunduli Jesus do sada halode na patuduhon haserepon nang bulus ni roha. Bulus ni roha on pe naung tarida di pahean ni Jesus na so apa uli idaon songon sahalak raja,alai holan mamahe pahean na biasa do. Hamamasa panjanghonon ni Jesus dongon raja mansai godang paboahon makna simbolis na mansai ringkot di haKristenonta:

Ø  Naparjolo; harro ni Jesus tu Jerusalem songon sahalak raja na ro mamboan hadameon nang hatigoran napatuduhon ia huaso ni Debata ndang na holan marpardomuan tu huaso ni haportibion. Nanaeng niajarhon Jesus ia harajaonNa i na sian Debata jala ndang mangasahon hagogon ni daging nang portibi on.

Ø  Napaduahon; na masa on patuduhon haradeon ni Jesus laho manggohi ulaonNa songon Sipalua, ima na rade mamelehon ngoluNa songon pelean hasesaan ni dosa manisia. Haroro ni Jesus tu Jerusalem songon raja na mamboan hadameon ima mula ni pardalananNa laho mamelehon dirina di hau pinarsilang i.

Ø  Napatoluhon; mamangke halode na hinundulan ni Jesus songon dalanna tu inganan penghormatanNa ima na patuduhon haserepon ni roha dohot habulusonNa. On ma na patuduhon ia hangoluan na bulus nang serep ni roha ima na mansai ringkot laho mandapothon asi ni roha nang holong ni Debata.

Ø  Paopathon; mambahen angka abit nang angka bulung  songon tanda penghormatan na patuduhon ia Jesus ima sahalak raja na dihormati jala diakui rakyatna. Angka bulung ni hau palma i pe patuduhon sada simbol hamonangan, hagabeon dohot haluaon na dilehon Jesus marhite panaritaanNa i.

Ø  Palimahon; ia na masa on pe na patuduhon panjangkonon ni Jesus di halak na pogos nang na tarduru, ndada di angka na marhuaso nang na mora. Dison ma dipatuduhon ia haburjuon nang hasintongan ndada sai marharoroan sian angka na marhuaso dohot angka na mora, alai sian na boi dapothonon di parngoluon na bulus, ima angka halak na serep marroha di adopan ni Debata.

Marhite ima saluhutna, di panjanghonon ni Jesus songon raja hadameon na bermakna simbolis jala na ringkot di haKristenonta, ima taringot tu huaso ni Debata, haserepon ni roha, pameleon diri, hamonangan, panjanghonon nang haburjuon.

 

e) Haunduhon ni Jesus di sangkap ni Debata Ama i.

             Na masa on na patuduhon songon dia Jesus na sukarela jala sadar do Ibana mangihuthon sangkap ni Debata Ama i. Diboto Ibana do na ingkot ditangkup Ibana jala diparsilangkon di Jerusalem, alai sai hot do Ibana mangoloi bulus rohaNa lao sopola sangsi. On ma na patuduhon tingkat ni hasatiaon ni Jesus tu Debata Ama jala marhaposan di sangkapNa. Haunduhon ni Jesus tu sangkap ni Debata Ama i ima sada sian aspek na mansai pendting di hamamasa panaonon nang hamateanNa.

 

         f). Angka na boi siputihonta sian na masa on ima:

Ø  Habuluson dohot serep ni roha ima angka nilai na mansai ringkot di sahalak pemimpin manang uluan.

Ø  Napaduahon, asa sai hot burju nang satia di sangkap ni Tuhan i.

g) Angka siingoton ni binoan ni Raja Hadameon i ima:

Ø  Haunduhon ni sangkap ni Debata

Ø  Habisuhon di nalaho mambuat haputusan.

Ø  Manghatindanghon habalgaon ni Tuhan

Ø  Manjanghon holong ni Debata

Ø  Sai manjaga haserepon ni roha.

Amen.

Jamita Minggu Judika (luluhon Ahu Ale Jahowa, Pslm 43:1a) 17 Maret 2024

Hot do Holong ni roha ni Jahowa

 (Ketetapan Tuhan Tidak Akan Berubah)

Jeremia 31: 35-37

 

a)      Huria na hinaholongan dibagasan Jesus Kristus, sada  na mansai diharingkothon halak na tartaban na naeng mandapot haluaon ima singkatna. Molo so adong singkatna, ndang na gabe tenang ngolu ni sasahalak jala boi do sai digohi biar nang hatahuton molo ndang tangkas singkatna i.

