SALUHUT
DO DIRAMOTI DEBATA
(Pemeliharaan Allah Yang
Universal)
Mateus 6 : 25 – 34
a)
Huria ni Tuhanta
na hinaholongan, Sabagian sian jamita dolok do turpuk on, ima jamita ni Tuhan
Jesus na mansai hona tu parngoluon siganup ari. Apala na masa di ngolu siganup
ari do ditaringoti di turpuk on, ima taringot tu na holsoan. Ai toropan jolma
sai holan na holsoan. Holsoan do na pogos ala ni hapogosonna, jala laos songon
i do nang na mora, holsoan mamingkirhon hamoraonna. Holsoan do na oto, ala
ndang tuk parbinotoanna laho mangatasi angka na masa di ngoluna, laos songon i
do nang na pistar, marragam siholsohononna, ala godang nabinotona, hape ndang
tuk gogona mangulahon saluhut na binotona i. Angka parjabatan pe holsoan do
sotung meret hasangapon i sian ibana. Sude do jolma di sude tirket ni ngolu on
masiholsohon na di ibana be. Diboto Jesus do na sude do jolma holsoan, ala ni i
do gabe sada pokok jamita ma i di Jesus di jamita dolok, na mangonai tu sude
jolma, asa unang nian holsoan jolma i. Diboto Jesus do godang angka dampak
negatip ni holso i. Isarana, manghorhon hagaleon jala manghorhon sahit do
holsoholso, manghorhon pangiburuon, jala manghorhon godang angka na negatip.
Ala ni i do tung tangkas diajarhon Jesus, asa unang nian sai holsoan hita
jolma.
b)
Na marudutudut do
sude isi ni Jamita dolok on, so boi tarsirang na sada tu na sada nari. Marragam
do pokok jamita na masirainrainan di jamita dolok on. Isarana anjuran ni Jesus
taringot tu partangiangon na sintong di jolo ni turpuk on (ayat 5-15), sadalan
do i tu pokok parasi ni rohaon dohot anjuran asa unang holsoan na adong di
turpuk on. Tung apala pungu do Jamita dolok on disurathon si Mateus sian bindu
5 sahat ro di bindu 7, ala ni i gabe mura antusan, ala masitumpahan perikop na
sada tu na sada nari. Anggo di evangelium na asing. isarana di evangelium
Lukas, ndang pungu jamita dolok on disurathon, alai marsirang be hira na soada
hubungan. Alai anggo panurat ni Mateus, himpu pungu jala jojor jamita dolok i
disurathon dohot tujuan asa tarida na so tarsirang sude perikop ni jamita dolok
i. Sabagian sian jamita dolok i ma nuaeng turpuk on na mandok asa unang
holsoan. Ai diboto Jesus do na sai holsoan angka jolma, ala ni i, asa unang
nian holso i mangarajai roha dohot pingkiran, unang ma gale jolma i dibahen
holso i, ala ni i diorai Jesus sude jolma asa unang holsoan.
c)
Ala ni i do,
unang holsoan hamu (ayat 25).
Pandohan "Ala ni i do..." patoranghon na so tarsirang
ayat 25 on tu angka ayat na di jolona, ima anjuran na mandok asa unang
marhaposan di arta, jala unang mardua tuan. Ai na boi do sikap na holsoan i
gabe manghorhon roha arta, jala boi marpanghorhon tu sikap na mansoadahon Debata,
manang mardebatahon arta, Hasomalan ni na mangholsohon ima morongorong huhut
passip so mangula ulaon. Hape anggo halak Kristen ingkon mangula ulaon do, dia
ma na boi siulaon hombar tu kemampuan. Molo adong hamaolon manang hahurangan di
materi manang sibaenon, ndada ringkot i holsohonon manang oronghonon, alai
patupaon ma dia na boi tarpatupa. Manang molo so i molo ndang tarbahen, tumagon
do masisungkunan tu angka dongan dari pada holsoan. Ala ni i do didok Jesus di
jolo ni turpuk on, " Pangido hamu ma sai na lehononna do di hamu,
lului hamu ma sai na jumpangan do hamu, tuktuhi hamu ma sai na ungkaponna do di
hamu"(Matius 7:7). Saluhutna pandohan i mangorai asa unang
holsoan, jala menganjurkan asa aktif mangulahon manang dia na boi tarpatupa
hombar tu kemampuan. Ala marragam do angka na maol di ngolu on, ganup ari do
hita pajumpang tu angka kesulitan na marragam. Ala ni i ndang denggan sai
holsoan, ai ndang membangun na sai holsoan i tu hadirionta, alai manegai do.
d)
Panarihonon ni
Debata (ayat 26). Sada contoh na
praktis dibaen Jesus di turpuk on, ima taringot tu angka pidong na so manabur,
jala ndang papunguhon tu sopo, ndang martabungan, alai boi mangolu dibaen
Debata. Ndada na anti manabung Jesus i, manang anti papunguhon. Justru di
bagian na asing dianjurhon do hita asa papunguhon manang manabung di hamamasa
ni gotilon (Poda 6:8), jala asa marpangontik di ngolu siganup ari (1 Timoteus
3:2), unang dipasuda angka na adong i, alai tongtong marpanarihon di ngolu na
naeng ro, i do na sintong di ngolu ni halak Kristen. Alai molo so adong
sipapunguon, manang siontihon, di si do asa unang holsoan, alai marpos ni roha
di panarihon ni Debata. Ai ndada holan hita na manarihon ngolunta, dohot do
Debata manarihon ngolunta.
