&
Ev: Lukas 3 : 1 - 6 &
Ep: Maleaki 3 : 1 – 4
TOPIK:
MUBA MA, PARADE DALAN
DI TUHAN I
a.
Selamat
Ari Minggu ma di hita saluhutna ruas ni huria ni Tuhanta. Nunga sahat hita di
Minggu Advent na Paduahon. Songon topik ni Minggu on na mandok “MUBA MA, PARADE
DALAN DI TUHAN I”, Disosoi do hita angka na porsea asa taparade ma dirinta, ta pauba ma
rohanta, laho manomu Tuhan i. Di bagasan haradeon ni roha manomunomu haroro
ni Tuhan i, ta pasahat ma ngolunta, rade roha dipaimbaru
dibagasan Kristus Jesus i. Di Minggu Advent II-hon nuaeng ma tingkina paimbaru diri, mangolu di
bagasan holong ni Debata, jala gabe pasu-pasu tu humaliang.
b. Huria
ni Tuhanta; Molo na jolo tung soada do kalender songon na nuaeng on godang
ragam nang manssam kalender biasa, digital nang angka na canggih. Ala ni i
najolo somalna molo paboahon partingkian masa, dipaboa do goar ni na marhuaso
di hatiha masa angka na masa uju i. Ima na diulahon si Lukas, songon na tajaha
dibagasan turpukta minggu on. Dipaboa si Lukas do di taon pasampulu limahon
panggomgomi Kaesar Tiberius, uju si Pontius Pilatus gabe panggomgomi di Judea,
jala Herodes raja di luat Galilea jala si Filipus dongan tubuna na mangarajai
di Iturea dohot Trakhonitis, dohot Lisanias mangarajai di Abilene. Lukas ima na
manurat evangelium patoluhon na denggan pangulaonna. Sude angka na niulana
songon sahalak ahli teologi, pangubati (Kol.4: 14), panulingkit nang
sejarahwan. Dilehon do rohana tu na manulingkiti di angka sejarah na masa di mula ni evangelium Lukas i
(Luk.1:3-5; 2: 1-2). Jala sahat do tu Lukas 3: 1 – 2, ditingki disurathon ibana
dohot jempek taringot tu angka halak na marhuaso hatiha i di angka luat
humaliang dohot angka na manguluhon parugamaon di tingki panghobasion ni si
Johannes pandidi. Kesar Tiberius (na marhuaso di taon 14 – 37 M) mangarajai
saluhut harajaon Rom, Pontius Pilatus (marhuaso di taon 26-36 M) ima wali ni
luat Judea. Tolu halak (Herodes Antipas, dohot si Filipus, dohot Lisanias)
digoari songon raja di luat (tetrarch). Molo dilapati pangantusionna, hata
tetrach ima “na mangarajai di saparopat luat,” alai pandohan on di pangke laho
paboahon “panggomgomi na tumoru tirketna.” Angka nasi na marhuaso manggomgomi
holan di batas daerah na naung ditontuhon. Angka uluan di parugamaon- Hans
dohot Kayafas- dohot do dipaboa (ay.2). Nang pe si Kayafas do na maniop
pimpinan jabatan Malim Bolon hatiha i, na marsagi uluan Jabatan do nasida dohot
si Hanas.
c. Marhite
pamaritaan na tangkas sian panurat Lukas paboahon na mangula do Debata
dipardalanan ni ngolu manisia, marhite
Jesus sian Nazareth, na hea masa jala tangkas partingkianna jala inganan na.
Asing ni si Lukas tung godang dope angka pande bisuk nang penyair na malo na
olo paboahon sada sipaingot marhite na mangalumba bilangan pitu. Molo
pangantusion ni bibelta i molo bilangan pitu ima hagogok, lapatanna adong
totalitas. Ido umbahen dilumbahon si
Lukas bilangan pitu marhite na paboahon dua halak malim bolon: Hanas dohot si
Kayafas. Tung so hea do masa laos dua halak na manguluhon hamalimon. Di
partingkian ni Jesus sahalak malim na bolon ima si Kayafas.
