Jamita Evangelium, Minggu I D.Trinitatis, 07 Juni 2026

GURU DI DEBATA DO PORTIBI ON RO DI NASA ISINA

(Dunia Dan Segala Isinya Adalah Milik Tuhan)

Psalmen 50 : 7 – 15

 

a)             Huria ni Tuhanta na hinaholongan, lam tamba do bilangan ni jolma manisia. Di jaman ni Israel, torop do angka bangso na dihumaliangna. Holan Israel do gabe bangso pilihan ni Debata. Ia bangso na dihumaliangna ima angka na manomba debata gana ganaan. Parsombaon ni angka bangso sileban I somalna do mamelehon sipeleonna marhite angka sipanganon na dumenggan. Jala dia ma na terbaik dilehon jala dipelehon tu debata sisombaon nasida. Adong do tradisi ni halak Israel mamelehon pinahan dohot pidong tu Debata di Bagas Joro di Jerusalem, sarupa tu tradisi pelean ni angka ugamo Timur Dekat najolo. Boi do pangalaho hasomalan I na mangelaela nasida asa mangarajumi na sarupa do haporluan ni Debata ni Israel dohot angka debata ni parugamo na asing. Jadi dipatandahon Debata ni Israel ma muse diriNa:

Ø     “Sai tangihon ma, ale bangsongku, Ahu Debata do Debatam”.  Ringkot do sai ingoton nasida ai ndang dos Debata ni Israel dohot angka debata ni bangso na asing.  Naung sala mangantusi do  nasida di na pasahathon pelean tu Debata. Songon na mangurupi, jala mangasii Debata do nasida. Lupa do nasida na so porlu Debata urupan jala asian. Ndang ringkot di Debata pelean sian nasida ala Ibana do nampuna saluhut na adong di tano on.

Ø      “Ndang nian pola sian jabum Ahu mambuat lombu, manang hambing sian angka baram. Ai guru di Ahu do sude hewan ni harangan, pinahan na marriburibu angka na di dolok pe. …Tung sura male Ahu, ndang pola tu ho Ahu mangalualu, ai guru di Ahu do liat portibi on ro di isina” (9-12). Debata do na manompa saluhutna, jala ala ni i, Ibana do nampunasa saluhut na adong di tano on. Ndang marsigantung Ibana tu pelean materi sian jolma laho manggohi haporluanNa, isara juhut manang mudar ni pinahan. Jadi aha do na dipangido Debata sian bangsoNa? Na dipangido Debata sian bangsoNa ima roha na mandok mauliate di sude denggan basa dohot asi ni rohaNa. Adong do halak na mangalehon pelean ndang alani na mandok mauliate tu Ibana, alai baliksa ala naeng manghirim.

Ø     Tung panganonku ma juhut horbo tunggal manang inumonku mudar ni angka hambing? On ma sada sungkunsungkun laho pahothon pangantusion nasida. Sopola ringkot di Debata manganhon sipelehonon nasida i. Ala sian Debata do I sude na pinelehononna I, ai Debata do na manompa I laho tu hasonangan ni jolma, ndada tu Debata. Diparhuriaon pe sikap sisongon on ingkon sijamothononta asa unang madabu tu sikap na naeng “menyogok” Debata. Dirimpu do molo lehonon baga tu Debata asa umbalga pasupasu ni Debata jaloona. Manang baliksa otik ehononna alai mangarop pasupasu na godang sian Debata. Pola pikiran nang mindset ni haporseaon na sisongon on porlu sipatureon di tongatonga ni ruas nihuria. Naneg ma tapelehon peleanta ala nionjar ni haporseaon.

Ø     Pelehon ma tu Debata hamauliateon, jala garari ma angka bagabagami tu Natumimbul. Dison ma diajari Debata bangsona I laho mamaelehon na terbaik tu bangsona I asa diingot mandok mauliate di pambahenan ni Debata. Sipata lupa do ruass ni huria pasahathon hamauliateon ni rohana. Jala hurang mandok mauliate, hurang bersyukur tu Debata. Pola do sahat tun a mangholit laho pasahathon silehonlehonna di punguan ni huria, nang tu huria I sandiri. Ai so diboto magona, gabe godang do ragam hasusaan na binahen ni Debata di angka halak na sai mangholit tu huria, hape sibahenonna mansai otik, arta godang alai silehonlehonna tu huria mansai otik. Boi dibahen Debata dalan sian na asing asa sadar diri nasida; isaran sahit panahit, musibah, nang ragam hasusaan manghorhon harugian bolon. Ala ni garari ma tu Debata bagabagami. Unang lupa pasahathon pelean bulanan nang taon jala unang paotik hu gabe maon mangholit Debata di ngolum.

