(Allah Menyertai
Kita)
Mateus
1: 18 – 25
1.
Huria
ni Tuhanta na hinaholongan dibagasan Jesus Kristus, SELAMAT HARI NATAL ma di
hita saluhutna. Somalna, tung semarak do angka pesta Natal, godang maremare
manang hiasan, uli angka lampu-lampu, jala torop ruas na marbaju nauli. I ma
las ni roha di Natal. Nang jamita pe, somalna sian Lukas 2 do, na pabotohon hatutubu
ni Jesus na niolophon ni angka surusuruan parbanuaginjang i, na mambahen
semarak pesta Natal na parjolo i. Alai ianggo borngin on, sian buku ni si
Mateus do jamita. Hohom do cerita i. Ndang apala historis dohot kronologis-na
na dipatujolo, alai lapatan teologis na bagas do. Gumodang do hita dipangido
pahusorhusorhon, merenung di bagasan hahohomon. Tauji ma jolo manigati, asa
adong boanonta gabe silua na arga sian pesta Natal on.
2.
Dipatudu
turpuk on do hubungan dohot panghor-hon ni Natal tu keluarga. Dipake Debata do
keluarga patulushon sangkapNa di Natal i. Jala dimulai sian peristiwa na
tragis, sian peristiwa haurahon. Ai nunga gabegabean si Maria, hape maroroan
dope. Jala na di bortianna i pe ndang binoto sian dia. Molo di tingkinta nuaeng
on, nunga masuk on tu gosip, infoteinment manogot sahat tu borngin. Boi do
ta-bayangkan boha ma ila ni si Maria jala boha ma panghilalaan ni si Josep.
Botulbotul nasida di posisi na mansai susa. Mereka dalam posisi yang sulit
sekali. Memang jotjot do hira na dipaloas Tuhanta i hita di posisi na maol.
Nunga taula ulaonta mansai denggan hape sai adong dope halak na marsogo ni
roha; sipata halak na asing mambahen hita mangae hahan-siton. Jotjot posisinta
songon si Josep dohot si Maria on. Alai, aha do siparsiajaranta sian i?
3.
Diajari
do hita mangadopi keadaan na maol i. Didok si Maria do tu surusuruan i: "Naposo
i Tuhan i do ahu, sai saut ma tu ahu songon na nidokmi" (Lukas 1, 38).
Lapatanna, dipaloas ibana do Tuhanta i mangatur ngoluna. Laos songon i do si
Josep. Halak na bonar do ibana. Ndang lomo rohana paurakhon si Maria i di jolo
ni natorop. Habonaron-na i do sinjata na umbalga di ibana. Ndang gasagasaon,
ndang emosio-nal, ndang gaor ibana, alai hohom do mangalului jalan keluar yang
terbaik. Keluarga na paloashon Debata mangatur dohot pasidunghon persoalan
keluarga nasida. Ulina i aut sugari songon i sude na marsaripe dohot na
berkeluarga, atehe!. Ai ndang adong keluarga na so diombus hamaolon dohot
persoalan. Itu alamiah. Alai, ingkon hata sirang nama jalan terakhir?. Ingkon
songgaksonggak, muruk, masipastapan, marbadai, pangaleaion, mambolai barang na
di jabu, i nama jalan keluar? Ndang dumenggan tiruonta si Josep dohot si Maria
on mangadopi hamaolon? Inanta i, si Maria mandok: Lomo ni roham ma Tuhan na
saut", jala amanta i, suami-na, si Josep patujolohon habonaron sian emosi?
Boha suraon, boi do pesta Natal on mangonjar rohanta membangun keluarga na
songon i?
4.
Sadanari
nauli sian keluarga on, ima: paloashon rencana ni Debata saut di keluarga
nasida. Nunga adong hian rencana ni si Maria dohot si Josep taringot tu
keluarga na naeng pajongjongon nasida. Alai, gabe hira na kacau (sursar) do i
ala adong rencana na asing sian Debata. Ai gabegabean do si Maria di na so
hinirim nasida. Dung i direncanahon si Josep ma laho manirangkon. I ma
rencana-na. Alai ro ma Debata mandok unang disiranghon alai asa dioli. Di ayat
24 didok: "dioloi ma hata ni surusuruan i, saut ma dialap naniolina
i". Ulina i keluarga on, na olo papudihon rencana nasida asal ma saut
rencana ni Debata. Jala ala ni i ma dipake Debata nasida pasauthon sangkap
haluaon ni Debata, ai sian keluarga i ma tubu na gabe Sipalua ni portibi on. Ulina
i molo sude keluarga ni huria on songon i: Olo papudihon rencana nasida, alai
patujolohon rencana ni Debata masa di keluargana. Molo olo hita songon i,
pakeon ni Debata ma keluarga-ta gabe dalan haluaon ni torop jolma. Di pesta
Natal on, anggiat ma nian angka rumahtangga di huria on lam tinggil, lam malo,
lam jeli mamereng angka rencana ni Debata di angka keluarganta be asa boi hita
gabe ulaula ni Debata laho pasauthon angka sangkap haluaonNa. Tarlobi angka
ama. Molo boi nian maniru si Josep on. Maol do na masa i di ibana. Alai, olo do
ibana unduk, TAAT. Ketika dia bingung memikirkan hal yang di luar dugaannya,
yang dia lakukan adalah taat. Dan hasilnya luar biasa!! Aha ma i? Karena dia
taat, Allah mau memakainya mengubah dunia. Boha, olo do ho amang songon i?
