SALUHUT
DO TARPATUPA AHU MARHITEHITE IBANA
(Segala
Perkara Dapat Kutanggung Di Dalam Tuhan)
Jona
4: 1 – 11
1.
Huria
ni Tuhanta na hinaholongan dibagasan Jesus Kristus; Ia Panurirang Jona na
marharoroan sian Kota gat-Hefer di luat Israel Utara (Samaria. Ia lapatan
goarna Jona sian hata Heber Yona (hata Indonesia “Yunus”) na marlapatan
“merpati”. Goar ni amongna Amitai, na marlapatan hasintongan manang hasatiaon.
Sian huta Gat-Hefer, sada huta na metmet di Galilea di perbatasan Houm Zebulon
dohot Naftali, jonokhon ni huta Nazaret. Na mangula do ibana songon panurirang
di abad-8 sM uju di panggomgomion Raja
Jerobeam II (thn 793 – 753 sM). Jala tarsurat do parjolo taringot tu panurirang
Jona di Buku 2 Rajaraja 14: 25, jala na umampit ma dipatorang di Buku Jona on.
2.
Ia
turpukta on ndang boi antusan molo ndang sian bindu na parjolo sijahaon, jala
memang buku Jona holan manaringoti pangulaonna, sikapna di na laho mangulahon
na nidok ni Debata tu ibana laho paingothon angka dosa ni halak Niniwe. Alai
mansai bangkol jala sogo do roha ni si Jona mangula parsuruon ni Tuhan i,
umbahen disangkapi ibana laho manundati borhat tu Niniwe marhite na lintun
ibana tu Tarsis. Boasa ? siala Kota Niniwe ima ibu kota ni Negara Asyur na gabe
alo sian najolo bangso Israel, jala ndang setuju si Jona molo dohot halak
Niniwe dapotan asi ni roha ni Debata. Ala bangso Asyur nang huta Niniwe angka
sionsop mudar do nasida. Dison ma tarida hosom nang sogo ni roha si Jona. Molo
tung apala naung didok Debata laho uhumonna ma pangisi ni Niniwe, hot ma
mardalan uhuman i. Hape ditangihon halak Niniwe do lumbalumba i asa saluhut
nasida nang raja jala na magodang, angka dakdanak nang angka dorbiana dohot do
manolsoli dosana. Marnida i mulak ma roha ni Debata, jala ndang pasaut uhumanna
tu halak Niniwe.
3.
Ndang
apala hibul roha ni si Jona di na laho mangulahon parsuruon ni Debata, mansai
borat do rohana mangulahon na pinangido ni Debata. Martangiang do si Jona laho
manuntut tu Debata nang pe dihatindanghon ibana do Debat paras iroha jala
pardenggan basa. Marsual do si Jona dohot Debata nang pe naung dipasingot
Debata ibana. Dipillit si Jona do asa mate asa sian na mangoloi di sangkap ni
Debata. Hape ndang marningot si Jona naung hea dipalua Debata sian hamatean na
dibondut ihan raya, tolu ari jala tolu borngin ibana dibagasan butuha ni ihan
raya i. Pangalaho ni si Jona ima na manggombarhon panghilalaan ni bangso Israel
na mansai sogo rohana mida halak Asyur i. Asa asi ni roha ni Debata sae ma
holan tu bangso Israel sambing. Sikap eksklusif na pinatuduhon paboa holan
bangso Israel do na gabe bangso ni Debata, ima bangso napinillit ni Debata,
ndang adong na asing. Bangso Israel ima bangso na eksklusif na mengakui halak
Niniwe nang pe naung marhamubaon dohot bangso na asing alai ndang tama mandapot
asi ni roha ni Debata. Holan nasida do bangso pilihan ni Debata, laos songon i
do panghilalaan ni si Jona na bersikap eksklusif alai mansai andul do sikap ni
si Jona dohot bangso Israel sian sangkap haluaon ni Debata. Ai haholongon do
Debata, na manghaholongi manisia na tinompaNa. Ido umbahen dipatorang Debata tu
si Jona asa diantusi si Jona jala sadar ibana di sangkap ni Debata. Asa
dipungka Debata ma laho manungkun si Jona: “suman do ibana muruk ?”. Molo sian
pandangan si Jona, tama do ibana muruk, ingkon lengsehononhon do Niniwe ndada sabalikna
diasii jala disesa dosana. Sungkunsungkun on songon mamunteni parange ni si Jona
alai so muba rohana ala digomgomi hosom ni roha. Asa diajari Tuhan do si Jona
marhite sada hau dulang sada, dipadiri Tuhan ma hau i laho manisoi si Jona, las
do rohana disi. Alai las n iroha ni si Jona holan sadari i do, ala marsogot na i
dipadiri Tuhan i ma sada gulokgulok laho mangarati hau dulang i asa melos jala
mohop ni sibalik hunik i mandoit mohopna tu si Jona. Jala pola dua hali si Jona
mandok : tumagon ma au mate sian na mangolu”. Pandohann a parjolo: si Jona
naeng mate siala disesa jala diasii Debata halak Niniwe. Na paduahon ima: si Jona
naeng mate siala nabinuat las ni rohana naung sonang hian menak. Na dua giot ni
rohana naeng mate on sude di na laho kepentinganna sandiri, holan tu las ni
rohana sambing.
