Jamita Minggu KANTATE – (Endehon hamu ma diJahowa ende na imbaru-Pslm.98:1 )2Mei 2021

“NASA NA MARHOSA MAMUJI DEBATA”

(SEGALA YANG BERNAFAS MEMUJI TUHAN)

 

EV. Psalmen 150 : 1 – 6                                     EP. Pangk.15: 1 - 4

 

Dhamu saluhutna na hinaholongan dibagasan Jesus Kristus

 

Ia Psalmen on dibona i jala diujungi marhite na marsoara“ Haleluya”. Marsoara laho mamuji Tuhan ndada na pinaksa jala na binahen asa marsoara. Mamuji Tuhan ima na marharoroan sian haporseaon, manang pangungkapon ni haporseaon ni na porsea siala tandap dibagasan rohana panghorhon pasupasu ni Debata, asi ni rohaNa, hamuliaonNa dohot holong ni rohaNa na balga i di ngoluna. Molo jolma sai na mauas di puji donganna manang halak, alai molo Debata naung tarpuji hian do simulana i. Jala ndang holan jolma na mamuji Debata alai sandok portibi on, sandok na tinompa, sandok na marhosa mamuji pasangap Debata.

 

Mamuji Debata ndang tarsirang i sian hangoluan ni halak Kristen. I do umbahen di angka partingkian aha pe; di las ni roha nang arsak pe sai tongtong do ingot na porsea i laho mamuji pasangaphon Debata. Tung godang do ende-ende pujian i tu adopan ni Debata asa sian Hata ni Debata di ganup parguruan nang partangiangan. Lapatanna ima patuduhon na mansai ringkot laho mamuji pasangap Debata diparngoluan ni halak na porsea.

Boasa hita na porsea sai mamuji Tuhan di ganup tingki? Siala na tinompa ni Debata do hita patubegehon dohot mamaritahon asi ni rohaNa i tu liat portibi on. Jesaya 43:21 “I ma bangso na hujadihon i di ahu, mamaritahon hamuliaonku sogot.”

Ia na mamuji Debata ima sada parenta ni Debata tu hita, songon angka anak hita na unduk dibagasan serep ni roha mangulahon i saluhutna. Heber 13:15 “Marhitehite Ibana ma tapelehon tongtong tu Debata pelean pujipujian, i ma parbue ni bibir, angka na marhatopothon Goarna.”

 

 

Mansai las do roha ni Debata tumangihon angka endeende pujianta, sai mian do Ibana di angka pujianta. Nang sipata mangadopi angka hamaolon

Nang hapariron nang di haholomon parngoluonta, ai tongtong ma hita mamujimuji pasangap Debata. Molo sai tongtong hita mamuji Debata diganup tingki pe, sai na jongjong do Ibana di lambungta na mangalehon hatiuron, habisuhon, hagogoon, hahisaron, dohot manogunogu hita. Psalm

147:1 Halleluya! Ai denggan do endehononhon Debatanta, ai hasudungan do Ibana tama papujipujion.

Naeng ma hita sai mamujimuji Debata di nasa partingkian songon na niulahon ni si Daud. Psalm. 34:2 “Pujionku ma Jahowa sipatsipat ni ari, sai tong ma pujipujianna di bagasan pamanganku”. Jadi namamuji Tuhan Debata ndada holan di tingki parmingguon manang partangiangan di sude partingkian pe mamuji Debata. Na mamuji Debata do hita molo taulahon hasintongan, hatigoran, parsitutuon mangula ulaon.

Dibagasan ngolu ni si Daud tung mansai godang do parsorionna, hamaolon nang sitaononna alai ndang lupa ibana sai mamuji Debata. Laos songon i ma angka na porsea i, sai diingot tu Debata inganan pangalualuan, panghirimon, nang hagogoon. Margogo do na porsea manaon sitaononna molo sai mamuji Debata Di na mamuji Debata disi ma tatompashon hagaleonta tu Debata, ndada margogo hita manaon angka sitaonon i. Mamuji Debata na mangalehon saluhut pargulmiton ni ngolu, ia Debata na tuk manuhuk sude sitaonon na dokdok i asa marhasonangan dohot marhamonangan hita. Tangkas songon na nidok ni endeta i di BE No. 763 MOLO JESUS DONGANMI 1). Molo Jesus donganmi las roham,

Jesus i pangurupim, las roham,

Hot haporseaonmi dohot pos ni roha mi

Mardonganhon Jesus i las roham.

Las roham, las roham mardonganhon Jesus i

Las roham, marsinondang ma di ho,

bintang pangkirimon i mardonganhon Jesus i las roham.

2). Molo Jesus donganmi las roham,

JagaonNa tondimi las roham,

Tiruonmu ma tongtong dame nang holongNa i,

Saleleng dingolumi las roham

Las roham ………

  

Ndang adong hasohotanta mamuji Tuhan sai torus do hita mamuji Ibana di pardalanan ni ngolunta. Saleleng mangolu dope hita dilehon dope partingkian tu hita mamuji Ibana na gok hatuaon i.

Taendehon ma angka ende na imbaru di Jahowa ala ni asi dohot holong ni rohaNa sai imbaru ganup ari. Ndang marpansohotan asi ni rohaNa tu portibi on. Ndang adong na tading saluhut pasupasuNa i mansai singkop. Natau do Ibana mangalehon na ringkot di pardalanan ni ngolunta. Ndang hurangan angka na porsea i manjalao asi ni roha ni Debata. Ala ni i taendehon ma ende naimbaru siganup ari, marhite, roha na imbaru, parange na imbaru, las ni roha na imbaru, dohot pangantusion na imbaru di asi ni roha ni Debata tu hita marhitehite Jesus Kristus Sipalua i.

Nasa na marhosa pe ingkon mamuji Debata, lapatanna tarjou do angka na porsea i mangaramoti lingkungan asa ias, dao sian angka polusi nang pencemaran. Saluhut na marhosa di porti bi on ima dalan ni Debata laho mamasumasu hita. Nang pe di masa pandemic covid-19 on, naeng ma lam imbaru lingkungan sian angka polisi nang pencemaran air, udara, daratan nang dirinta ganup. Asa dipaimbaru Tuhan i ngolunta di masa pandemic on: marhite Prokes – Protokol kesehatan; menjaga jarak, mencuci tangan, menghindari kerumunan, menjaga kebersihan diri. Na dohot do hita mangendehon ender na imbaru dohot saluhut na tinompa marhite menjaga kesehatan lingkunganta. Sai olo ma hita di ajari Tuhanta marhite pandemic on asa mangolu dibagasan haimbaruon; new normal life. Ndang songon na uju i be hasomalanta, naeng ma jaga hita di parhusoranni tingki nang angka na masa di portibi on asa unang  manegai hita di kerusakan alam, alai naeng ma pauliulihon tu haimbaruon dirinta, kelurga, lingkungan, masyrakat, bangso nang negara dohot portibi on. Ima misi di Kristus i tu hita angka na porsea, asa saluhut na tinompa i mulak muse denggan lam tu sehatna alam laos marhite ma tarida panghorhon pujipujianta tu adopan ni Debata.Amen.

