SALUHUT
DO TARPATUPA AHU MARHITEHITE IBANA
(Segala
Perkara Dapat Kutanggung Di Dalam Tuhan)
Pilipi
4: 10 – 19
1.
Huria
ni Tuhanta na hinaholongan dibagasan Jesus Kristus; barita pardalanan ni si
Paulus tu luat Makedonia boi do jahaonta di Ul. 6: 9-d.u. Diida si Paulus do di
bagasan tondina jongjong sada halak Makedonia mangelehelek ibana asa taripar
tu luat Makedonia. Dung masa parnidaanna i manigor borhat do ibana tu Makedonia.
Ala Pilippi do huta sabungan ni Makedonia, huta i do songon ojahan/basis ni si
Paulus laho mamaritahon Barita na Uli di luat i. Di huta i do si Paulus
maringanan manang piga ari (beberapa hari). Di mulana i di huta Pilippi ndang
diadopi si Paulus tantangan sian halak Jahudi. Gariada ala halak Jahudi ibana,
dituhas angka pangisi ni huta i do ibana songon panggunturi na mamboan ugamo
na imbaru (Ul. 16:20). Alai dung tubu huria i tubu do muse tantangan sian halak
Jahudi (Pil 3:2). Songon huria na baru mamungka, dokdok do parungkilon ni huria
i. Alai nang pe borat parungkilon i tarida do na denggan tubu haporseaon
nasida. Ndang adong masa parbolatbolatan di huria i. Gariada tung sada do
roha nasida laho mangurupi si Paulus laho mamaritahon Barita na Uli i (pat.
Pil. 2:25-30; 2 Kor. 11:9; 8:1-5). Nasida sandiri pe tong do aktif (dohot)
manaburhon boni Barita na Uli i (Pil. 1:5; 4:3). Jala na mansai menarik di
huria Pilippi i ma ala naung dohot angka parompuan aktif di ulaon Barita na Uli
(Pil. 4:2: si Euodia dohot Sintike; Ul. 16:10-16: si Lidia). Ala ni angka
parsaoran na denggan dohot pangurupionnasida i, gabe taronjar roha ni si Paulus
mandok mauliate tu nasida, i ma songon na naeng idaonta di turpuk on. Laos di
bagasan hata mauliate i do dipatujolo ibana tangiang dohot panghirimonna.
2.
Ayat 10-13: Di angka ayat on dipatorang do na
mambahen las ni roha ni si Paulus mamereng huria Pilippi, i ma "ala
mangulahi tarida rohamuna sumarihon na ringkot di ahu". Mangulahi
tarida, diterjemahkan sian hata anethalete, boi do marlapatan: tubu muse,
tarida muse. Hata on mangondolhon, nunga tibu hian nian adong/tubu
pamingkirion na denggan, roha na marpanarihon di huria Pilippi. Ndada na adong sangombas i sambing i, alai naung
mamungka tubu do i sian tingki parjumpangan nasida. Jadi ndang holan ala
pangurupion (materi) sambing mambahen las roha ni si Paulus, alai lumobi
ala pangurupion patuduhon naung mangolu do Hata ni Debata di bagasan
rohanasida. Hata ni Debata i do na mangonjar nasida mamingkirhon angka na
denggan tu ulaon Barita na Uli i. Nian ndang sai manigor boi hatop terlaksana
(dipatupa) angka na piningkiran nasida. Godang do masalah mambahen tarambat
angka sangkap nasida. Di ujung ni ay. 10 i didok: "alai holan
tingkina do na so une". Adong do na menafsirkan hata on sian sudut
kemampuan ni huria i. Tingki na so une marlapatan, ndang manigor tarbahen huria
i mangurupi si Paulus. Ala pogos do huria i, ingkon jolo dipapungupungu do, i
pe asa ditongos pangurupion tu ibana. Alai na deba penafsir, ndang setuju tu
pandapot on. Ndang soal hapogoson ni huria i na naeng dohononna disi, alai soal
kairos (kesempatan manang tingki) do. Ala huria i pe tong do di bagasan
parungkilon manang pangaleleon ndang adong kesempatan di nasida laho
pasahathon pangurupion tu si Paulus. Manang dia pe pandapot na dua i tasetujui,
na torang i ma di huria Pilippi nunga adong do roha na olo rade mangurupi
Parbarita na Uli i. Asa ukuran i do na parjolo na binereng ni si Paulus, ndada
silehonlehon i sambing. Tangkas do didok di ay. 11, ndada ala na hurangan ibana
umbahen didok mauliate. Lapatanna, ndang tergantung tu godang (jumlah) ni
silehonlehon i las ni rohana. Ndada di bagasan kelengkapan ni ngolu siganup ari
na gabe hasonangan ni si Paulus. Hagogok ni las ni rohana i ma molo dung lam
mar-hataridaan parsaoran na tangkas dohot Kristus Jesus (Pil. 1: 21). Ala ni i,