d. Dipamasa
si Lukas do na mamangke sastra laho paboahon sipaingot na mangula do Debata di
pardalanan ni jolma marhite Jesus Kristus na sian Nazareth, sada masa na marsintuhu ndada holan tu bangso
Israel, alai tu sandok bangso di poribi on, ima tu saluhut jolma. Molo sian
pangantusion ni hita na porsea, Ingkon paboahon ni Debata do jumolo tu angka na
targoar angka malim bolon songon si Hanas dohot Kayafas, ala targoar do nasida
songon parhitean n Debata di tonga ni portibi on, jala sasintongna ingkon
manghatai do Debata marhite angka
panggomgomi songon Kesar Tiberius di Rom. Alai marhite turpuk on na ro do
Debata mamangkulingi si Johannes Pandidi anak nisi Zakaria dii halongonan. Molo
di dok di halongonan, ndada inganan ni jolma i. Alaia boasa di halongonan ni si
Johannes pandidi? Ndada disi hian sasintongna si Johannes, boasa- siala si
Johannes anak ni si Zakaria, sahalk malim, naingkon mangingani Kenisah di huta
Jerusalem. DI Israel hamalimon ndada
sada panjouon, alai naung diuarihon sahalak ama do i tu iananghonna songon
pinompar ni si Aron, haha ni si Musa manang songon pinompar ni halak Lewi. Di
na marumur 18 taon si Johannes somalna ingkon di Kenisah di Jerusalem do ibana
laho mandalani pemeriksaan, na ias do ibana sian haramunon, manang martihas do
asa unang mampangkurangi dalanna laho marhobas songon malim-songon naung di
totophon di Buku 3 Musa 21-22 asa boi manorushon ulaon hamalimon ni si Zakarias
amana i. Alai ndada di Kenisa ianggo si Johannes siala naung dirajai Tondi
Parbadia doo ibana sian bortian ni dainang (Luk.2: 41). Si Johannes ima jolma
na manghobasi Tondi Parbadia ndada angka hasomalan hasomalan ni parugamaon. Ido
umbahen na paluhon dirina nang manirang dirina sian hasomalan liturgi ni
Kenisah jala laho do ibana tu halongonan, dao sian Jerusalem-pusat ni
parugamaon ni halak jahudi, dao sian huaso ni portibi nang parugamaon.
e. Aha
do nanaeng sidohonon ni si Lukas marhite pangalaho ni si Johannes na paluahon dirina sian i sude? Ima na
paboahon hatiha na dihaporluhon Debata panguruion ni jolma laho pasauthon lomo
ni roha ni Debata, dipillit Debata do angka haposanna na so tarihot tu ulaon
parugamaon nang hasomalanna, songon na hea masa tu si Zakarias na ditopoti
surusuruan Gabriel uju na mangulahon liturgina ibana di Bagas Joro ni Debata.
Zakarias ndang porsea dii hatiha i di Hata ni Debata, paboa na sorang ma dakdanak
sian sii Elisabet pardihutana. Dungi gabe ngungu on ma si Zakarias ala so
porsea. Songon i ma na boi masa molo
sahalak malim na so porsea tu Hata ni Debata. Malim i ngunguon ala so
dihaporseai hata ni Debata, tung pe manghata i ibana, alai ndang diantusi ruasna, ala ndang di haporseai (Luk.1:18-23).
Angka halak naung somal markebaktian manang angka naung jonok di parmingguon
jotjot do ndang tinggil tu sangkap nang rencana ni Debata. Ia Jesus sandiri pe
tung so hea do manjou angla na gabe siseanNa hatiha na martangiang manang na tingki marminggu manang mar
kebaktian- Sai dijou Jesus do angka halak na sibuk mulaulaonna.
f.
Dungi ro ma si Johannes pandidi mamaritahon
pandidion hamubaon ni roha tu hasesaan ni dosa. Pandidion ima san hata gorik na
marlapatan; mambonomhon, gonong tu aek. Hasomalan do naung diulahon sian na
jolo andorang si Johannes pandidi di Rom nang di Israel. Molo di Rom uju i ,
mmolo adong sahalak hatoban dilehon haluaon, jolo dibonomhon do ibana di aek
gabe tanda simbolis naung mate do parhatobanonna, ndang marlangku be hatobanon
i di ibana, dungi haruar ma ibana sian bortian ni aek i songon jolma na imbaru,
na mereka. Molo di Israel uju i; molo adong halak sileban (Kafir), ima halak na
so sian halak Israel- na neng giot rohana gabe ruas ni Ugamo Jahudi, dibonomhon
do tu bagasan aek, na secara simbolis naungmate do ibana songon halak sileban
jala haruar sian aek i songon jolma na imbaru, ima gabe pinompar ni si Abraham.