Godang nari dope ulaon níDebata di portibi on na so sidung, tarlobi paturehon
angka keluarga. Sai dilului Debata dope angka ama na olo songon si Josep on
laho pakeon ni Debata mengubah dunia. Olo do ho unduk amang?
5.
Hamu
angka dongan! Adong dope na ummarga, silua sian Natal on. I ma bagian paduahon
nuaeng. la na mambahen las rohanta di pesta Natal, ndada kue, ndada acara
manang pertunjukan, alai na tubu i do. Ai na tubu na di Betlehem i ndada
Posoposo songon na somal taroboroboi. Alai dipatudu turpuk on do kehebatan ni
Posoposo i. Dia ma i? Di ayat 21, didok ia goarNa ima JESUS. "Apa arti
sebuah nama", ninna Shakespeare. Umpama ni ompunta i mandok: Madabu gorga
tu gambo, sarupa goar tu pangalaho". Di halak Jahudi, goar ndada holan
sebutan, alai dohot do i hakekat nang sintasinta. Asa molo didok, ia goar ni na
naeng tubu i ima Jesus, ndada holan goar sambing i, alai dohot do i patuduhon
hadirion, hakekat dohot ulaonNa. GoarNa Jesus, jala ulaonNa ima goarNa i, ima
paluahon bangsoNa sian dosa nasida be. Tutu do nian, nunga leleng dipaima
Israel haroro ni Mesias, na tinagam nasida boi paluahon nasida sian gomgoman ni
penjajahan Romawi. Alai diboto Debata do, ndada masalah politik masalah na
rumingkot di jolma. Diboto Debata do, ia masalah utama ni jolma ima DOSA. Ai
dosa do naung mamparhatoban sude jolma. Dosa i ma manirang hita sian Debata
Bona ni Hangoluanta i. Jala upa ni jolma sian i ima hamatean. Hamatean i ma
hira penguasa na so boi tartaluhon, ai nasa jolma ingkon mate. Ndang tolap ni
jolma be paluahon dirina sian i. Masalah utama i ma naeng pasidungon ni Debata.
I do umbahen disuru Jesus, naung disangkapi Debata ingkon manaon na hansit,
jala ingkon mate asa hosa dohot mudarNa i dilehon laho manobus jolma sian dosa.
Jala olo Ibana targantung di silang laho manaon "kutuk" ni dosa (Gal.
3,13).
6.
Natal
adalah satu bentuk intervensi atau campur tangan Allah untuk merebut kembali
manusia dari penjara dosa. Marhite hasesaan ni dosa, mulak ma hita tu
hajolmaonta na sasintongna, gabe anak ni Debata. I do las ni rohanta di Natal.
Ima, ala nunga adong be Jesus, nasi-nuru ni Debata, paluahon hita sian dosa.
Marhite Jesus, mulak ma hita tu Debata, jala jaloonta ma jambarta ima hangoluan
sisalelenglelengna. Jala holan Jesus do na boi patupahon i. Ala ni i do barani
Jesus mandok: "Ahu do dalan i .... Ndang adong na sahat tu Ama ia so
marhite sian Ahư" (Joh. 14, 6). Jesus i do na sai torus ro manjouhon tu
hita, asa olo hita manopoti dosa, huhut rade manjalo hasesaan ni dosa,
nanilehonNa secara gratis. "Ida jala dai hamu ma dengganbasa ni
Jahowa" ninna ganup marulaon na badia hita. Persoalan nuaeng, suraon do
sude hita olo ro manjalo hasesaan ni dosa i? Manang na tumabo dope tahilala sai
torus dibagasan dosa i?. Halak na tutu marlas ni roha di pesta Natal, ima naung
mambuat haputusan, mandok: Selamat Tinggal Dosa. Selamat Datang ma Tuhanku
Jesus, Haluaonku; Ho ma di ahu, ahu ma di Ho!
7.