Ø     Jala jou ma Ahu jumpa di ari hagogotan, asa hupalua ho, asa dipuji ho Ahu. Diajari Debata do hita asa tongtong satia joujou tu goarNa na Badia i. Molo nunga tahilalahon pambahenan ni Debata I, jala saluhut denggan nib asana nang asi ni rohaNa na godang I di hita. SIdok mauliate jala sai tongtong joujou tu adopanNa. Molo jumpa hita angka hamaolon, parsorion ni ngolu nang di hagogotan sai joujou ma hita tu Ibana, taingot ma holan Debata sambing do nab oi paluahon hita sian hamagoan nang hamatean marhite Jesus Kristus i. Dipangido roha ni Debata do asa antusan ni bangso Israel paboa pelean tu Debata ingkon marojahan sian roha na tongtong mandok mauliate di pambahenan ni Debata na mangalehon haluaon na manongtong i. Marhite tona asa tongtong manggohi nazar manang bagabaga naung dipasahat di adopan ni Debata, dihalomohon Debata do asa bangso Israel marsomba tu Ibana marhite na pasangaphon hadaulaton dohot huasoNa. Sikap na manghormati hadaulaton ni Debata marlapatan do i ingkon radotanta do bagabaganta, songon Debata na tongtong manggohi bagabagaNa. Debata pe naeng do hita marsigantung tu Ibana. ndada holan marsigantung tu Debata uju marungkil hita, joujou tu Ibana, alai dohot ma membangun hubungan holong tu Debata. hita mangetong Allah songon aleale dohot pangurupinta. 

 

b)             Huria ni Tuhanta na hinaholongan; Disungguli jala dipaingot do hita asa tangkas manjamothon motivasi laho marsaor dohot Debata di tongatonga ni bagas joro i unang tu kepentingan pribadi alai  sihol ni roha lahon pajumpang dohot Debata songon na didok di BE No 18 ayat 1 mandok: “Ungkap bahal na ummuli bagas ni Debatangki ai tu si do au naeng muli ganup jumpang minggu i. Hulului do disi bohi ni Debatangki.”Mansai andul do na masa di tongatonga ni bangso i hatiha i ala ni i do dipaingot nasida asa unang gabe patubuhon pargasipan nasida marhite na pasahat pelean situtungon alai motivasi ndang hombar tu lomo ni roha ni Debata. Gabe dipakke nasida do i dalan laho pasombu tagas so pola perduli be tu angka halak na pogos, halak na so mardihadiha holan dirina sambing nama disarihon. Na mora lam mora alai na pogos lam marpogos. Sasintongna songon parbue ni holong ni Debata na mian di ngolu ni sasahalak ikkon do dipataridahon ma i marhite tindakan keperdulian tu halak na asing asa unang holan manarihon na ringkot di dirina sambing alai dohot ma na di dongan tarlumobi tu angka na metmet. Tindakan keperdulian tu angka halak na memet ido na dihasiholi Debata di ngolu ni halak na porsea songon na dipaingot di Mat 25 : 40 b ; nasa na binahenmu tu sada sian anggiKu na metmet on na tu Ahu do i dibahen hamu. Ngolu ni halak na porsea ndada holan tu dirina sambing alai beha do asa bolas marpanghorhon ngoluna songon hataridaan ni holong na marharoroan  sian Debata.

 

c)              Huria ni Tuhanta nahinaholongan dibagasan Jesus Kritus; holan Debata do nampuna saluhutna, jala Ibana marhuaso mangatasi saluhut sian nasa na adong. Ala ni i, molo dilehon Debata do kesempatan tu hita laho pasahathon peleanta, namarlapatan do i naung diajari do hita asa tongtong mandok mauliate di sude na pinasahat ni Debata di portibi on. Naeng ma tangkas motivasini parsombaon dohot pemeleonta tu Debata, naeng ma marojahan di panghilalaan ni hamauliateon n iroha di basabasa dohot asini roha ni Debata marhitehite Jesus Kristus naung memelohon AnakNA na sasada i. Amen.