Jamita Minggu JUBILATE – ( Marolopolop tu Debata ma sandok tanoon) 25 Aprill 2021

“MANGOLOI PARSURUON NI TUHAN I”

(MENURUTI PERINTAH TUHAN)

 

EV. 1 Johannes 3: 19 – 24                                     EP.Josua 1: 5 - 8

 

 

Huria ni Tuhanta na hinaholongan dibagasan Jesus Kristus.

Sian barita ni huria na parjolo i, ia Apostel Johannes maringan di kota Efesus di ujung ni parngoluonna. Jadi adong do kemungkinan nasida manurathon buku Johannes on di tingki di Efesus ibana. Sian sejarah ni angka apostel di huria na parjolo i, na mangolu do apostel i di ujung ni abad na parjolo. Jala  gumodangan do angka parbinoto di Teologi marpandapot ia surat on di gurithon di taon 90.

Disurathon si Johannes do tujuanna di 1 Joh. 5: 13. Saluhutna i. Huggurithon tu hamu, asa hamu angka na porsea di Anak ni Debata umboto ai naung partohap do hamu di hangoluan na manongtong i.

Sasintongna nunga mansai godang angka panurirang pargapgap na mangajarhon angka parbinotoan na paliluhon, sipaotooto torop jolma sian hasintongan. Sian na ginurithon ni Ap.Johannes di bagasan suratna on, dohononta ma ia angka panurirang gapgap i marharoroan sian sada kelompok na margoar “Gnostik” (sian hata Gorik) na marlapatan “Parbinotoan”. Sian angkka pande bisuk ni bibel i mandok ia angka ajaran ni halak “gnostik” dipahembang di abad paduahon jala daso sian ni golongan on ima songon: 1). IA angka na sian portibion ima na jat doi alai tondi i, na sintong do i. 2). Pamatang na sian portibi on ima na jat, jala Debata na sian Tondi i ima hasintongan i. 3). Haluaon na jinalo sian parbinotoan na istimewa, ndada sian haposreaon dibagasan Kristus. 4). Ia Kristus i ndada ro sian hajolmaon siala Debata na dumenggan ndada boi i mamahe pamatang ni manisia na jat i.

 

 

 

 

 

Naung jotjot do tatangihon taringot tu “Haholongon” sian 1 Korint 13, alai dibagasan turpukta on ima sabahagian na manaringoti “haholongan” na dibagasan turpukta on.

 

Ap.Johanes patotahon ia halak na porsea ndada be mangulahon dosa. Tanda angka anak ni Debata ima marhite sian holong na nipatuduhon nasida. Alai, na masa di angka anak ni Debata sai adong dope mangulahon hadosaon. Isarana ndang manghaholongi donganna songon Kristus i manghaholongi saluhut jolma. Molo naung songon i, dohonon dope anak ni Debata nasida?

 

Angka ruas ni huria na masai targoar do gabe sihataan ala na manghosomi nasida umbahen na maol nasida manghaholongi. Ala ni i do umbahen gabe manalahon dirina ganup di rohana, gabe ndang patut dohonon di roha nasida dirina sandiri siihuthon Kristus. Ala ni ganggu rohanasida i ma na dipabotohon Ap.Johannes ay.20 “Molo disolsoli rohanta hita, umbalga do Debata sian rohanta jala diboto saluhutna.” Dohot ay.21 Hamu angka haholongan, molo so disolsoli rohanta hita, marhiras ni roha do hita maradophon Debata. Ido asa disosoi AP.Johannes nasida laho mangatasi angka ponjot ni roha nasisda i:

 

1. Mangatasi halenseng ni roha marhite na manghaholongi dongan jolma. (ay.18-19). Manghaholongi ndada holan di hata manang songon sifat panghorhonna alai parulaon do ia haholongon i. Holan  na mangulahon haholongon marhite pambahenan do asa boi demak sude.

 Tapatudos na nidok Tuhan Jesus di  Mat.5:16 Naeng songon i ma marsinondang palitomuna di jolo ni halak, asa diida angka pambahenanmuna na denggan i, asa dipuji nasida Amamuna na di banua ginjang i (Demikianlah hendaknya terangmu bercahaya di depan orang, supaya mereka melihat perbuatanmu yang baik dan memuliakan Bapamu yang di sorga.) Ima dasor ni angka na porsea i laho mangulahon haholongon i, jadi ndang holan di hata alai ihut ma tongtong di pambahenan.

2. Mangatasi Halenseng ni roha marhite habalgaon ni Jahowa (ay.20). Sihor ni roha ni Debata asa taruli pasupasu sude na pinarmahanNa tu jampalan na lomak i. Ai ndang lomo roha ni Debata dibagasan hasusaan angka na pinarmahanNa. (Joh.10: 27-28 Ditangihon angka birubirungku do soarangku jala hutanda do nasida, diihuthon nasida do Ahu. Gabe hulehon tu nasida hangoluan salelenglelengna; ndang be mago nasida salelenglelengna jala ndang tarrampas manang ise nasida sian tanganku.

(Domba-domba-Ku mendengarkan suara-Ku dan Aku mengenal mereka dan mereka mengikut Aku, 10:28 dan Aku memberikan hidup yang kekal kepada mereka dan mereka pasti tidak akan binasa sampai selama-lamanya dan seorang pun tidak akan merebut mereka dari tangan-Ku.).

Ima sada tujuan ni Ap.Johanes on laho patoguhon haporseaon ruas ni huria i siala naung ganggu roha nang haporseaon nasid ahinorhon ni angka panurirang pargapgap na pa sarhon angka haliluon na mangajarhon: “Ia haluaon i jaloonna do marhite parbinotoan na istimewa”, jala ndang adong haluaon i siala angka dosa na salpu dohot angka dosa ni angka natorana najolo. Ido umbahen mansai ganggu roha ni angka siihuthon Kristus hatiha i. Ido umbahen disurathon AP.Johannes surat on tu nasida asa pahothon haporseaon nasida ia naung dijanghon nasida do Jesus Kristus Sipalua i marhite na manghaholongi dohot na mangulahonsa.

 

3. Mangatasi halenseng ni roha nasida marhite haporseaon nasida. (21-24)

Sai tongtong ma nasida dibagasan tangiang asa margogo haporseaon nasida jala mangolu dibagasan Hata ni Debata. Haporsean dibagasan Jesus Kristus Anak ni Debata marhite na mangulahon Haholongon na nilehon Jesus Kristus tu hita jolma. Margogo do haporseaonta i siala Tondi Parbadia na mian dibagasan rohanta ima Debata sandiri. Rom 8:14 Ai nasa na tinogihon ni Tondi ni Debata, angka i do anak ni Debata. Amen.

Jamita Minggu MISERIKORDIAS DOMINI – ( Gok asi ni roha ni Jahowa do Tanoon) 18 April 2021

“MANGOLU DIBAGASAN HOLONG NI DEBATA”

(HIDUP DALAM KASIH SETIA TUHAN)

 

EV. Psalm 106 : 1 - 5                                   EP.Ul.Ap.3: 12-19

 

Hamuna ruas ni huria nahinaholongan dibagasan Jesus Kristus

Dibuhai do turpuk Psalmen on laho manghehei sude jolma mandok mauliate tu Debata Jahowa siala asi dohot holong ni rohaNa na gok asi ni roha. Humurang dope panatapan ni parpsalmen roha hamauliateon ni angka jolma na dihumaliangna. Ndang pintor gok las ni rohana manghatindanghon habalgaon ni Debata Jahowa. Pangidoan ni parpslamen on, naeng ma tinggil angka na torop i di asi ni roha ni Debata na saor diparngoluan nasida. Asa marhite pasupasuNa i manghorhon roha mauliate marhite na unduk jala mangulahon patik ni Debata.