 

Dungkon dipabotohon Debata padan paulihon bangso Israel, dipasahat Debata do singkatna di padanNa i (ay.37). Songon pastina mataniari na sai marsinondang di arian dohot bulan nang angka bintang na manondangi di bornginna i laso songon i ma Hata ni Tuhan i na sai pasti do. Dipauli Tuhan i do muse bangso Israel. Asa marjongjongan ma angka huta jala so di lengsehhon be.

Ia pandohan on na martudutudu tu haluaon ni bangso Israel sian Babel dohot na paulihon muse huta Jerusalem. Dung gonop 70 taon ma nasida di habuangan, mulak ma bangso Israel i tu Jerusalem ditoru ni panggomgomion ni si Ezra dungi mangihut ma tu si Nehemia. Alai na pinadanhon ni Debata ndada holan tu bangso Israel, alai dohot do tu angka huria bangso ni Tuhan i na naung dipauli. Jerusalem ndada huta na secara fisik di Timur Tengah alai huta ni Debata didia maringan angka na porsea na manomba Debata jala na marhatophothon Jesus Kristus Tuhan.

b)      Jotjot do taparrohahon mata ni aridi arianna i dohot bulan nang bintang pe di bornginna i, jala marhite i ma ingotonta ia saluhut na ditotophon Debata ingkon saut do i. Sai ingoton ni Debata do angka hata nang padanNa i. Jadi ndada holan na paluaonna boti hita jala diihot muse tu padanNa i alai naung dibahen Tuhan i do jaminan. Ngolu na dibagasan jaminan ni Tuhan i do na mambahen sonang rohanta jala pos rohanta mandalani ari ari ni ngolunta. Padan ni Tuhan i ndang dipengaruhi ala ni angka na masa di ngolunta. Aha pe na masa dingolunta ditingki on; atik na marsahit, hamaolon nang mangadopi angka hasusaan na borat, sai ingotonta ma ia padan ni Tuhan i do na pasti. On ma pangkirimonta na togu songon angka na porsea,, ia soada na boi manirang hita sian asi dohot holong ni roha ni Debata. Mian jala mangolu dibagasan padan ni Tuhan i na manjou hita asa unang pintor gale manang mandele. Disituasi manang aha pe sai hot ma hita mangolu di na pasahathon dirinta tu Tuhan i.

c)      Pada ni Tuhan i; paulihon muse huta Jerusalem. Angka na uli na denggan naung dipasahat di jolo ni turpuk on. Angka ruas na tarbarita do angka halak Jahudi na dibuhai dungkon hamumulak nasida sian habuangan na diujungna mansohot. Jala dibagasan bangso natarbarita on do ingkon ginohan angka padanNa i. Alai na gabe sungkunsungkun; boi do hita holan marparsigantungan tu padanNa i ? alusna: BOI laos disi do hita mandapotihatoguonna jala dilehon jaminan na sasintongna taringot tu hatongtongon ni pasupasu na dibagasanna. Sada na pasti siingotonta sian jaminanNa i, saleleng portibi on adong, sai jagaonNa do ruasNa i. Sai sipata do hitaon dipatongon tu inganan na toru alai dungi sai patimboonNa do muse jala sai patgronNa do sangkapNa i muse. Huria n apinajongjong di atas batu ojahan n atogu, jala banuatoru pe ndang marhuaso disi. Ala ni i on ma dua point na dilehon tu hita laho patoguhon haporseaonta sian angka parsualonta, ima pajongjongonNa do portibi on jala pajongjongonNa do muse Jerusalem i.