nang pe diurupi huria Pilippi ibana, ndang gabe tergantung/terikat ngoluna
dohot haporseaonna tu nasida. Ndang tarambati silehonlehon portibi on
parsaoranna dohot Kristus. Sikap ni ibana taringot tu ngolu portibi on tumangkas
muse diondolhon di ay. 12-13. Marpangontik (diterjemahkan sian hata tapeinouthai)
boi do marlapatan hidup dalam keadaan yang sulit, baik makanan maupun yang
lain; hidup dalam keadaan serba kekurangan. Marlobilobian (sian hata perisseuein)
boi do marlapatan berada dalam kelimpahan. Tongtong do somal si Paulus di na
dua keadaan i. Lapatanna, na dua keadaan i nunga dialami ibana. Molo tung masa
hahurangan ndang pola be manegai parsaoranna dohot Kristus i, Jala molo tung
dapotna pe ngolu na berkelimpahan, nunga somal ibana disi gabe ndang pola be
lupa ibana tu Kristus ala ni i. Somal do ahu di saluhutna i (memyemai ;to
learn the secret) marlapatan, nunga dapot ibana rahasia ni ngolu i. Ngolu
na sintong i ma parsaoran do-hot panandaon di Kristus. Ndang tergantung tu
bosur manang male manang ndang tergantung tu arta portibi on, ngolu haporseaon
ni ibana. Puncak ni parbinotoan ni si Paulus di rahasia ni ngolu i i ma
kesadaranna, saluhutna tarpatupa ibana ala Kristus na margogoihon. Margogoihon
(infuse power to) marlapatan menganugerahkan kuasa/kekuatan parbagasan jala na
tersembunyi. Lapatanna, ndang dipaburnangburnang ibana dirina, alai sadar do
ibana na Kristus sandiri do na umbalga, na metmet situtu do anggo tung dirina.
3.
Ayat 14-18: Boi do gabe sala mangantusi huria
Pilippi di pandohan ni si Paulus na di ginjang i, gabe sai hira na so ringkot
di ibana silehonlehon i. Ala ni i, di ayat na mangihut on ma dipatorang sikap
ni si Paulus taringot tu silehonlehon nasida i. Didok ibana do na denggan
pambahen ni huria Pilippi. Hata denggan (disalin sian hata kalos) boi do
marlapatan pasonanghon roha, patubu las ni roha. Lapatanna, ndada na gabe
marisuang pambahenan ni huria i. Tung pe si Paulus nunga somal marpangontik,
alai marguna situtu do pangurupion na jinalona i. Dunghon ni i, gabe patar do tarida
parsidohoton ni huria i di sitaonon ni si Paulus, na sekaligus marlapatan
parsidohoton nasida mamaritahon Barita na Uli. Haporsuhon (thlipsis) na
minaksudna dison i ma sitaononna di tingki di hurungan (pat. Pil. 1:17; 2 Kor.
1:8). Saleleng mamaritahon hata i di luat Makedonia sahat tu Korintus, holan
huria Pilippi do na olo mangurupi ibana. Jala sian mulana mamaritahon Barita na
Uli i si Paulus di luat Makedonia, nunga diurupi huria i ibana (pat. Ul. 16:15,
40). Di ay. 15 on dipangke si Paulus do bahasa perdagangan manggombarhon
hubungan ni ibana dohot huria i mangetong hepeng na ro dohot na laho. Hata on
marastuan, naung dijalo huria i hian do na denggan sian si Paulus, i ma boni
Barita na Uli i (pat. 1 Kor. 9:11). Ala naung manjalo nasida, kewajiban nasida
ma mangalehon songon balas ni naung jinalo nasida i. Las ni roha ni si Paulus i
ma, ala sian angka naung manjalo sian ibana, holan huria Pilippi do na olo
mangalehon. Ai nunga torop angka halak/huta naung mandai las ni roha na
binoanna, alai ndang sude na olo mangalehon (pat. 2 Kor. 11:8; 12:13). Di
Tessalonik dope ibana nunga diurupi huria Pilippi ibana. Taboto do, dung
Pilippi manigor Tessalonik nama ditopot. Lapatanna, manigor udut do ma-ngihut
di pudi ni si Paulus pangurupion ni huria Pilippi i. Sian i tarida, hatop do
tubu jala marparbue boni na sinaburhon ni si Paulus di Pilippi. Di ay. 17-18
diulakhon do mangondolhon lapatan ni silehonlehon i di ngolu ni si Paulus. Ndada apala silehonlehon i dilului, alai
parbue i do. Lapatanna, haradeon ni huria Pilippi mangurupi si Paulus, ndada
ala na asi rohanasida, alai ala na marparbue do haporseaonnasida. Ai molo holan
silehonlehon ala ni asi ni roha sambing do i, boi do gabe paganggang parsaoran.
