Jamita Evangelium, Minggu II D.Trinitatis, 14 Juni 2026

DIPINTORI ALA HAPORSEAON

(Dibenarkan Oleh Karena Iman)

Galatia 2 : 15 – 21

 

a)             Huria ni Tuhanta na hinaholongan, Bindu 1 dohot bindu 2 di surat Galatia on manaringoti taringot tu hapolinon ni Barita Nauli. Secara khusus di bindubindu on, ditaringoti do impola (intisari) ni Barita Nauli. Hapolinon ni Barita Nauli dohot hasintongan na jinalo ni Apostel Paulus sian Debata, laos i do na pinodahonna tu huria Galatia. Di jolo ni angka ayat on dipatorang do paboa sapandapot do sude angka sisean (apostel) i, paboa Barita Nauli taringot tu haluaon i, na marharoroan do i sian Debata. Jala holan ala ni asi ni roha ni Debata sambing do i, ndang adong disi ala ni usalta ni jolma. Barita Nauli na binaritahon ni si Paulus ndang marasing sian naung binaritahon ni angka Apostel na asing (2 11-21). Di sude surat Galatia on mansai tangkas do ondolan haluaon napinatupa ni Debata marhite haroro ni Kristus ala ni asi ni roha, dohot ala ni haporseaon. Jala na gabe dasor ni haporseaon i i ma silang ni Kristus. Paulus mangondolhon di turpuk on, marhite haporseaon do asa dapotan haluaon ndada na mangulahon patik i (2: 16). Tujuan ni si Paulus di suratna tu halak Galatia on, i ma asa hot hasintongan (hapolinon) ni Barita Nauli i di hamu (2: 5). Angka na porsea jala tardidi dapotan haluaon (Markus 16: 16), dung malua jolma i songon dia do sikapna? Aha do respon ni jolma na malua i. Alusna i ma asa naeng nian angka naporsea i gabe jolma parhaporseaon na marpangulaon, ai molo so marpangulaon na mate do i (Jak 2: 17). Angka dia ma na gabe parbue ni haporseaon i? I ma angka na marparbuehon parbue na denggan, parbue ni Tondi (5: 22).

b)             Ayat 15 -16: Diokui si Paulus do paboa halak Jahudi do ibana ima bangso ni Debata naung dipillit hian jala bona ni haroroan ni Patik ni Debata nada mambahen nasida gabe halak na pinalua ni Debata. Tu nasida do dilehon patik I parjolo asa diulahon, alai ndada ala ni na mangulahon patik I gabe malua nasida. Haporseaon ndang na holan mangulahon patik i, alai naung tajalo do asi ni roha sian Debata marhite Jesus Kristus naung gabe jolma. Naung dipintori do hita (dibenarkan= δικαιόω- dikaio) dinyatakan benar dihadapan Allah. Haporseaon do inti dohot sumber ni ngolu partondion (bd. Rom 9:31-10: 3). Molo ndang nionajar ni haporseaon mangulahon patik i marisuang do sude na taulahon i, jala ala parniulaanta i ndang denggan be di adopan ni Debata dohot donganta jolma. Jadi holan sada na ma dalan i ma Debata sandiri naung mamintori hita dohot naung manobus hita marhite AnakNa Jesus Kristus (bd. 2 Kor 5: 21). Jadi haporsenonta tu Ibana ndang gabe pasif hita alai tongtong do hita mangulahon lomo ni rohaNa. Songon i do nang Jesus nang uju berhadapan dohot patik i. Lapatan na ndang naeng mansoadahon patik i hita, ala naung dipalua hita, patut hita mangalahonsa, songon Tuhan Jesus na ro tu portibi on i ma pahothon jala pasinghophon patik i.

c)              Ayat 17-18: Marhite ayat on diondolhon do, ia haluaon i silehonlehon ni Debata sambing do i. Ndang adong disi usaha ni jolma. Alai tutu ingkon adong do reaksi ni jolma, asa taripar tu ibana haluaon i. Jala ala naung dipintori hita ingkon ongkuonta do pardosa na godang do hita, ndang bor be hita mamintori parnmulaonta. Taulahon pe patik i ala i nama kewajibanta songon anak naung dipalua Debata di bagasan holongNa marhitehite naung Tarsilang Jesus Kristus di Golgata laho manobus hita sian dosa i. Jadi jelas haluaon i holan asi ni roha ni Debata sambing do!

d)             Ayat 19-20. Kristus nunga mate ala ni ahu (hata "ahu" dipangke si Paulus marlapatan ibana songon jolma naung dipintori Jesus diongkuhon abana, "mangolu manang mate pe ibana, nampuna ni Kristus, jala angka na malo godang mamangke hata "hita jolma"). Holan marhite Jesus na ma hita sahat tu Ama i, ala ndang olo jolma i mangungkap rohaNa mangulaho patik i dohot sempurna. Ala patik i songon rante, sada pe dilanggar madabu ibana tu dosa i berarti gagal mangulahon patik i. Di bagasan Kristus do adong haluaon (Joh 14: 16). Dung ro Kristus ndang margogo be patik i. paluahon jolma sian dosa. Antong, aha do guna ni patik i ? la patik i, i ma hasintongan (kebenaran, kesucian), asa boi malua jolma i sian dosa. Alai realitasna, ndang adong jolma na mampu mangulahon patik dohot singkop mangulahon patik. Alai gabe Tuhanta i ma na mangulahon patik i dohot singkop singkat ni hita jolma. Patik i marguna gabe cermin dohot pembimbing jala manogunogu hita. Gabe cerminan do patik i patuduhon ketidakmampuanta mangulahon hasintongan, hape dijalo Jesus hita gabe ianakhonNa. On ma sihalashononta, nang pe so mampu hita mangulahon patik i alai dijangkon/dijalo Jesus do hita gabe ianakhonNa.