Sian angka pengalaman ni ompu nasida bangso Israel na jolo na tinogihon ni Debata marhite si Musa bungkas sian parhatobanon Misir tu tano Kanaan na gok pasupasu ni Debata paluahon nasida. Alai dung di pardalanan i tungkan di Laut Teberau dipalua Debata do bangso i mamolus aek i na bola dua siala pangelelion soldadu ni si Firaun, lupa do nasida di asini roha ni Debata i na sai marmungutmungut.

Pangalaho sisongon on ma na jotjot manonggopi angka halak na porsea di partingkian on, sai jotjot manghalupahon asi ni roha ni Debata naung sahat di ngoluna. Hape parasiroha do Debata. Uju ro angaka sitaonon pintor muramura do marungutungut, jala mangalo Debata. Tadok ma nian mauliate ni rohanta, sai satia do Debata Jahowa pasarisari ngolunta, mangaramoti dohot mamasumasu hita.

Siala ni i ringkot ma hita mangarade diri tu joloan on, marhitehite pigapiga point:

a.       Sai tongtong marningot Debata huhut mangulahon HataNa di ganup tingki (Ay.3). Unang ma nian ta ingot Tuhan i holan di tingki hasusaan. Alai diganup tingki ma taingot Tuhanta i, nang didia pe hita mangula ulaonta. Molo songon i asa gabe martanggung-jawab hita di angka ulaonta i. Sai dipasahat Tuhan Jesus do tu hita tiruan di Johannes 4: 34 Dung i ninna Jesus ma mandok nasida: Sipanganon do i di Ahu, na mangulahon lomo ni roha ni na marsuru Ahu dohot paujungkon ulaonna. Lapatanna ndada sibabaan be na mangulahon patik nang Hata ni Debata, ndada pinaksa, alai naung gabe hasomalan ni angka na porsea mangulahon i.

b.      Mamereng haburjuhon ni halak na porsea jala marlas ni roha dohot nasida (ay.5). Dison ma ringkotna hasadaon (Koinonia; kesatuan; persekutuan). Jala adong do labana nang tujuan ni hasadaon i, asa denggan jala uli na tinuju ni roha nang punguan i. Laos ido na ringkot ditonga ni huria, molo sada ruas ni huria dohot parhalado mansai uli ma nihorhonna disi, adong las ni roha ni angka na porsea laho mangula ulaon ni Debata. Marhobas dibagasan hasadaon nang las ni roha. Jadi ndada holan na marminggu pungu, sada di parmingguan alai sada ma nang di partondion. Masa do parbolatbolatan di tonga ni huria ala hurang hasadaon, laos naung moru haholongon, rap do marminggu nang sapunguan alai boi do ndang dos roha. Jala na lam jorbut na hasesega ni sada huria molo gabe marbolatbolat nang gabe bola dua huria i ala soada hasadaon nang haholongon. Siala ni i sai taharinghothon na marlas ni roha na manghorhon hasadaon. Molo nunga holong na mangkuling di roha ni na porsea, ndang adong be na masihosoman, marbada, masitihasan, manang na mambahen hansit ni roha. Sabalikna maolo adong haholongon, lam na laho masisesaan do disi, masipauliulian, membangun jala lam tu majuna huria i. DI dok do di Johanes 17: 20 - 21Alai ndang holan nasida hutangiangkon, dohot do angka na naeng porsea dope di Ahu, tinogu ni hatanasida: Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu.” Jadi hasadaon i do na dihalomohon ni Debata masa di tonga ni huria ni Tuhanta. Songon na toras manghasiholi hasadaon  ni angka pinomparna asa denggandenggan muse mardame sonang angka pinomparna. (ptds. Rom 12: 16; 1 Kor.1:10; 2 Kor.13:11: Pil.2:2).

c.       Jala na parpudi mansai ringkot tajaha di ay.6, marsiajar sian angka pengalaman na salpu asa unang tarulang muse. Mansai ringkot do sejarah siingoton ni manang ise pe. Sejarah ni keluarga, sejarah ni ngoluna sandiri, sejarah ni sada organisasi, manang sejarah ni huria (tadok ma jolo HKBP), suang songon i sejarah ni negaranta. AI didok Suakrno presiden na parjolo di negaranta Indonesia “JASMERAH” lapatanna: Jangan sekali-kali lupa akan sejarah. Halak na manghalupahon sejarah ima angka na olo lilu, mansai mura di paotooto. Alai molo marningot sejarah nang pengalaman na salpu ndang olo be hita madabu tu hasalaan na sama. Marsiajar sian na salpu, sian angka pengalaman pengalaman ni ompunta na jolo, laos songoni ma bangso Israel i marsiajar sian angak pangalaho nang pengalaman ni angka ompunasida najolo asa unang madabu tu hasalaan na sama. Asa boi nasida lam maju, padenggan diri nang pangalaho tu joloan ni ari on. Ai marulak loni do asi ni roha ni Jahowa na sahat tu bangso Israel i, alai ndang diargahon nasida i, ndang diingot i umbahen ndang mangolu dibagasan hasintongan nasida diadopan ni Debata. Halak na porsea naeng ma ingot di asi dohot holong ni roha ni Deata na sai tongtong mamasumasu hita. Molo tabereng tu pudi sejarah taon na salpu sahat tu tingki on ala ni pandemic covid 19 on, tung sidok mauliate do hita tu Tuhan Debata. Ala ni asi dohot holongNa i sai dilehon tu hita bohal, hagogoon, nang kondisi-kondisi na mambahen hita asa kreatif jala jaga di haiason. Jala tadok ma mauliate naung mardalan vaksinasi di negaranta Indonesia on nang di liat portibi on. Sai manghorhon tu na lam dengganna ma parngoluan ni manisia, nang lingkungan hidup. Ala ni i mangolu ma hita dibagasan asi ni roha ni Debata na mangaramoti hita nuaeng nang sogot pe. Amen.

Jamita Minggu QUASIMODOGENITI – ( songon posoposo na imbaru tubu) 11 April 2021

“PAJONGJONG PARSAORAN NA MASIHAHOLONGAN”

(MEMBANGUN PERSEKUTUAN YANG SALING MENGASIHI)

 

EV. Ul.Ap. 4: 32- 37                                   EP. Poda 17: 17 - 20

 

Horas ma di hita saluhutna

Dihita ruas ni huria na hinaholongan dibagasan Jesus Kristus !

Naung diajari jesus Kristus do hita taringot tu na manghaholongi Debata dohot manghaholongi dongan jolma (Mat.22: 37 – 39), ima sada impola pamingkiron dohot panatapan ni halak na porsea. Manghaholongi ndada holan sian partondion, alai tarida parbuena dipangalaho nang pambahenan na manghaholongi dongan jolma marhite materi, sinadongan dohot sipatupaon. Laos i do na pinatuduhon ni angka na porsea di huria na parjolo i dibagasan turpuk on. Ndang na gabe nampuna nasida sandiri angka artana i, alai disadari nasida do i saluhut arta na i sada pasupasu na ingkon si sagihon nasida laho manarihon angka donganna na mangharinghothon.

