NDANG MANSOHOT MARTANGIANG
(Tetap Berdoa)
Kolose
1 : 9 – 14
1.
Huria
ni Tuhanta na hinaholongan, hajojongjong ni huria Kolose ndada marhite si
Paulus, jala si Paulus san-diri ndang hea dope mangebati huria i. Ndang apala
tangkas dipaboa manang na ise pajongjong huria i. Alai torop mandok si Epapras
do pajongjonghonsa (patudos ayat 7). Didok si Paulus dongan saulaonna do ibana,
jala sahalak parhalado ni Kristus na haposan na olo humophop huria i. Na ro do
si Epapras mandapothon si Paulus pabotohon angka na masa di huria huhut mangido
pangajarion sian ibana songon dia mangadopi angka hamao-lon dohot mara na tubu
dibagasan, lumobi ma i, siala haroro ni angka parpoda haliluon. Dung dibege si
Paulus laporan ni si Epapras i, manigor taronjar do rohana manongos: surat tu
huria Kolosse, nang pe hatiha i tongon di bagasan hurungan do ibana (torop
halak mandok i ma di huta Roma). Di bagasan surat i dipabotohon ibana do
tangiangna na mamboan huria i tu Debata. Jala laos di patorang dope umbagas
poda taringot tu Kristus dohot ulaon Na paluahon jolma sian haholomon dohot
dosa, asa tongtong nasida marsihohot di poda na sintong i, unang muramura
dipaotooto angka parpoda haliluon.
2.
Turpukta
on ima tangiang ni apostel i maradophon huria i. Mansai arga do tangiang i nang
di hita, ai laos diajari i do hita taringot tu isi ni tangiang. Di-mulai do
tangiang i dohot pangidoan asa digohi Debata huria i dohot pantas ni roha,
habisuhon dohot hapistaran, ima na patauhon halak Kristen i, mar-parange na
tama di Tuhan i dohot mananda lomo ni roha ni Debata (ayat 9-11). Alai angkup
ni isi ni tangiangna i, laos dipaingothon apostel Paulus do huria i, asa
tongtong diboto manghamauliatehon silehonlehon haluaon na pinatupa-ni Debata
marhite anakNa Jesus Kristus (ayat 12-14)
3.
Ayat
9-11 Nang pe so si Paulus pajongjong huria Kolose, jala nang pe so hea dope
ibana sian i, alai disi dibege ibana barita ni huria i manigor ndang mansohot
ibana manangianghonsa. I ma pataridahon holong ni rohana di sude huria, holong
ni roha na mabaor sian Jesus Kristus. Tung to hea do holan dirina
ditangianghon, alai sai marpusat tu ngolu ni huria i do langiangna. Songon i do
nang dihirim rohana ngolu ni saluhut halak Kristen i, unang ma holan dirina
ditangianghon, alai naeng ma masitangiangan.
4.
Isi ni tangiang ni si Paulus i, ima:
Ø Parjolo, asa digohi
Debata di huria i pantas ni roha marhite nasa hapistaran dohot habisuhon
partondion mananda lomo ni roha ni Debata. Di ngolunta on, ingkon sai
marsiajari do hita mananda lomo ni roha ni Debata. Sasaran utama ni tangiangta
pe mananda lomo ni roha ni Debata do. Di baga. san tangiangta unang ma tauji
asa gumodang Debata manangihon hita, alai tauji ma gumodang manangihon Debata.
Di bagasan tangiang unang ma tau-ji mamaksa Debata pasauthon aha lomo ni
rohanta, alai tauji ma mamereng dia lomo ni roha ni Debata siulahononta. Songon
na tarida di tangiang na nj ajarhon ni Tuhan Jesus, di tangiangta pe ingkon
lomo ni roha ni Tuhan i do na saut. Laho mananda lomo ni roha ni Debata, mansai
ringkot do "habisuhon dohot hapistaran partondion".
Habisuhon partondion (sophia), i ma habisuhon na ro sian Debata
laho mangantusi hasintongan na pinapatar ni Debata tu hita. Mansai maol do
mangantusi hasintongan ni Debata, ala mansai godang do soara-soara di humaliang
hita na tong mandok ibana do hasintongan i. Ala ni porlu do di halak Kristen hatauon
laho mambedahon dia do hasintongan, dia gabus. Hapistaran partondion (sunesis)
i ma hatauon laho manghonahon aha na nidok ni Debata tu bagasan parngoluan
siganup ari. Ndada sae holan umboto hasintongan dohot lomo ni roha ni Debata,
alai ingkon tau do hita manghona-hon i tu angka soal na taadopi siganup ari.
Ø Na paduahon isi ni tangiang i
ima, asa marparange na tama angka halak Kristen, huhut marparbuehon nasa ulaon
na denggan. Parbinotoan di lomo ni roha ni Debata ingkon gabe patauhon hita ma
i marparange na tama di jolo ni Tuhan i. Parange na tama ima parange halomoan
ni Tuhan i jala na marparbuehon angka ulaon na denggan. Jadi ndang sae holan
botoon secara intelektual lomo ni roha ni Tuhan i, alai ingkon parangehononta
do di ngolu siganup ari. Sude aspek ni ngolunta, sude hata dohot ulaonta,
ingkon gabe halomoan ni Tuhan i do. Molo mangolu hita di bagasan halomoan ni
Tuhan i, i ma di bagasan haunduhon tu Tuhan i, tarpar-buehon hita do nasa ulaon
na denggan, jala lam ganda panandaonta di Debata. Songon hau na denggan na
marparbuehon parbue na denggan mangalehon pangomoan dohot las ni roha ndada tu
dirina, songon i do hita mangulahon na denggan mamboan pangomoan dohot las ni
roha tu halak na asing. Angkup ni i di na marparangehon halomoan ni Tuhan i,
lam donok do panandaonta di Debata, jala lam donok parsaoranta tu Debata.