d)     Tuhan Debata pajongjong portibi on, togu jala manongtong bangunan i songon sada bukti sian huaso nang hasatiaon ni Debata naung mangulahon pajongjonghon huriaNa . Napajongjong saluhutna sian mulana i ima Debata (Heber 3: 4) jala laos Ibana do na jumadihon na adong sisaonnari on. Ndang adong na hot di hasiangan on. Marujung do saluhutna. Hasangapon, haulion, hamuliaon songon i nang na hansit, sitaonon, siporsanon dohot huaso na jahat pe salpu do i sude. Ndang adong na hot. Ndang adong na boi boanon nanggo otik pe huaso, sangap, arta, sihumisik, pangkat, saluhut na masa dohot na adong di diri, molo masa haroro ni Anak ni Jolma i. "Alai anggo hatangKi ndang olo salpu." I ma hata ni Debata na marsangap jala marmulia. Hata ni Jahowa, ndang marharoroan sian portibi, ndang ditompa jala ndang boi dibuat manang pasoon ni angka hagogoon dohot huaso na adong di portibi on. Hata ni Jahowa marharoroan do i sian Jahowa, marhite Hata i do ditompa langit dohot tano ro di saluhut nasa na adong di hasiangan on, songon i nang angka na adong di langit. Hata ni Jahowa na marharoroan sian Jahowa na mian rap dohot Jahowa sian na manongtong. Oleh karena itu, apa pun keadaan kita, apa pun masalah yang kita hadapi dan seberat apa pun itu. Kita percaya kasih Tuhan tidak pernah berubah kepada kita. Karena itu, kalau kita menghadapi berbagai pergumulan itu jangan cepat kita mengatakan bahwa Tuhan tidak mengasihi kita. Atau kalau kita menghadapi penyakit yang tidak segera sembuh bukan berarti Tuhan tidak mengasihi kita. Tuhan tidak pernah berhenti mengasihi kita. Hot do holong ni roha ni Debata. Ndang bolongkonon ni Jahowa be hita. Judika: Debata do siluluhon hita. Nunga dijou goarta ganup, Ibana nampuna hita. Hot do holong ni Kristus i manghophop hita asa unang marmara hita, asaunang tu hamatean na manongtong i hita alai diunsat sian i asa bongot hita tu hangoluan na manongtong dibagasan Kristus Jesus i. Ala ni sai idajari jala ditogihon Tondi Parbadia ima hita manghaposi Ibana. Amen.

Jamita Minggu,Letare – Marlas ni roha ma hamu, Jes.66:10a – 10 Maret 2024

Lam Ganda MA Jesus, Lam Moru Ma Anggo Ahu

 (Yesus Harus Makin Besar, tetapi Aku harus mekin kecil)

Johannes 3 : 22 – 30

 

 

a)      Huria na hinaholongan dibagasan Jesus Kristus. Ia turpukta on manaringoti panindangion ni si Johannes pandidi taringot tu Jesus. Hatiha i naung tarbarita do si Johannes ala ni paningtingonna, parngoluonna nang pandidion na niulahonna. Bahat do jolma na olo ro mangihuthon ibana. Disada tingki disungkun ma ibana taringot pandidionna i dohot pandidion na niulahon angka sisean ni Jesus. Ditanda si Johannes do dirina na gabe suruan ni Debata laho paradehon haroroni Mesias i. Dipasahat ibana do panindangion na sintong taringot tu Jesus ima Mesias i. Ai dihatindanghon ibana do paboa: “Ianggo Ibana, patut lam ganda; lam moru ma anggo ahu!” Diantusi si Johannes do naung saut tingkina Jesus manorushon panghobasionna asa ingkon patandahon diri ma Jesus tu si hatoropan. Dipatuduhon si Johannes do haserepon ni rohana, nang pe targoar ibana sahala panurirang bolon siang angka naung parjolo ala ibana ma panurirang na parpudi di suriranghon di Padan na Robi jala ibana ma panurirang na parjolo di masa Padan na Imbaru. Jala dihatindanghon Jesus do panindangion ni si Johannes, ia ibana ma jolma na umbalga na hea sorang di portibi on. (ptds. Mat.11:7-15).

b)      Na gabe sungunsungkun ima, aha ma rahasia na di si Johannes pandidi asa gabe sukses laho mandalanhon angka na tinujuna na rumingkot ima asa mambahen Jesus lam ganda jala ibana lam marmetmet ? Adong  ma dua point na boi sibuatonta, ima:

ü  Naparjolo; Ala serep ni rohana; molo taparrohahon sian latar belakang ni parngoluon ni si Johannes pandidi, botoonta ma ia bahat do na ni dapotna asa boi banggahononna dirina ima songon :