Ia turpuk on na gabe ondolan ni si Lukas songon panurat turpuk on, songon naung dipaboa andorang so turpuk on taringot bulus ni roha nasida dohot hasadaon nasida (Ul.Ap. 2: 44-46). Molo taparrohahon na nionjar ni roha nang haporseaon nasida do umbahen manjadi i saluhutna, ndada ala ni uhum manang aturan, alai nionjar ni haholongon na sian Jesus Kristus (ptd. 1 Joh.3: 17-18). Panghorhon ni ekonomi na mansai maol jala haleon potir, hasusaan, dohot siala ni situasi politik ihut ni i angka halak Jahudi na so manghalomohon angka siihuthon Kristus hatiha i gabe tu na lam margogo nasida di hasadaon laho masiurupan pajongjong hasadaon ni huria di Jerusalem hatiha i.

Mansai marasing do sian pangantusion ni horong sosialis komunis, ala soada kewajiban laho pasahathon artana i songon nampuna ni sude, alai sian roha na bulus do gabe nampuna ni sasude. Disi ma tarida hasadaon ni roha nang panghilalaan nasida sama nasida.

 

Ø  Ul.Ap4:33 Jadi marhagogoon situtu ma angka apostel i, mangkatindangkon haheheon ni Tuhan Jesus i, jala tung lomo situtu do roha ni halak mida sude nasida.

Tangkas do dipabotohon turpuk on, ia impola ni panindangion nasida ima di “Haheheon ni Tuhan Jesus”. Hagogoon ni panindangion i ndanda sian hagogoon laho patupahon halongangan, alai sian asi ni roha na manggohi roha nang ngolu nasida.

Johanes 13 :34 Patik na imbaru ma hulehon tu hamu: Naeng ma masihaholongan hamu; songon holong ni rohangku di hamu, naeng ma songon i dohot hamu masihaholongan.13:35 Apala sian on ma tandaon ni halak saluhutna, hamu siseanku: Molo masihaholongan hamu.

Marhite i ma, panindangion nasida pasingkophon pangungkapon taringot tu Jesus ima Mesias jala Sipalua naung dibagabagahon saleleng on (ptds. Ul.Ap.2:29-32). Doshon songon Jesus Kristus na magodang dibagasan habisuhon, laos songon i ma huria ni Tuhanta gabe lam magodang dibagasan asi ni roha nang haholongon na sian Tuhan Debata (Luk.2: 40 Ia Dakdanak i, lam magodang do, lam margogo huhut marroha situtu, laos didongani asi ni roha ni Debata Ibana)

 

Ø  Ul.Ap.4:34 - 35 Ai ndang adong manang ise nasida hurangan; ai ia adong pe sian nasida parhauma manang parjabu, digadisi do i, dung i diboan ma tuhor ni na ginadisna i. Dipeakkon ma i tujolo ni angka apostel, dung i disagihon nasida ma i tu angka na hurangan

Molo taparrohahon sian Ul.Ap.2: 45 Tupa di gadisi nasida arta dohot ugasan nasida, disagihon ma tu saluhutna marguru tu haseana di ganup. Lapatanna naung dihasomalhon nasida do manarihon donganna di tonga ni huria i, naung marulakloni diulahon nasida i. Pos do roha nasida laho mamelehon sian upa ni panggadison ni arta nasida. Tu na mangihut ma muse di baritahon ma angka ulaon asi ni roha i di Ul.Ap.6: 1 – 4 ingkon berlanjut do ulaon i pambaritaon barita nauli jala ndang boi hatadingan ulaon pangurupion di tonga ni huria. Jadi ihut ma mardalan ulaon pasarhon Barita nauli dohot ulaon diakonia, manang ulaon asi ni roha.

 

Ø  Ul.Ap.4: 36 – 37 Jadi adong ma sahalak Lepi sian pulo Siprus, i ma si Josep, na ginoar ni angka apostel si Barnabas (mandok: Anak ni pangapulon). Digadis ma hauma golatna, diboan ma hepeng i, laos dipeakkon ma tujolo ni angka apostel i

Marsangkap do si Barnabas dohot si Paulus laho manotas pardalanan misi paduahon mamaritahon Barita na Uli, alai gabe marsalisi ma nasida siala dongan si Barnabas ima Johanes Markus (Kol.4: 10) na manadinghon pardalanan misi na parjolo mamaritahon Barita na Uli (Ul.Ap.13: 13). Ndang olo be Ap.Paulus manogihon si Johanes Markus tu ulaon Misi na paduahon i, gabe dua bagian kelompok ma nasida: Barnabas dohot Johanes Markus, dungi Paulus dohot si Silas (Ul.Ap.15: 36 – 41).

Sian panindangion angka ahli teologi, ia si Barnabas ima sahalak Levi. Somalna ia halak Levi ndang adong tano teanteanan (ptds. 4 Musa 18: 24). Jala si Barnabas ndang maringan di luat Israel, alai di Siprus do. Jadi ndang marlaku aturan ni kepemilikan ni tano tu horong Levi ala maringan di duru ni luat Israel. Marhite situasi si songon i, dapot rohanta ma karakter ni si Barnabas on patuduhon pangalaho nang parange na uli sian huria na ias roha masilehonlehon, ndang pola mangarop di balos na nilehonna, saluhutna i ala mangolu nasida dibagasan holong na sian Jesus Kristus. Sian parngoluan ni si Barnabas i na patuduhon pambahenan na na manghorhon tu ulaon sending, jala manumpahi ulaon ni Ap.Paulus jala mangurupi dohot mangajari Johanes Markus (dungi gabe panurat Evangelium Markus) dungi sahat panghorhonna tu hajongjongan ni huria ni Kristus i.

 

Sipahusorhusoron:

1.       Parsitutuon;

Huria na marsada ni roha siala na marsitutu nasida di panghorhon Haheheon ni Jesus Kristus dohot bagabaga dii haroroNa. Dibagasan hahehehonna  dohot padanna i, tangkas ma dihangoluhon haholongon i. Mansai torop huria na so marsitutu di ulaon haholongon, holan ulaon sambing, jala nunga marlaok haportibion tujuanna. Adong do huria na holan sonang manghobasi angka na dibagasan huria i, ima hasomalan ni pelayanan si ganup minggu, di angka kategorial nang di angka dewan dohot seksi, alai mansai humurang di ulaon asi ni roha tu duru ni huria i. Tung bahat do holan pasonanghon partondion ni huria i sambing, alai hurang mampanghorhon di sekitar ni huria i, tung godang dope na hurangan, isarana Koster gereja, angka sekuriti na so pola tangkas pangurupion ni huria lam ma tu sekitar masyarakat. Molo pembangunan mansai torus do mardalan, lam tu bagakna secara pisik bagas joro i, alai boha do karakter, roha nang haholongon ni ruas ni huria i bagak do manang ndang? Molo marsitutu do huria i di “Haheheon ni Tuhan Jesus” mansai manghorhon situtu do ulaon panghobasion ni huria i. (1 Korint 15:14 Ai anggo so hehe Kristus sian angka na mate, rumar ma jamitanami, laos rumar ma nang haporseaonmuna.) Lapatanna aha ma sibaritahononhon ia so holan taringot tu naung hehe Kristus sian na  mate. Ipe naung tapestahon parningotan ari haheheon ni Tuhan Jesus. Aha do panghorhon ni i di hita ganup ruas nihuria marsadasada?, jala aha do panghorhonna tu parsaoranta di keluarga nang di tonga ni huria ? Lam sada do huria i dibagasan holong?, mangolu do haholongon ni Kristus i?, manang sabalikna gabe lam masihosoman, masilatean, masipusaan, masitunjangan do ? Dia do tahe ? taalusi be ma dibagasan rohanta.