e)
Hubungan ni
holso dohot umur (ayat 27). Sada
ketegasan sian Jesus mandok na so adong jolma na boi paganjanghon umurna, alai
Debata do. Jala ganjang ni umur ndang boi ditontuhon sian jaminan ni arta na
godang, alai sabalikna, ngolu i do manghorhon adong arta, ndada arta i mambahen
mangolu. Di zaman nuaeng on torop do jolma na mate tompu ala pagodanghu
sipingkiranna dohot siholsohononna. Ala ni i do didok Jesus, asa unang nian sai
holsoan, alai asa terbangun pos ni roha tu Debata di sude angka kondisi na
masa.
f) Unang holsohon sipanganon, siinumon dohot parabiton(
ayat 28-31). Na tolu bagian i, ima na
ginoaran kebutuhan primer di ngolunta on, na ingkon adong. Tuhan Jesus mambahen
tudosan tu ngolu ni pidong dohot bunga na so mangula jala na so martonun, alai
lengkap do sipanganonna dohot parabitonna na mansai uli. Marhite tudosan i,
ndada asa songon pidong hita so pola manabur, manang manapu angka na so
sinuanna, alai sabalikna ala sumurung do hita dibahen Debata sian angka pidong,
ala ni i ingkon mangula do hita jala manabur manarihon ngolunta tu tingki na
naeng ro, so pola holsoan so pola morongorong. Dijamin Debata do ngolunta
marsipanganon dohot marparabiton, asal ma olo hita mangula ulaon hombar tu lomo
ni rohana.
g)
Patujolohon
mangalului harajaon ni Debata (ayat 32-34). Marhite angka ayat on do dipaboa Jesus tu hita dia do parjolo na
rumingkot siulaonta di ngolu on. Ai sai hira na rumingkot do sipanganon dohot
angka arta na adong di portibi on luluan parjolo, ala digoari do i kebutuhan
primer. Hape sabalikna, anggo arta i ndang boi manjamin kelangsungan ni ngolu.
Sabalikna, molo denggan parngoluon ni jolma, denggan marroha, tarjamin do adong
artana sipangkeonna di ngoluna. Ala ni i ummarga do ngolu sian arta, ummarga do
ngolu sian parabiton. Di bagasan harajaon ni Debata do jaminan ni ngolu. Manang
ise naung mandapot harajaon ni Debata, boi do dapotsa muse sude angka arta na
ringkot di ngolu on.
h)
Huria ni Tuhanta
na hinaholongan; holso manghorhon hajahaton. Pingkiran na paholsohu
dohot na pasarihu tu kebutuhan ni ngolu ternyata boi patubu hajahaton. Umbahen
na torop angka pejabat korrupsi, ala na holsoan do ibana di ngolu on, asa adong
didok rohana di ngoluna, dohot di ngolu ni ianakhonna marsundut sundut. Hape
dung godang arta i dapotna sian dalan na so sintong, ndang sonang ngoluna,
ndang puas panghilalaanna, torus do sai naeng tambaanna nian arta i so hea
marnasae. Ala ni i, sai gumodang do holso ni angka pararta sian na so pararta,
gumodang do holso ni na mora sian na pogos.
i)
Huria ni Tuhanta;
marpanarihon manghorhon hapadoton mangula. Isarana angka halak Eropa,
pogos do nasida di sumber daya alam, na so adong kekayaan alam
sipangasahononna, hape nasida do ummora, ala nunga jumolo nasida mangalului
dohot manjalo harajaon ni Debata dohot hasintonganna di angka tingki na salpu.
Sabalikna halak Asia, khususna Indonesia na memiliki godang kekayaan alam alai
ternyata gabe sai lam marpogos ala ndang dimiliki harajaon dohot hasintongan ni
Debata, Atik pe sude warga negara Indonesia mengaku beragama, mengaku
marhaporseaon tu Tuhan, alai ternyata di negara on ma na gumodang hajahaton,
pembunuhan dohot angka kekerasan. Laos di negera on do na gumodang dapot KKN
dohot angka penipuan na patar. Sudena hajahaton i tubu sian pingkiran ni jolma
na sai holsoan so marhaporseaon tu Debata.
j)
Huria ni Tuhanta;
aha do lapatan ni hata "holsoan"?. la hata
"holsoan" na marharoroan do i sian dua kata dasar ima:
"hol" dohot "so", Hol lapatanna
"mandul" ndang produktif. "So" na marlapatan
"fakum", ndang mangula. "Holsoan", ima pangalaho na so
adong marpanarihon, ndang adong inisiatip mangula ulaon, alai sai
morongorong di angka na hurang. Ala ni i cenderung do angka jolma na holsoan
mangulahon hajahaton manang marpingkir negatip. Hombar tu si do diorai Jesus
dohot tegas asa halak Kristen unang holsoan. Hata holsoan di bahasa Indonesia
didok "khawatir", ima kondisi ni jolma na so jelas marpingkir, alai
sai bobonosan huhut hitirhitir ateatena so boi mangula siulaon. Kebalikan ni
hata holsoan, ima "marpanarihon", ima sikap na segera mangusahahon
sesuatu hombar tu kebutuhan di ngolu siganup ari. Paima dapot na niluluan, rela
manghasabamhon na adong, paima dapot na dumenggan. Songon i do ngolu ni angka
na porsea na so pola holsoan. Ala mansai ringkot do angka sipanganon dohot
parabiton, dohot sude angka na porlu di ngolu on, ala ni i do umbahen didok
Jesus asa unang holsoan, alai marpos ni roha tu Debata, huhut mangula angka
ulaon di bagasan panghirimon na togu. Marhite pangulaon i do Debata manarihon
ngolunta. Amen.