1)      Partuturon ni si Johannes Pandidi; Ia natorasna ima sian pinompar ni si Aron. Sada partuturon na mansai sangap ditonga ni masyarakat. Ia taboto do holan sian pinopar ni si Aron do na bolas manghobasi di bagasjoro ni Debata. Asa marhite i ma ama ni si Johannes pe ima sahalak malim, jala sahat  ma niuarihon torus tu si Johannes Pandidi na gabe manjabat malim na sangap mangihut angka na bolas jaloonna sian ulaonna i. Hape ia Jesus nang pe sian pinompar ni si Daud, na sorang sian sada keluarga na sederhana do Ibana. Ima keluarga pande hau (ndada pengusaha hau, manang penguasa hau). Sian keluarga na pogos do Ibana, jala parsorangna pe mansai lea situtu martimbanghon parsorang ni si Johannes Pandidi. Nang pe Bibeltai ndang manaringoti si Johannes pandidi na sorang i, songon partuturon na sian malim pasti sangap do hasosorangna.

2)      Malo marjamita. Hatiha i si Johannes Pandidi ndang di Sinagoge marjamita (inganan parpunguan ni halak Jahudi). Jala ndang di si hatoropan ibana marjamitai di godang ni jolma na boi manangihon jamitana. Alai na marjamita do ibana di halongonan, ise ma olo ro tu halongonan, jala maringan disi ? on ma na patuduhon na mansai lungun do inganan sisongon i jala mahiang na mardonokhon sunge Jordan. Alai na mambahen longang roha ima na maroan do torop jolma sian Judea nang Jerusalem laho manangihon jamitana (Mrk.1:15). Ndada songon parjamita dihasiangan on na gabe daya tarikna ndada jamitana alai i ngananna do ima di gedung bertingkat, di Mall di Stadion, di angka gareja na bolon.

ü  Napaduahon: na rade mamelehon diri. Aha do sipelehonon ni si Johannes Pandidi laho pabalgahon Jesus ? alusna ima mamelehon saluhutna. Gabe marmetmet jala mambahen lam ganda halak ima sada pelean na mansai balga. Panghobasion ni si Johannes Pandidi ima na adong di ibana. Manghobasi Debata nada na gabe ulaon sampingan manang part time di si Johannes Pandidi. Jala ndada laho mangisi partingkianna. Alai saluhut ulaonna laho manghobasi Debata. Naung dipelehon do diriNa laho marhobas di adopan ni Debata. Jala ndang pola sisungkunon be pelayanan ni si Johannes Pandidi molo lam marsangap ibana marhitehite panghobasionna i. Asa gabe malim na tarbarita ma ibana, jala malim bolon. Molo di partingkian sisaonnari on, sai adong do na gabe pandita na tarbarita jala sangap idaon, parbarita na uli na terkenal jala torop na mangihuthon angka ruas. Alai saluhut sintasintana i naung dipaonjap si Johannes Pandidi do, jala sabalikna naung rade do ibana lam marmetmet asalma Tuhan Jesus lam ganda. On ma sada pameleon na mansai balga situtu.