Alai na pasti molo naung bagas do uhir dibagasan rohanta aha do lapatan Kristus naung hehe sian na mate ? Ima holan laho tu hasonanganta sambing do, asa marolopolop tondinta ai naung tajanghon do asi ni rohana i di bagasan Kristus naung mate jala hehe laho holan paluahon hita sian mara bolon ima hamatean na saleleng ni lelengna, jala asa partohap hita di hangoluan na saleleng ni lelengna di surgo i. Impola ni barita na uli ima “Naung hehe Kristus i” ndang asing ni i. Jadi marsitutu ma hita di naung hehe kristus, dipahehe tondinta, ngolunta, las ni rohanta laho marhalado, jala marhobas marhite misi ni Kristus i.

 

2. Bulus ni roha. Dipatuduhon si Barnabas on do tu hita bulus ni rohana laho mamelehon. Ndang adong sangkap-sangkap na roa, ndang adong motivasi na asing ia so holan na sian na niajarhon Kristus i. Molo naeng tapelehon, manang talehon tu huria ndang i na parjolo talapati saluhut natapasahat nang na talehon i. Molo tapasahat pe i marhite bantuan, donasi, pelean manang hibah, taetong ma i naung talehon tu Tuhan Debata. Jala naeng ma sian bulus ni roha, ndang adong maksud nang motivasi asa dietong halak na jago, asa diboto halak, manang asa dipuji jala dipasangap huria i hita. Ai sasintongna peleanta i laho pasangap Debata do, unang ma ta tangko, manang tabuat hamuliaon, pujian na tu Debata gabe tu hita. Puji-pujian nang hasangapon holan tu Debata do Ala ni i talehon, tapelehon ma sian bulus ni roha saluhut ngolunta tu Debata, ala nionjar haporseaon; mandok mauliate di sude denggan basa ni Debata na sahat tu hita. Unang ma tapangke panggung pelayanan huria asa mendapat status kehebatan dalam pelayanan huria. Unang ma tabahen pelayanan kavlingan di huria, artina ndang boi digugai, manang holan kelompok nasida do na ber-hak di ulaon i. Hape huria i milik ni Tuhan do i, ndang milikta, ndang lomonta disi, unangma hita gabe sisuan bulu, marlomolomo di huria i. Unang ma siala naung godang talehon, tapelehon, manang asa dibereng halak na mora hita di huria. SALAH BESAR...... Unang gabe muruk Tuhanta i tu hita. Songon na masa tu si Ananias dohot Safira, mamelehon alai adong maksud dohot motivasi na asing gabe diuhum Debata do nasida ala ni pambahenanna i. Sai adong do dope ditonga ni huria angka si Ananias dohot Safira modern di jaman nuaeng on di pelayanan huria, dilehon do dirina melayani, marhite gogona nang artana, alai holan asa adong pengakuan status sosial terpandang di gereja manang terpandang di huria. Molo sian bulus ni roha do tapelehon ngolunta di panghobasion di huria nang di masyarakat ndang adong be maksud dohot motivasi na asing disi. Ala ni i tatiru ma pambahenan ni si Barnabas i, na mamelehon dohot na pasahathon tu Tuhan i dibagasan bulus ni roha.

 

3. Pajongjong parsaoran na masihaholongan.

Masihaholongan dibagasan parsaoran mansai ringkot situtu do i, molo soada holong marisuang ma tujuan nang kebersamaan. Siala ni i mansai ringkot do holong  masihaholongan, di rumatangga, di parsaoran, di parkarejoan, di masyarakat nang di huria pe tarlumobi. Na masihaholongan gabe identitas ni halak na porsea. Pajongjong parsaoran di tonga ni huria ima marhite semangat na masihaholongan, songon panindangion ni Jesus Kristus Tuhanta i. Ala ni i adong ma 3 point siingotonta laho pajongjong parsaoran na masihaholongan:

Ø  Uasan disusu na tama.

Siala naung masuk do hita nuaeng di Minggu Quasimodogeniti, lapatanna songon na tarsurat di 1 Petrus 2:2 Songon posoposo na imbaru tubu, uasan ma hamu di susu na tama, na so marlaok, asa lam magodang hamu, horhonon ni i, bahen haluaon. Di minggu on naengma patuduhononta parange nang pangalaho songon posoposo na uasan di susu na tama, ndang marlaok dope, alai polin do Hata ni Debata mangolu dibagasan dirinta. Sai uasan dope hita di Hata ni Debata so padohot angka logika, pikiran, alai haporseaon na mangolu di Hata ni Debata sambing do laho mangonjar rohanta masihaholongan. Mansai ringkot do di hita sipanganon pardagingon alai ndang holan i na gabe hangoluan. (Matius 4:4 Alai ninna ma mangalusi: Na didok Surat i do: "Apala holan sipanganon hangoluan ni jolma; tung nasa hata ni Debata do, na ro sian Ibana!)

 

Mansai ringkot do di hita hangoluan, petunjuk arah, palito asa tigor jala sintong dalan na tadalani, unang gabe lilu, ala ni i uasan ma hita di susu na tama. Marhite i ma mangolu haporseaonta laho bulus ni roha, ias ni roha laho pajongjong parsaoran na masihaholongan.

Ø  Holong Agape.

Silang na di dolok Golgata ima sada bukti ni holong na sian Debata. Tagoar i ma i Holong Agape, ima sada identitas ni angka na porsea dohot angka siseanNa. Halak mananda hita ima marhite holong, ndanda sian paheanta, manang sian parmingguonta si ganup minggu, ndada ala ni sian pangkataionta sambing manang sian Hata ni Debata na taapil ganup tingki, ndada sian jabatan manang kedudukan di pelayanan huria. Holong Agape gabe identitas angka na porsea na olo marsaor, mardongan, na ungkap rohana manghaholongi Debata dohot manghaholongi dongan jolma. Sian na nionjar ni holong ni Debata ma manjou hita marasi ni roha tu angka na mangharinghothon pangurupion. Masilehonlehon tu na hurangan, masisesaan dosa, dohot masiurupan. Mansai balga do asi dohot holong ni roha ni Debata tu hita, ndang tarbalos hita i, holan na mangulahon haholongon ima ulonta. Holong ni Debata ima Holong Agape tu saluhut jolma. Hita do na mardabudabu tu Tuhan i (mempertanggung-jawabkan iman) di haporseaon na ta hatindanghon marhite ulaon haholongon i.