Angka halak na naeng ro di didi si Johannes pandidi ima na taonjar rohana asa
maruba tujuan ni ngoluna. Alai sangkap ni rohana asa maruba sian ngoluna na
robi i tu haimbaruon i ndang tarida tangkas, ndang boi idaon ni halak. Ido
umbahen dipatuduhon ma sangkap ni rohana i marhite pandidion i. Dibonomhon ma
dirina tubagasan aek i, naungmate do ibana sian hadirionna, asa haruar ma sian
aek i songon jolma na imbaru na marroha panatapan na lam umbidang tu
humaliangna nang angka dongan jolma. Jala porlu do tinangkasan, naung sesa pe
dosana i ndada ala ni ritus, manang na diulahon i, ndada ala naung dibonomhon
tu bagasan aek ibana, alai ala na olo do ibana maruba dalan ni ngoluna.
Lapatanna ndang mamingkiri holan dirina smabing be ibana disi, alai na perduli
do ibana mamingkiri angka na di humaliangna nang donganna jolma, ido na
mambahen ibana asa malua sian dosa i.
g. Adong
soara na joujou sian halongonan: Johannes pandii ima anak ni malim Zakarias,
ndada mangihuthon panghobasion ni amana ibana di Bagas Joro ni Debata di
Jerusalem. Ditadinghon ibana do isntitusi parugamaon ni Halak Jahudi jala
mamillit ‘soara’ na di halongonan na joujou “parade ma dirim tu dalan ni
Debata, patigor hamu ma dalan di Ibana.” Ganup angka rura ingkon timbunonna,
ganup dolok jala bukit gabe parataonna do, angka na marlekuk patigoronna..
Lapatan ni na ni dokna, rura, dolok dohot bukit dohot lan na asing, dipatorang
panurirang Jesaya 2: 11 -17 lapatanna;sude ginjang ni roha ni jolma ringkot do
patutoru dirina, dipaserep rohana, paunduk dirina di adopan ni Debata, marhobas
di adopan ni Debata.
h. Jala
saluhut jolma ingkon marnida haluaon na sian Tuhan i. Ndang dipangke si lukas
‘halak’ alai istilah “sarks” (hata gorik) – lapatanna “daging”. Ima jolma
manisia i sandiri na memang adong do kelemahanna di pardagingon nang pe
dipartondion. Ia jolma ima daging – “sarx” boido gale, gabe marsahit, marsala,
hanlungunan, jolma i gabe matua jal amonding ima “sarx” – daging. Alai di sude
kelemahanna i, ndang hea tadinghonon ni Holongni Debata jolma i, siala asi ni
rohaNa nang pangapulionNa. Tung soada do angka hagaleon nang dosa na balga
sahali pe na so tardodo dohot hahisaron asi ni roha nang holong pangapulion na
sian Debata.
i.
Di minggu Advent II-dohot topik “Muba ma, Parade
Dalan DI Tuhan i”. Ndada siluluan Debata, ndada dipangido Ibana dijanghon, alai
Iabana Debata Ama i do na ro mangalului jolma ala ringkot do jolma i
dihaholongi Ibana. DI Masa Advent on lapatanna laho menyadari ia panjonohon ni
Debata tu jolma i nunga maruba. Dibagasan diri ni Jesus, ro do Debata
manjonohi jolma i laho marsagi
hangoluanNa dohot las ni rohaNa. Alai sai jotjot do jolma i manutup rohana sian
haroro ni haholongon ni Debata, di tingki so ungkap roha ni jolma i
masihaholongan nang masisesaan dohot donganna jolma. Marhite turpuk jamita on
disosohon Johannes Pandidi tu hita asa “BERTOBAT”, ima pauba diri, roha. Ndang
roha diri be disina marlangku. Alai boha do hita mangungkap rohanta mangoloi,
mangantusi roha ni Debata. Panjouon asa Muba Roha ima na mandok ingkon gohan
nasa rura; angka na masa hansit ni roha, muruk, badabada, parbolatbolatan unang
be adong di rohanta. Pauba roha-pertobatan na mandok: siparejeton do nasa dolok
dohot buntulbuntu- asa unang be roha diri, na egois, ginjang ni roha, alai
marserep jala martoruk ni rohama hita
diadopan ni Debata. Pauba roha-Muba ma-bertobatlah – parade diri di dalan ni Tuhan: asa rohanta unang be adong
na bengkukbengkuk, na so tigor roha (angka na sai lomo an rohana di portibi on
asa sian Debata). Marhite na pature dirinta di na laho manomunomu Tuhan Jesus
idaonta ma haluaon na sian Debat dibagasan Jesus Kristus. Tinggil ma roha nang
tondinta tumangihon soara na joujou tu hamubaon ni roha. Jala tarjou ma hita
angka na porsea manggorhaon, manjouhon angka na tarpodom, angka na tarlalap
binahen ni portibi on nang sibolis asa jaga, dungo, hobas parade dirina manomu
nomu Kristus Jesus Sipalua i. Amen.