ü  Siala ni i, marhite sikap pamelehononna i, Johannes Pandidi dibagasan panghobasionna ndang hea mangalap sangap manang mambuat hasangapon ni Tuhan i laho manaarihon dirina sandiri. Jala molo tajaha di Johannes 1: 20-23, ro do jolma na manungkun tu ibana taringot tu hadirionna, jala bahat do na patudoshon ibana dohot panurirang Elia dohot Mesias i, alai dialusi ibana do, “ndang, nadada ahu si Elia, ndada Mesias.....” Ala ni i molo taparrohahon pamusatan ni pamaritaonna ndada taringot tu dirina sandiri, alai tu Jesus Kristus do. Marasing do di nadeba angka parjamita sinuaeng on na godangan holan paboaboa taringot tu dirina sian Tuhan Jesus. Adong ma on na paboa pengalaman hidupna, gabe talpe holan laho asa diboto na umbegesa. Gabe boi maon tu mengasihani diri, manang asa membanggahon dirina sandiri. Na deba parjamita marjamita ndada Hata ni Debat be fokusna, alai gabe adong do hata parjamita : “didok rohangku...” Nda ingkon roha nang Hata ni Debata sipaboaboahon ? na deba parjamita disanjungsanjung ma ruas na mangalehon sumbangan na balga (jadi ingkon pelean manang sumbangan na mora ima na tama diadopan ni Debata ?) Jadi gabe balik do sian na pinangido ni turpuk on manang di haKristenonta asa: “Lam ganda ma Tuhan Jesus alai lam marmetmetma hita.” Na deba ruas manang parjamita mambuat hasangapon ni Debata di pelayanan huria, didok rohana sian hamoraonna marsangap ma ibana sian na binahenna lobi sian angka ruas na asing. Ala ni i songon angka na porsea, ingkon sai tapabalga ma goar ni Tuhanta Jesus i, ai Ibana do na Sipalua na paluahon hita sian dosa nang hamatean dohot sibolis i. Ingatlah bahwa kemuliaan Tuhan bukan dalam kemewahan dia lahir dan datang ke dunia ini dalam kesederhanaan, menggapai jiwa-jiwa yang haus akan keselamatan dan pemulihan. Berbanding terbalik di angka huria na patamahon huriana asa mian Tuhan i di kemewahan dohot habalgaon ni gedung gereja. Dibagasan haserepon ni roha na unduk jala polin roha manghobasi Tuhan Jesus jala pasangaphon Ibana disandok parngoluanta. Naung mamora, naung marhasil, marpangkat nang marjabatan angka na porsea i sai dohononna ma ala ni Tuhan i do i, jala tongtong dipasangap Tuhan i marhite ulaonna i. Amen.

Jamita Minggu, OKULI – Sai tong do mangaranapi matangku dompak Jahowa,Pslm.25:15a – 3 Maret 2024

Sun Denggan Do Patik ni Jahowa

 (Firman Tuhan itu Sempurna)

Psalmen 19: 8 – 15

 

 

a)      Ia Buku Psalmen ima Buku pujipujian nang ende ni halak Jahudi. Adong ma 150 bindu angka ende nang pujian. Sada sair ni ende na di Psalmen ima na tarsurat di Bindu 19. Digoari do psalmen on “adidactic Psalm” ima psalm na mangajari dohot mandidik. Songon angka psalmn na asing, ia psalmn on dikarang si Daud jala mulanai diendehon di bagasan parsombaon ni halak Jahudi di Tabernakelna di Jerusalem. Ia pslmen on disagi ma gabe dua horon; na parjolo ayat 1-6, patoranghon awangawang na mamaritahon hamuliaon nang hasangapon ni Debata. Napaduahon, ima ayat 7-15 na mangondolhon alus manang tanggapan ni jolma di hasangapon nang hamuliaon ni Debata. Dibagasan alus nang respon ni si Daud di na mangendehonsa, boi idaonta sahalak na pasonanghon roha ni Debata. Ganup halak Kristen na marsitutu manghaholongi Debata, naeng do tongtong naeng pasonanghon roha ni Debata.

b)      Ala ni i ma nuaeng hita manulingkiti Psalmen on sian pangalaho i. Dibagasan turpuk ende on, raja Daud mangendehon tolu pilihan na ingkon buaton ni angka jolma na marsangkap pasonanghon roha ni Debata. Hape molo tabuat tolu pilihan i, ima molo mamilit na pinillit ni si Daud, sai pasonangonta do roha ni Debata. Ala ni i tapillit ma jala tasulingkiti na tolu pilihan i ganup marsadasada:

Ø  Naparjolo, Manghalungunhon ngolu partondion. Di Padan na Robi adong ma 45 bindu manaringoti Raja Daud, jala 58 hali disungguli di Padan na Imbaru. Mansai tarbarita do pambahenan ni si Daud di Bibelta i. Ibana ma sahalak raja na sangap jala na balga. Sian partondionna. Nang pe dibaritahon do dosa nang hasalaanna alai rajuman do hina balga haporseaonna nang ngolu partondionna. Na boi idaonta sian ayat 15. Jotjot do hita marusaha laho patupahon sibaheon na denggan. Boi do ndang korupsi hita, manang ndang tarela agia angka hagiot ni portibi on, alai boha ia simangukdapta, boi do rajaanta i ? atik gabe partuktuhan angka panghataionta tu dongan jolma. Ai didok Jakobus 3: 2 “Sebab kita semua bersalah dalam banyak hal; barangsiapa tidak bersalah dalam perkataannya, ia adalah orang sempurna, yang dapat juga mengendalikan seluruh tubuhnya.”