Ø  Tapadao ma pangalaho na manegai parsaoran di huria

Molo naeng sada rohanta ditonga nihuria, taorom ma rohanta, sangkapta sian pangalaho, na hurang roha, na mangkaholongi pargulutan, halak na patimbo pintuna mangalului hamagoan, na geduk marroha, jala halak pardila getegete, (epistelta; Poda 17:17-20).

Martua ma hita na sa roha di tonga ni huria  ni Tuhanta; masitumpahan, masiurupan, masiaminaminan siala naung jumolo tajalo asi ni roha ni Tuhanta i. (Poda 17:17 Manang ise na tongtong marholong ni roha, i ma aleale, alai tartulluk di hagogotan pe ianggo dongan situtu).

Martua ma hita jala marlas ni roha naung mangolu di ulaon na uli na denggan, mangasiholi parsaoran na rosu, sada dibagasan parguruan, partangiangan, sada roha mamuji Tuhanta, dohot na mamelehon diri nang ngolunta jala rap marhobas, mangolu dibagasan Hata ni Debata. Amen.

 

Jamita Minggu PASKAH II (Parningotan haheheon ni Tuhan Jesus) - 5 April 2021

“MANDOK MAULIATE SIALA HALUAON NA SIAN TUHAN”/

(BERSYUKUR  ATAS KESELAMATAN DARI TUHAN)

EV. Psalm 136: 1 – 10                                   EP. 1 Korint 15: 1 – 11  

 

Di hita nahinaholongan, SELAMAT PASKAH II ma di hita saluhutna.

Saluhutna hita mansai mura do mandok mauliate molo disituasi na denggan, alai boha ma molo sahat tu hita situasi na so denggan, jala tarbalik sian na taarop hian; ro angka hamaolon, hapariron, angka masalah, panaritaan, maol ni parhepengon, parsahiton, harugian, dohot angka hasusaan na asing, boi dope tardok hita mauliate tu Tuhan i ?

Di na mandali ari ari ni ngolunta, ndang sai sude tabolus dibagasan dame nang las ni roha, alai sai olo do tabolus angka hamaolon songon galumbang ni laut i, ro angka habahaba, angin na doras, ambolas. Saluhut jolm ai pe diboto do  parhusoran ni ngolu on songon sorha ni padati i do, sipata di toru mansa ihansit manuhuk na borat i, pola do tumatangis ala ni boratna, mangae hinabernit sitaonon i, boi do manghorhon arsak nang pandelean. Dungi sorha i pe boi do marhusor ditongatonga, ndang apala hansit be diae nunga songon na moru boban i saotik. Dungkon i marhusor ma muse sorha i tu ginjang, ngolu na pe songon na lumbang panghilalaanna, gok hasonangan, las ni roha dohot gogo na imbaru dapotna.

 

Angka jolma jotjot do menuntut tu Debata asa sude pangkirimon nang sihol ni rohana ta i diparade, alai molo ndang sesuai gabe mura ma hita mandele, ja muruk tu Debata. Gabe so lomo be rohanta martangiang, ndang olo be hita mamuji Tuhan i, jala laos so olo be hita marminggu. Mansai maol tahilala ariari ni ngolunta, jala boi do manegai haporseaonta, gabe trabolus ma dalanta sandiri hombar tu pingkiranta, hape ndang sintong na tabolus i jala ndang dibagasan lomo ni roha ni Tuhan i.

Ai didok do di 1 Tesalonika 5:18 Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus.

marhite i disosoi do hita asa tongtong mandok mauliate ala ido na hinalomohon ni Debata sian hita. Na deba gabe mansai maol do dihilala mandok mauliate, siala mamingkiri na so adil Debata tu ngoluna jala ndang dilehon pasupasu na godang i hilalaonna. Laos boi do ala ni angka parsualon na so marna sae sahat di ngoluna.

Ala ni i aha do sibahenonta asa sai tongtong hita mandok mauliate ?

 

Marhite turpuk on adong ma tolu point sipahusorhusoronta asa la malo hita mandok mauliate:

 

1.    Naparjolo; Manghilalahon asi dohot holong ni roha ni Debata na paluahon hita.

I Kronika 16:34 Mandok mauliate ma hamu di Jahowa, ai na basa do ibana, ai ro di saleleng ni lelengna do asi ni rohana i.

Johanes 3:16 Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.

Mansai holong do roha ni Tuhan i tu hita angka ianakhonNa, ima barita hasintongan tu angka na porsea. Alai mansai torop do halak na porsea i manghalupahon i ala las ni rohaNa holan disi do ndang apala sahat tu na hona harugian, hamaolon di parhepengon ndang apala dohot disi rohana mandok mauliate. Sipata mandok mauliate molo malua sian saluhut hamaolon di ngoluna. Hape na mandok mauliate on di haporseai ndada holan ala ni na nilehon ni Debata na ringkot di parngoluan on alai naung dohot do hita marnampunahon dibagasan Ibana. Ala ni i las ni rohanta ndada sian sadia godang sere, perak, nang arta portibi on alai sadia bagas ma tatanda asi dohot holong ni roha ni Debataa marhite panghophoponNa i di hau pinarsilang i tu hita.

2.    Napaduahon; Manghilalahon sude angka na masa di portibi on ndang dao sian sangkap ni Debata. Rom 8:28 Alai taboto do, saluhutna do manumpak tu na denggan di angka na marholong ni roha di Debata, angka na jinouna sian tahina hian. 1 Musa 50:20 Na jat do nian tutu tahi ni rohamuna dompak ahu, alai na denggan do hapatean ni dibahen Debata, patupahon songon na niidamuna sadari on, laho pangoluhon bangso na bolon.

Unang be holsoan hita, taingot ma sai na tioponNa dosude angka parhusoran ni tingki. Molo ro pe angka na bernit i ndada na laho manegai ngolum tujuanna alai laho patoguhon haporseaonmu do.

Mansai jotjot do panatapan sihatoropan di angka hamaolon nang sahitta sian sudut pandang negatif, asi rohana ala ro sahit nang hamaolon. Alai sasintongna na diajari Tuhan i do hita disi ro angka sahit nang hamaolon i. Taingot ma na nidok hata ni Tuhanta di Pangungkapon 3:19 Ai nasa na huhaholongi, angka i do hupinsang jala huajar. Antong, haringkothon ma na paubahon roha! Asa ajaron ni Tuhan i do hita sian angka sitaonon nang na bernit i laho mangalatih hita lam margogo, jala boi manghamonanghon hamaolon i. Porsea ma hita disi sai pangkeon ni Debata do angka na masa i na uli manang na so denggan pe i laho manumpahi ngolunta.

KJ. 408 DI JALANKU 'KU DIIRING

Di jalanku 'ku diiring oleh Yesus Tuhanku.

Apakah yang kurang lagi, jika Dia Panduku?

Diberi damai sorgawi, asal imanku teguh.

Suka-duka dipakaiNya untuk kebaikanku;

Suka-duka dipakaiNya untuk kebaikanku.