e)             Ayat 21: Molo adong dalan na asing, dalan ni ni jolma i; boi do ibana dipintori holan ala mangulahon patik i, dohot tongtong ibana porsea tu Debata sian nasa rohana (pat. si Elisa na manaek tu surgo). Alai nuaeng torus do jolma mangulahon dosa, jala ala ni i ndang tarbahen jolma i be mamintori dirina. I do sibingkasi manegai pardenggananta dohot Debata. Holan di bagasan jala marhite Kristus do na boi padengganhon pardenggananta dohot Debata. Ndang adong kompromi porsea tu dirinta sandiri, alai ingkon ro ma hita jala pillitonta ma manghaporseai asi ni roha ni Debata marhitehite Jesus Kristus na tarsilang i. Gabe silang i do inti ni parjamitaan ni angka na porsea di Ibana (bd. I Kor. 15: 14).

f)  Huria ni Tuhanta nahinaholongan, tandap do na so adong dapotan hatigoran di jolo ni Debata bahenon ni patik i, alai na mangolu do partigor i hinorhon ni haporseaonna (3 1), dung madabu jolma tu bagasan dosa hamatean na gabe jambar ni jolma i Umbahen didok di Rom 6: 23 "Ai upa tinuhör ni dosa do hamatean". Mulai sian na robi dipatupa Debata do dalan laho manogu jolma sian dosa doho hamatean. Dilehon Debata do patik tu si Musa di dolok Sinai (2 Musa 20), na gabe siulahonon ni jolma di jolo ni Debata. Alai ndang malua jolma i sian dosa hinorhon ni na mangulahon patik (Gal. 2: 16). Ala ni i do umbahen na 'ro Kristus tu portibi on laho paluahon jolma sian dosa. Jadi ndada usaha ni jolma haluaon i alai tung sibasabasa ni Debata do. Paulus patangkashon pamodaion si songon i tu huria Galatia, asa tung tangkas diantusi huria i hasintongan ni Barita Nauli i. Silehonlehon ni Debata sambing do haluaon i, ndang adong disi usaha ni jolma. Alai tutu ingkon adong do reaksi ni jolma asa taripar tu ibana haluaon i. Tapatudos do i tu mataniari na binsar di manogot ni ari na mangalehon sinondang tu sude jolma, alai molo dihinsu do bagasna ndang tarbahen masuk sinondangna i. Songon i do Kristus patupahon haluaon tu jolma holan sahali do i masa (ef hapaks). Alai molo ndang diungkap dirina manjalo haluaon ndang dapotan haluaon ibana. Ala ni i laos diigil do tongtong haoloon ni jolma mangungkap rohana laho manjalo haluaon i. Angka halak naung manjalo haluaon i (pinalua ni Kristus) unang be didatdati mardosa (mangulahon dosa).

g)              Dihilala si Paulus paboa na so bolas ibana mangulahon patik, ia so ala ni Kristus. Dung pe ditanda ibana Kristus. disi pe asa ditanda ibana ngolu na sasintongna. Ngolu ni Apostel i ndang sebatas ngolu pardagingon be. alai naung ginohan ni Tondi Parbadia ala nunga Kristus maringan di bagasan Ibana. Jala ibana mangolu di bagasan Kristus. Disadari do paboa di bagasan daging do ibana mangolu. Alai adong halobianna, i ma ngoluna mangolu di bagasan haporseaon tu Jesus Kristus. I ma na ingkon tandap auhonon ni halak Kristen. Molo mangolu hita ingkon mangolu di bagasan Kristus, ingkon hilalaonta molo ndang mardongan Jesus ndang marguna ngolu on. Aha ma gunana liat portibi on diomo halak molo rugi tondina? Ndang ala ni ulaonta na denggan umbahen na dipalua Dębata hita, als naung dipalua Debata hita, alai ala naung dipalua Debata hita gabe tama ulahononta na denggan. Diulahon halak Kristen pe angka na denggan ndang pahala na niluluanna disi, songon haporseaon ni halak Silom, alai gabe tanggungjawabta do i mangulahon na denggan songon anak ni Hatiuron. Sola gratia: holan ala asi ni roha ni Debata sambing! Ala ni i, ala naung diasii jala dihaholongi Debata hita, hita pe patut ma mangolu di bagasan asi dohot holong ni roha. Topik  ni minggunta mandok: DIPINTORI ALA HAPORSEAON  (Dibenarkan Oleh Karena Iman), ala ni i tahaposi ma Ibana, unang tadatdati mardosa, taulahon ma na tama, songon angka anak ni Debata. Amen.