4.
Huria
ni Tuhanta, aha do nanaeng siparsiajaranta sian i ?. Naparjolo; Ndang hea
Debata mardos ni tahi dohot dosa alai angka halak pardosa na marhamubaon dapotan
asi ni roha hasesaan sian Debata. Marsiajar sian na masa di halak Niniwe,
dilehon Debata do tu hita tingki ima tingki parasian asa olo hita marhamubaon n
iroha ala dihaholongi Debata do saluhut halak. Dihaholongi Debata do halak
Israel suang songon I halak Niniwe, nang saluhut angka bangso na di portibi on
tarmasuk ma bangso Indonesia. Dihaholongi Debata pe halak Niniwe ndada ala ni
torop ni jolmana 120.000 halak manang ala bidangna huta i tolu ari pardalanan,
alai ala Debata do holong i. Ndada ala ni burju ni rohanta, ndada ala ni
hadirionta, alai saluhutna ala ni asi ni roha ni Tuhan i tajalo haluaon
dibagasan Jesus i. Ala ni i ringkot do ta respon holong ni Tuhan i marhite na
manghaholongi dongan jolma diparhataan nang dipambahenan tarlumobi. Songon
Tuhan i na manghaholongi ndang mardia
imbar. Holong ni Tuhan i do halongangan di hita marhitehite AnakNa Jesus
Kristus i, tarpatupa Ibana halongangan paluahon portibi on nang dosa ni manisia
asa bongot hita jolma pardosa on ditobus mudar ni Kristus i bongot tu hangoluan
na so ra suda i.
5.
Huria
na hinaholongan dibagasan Jesus Kristus, napaduahon marsiajar hita sian sikap
nang pangalaho ni si Jona, asa unang masa sikap na: senang melihat orang susah,
jala susuah melihat orang senang. Dao ma sian rohanta late n iroha, kepicikan
nang hosom, dendam, sada sian horhonon ni parbue ni dosa do I na menggorogoti
rohanta na so sonang mamereng halak na bertobat. Asa molo nunga tajangkon Jesus
Kristus gabe Tuhan jala Sipalua dihita dao ma sian rohanta pangiburuon, hosom,
teal n iroha, alai holong i ma na manggohi rohanta asa marasini roha tu saluhut
halak. Marsiajar ma hita di ganup na boi masa di parngoluonta jala diloas Debata
manondong parngoluonta asa sadar hita
jala muba rohanta, boi do marhite halak na asing, angka kejadian di
humaliangta, asa tinggil hita marespon i sude. Songon si Jona, boi do angka ragam
media, benda nang angka situasi Debata mamangkulingi hita. Ala ni i talapati ma
tujuan dohot maksud ni Tuhan i unang holan na ringkot di dirinta sandiri na
tapasarisari, alai sarihon ma parngoluon na dihumalianghita. Napatoluhon,
marsiajar sian si Jona asa mangula ulaon dohot bertanggungjawab, molo sapala
disuru Tuhan i hita mangula, ulahon ma dohot denggan. Dijou do hita mangulahon
pamaritaon Barita na Uli tu saluhut jolma ndang mardia imbar. Asa saut ma lomo ni
roha ni Tuhan i, torop jolma marhamubaon n iroha tumadinghon dalan na robi tu
haimbaruon. Saurdot tu na tarsurat di Hesekiel 33:11 Dok ma tu nasida:
Songon sintongna mangolu ahu, ninna Tuhan Jahowa, tung na so lomo do rohangku
mida hamatean ni halak parjahat i, so ingkon mida hamumulak ni parjahat i
tumadingkon dalanna i nian, asa mangolu ibana. Antong sai mulak ma hamu
tumadingkon dalanmuna angka na jahat i! Boasa tung tagonan mate hamu, ala
pinompar ni Israel. Marhite i ma sangkap haluaon na pinatupa Debata
hatuaonta jala haluonta, ndang tarpatupa hita patupa haluaon i ia so Debata na
mangulahon. Songon na pinangido ni topik ni minggunta mandok: SALUHUT DO
TARPATUPA AHU MARHITEHITE IBANA (Segala Perkara Dapat Kutanggung Di Dalam
Tuhan). Sangkap hatuaon na diparo Debata AnakNa asa malua ganup na porsea I,
jala marhatopothon Kristus do Tuhan. Pilipi 2:10 - 11 asa somba tu Goar
ni Jesus nasa ulu ni tot, na di banua ginjang i dohot na di tano, nang na
ditoru ni tano, jala asa nasa na marsoara marhatopothon: Jesus Kristus do
Tuhan, bahen hasangapon ni Debata Ama. Amen.