ØMolo najolo nang sahat sinuaeng on angka biarawan dohot biarawati asa tama di roha ni Debata ima na mambahen “nazar diam” (Vows of Silence) otik ma nasida manghatai manang ndang pola manghatai. Alai ndada gabe manguhom si Daud manang gabe ngungu asa gabe tama diroha ni Debata. Alai manghatai do ibana na manghilalahon asa tong dohot Tuhan i manghatai. Diigil ibana do asa pandohanna i gabe tama di adopan ni Debata.

Ø  Napaduahon; maniop Hata ni Debata (ay.8-12). Ia patik nang Hata ni Debata mansai balga do panghorhonna di konteks Psalmen on di parngoluon ni angka na naeng tama di adopan ni Debata. Ndang mungkin gabe tama jolma di daopan ni Debata ia so na maniop Hata ni Debata. On ma pilihan na diendehon si Daud di syair on. Patik ni Debata jotjot do digoari “Intan Permata Israel”. Panggoaron i asa diantusi molo tapahami na lima sifat na utama sian Hata ni Debata di ayat 8-10:

1)      Ia Hata ni Debata singkop do isina na pasonanghon rohanta. Angka na manjaha dohot na pahusorhusor Barita Nauli i ima na martua jala sonang. Ala ni i gabe minar bohinta, lam semangat mandalani ari ari nang parngoluon siganup ari.

2)      Ia Hata ni Debata Togu ala mangalehon habisuhon tu angka na oto. Ai ndang adong parbinotoan ni baoa naposo asa ndang marbisuk ibana. Ala ni i mansai ringkot jahaonna Hata ni Debata asa marbisuk. Angka naposo nuaeng mansai jotjto do holan manjaha media sosial nang gadget, Handphone. Dijaha pe Bibel i holan ditingki marpungu, marminggu nang PA dohot partangiangan. Boha do siganup ari, adong do jahaonna Hata ni Debata ? Hata ni Debata ima pingkiran ni Debata na tarsurat di Bibelta i,ima sipaingotNa tu hita asa marbisuk. Manjaha Hata ni Debata ido kepastian di hita halak na porsea asa gabe marhabisuhon hita.

3)      Napatoluhon ima na didok di ay.9, ima “tigor”, ala tigor do hata ni Debata i laos ima na mambahen las roha. Sai tigor do Hata ni Debata. Jala didok muse “pita” mambahen tiur parnidaan. Ala na marsinondang do parnidaanta siala na marnida na pita. Marsinondang simalolongta molo marnida aek na pita, hau na rata jala sehat bagas na uli jala singkop dungi adong muse mobil na imbaru jala marhillong. Laos songon i ma lobi hapitaon ni Hata ni Debta na boi mambahen marsinondang simalolongta. Boi dohononta ia hapitaon ni Hata ni Debata na boi pamalumhon roha na mapitung siala n i ma mambahen parnidaanta gabe marsinondang. Tudos songon na tarsurat di Psalm 119: 105 “Hatami do sulusulu ni pathu jala hatiuron di dalanku.” Ujungna angka na manjaha Hata ni Debata mandok “sintong” ima na so ada na lipe dibagasanna. Siala mansai bahat do halipeon di portibi on. Ise ma na boi porsea di barita medsos sinuaeng on mansai bahat do angka barita hoax, pembohongan publik dohot laho tu kepentingan ni sekelompok jolma laho paroaroahon alona. Holan Hata ni Debata i do hasintongan nang hatigoran.

4)      Na paopathon : Hata ni Tuhan i songon sere (emas). Hata songon do, lobi sian sere tahe haulion ni Hata ni Debata, ala ndang puas dope si Daud di komparasi on ala lobi sian i dope Hata ni Debata. Pola didok lobi sian sere palangki na godang situtu. Mansai arga do sere di luat Palestina ala soada ditambang disi. Asa angka na mora do najolo na marnampunahon sere. Pelean sere ima na binoan ni halak Majusi tu Jesus posoposo i. Nang pe sere alai ndang hilalaon tabona, asa adong muse dibahen si Daud gombaran ni Hata ni Debata songon situak ni loba do daina alai tumonggi dope sian situak ni loba i. Na manetek i do na lumobi polin sian na adong di sarang ni loba i. Taingot ma padan ni Debata tu bangsoNa Israel andorang so mamasuhi Tano Kanaan, ia tnao parpadanan i na gok susu dohot situak ni loba. Di Luat Palestina ndang adong gula sian tobu alai situak ni loba i do pangkeon nasida dohot sagusaguna laos i do na tumabo. Alai situak ni loba ndang boi di komparasi dohot Hatani Debata, porsea do si Daud keunggulan Hata ni Debata i.