Ø Patoluhon, i ma asa
dipargogoi Debata huria i marhite sude gogo ni hasanga ponNa i. Ndang tarbahen
hita mangula ulaon na denggan na gabe halomoan ni Tuhan i anggo sian gogonta
sandiri. Ingkon na pinargogoon ni Debata do hita mangulahon i. Ala ni i do
umbahen na dipangidohon si Paulus tu Debata angka na gale do hita, lumobi
mangadopi hamaolon dohot sitaonon. Alai asa dipargogoi Debata huria Kolose,
Suang songon halak Kristen na di Kolose Debata gok hagogoon dohot huaso do,
jala dilehon do hagogoonNa i tu angka halak na di Ibana.
5.
Huria
ni Tuhanta, hagogoon na pinangido ni si Paulus, ndada apala hagogoon fisik,
manang hagogoon laho patupa angka hal-hal na luar biasa sihalonganghonon,
hagogoon parbagasan do, i ma na patauhon hita marhabengeton dohot marlambas ni
roha mardongan las ni roha di bagasan sitaonon, songon i dohot mangadopi angka
poda na sala dohot pangaleleon. Molo ro parungkilon, asa unang mura hita
mandele, jala unang mura maninggalhon haporseaonna. Ala maralo (berjuang) do
hita di portibion mangalo musu ni haporseaon na ro sian duru dohot sian bagasan
dirinta. Sian duru boi do i marrumang angka parpoda haliluon, ro di angka tondi
ni Zaman. Na ro sian bagasan boi do i marru-mang ginjang ni roha, roha diri
(egoisme), pangiburuon, late, da n, Sudena i ing-kon sitaluhononta do. Jala
laho manaluhon i ma porlu hagogoon, hagogoonna patauhon hita marbenget ni roha
dohot malambas ni roha. Marbenget ni roha lapatanna marsihohot di bagasan
haporseaon na ingkon dapot hamonangan. Manang boha pe borat ni parungkilon
dohot hamaolon siadopanta, ndang jadi hita menyerah. Angkup ni i ingkon adong
do di hita lambas ni roha, nang hasabaron. Nang pe leleng paraloanta di
portibion, ndang jadi sumurut hita, alai torus do hita marjuang. Nang pe godang
pangunjunan, ndang jadi mura hita mandele.
6.
Ayat
12-14 Dung dipabotohon si Paulus tangiangna i, diarahon ibana ma halak Kristen
na di Kolose mandok mauliate tu Ama i, mangha-mauliatehon sude angka
paruntungan na dijalo di bagasan Kristus. Ndang sonang roha ni si Paulus molo
holan ibana do na mandok mauliate tu Debata. Dihalomohon rohana, ingkon sude do
hita halak Kristen umboto mandok mauliate tu Debata, manghamauliatehon
pambahenan na i, i ma:
ü Parjolo, Na patauhon hita
manjalo tohap na di bagasan hatiuron i, siteanon ni angka na badia. Na di
bagasan haholomon hian do hita, alai marhite Jesus Kristus ditogu do hita sian
haholoman i tu hatiuron. Ndada holan halak Jahudi be targoar bangso na pinillit
ni Debata. Alai marhite Jesus, sude bangso nunga tarjou partohap gabe bangso ni
Debata. Didok apostel Paulus, tohap i, i ma sitaonon ni angka na badia. Huria
ni Jesus Kristus, i ma huria na badia lapa-tanna, huria na pinapulik jala na
ginomgoman ni Kristus. Habadiaon ni huria i, ndada na ro sian dirina, alai na
hinorhon ni habadiaon ni Kristus ulu i do.
ü Paduahon, mangaroro hita
sian haholomon i jala paunsathon tu bagasan ha-rajaon ni Anak haholongan ni
rohana. Dison dipatudos si Paulus do tu panga-laho na somal di parporangan, Na
jolo molo monang sada harajaon manaluhon harajaon na asing, hasomalon do di na
monang paunsathon pangisi ni luat na talu i tu luat ni na monang i. Tiruanna,
di tingki ditaluhon harajaon Babel i harajaon Juda 9,C, dipaunsat harajaon
Babel do pangisi ni Juda tu Babel. Songon i ma digambarhon si Paulus dison.
Marhite hamonangan ni Jesus di silang i, dipaunsat Debata ma hita sian gomgoman
ni haholomon i tu bagasan harajaon Na. Dipaunsat sian parhatobanon tu haluaon.
Dipaunsat sian uhum tu hasesaan ni dosa. Dipaunsat sian gomgoman ni sibolis tu
gomgoman ni Debata. Marhite hatorangan i dipaingothon Paulus do balga ni
basabasa na tajalo marhite pambahenan ni Jesus. Manang ise naung marnampunahon
Jesus, nunga marnampunahon hasesaan ni dosa. Jala manang ise naung dapotan
hase. saan ni dosa, nunga dapotan sude silehonlehon dohot haluaon sian Debata.
I ma na patut tongtong hamauliatehononta tu Debata. Ndang jadi porsoonta, lumobi
ndang jadi parsoadaonta basabasa ni Debata di ngolunta. Amen.