 

3.       Napatoluhon. Marhte na mandok mauliate boi do manghorhon hamenahon dohot las ni roha.

Pilipi 4:6 – 7  Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate! Jala dame ni Debata na sumurung sian saluhut roha, i ma mangaramoti angka ateate dohot pingkiranmuna di bagasan Kristus Jesus. Jotjot do dai tapingkiri ia hasonangan ima dalan asa mandok mauliate, hape na sintong ima , molo sidok mauliate hita ima dalan asa marhasonangan ngolunta. Uju tapillit asa mandok mauliate tu Debata lapatanna asa marsihohot do hita mamereng tu adopan ni Debata ndada mamereng tu adopan ni angka hamaolon nang angka na bernit i.

Mansai mura do hita paboaboa angka na maol, nagka na bernit, angka sahitta tu loloan, ndada paboaboa angka na uli na denggan na pinasahat ni Debata tu ibana. Marguru ma hita sian na sai tongtong mandok mauliate di na mamolus habahaba nang sitaonon di ngolunta on. Sandok sai mandok mauliate ma diganup tingki, molo sai maol do pe dapot rohanta, molo hansit dope tahilala, tapasohot ma laho marmungutmungut dohot mandele. Unang buhai i ungutungut i laho gabe dalan ni si Bolis manjehehon hita, jala mambuat las ni rohanta.

Lam malo ma hita mandok mauliate sian na manghamauliatehon na otik sahat tu na godang. Haposan di na otik laos haposan nang di na godang. Sidok mauliate naung dipasupasu Tuhan i di hita hahipason, hagogoon, nagka ulaon na denggan, sidok mauliate di sipanganon nang siinumon na pinaradena tu hita ganup ari.

 

 

 

 

 

 

a.       Mandok mauliate do hita ndada ala soada angka hamaolon nang parsualon, alai sidok mauliate do hita ala sai dongananna do hita laho mamolus angka i sude. Didok Immanuel; sai didongani Tuhan i ma hita/ Tuhan selalu beserta kita. Didongani do hita laho mangadopi sitaonon, nang angka hamaolon na masa diadopanta, asa tartaon hita jala tartuhuk hita i sudena. Rom 6:9 Ai taboto do, na so mate be Kristus, dung mulak mangolu sian na mate; ndang dirajai hamatean i be Ibana.

a.

Hitana hinaholongan dibagasan Jesus Kristus, na tapestahon do parnigotan ari Haheheon ni Tuhan Jesus  (Paskah II). Boai so gabe sungkunsungkun di rohanta; Boasa gabe dua hali hita patupa parnigotan ari hamamate ni Tuhan Jesus (paskah II) ? Alus na ala sai las dope rohanta marningot i, balga ni rohanta do i, jala mandok mauliate hita di pambahenan ni Tuhani . Laos dos do i dohot ulaon pesta parningotan di hurianta HKBP di Natal dohot Hasasaor ni Tondi parbadia (Pentkosta) tataringoti do i pola 2 hali, marasing dohot angka huria na asing holan sahali. Jadi saluhutna i ala las ni rohanta, jala ingot dope di hita angka parningotan i. Ndang bulus boti mago di rohanta nang panghilalaanta, alai asa arga ma i saluhut pambahenan niDebata tu hita jolma na hinaholonganNa.

Laos songon i do parningotan paskah II on di hita, marlas ni roha ma hta naung Hehe Kristus i, mangalehon hagogoon, semangat juang di ngolu siganup ari, mangalehon percaya diri, pahisarhon sahitta, asa malum hita hilala. Sai na hot do holongna tu hita, sai masa dope angka halonganganna i di hita, sai marhamonangan mahita maralohon sumbia ni portibi on dohot manaluhon huaso ni sibolis i. Jesus kristus nanung ehe i manaluhon hamatean nang sibolis i  pos ma rohanta disi, ndang be ganggu rohanta, ndang be mabiar hita nang di situasi pandemic on. Sai lehononna do gogo nang dalan tu hita asa malua hita sian angka parmaraan. Amin.

Jamita Minggu PASKAH I (Parningotan haheheon ni Tuhan Jesus) - 4 April 2021

“HUASO HAHEHEON NI TUHAN JESUS” /

(KUASA KEBANGKITAN TUHAN YESUS)

EV. Markus 16: 9 – 18                                   EP. Johanes 20: 1 – 10  

 

 

16:9 Alai anggo Jesus, naung mulak mangolu, sogot di ari parjolo dung ari Sabbat i, dipataridahon do dirina jumolo tu si Maria Magdalena (sian i do dipabali najolo pitu sibolis).

16:10 Jadi laho ma i paboahonsa tu angka na mandongani Ibana najolo, angka na marsak jala tumatangis.

16:11 Alai ndang porsea nasida, naung mangolu jala naung diida si Maria Ibana.

16:12 Dung i dipataridahon Ibana muse dirina tu dua halak sian nasida, marrupahon rupa na asing, di na laho marhutasada nasida.

16:13 Jadi dohot ma nasida ro mamaritahonsa tu angka donganna i; alai nang nasida, ndang dihaporseai.

16:14 Dung i muse uju hundul nasida mangan, dipataridahon ma dirina tu na sampulusada i, dipinsang ma ganggu dohot jogal ni rohanasida, ala so porsea nasida di angka naung marnida Ibana, naung hehe sian na mate.

16:15 Jadi ninna ma mandok nasida: Laho ma hamu tu liat portibi on; jamitahon hamu ma barita na uli i tu nasa na tinompa.

16:16 Na porsea jala tardidi, dapotan haluaon; alai na so porsea i, hona uhum do!

16:17 Jala on ma tanda angka na mangihut tu na porsea: Pabalionnasida do angka sibolis marhitehite Goarhu dohot mangkatahon hata na imbaru.

16:18 Jomputonnasida do angka, ulok, jala nang diinum rasun hamatean, ndang pola mahua nasida; ampehononnasida ma tanganna tu angka na marsahit, gabe malum ma hilalaonna31:8 Sai marolopolop jala marlas ni roha ma ahu bahen mida asi ni roham, na tinatapmu dangolhon, na marbinoto i Ho di angka hagogotan ni tondingki.

 

 

 

 

 

Huria na hinaholongan Tuhanta Jesus Kristus, SELAMAT PASKAH ma di hita saluhutna. Tangkas do dipatorang dibagasan turpuk on dungkon Hehe Jesus sian na mate, di buhabuha ijuk i di minggu i, di patuduhon Ibana do diriNa tu si Maria Magdalena. Dibagasan sejarah ni huria ia Maria Magdalena ima halak na parjolo pajumpang dohot Jesus naung hehe i. Ndada tu InaNa si Maria jumolo di patuduhon Ibana diriNa, ndada tu angka siseanNa songon si Petrus alai tu si Maria magdalena. Ndad sahat pikiranta tu si Maria Magdalena. Dibagasan bibel i adong do dipaboa ponom halak na margoar si Maria:

1.       Maria Ina ni Jesus

2.       Maria sian huta Betania ima pariban ni si Marta dohot iboto ni si Lazarus.

3.       Maria inong n si Joses (Mark.15: 47)

4.       Maria Innong ni si Jakobus dohot si Johannes (Mark.16: 1)

5.       Maria parsinonduk ni si Kleopas (Ioh.19: 25)

6.       Maria Magdalena sian Huta Magdala, adong ma 15 hali di paboa di Bibel i, onom hali dipaboa goarna sambing jala sia hali dipaboa mardonganhon angka ina na asing.