Hamu
angka dongan! Ndang holan i kehebatanNa. Di ayat 23, na dienet sian Jesaya 7,
14, didok do ia goar ni na tubu i huhut ima; IMMANUEL, lapatanna: Donganta ma
Debata. On do sada makna ni Natal, ima Debata nunga ditongatonganta, Debata ro
manopot (melawat) jolma, jala ro mandongani jolma. Molo angka parpolitik
mandok: Tidak ada kawan abadi, dan tidak ada musuh abadi. Yang ada hanyalah
kepentingan abadi. I do ala jotjot masa, nantoari dongan alai saonari nunga
gabe "homang" na mamondut hita. Ndang songon i ianggo Immanuel.
Dibagasan Jesus, Debata olo gabe donganta salelenglelengna. Disi ma taida
tangkas solidaritas ni Debata na ro sian holongNa na so halompoan i. Goar on ma
gabe jaminan pandonganion ni Debata di hita. Taboto do, ndang sai torus tabo,
uli jala sonang ngolu on. Alai nang pe songon i, sada do na ringkot di hita,
ima Debata tongtong rap dohot hita. "Untung-ku do hasolhoton tu
Debata” ninna di Psalm 73, 28. Manang na luangan pe hita, manang na sude pe
portibion maninggalhon hita, manang na dohot pe hahipason mandao sian
pamatangta, manang na dohot pe artanta laho sian hita, alai molo Immanuel,
Debata rap dohot hita, i do arta na ummarga. Di Posoposo na tubu di Betlehem i
do dapot hita huaso na mansai balga, ima huaso pandonganion ni Debata. Jala
molo di lambungta Debata, dapot hita ma gogo na mardapotdapot (Jes. 40). Tudos
do i tu dakdanak. Molo di lambungna amangna manang natorasna, tung aha ndang
adong dihabiari i; mardalan di na golap pe ndang mabiar i; ro pe panangga ni
halak naeng mangharat ndang mabiar i; gariada tahe molo pajumpang dohot
"alona" di dalan gabe mangasangi do i. I ma ala di lambungna amangna,
haposanna. Songon i ma nian hita angka na marnatal. Dohononta ma: Selamat
Datang Yesus. Nunga rap ahu dohot Debata, ndang mabiar, ndang tahutan be ahu,
manang aha pe na masa.
8.
Hamu
angka dongan! Na parpudi ma. Goar Jesus dohot Immanuel, i ma tanda soldaritas
ni Debata tu hita jolma na dangol. Ibana na so tumanda dosa hian olo gabe dosa
ala ni hita asa tarpaluasa hita sian dosa. Olo gabe jolma, dos songon hita asa
Ibana manuhuk sude dosa dohot parungkilonta. Gariada tahe, olo mate di Golgata
asa diparade di hita haluaon na manongtong. Solidaritas yang luar biasa, bukan?
Ala ni i satingkosna, Natal, ima pesta
solidaritas, pesta kesetiakawanan. Molo olo Debata solider, setia kawan tu
hita, hita pe naeng ma songon i. Ala ni i, pesta Natal nian naeng ma tingki di
hita ganup laho mangambolongkon roha egosime, roha na holan patujolohon na
dirina be, roha na so setia tu dongan. Alai naeng ma tapangke Natal on gabe
tingki na lehet di hita laho bersolidaritas tu angka dongan na paimahon
pangurupion. Sijagahononta do asa pesta Natal unang ma pesta LLD (Liat Liat
Dihita). Karena Natal adalah kemauan Allah berbagi dengan manusia. Ala ni i, di
ganup pesta Natal, unang ma jumolo tapikiri aha ma bagianta, aha di hita, aha
pangomoanta. Alai jumolo ma tapingkiri, aha ma sibagionku tu halak na asing.
Sude ma na marpesta Natal mamingkiri, aha ma sibahenonku tu halak na asing,
songon nabinahen ni Debata tu ahu dibagasan Jesus? Molo masa Natal, taorui ma
na tu hita, alai tapagodang ma solidaritas-ta tu halak na pogos, gelandangan,
pemulung, angka na marsahit, an di penjara, na putus sikola, korban bencana,
dll. Olo ma hita berbagi dohot nasida. Di na olo Debata mar-Immanuel, ima
patuduhon, ia Debatanta i berorientasi tu toru, pasobokhon diriNa dohot angka
na di toru. Solider jala sepenanggungan, sapanghilalaan dohot angka na na di
toru. Songon i ma hita nian di pesta Natal on, olo mamereng tu toru, mamereng
penderitaan ni angka dongan na pogos, na hurangan, na tertindas, dna. Makna
Natal yang sebenarnya adalah solidaritas, berbagi dengan orang yang membutuhkan
pertolongan. SELAMAT NATAL-IMMANUEL -SELAMAT BERSOLIDARITAS Amen.