Ndang apala dipatorang sadia godang na jinalona sian huria i. Mungkin do ndang apala
godang/balga. Alai manang sadia godang pe i, na gabe singirnasida do i. Hata
singir dison ndang marlapatan na ingkon gararon ni si Paulus ma i tu nasida di
sada tingki. Alai bahasa kiasan do on na manggombarhon halobian nasida sian
angka huria na asing. Na gabe marlipatganda do silehonlehon nasida ala sian
parbue ni holong ni roha i dipasahat nasida. Manang sadihari pe silehonlehon i,
manang tingki dipasahat si Epaproditus pe i, tongtong do marguna jala mampanghorhon
tu ulaon mamaritahon Barita na Uli. Ndada holan marguna tu si Paulus sambing
i, alai dohot do gabe uap na hushus, pelean halaean, halomoan ni roha ni Debata
(pat. 2 Musa 29:18, tu Septuaginta disalin dohot hata: osmen euodias, na
marlapatan persembahan yang harum). Ndang pribadi ni si Paulus na rumingkot
berengonnasida, alai pelean tu Debata do i dipasahat nasida.
4.
Ayat 19-20: Dilehon ibana do pos ni roha tu huria
Pilippi, na sekaligus Ndang magopo songon tangiang/pangidoanna tu Debata. na binahennasida
i. Debata sandiri mangalehon tu nasida suksuk angka las ni roha dohot haporluan
di portibi on. Debata do na pasahathon ulaon i tu si Paulus. Asa saluhut na
binahen nasida tu ibana, na manghalashon ulaon na pinasahat ni Debata do nasida
disi. Ndang tarbahen si Paulus mangalehon upa tu nasida, alai Debata sandiri
tuk do mangalehonsa. Tuk do hamoraon ni Debata mangalehon tu jolma saluhut na
ringkot di ngoluna. Sian hamoraonNa do saluhut jolma manjalo hangoluan portibi
on. Sasintongna nian, tung pe ndang adong pangurupion sian huria Pilippi,
tarlehon Debata do na ringkot di ngolu ni angka naposona/si Paulus. Alai diigil
do kesadaran sian ganup halak naung manjalo sian hamoraon ni Debata jala
saluhut silehonlehon i gabe pelean hamauliateon tu Ibana. Ala ni i, saluhut
pujipujian naeng ma ditujuhon tu Debata. Ndada si Paulus na naeng marsangap,
manang huria Pilippi. Di Debata ma pujipujian ro di salelenglelengna.
5.
Huria
ni Tuhanta na hinaholongan dibagasan Jesus Kristus, topik ni minggunta mandok :
SALUHUT DO TARPATUPA AHU MARHITEHITE IBANA (Segala Perkara Dapat Kutanggung Di
Dalam Tuhan), ala ni i:
Ø
Molo
di bagasan hasadaon manang dos ni roha hita, godang do na boi tarpatupa. Sian
mulai adong huria i di portibi on, sai tongtong do mangadopi tantangan, sian
duru (ekstern) manang pe sian bagasan (intern).
Alai tong-tong do tabereng do sai ingkon monang do huria i.
Ø
Sude do halak Kristen nunga manjalo basabasa
sian Debata. Adong do deba manjalo godang alai na deba manjalo otik. Torop do
na olo manghamauliatehon i tu Debata, alai laos adong do na tarpedem. Dirimpu
rohana do saluhut na adong di ibana ala gogona sambing i. Diigil do sian angka
huria (ruas secara pribadi dohot punguan pe) asa mananda na denggan naung
jinalona sian Debata. Dung i ditumpahi ma ulaon di huria i.
Ø
Torop
do halak na holan marpanarihon tu dirina sandiri. Laos jotjot do masa sadasada
huria (jemaat) holan mamingkirhon dirina sandiri. Tarida do i sian sikapna tu
angka ulaon hatopan dohot ulaon asi ni roha. Tandatanda ni angka haporseaon
dohot holong na so marparbue do i. Ala ni i ingkon tangkas do pasidingonta sian
dirinta nang sian huria pe.
Ø
Roha
dohot diri ni jolma i do gabe pelean na hushus di adopan ni Debata. Manang ise
halak naung mamelehon dirina tu Debata, nang saluhut na jinalona sian Debata pe
sai na hamauliatehononna do i.
Ø
Ala
ni hadengganon ni huria Pilippi, pola do dibahen si Paulus i gabe tudosan na
gabe siihuthonon ni huria na asing (pat. 2 Kor. 8:1-6). Naeng songon i ma nian
nang hita dohot hurianta gabe teladan siihuthonon ni halak na asing. Amen.