 

Ia si Maria magdalena on ima songon uluan ni angka parompuan hatiha i songon si Petrus na manguluhon angka sisean i. Naparjolo, tasulingkiti ma taringot tu si Maria Magdalena. Dibagasan Bibel i ndang pola godang dipaboa taringot tu baritana. Holan sian huta Magdala ima sada huta na metmet di luat Galilea. Parjolo dapot hita goarna di Lukas 8: 2, ditingki dipabali Jesus pitu tondi na hodar na manggugai ibana. Dunghon dipahisar Jesus, parompuan na parjolo ma ibana marhaporseaon. Andorang so mananda Jesus, ibana sahalak parompuan na so denggan (Luk.7: 37 sahal parompuan pardosa). Ndung porsea ibana tu Jesus, sai diingot ibana do Jesus na paluahon ibana jala balga ni rohana laho mangalehon na dumenggan tu Jesus. Sian naung ditanda ibana Jesus sahat tu hau pinarsilang, ditanom jala hehe Jesus sian na mate, sai diparrohahon ibana do Jesus, pangalaho si Maria on na patuduhon dihaholongi ibana do Jesus.

Napaduahon, marsiajar hita sian si Maria na manghaholongi Jesus. Sai ditumpahi si Maria do ulaon ni Jesus nang di pelayanan sian angka sinamot (Luk.8: 3). Ibana doohot angka donganna parompuan sai mangalehon rohana laho manumpahi ulaon ni Jesus marhite angka arta nasida. Songon hasomalan ni halak Jahudi hatiha i, angka parompuan i ndang boi sai manghobasi Jesus secara langsung ido umbahen sian parhepengon ma diurupi nasida Jesus. Marhite barita si Maria Magdalena i na mangonjar rohanta asa ringgas mangurupi, jala mamparrohahon angka na ringkot di tonga ni hura nang di angka pangula ni huria. Marhite ma angka parompuan tarjou sai ringgas masilehon-lehon dohot sian las ni roha dohot ias ni roha manumpahi  ulaon di tonga ni huria. Marhite i na mandok mauliate ma hita di Tuhan Jesus naung manobus angka dosa nang pangalaosionta. Tapatuduhoon ma roha mauliate di angka tumpak na tapasahat di ulaon ni huria. Tumpak tu pembangunan huria, tumpak tu diakonia sosial huira nang tumpak dana pensiun HKBP.

Sian holong ni si Maria Magdalena on sahat tu na tarsilang Jesus i, sai hot do  holongna i tu Jesus i (Mat.25: 56; Joh.19: 25). Uji na tarsilang i Jesus, holan pitu ma angka ina na niuluhon si Maria Magdalena dohot angka apostel na hinaholongan ni Jesus ima si Johannes na di toru silang ni Jesus i. Angka sisean i ndang tarida be.

Napatoluhon, Dibereng si Maria Magdalena sandiri do naung ditanom i Jesus. Molo taparrohahon moloo adong na monding, ndang apala sude olo manaruhon bangke na mate i sahat  tu parbandaan, mansai godang do sidalian, nang kesibukan umbahen so pola sahat dipataru tu udean bangke ni na mate i. Alai sian pangalaho si Maria Magdalena na pataruhon bangke ni Jesus sahat tu udean i, bagas ni holongna tu Jesus. Sai hira na so olo sirang ibana sian Jesus i. Sai di panotnoti do tanoman ni Jesus i. DI Markus 16 dipaboa, naeng do pasahathononna angka ragamragam na hushus tu bangke ni Jesus i, ala so sanga hatiha i nasida mamiahi pamatang ni Jesus. Sangkapna laho patulushon sangkapna. Balga niholongna tu Jesus mansai bagas. Dungkon sahat ibana tu tanoman i, dibereng ibana ma naung buha batuu i sian tanoman ni Jesus jala ndang disi be bangke ni Jesus. Na sahat dipingkiranna naung dibuat na mambuat bangke ni Jesus asa gabe hatop marlojong si Maria tu Jerusalem paboahon tu si Petrus dohot si Johannes. Petrus dohot si Johannes sigop ma laho tu tanoman i mamereng  bangke ni Jesus dungkon i mulak muse tu Jerusalem alai ndang jumpangsa Jesus i. Jala sai tumatangis ma nasida dompak tanoman ni Jesus i. Dungkon i dibereng nasida ma dua surusuruan na manungkun nasida: boasa ho tumatangis ? Dialusi si Maria ma, adong na manangko bangke ni Jesus. Ditingki i ndang diingot si Maria na nidok ni Jesus uju i, ia na hehe do anak ni Jolma i sian na mate di ari patoluhon.

Jala Ibana do haheheon dohot hangoluan i (Yohanes 11:25). Disi dijou Jesus goar ni si Maria

 

Jalo dibereng si Maria ma Jesus i, jala naung diantusi jala ditanda ibana Jesus i naung hehe do hape .

Dungkon i dipataridahon Jesus ma dirina nuaung hehe i tu angka siseanNa na sampuludua i, asa porsea di Hatana jala ndang ganggu be rohanasida. Ia haheheon ni Jesus ndang holan hata alai sintong do Anak ni Debata naung hehe sian na mate. Sintong do baritana Hehe sian na mate laho manaluhon hamatean i. Asa dipataduhon pe diriNa tu angka sisean i sada bukti nyata jala laho mangajari angka seseanna mar pos ni roha jala marhaporseaon na togu. Asa ima bohal na sida laho marbarita na uli tu sandok portibi on.

Angka na porsea jala manjanghon Jesus Sipalua ibana, gabe mangalehon dirina asa dididi. Mahite pandidion i na patuduhon hasadaon ni ngoluna di hamamate dohot di haheheon ni Jesus. Sahali do Jesus i mate humonghop hita jolma pardosa dohot portibi on, asa malua hita jala parjambar di hangoluan na so ra suda i, ima na di surgo i. Jala sahali do pandidion i tu na manjanghon Jesus i ndada dua hali. Sahali do mate Jesus (ex hapax) sahat ro di salelengni lelengna.

Saluhut angka na porsea i manuhuk sada ulaon asi ni roha na sian Jesus i laho pararthon barita na uli. Jala impola barita na  uli i, ima taringot naung Hehe do Jesus i. Molo so hehe Jesus i, marisuang ma pamaritaon ni sude angka parbarita na uli i.

Angka na porsea na mangashon hagogoon ni Jesus i, gabe marhuaso laho pabalihon angka na marsahit, angka sisean i pe na gabe apostel digoari lam marbisuk jala margogo do di na laho mamaritahon Barita na uli. Ai naung ditumpahi do angka sisean i marhite gogo na sian Tondi Parbadia asa ndang mabiar jala tahutan apostel i, sabalikna lam militan jala barani manghatindanghon hajngjongan ni hatigoran barita na uli i.

Laos i ma ulaonta angka na porsea di Jesus Kristus i, asa tapangashon ma Tondi Parbadia i manguluhon hita laho mangulaon ulaon pararathon barita na uli i. Ndang mabiar be angka na porsea i di angka hamaolon, na bernit, parsahiton nang hamaolon masa di adopanna. Bolusonna luhutna i marhitehite huaso ni Tuhan Jesus naung hehe i. Amen.