RADOTI
UHUM, ULAHON HATIGORAN
(Taati
Hukum Dan Tegakkan Keadilan)
Galatia
3 : 26 – 29
1.
Huria
ni Tuhanta na hinaholongan, na mangula do Ap.Paulus di luat Galatia na
mayoritas marlatar belakang halak non-Yahudi. Alai ro ma angka pangajari
sipaotooto na ro sian halak Jahudi na manggaori. Nasida ima halak Kristen Jahudi
na mandok hurang singkop do harKristenon I molo so padohot ruhutruhut ha-Jahudion
dipadalan. Asa ditonahon nasida halak Kristen di Galatia patupa parsunaton
dohot na mangulahon sintong patik na sampulu i. Hape lapatan ni angka patik i
ima songon siparorot tu angka naung porsea dibagasan Jesus Kristus. Manjaga
hadirion ni jolma i asa tongtong mian di bagasan lomo ni roha ni Debata.
Mamboan, mangarahon, ngolu ni jolma i asa mardalan di lomo ni roha Debata Ama
i. alai ala ni godang ni pangalaosion ni jolma i di patik i. Na nidok ni patik
i ndang tarula jolma i, manghorhon patik i do mamboan jolma tu panandaon di
dosa i (Rom 3:20; 4:15; 5:13; 7:7-12). Alai di haroro ni barita na uli na
binoan ni Kristus i, sian asi ni roha ni Debata Ama i, manutup sude
pangalaosion ala ni patik i. Ai ndang adong na tigor nanggo sada anggo sian
patik i alai gabe patar do hatigoran ni Debata ala ni asi ni rohaNa sian
haporseaon di Jesus Kristus i (Rom 3:22). Jolma i gabe pintor ala ni asi ni
roha ni Debata di panobusion na pinatupa ni Kristus i. Hinorhon ni panobusion
ni Kristus i gabe angka anak ni Debata na tinobusNa i ala ni haporseaon. Gabe
angka anak ni Debata hita alani pandidion i di bagasan haporseaon dipasada hita
dohot Kristus i (1 Kor 12:13). Ai tartanom do hita rap dohot ibana marhite
pandidion i tu bagasan hamatean, asa marparange hita di bagasan ngolu na imbaru
songon Kristus naung hehe sian angka naung mate hinorhon ni hasangapon ni Amana
(Rom 6:4). Hinorhon ni pandidion i gabe jolma na imbaru hita na tigor jala na
ias roha na mangolu di jolo ni Debata salelengna. Ala ni pandidion i panobusion
ni Kristus i taparuloshon, gabe sisada panghophopon na tinompa na imbaru
saluhut na tinobus ni Kristus i (II Kor 5:17).
2.
Ngolu
na buruk na di toru ni bura ni patik i, ai saluhutna jolma i nunga marroha sada
ai ndang adong na tigor nanggo sada. Alai ala ni haporseaon di panobusion ni
Kristus i tasolukhon do ngolu na imbaru ala ni na sahangoluan dohot Kristus di
pandidion i. Marhite pandidion na badia i nunga tajalo pembaharuan. Bangko
ngolu na leleng i na ginoaran ni bura ni patik i tatadinghon mangeahi haluaon
na sian Kristus i (Rom 6:1-11). Ndada marrumanghon hamubaon di pardagingon,
alai marrumanghon ngolu di partondion na ni alusan ni ngolu haporseaon (1 Petr
3:21). Ai Kristus i do diparuloshon hamu. Sude hamu naung tardidi tu bagasan
Kristus. Sian marragam houm, bangso dohot marga dipasada di bagasan na mangolu
na imbaru di bagasan panobusion ni Kristus i. Ndang mardia imbar be halak
Jahudi, Gorik, hatoban manang anak mata, baoa manang parompuan alai dilehon
gabe sisada ngolu panobusion ni Kristus i, marngolu na imbaru. Di bagasan
sudena i tajalo marhite pandidion na badia gabe marngolu na imbaru holong sian
ragam ni dosa na nidok ni patik i. (Psalm 132:9; Jes 61:10; 64:6, Zak 3:3).
3.
Huria
ni Tuhanta na hinaholongan dibagasan Jesus Kristus; di habatahon, angka anak
kandung do gabe panean manang pewaris di arta ni natorasna. Di nuaeng na adong
do na mangadopsi anak gabe sipanean di arta ni natorasna. Pangadopsian anak
marhite pengadilan manang marhite adat. Alai anggo hita naung dipaias/diselamatkan
Kristus i do hita sian bura ni dosa i gabe diain hita gabe anakhonna, gabe
pewaris di arta na pinaradena i di angka na porsea di Ibana. Digombarhon di
turpuk on, molo Kristus nampuna hita sekaligus do gabe pinompar ni si Abraham
ima sipanean di pasupasu, asi ni roha na sian Debata Ama i. Bagabaga ni Debata
tu si Abraham gabe pasupasu di sandok na mangulahon lomo ni roha ni Debata.
Bagabaga haluaon na pinasahat ni angka panurirang bangsona dohot do i tarida di
bagasan Kristus Jesus. Kristus i do hapataran ni bagabaga i. Di bagasan Kristus
i do digohi saluhut na nidok ni patik i, sian asi ni roha ni Debata Ama i gabe
anak do angka na tinobus i di Kristus i jala gabe panean di bagabaga ni Debata
Ama i ala ni haporseaon. Tardidi di bagasan goar ni Debata Ama, Anak dohot
Tondi Porbadia, pasadahon hita do i dohot Kristus i, jala marngolu na imbaru
hita di bagasan pandidion i mangalehon di hita gabe panean di bagabaga ni
Debata Ama i.
4.
Huria
ni Tuhanta na hinaholongan dibagasan Jesus Kristus, naung tardidi do hita tu
bagasan goar ni Debata Ama, Anak dohot Tondi Porbadia asa tongtong hita
marhasadaon di bagasan ni Kristus. Angka na porsea naung tardidi tongtong
tarida parange na marngolu na imbaru jala gabe panean di bagabaga ni Tuhan i.
Hata ni Tuhanta mandok di Rom 6:3 – 5 Na so diboto hamu do on: Sude hita, nasa
naung tardidi tubagasan Kristus Jesus, tubagasan hamateanna do hita tardidi? Antong,
naung tartanom do hita rap dohot Ibana marhitehite pandidion i tubagasan
hamatean, asa marparange hita di bagasan ngolu na imbaru, songon Kristus naung
hehe sian angka naung mate hinorhon ni hasangapon ni Amana. Ai anggo nunga
sanghambona hita dohot Ibana, di na rap mate hita dohot Ibana i, suang songon i
ma hita nang taringot tu haheheon. Songon na pinangido ni topik ni minggunta na
mandok: RADOTI UHUM, ULAHON HATIGORAN (Taati Hukum Dan Tegakkan Keadilan), ima
siulahonon ni angka na porsea i asa panean di Harajaon ni Debata marhitehite
Jesus Kristus i. Amen.