5)      Hata ni Debata na manondangi (ay 12), asa marhati hata ni Debata dipaingot si Daud nang hita. Songon sahalk sopir na so marnida rambu-rambu lalulintas dohot na so marbinege angka klakson ni kendaraan, ndang sahat i tu tujuanna, hatop do masa kecelakaan di ibana. Laos songon i ma angka halak na so marnida jala mambege Hata ni Debata boi do gabe buta rohani asa godang ma jolma na madabu tu bagasan dosa. Sai huphup do sipareonna sian Hata ni Debata. Ndang olo marnida hasintongan na sian Hata ni Debata gabe godang ma na tarrobung tu pangalaho sala nang dosa. Marsitiopan ma hita di Hata ni Debata asa malua hita sian nasa mara nang hasusaan. Maniop Hata ni Debata ima marhite na manjaha dohot mangulahon HataNa.

Ø  Pilihan na patoluhon ima: marpangunsandean di pangurupion ni Debata (ay.13-14). Na tumimbo diparsinta Hata ni Debata ndang sae halak na holan laho pasonanghon roha ni Debata. Asa marhamonangan hita maralohon dosa jala mangolu di habadiaon, asa tongtong hita marpangusandean di pangurupion ni Debata. Ndada na mandok ndang adong peranan penting ni Hata ni Tuhan i tu habadiaonta. Sai jotjtjo do jolma on puas na di rohana naung singkop di rohana ngoluna. Hape molo nunga dibuhai manulingkiti Hata ni Debata, gabe sadar ma ibana di haramunonna diadopan ni Debata. Jala molo bahat do ibana manulingkiti Hata ni Debata, asa ringgas ma rohana mangido pangurupion sian Tuhanta i. Dibagasan turpuk on disadari si Daud do haliluonna nang hasalaanna. Boi do na so disadari ibana boi mangulahon pangalaosion nang dosa, ala ndang shat di rohana laho mamunu si Saul, hape dilaonlaon ni ari sanggup do ibana mamunu si Uria ripe ni si Batsyeba, soldaduna na bulus roha i. Ay.13 “Tung ise ma umboto angka haliluon? Sai sesa ma dohot dosa, angka na so huboto.” Boi do dohononta ndang songon si Daud hita mamunu alai boha do dosa na asing isarana ginjang ni roha ? boi do halak tadok sombong hape dirinta sandiri pe ginjang do rohanta; “sesa ma angka dosa na so huboto” didok si Daud. Godang do ra dosa na so taboto hape di halak naung patar do hape tarida. Ido ala na ringkot adong na paingothon asa denggan si Daud songon raja suang songon i nang hita pe di panggulmiton ni ngolunta. Godang do jumpang hita angka jolma sisongon i. Tarlumobi halak Kristen na so marojahan tu Hata ni Debata jala marlao tu patik ni Debata. Halak kristen alai tukang mabuk, sisobur tuak, halak Kristen hape koruptor, penipu ulaonna, mamunu, parmuruk, parbada, pamolamola, angka na sai marroha kompromi ndang tegas tu dosa.

c. Sun denggan do Patik ni Jahowa (Firman Tuhan itu sempurna), ima topik ni minggunta, paboa ndang adong be na hurang di Hata nang Patik ni Jahowa. Angka na sai burju mangulahon dohot mangaradoti Patik nang Hata ni Jahowa sai dapotan pasupasu, upa sijaloonna ala ni hasationna ima tumpal hmonangan i (ay.12). Asa lomo ma rohanta di Hata nang patik i Jahowa asa lomo rohaNa mida hita. Hidup yang berkenan dihadapan Allah adalah hidup yang sesuai dengan Firman Allah. Amin.