DIPINTORI
ALA HAPORSEAON
(Dibenarkan Oleh Karena
Iman)
Habakuk 2: 1 - 5
a)
Huria ni Tuhanta
na hinaholongan, dibagasan arsak do si Habakuk marnida angka hajahaton na masa
dihumaliangna. DIida ibana do hadadabu ni Juda na sega binahen ni pangalaho
jala martangiang do ibana asa tartogu haporseaon ni bangso I, alai songo na so
maralus do Tuhan I di namasa i. Sai sungkunsungkun ma rohana: Tuhan, didia do
Ho ? boasa loasonMu masa sasudena on ? Andigan do pasauthonMu sangkaMu di na masa
on ? Dung piga leleng nari, dialusi Debata ma alualuna I, “ Ale habakuk ndang
na manang tudia Ahu, jala Huboto do angka na masa. Bereng ma jala parrohahon, pamasaonku
ma na so dapot rohm molo hudok tu ho; sai na paheheonku do Babel laho mangatur
Jehuda.” Dohot parhataan na asing; lam jumorbut do na masa tu hamu. Dison do na
so tarjalo si habakuk jala ndang dapot di roha dohot pikkiranna. Masirapusan ma
rohana; manghaposi Debata manang marpangunsandean tu pikiranna sandiri. Boi
masa do pangalaho sisongon I, molo sipara maol tahilal aparngoluon on,
mangasahon Debata do manang mangasahon pikiranta sandiri. Molo tahaposi Debata,
naeng ma benget hita paimahon alusNa tu hita. Jala sian turpuk on do hita boi
marsiajar sian si Habakuk taringot tu na paimahon alus ni Debata.
b)
Tingki Paimahon; diboto si Habakuk do ai holan Debata sambing do nampuna
alus na ringkot. Alai aha ma lapatan ni na paimahon i? Adong tolu dalan laho
paimahon Debata nab oi putihonta sian turpuk on:
Ø Naparjolo; paimahon dibagasan habengeton; ndang taboto sadia leleng si Habakuk paimahon alus
na sian Debata. Ayat 1 on ndang paboahon I, alai dipaboa do sikap dohot
pangalahona laho tumangihon alus na sian Debata. Astuanna ingkon benget do si
habakuk. Isarana molo naeng laho hita mar -angkot tu gareja, alai mansai leleng
ro angkot I, gabe ndang sabar be hita, jala gabe mulak ma ta tahi, ndang
paimahon angkot I be hita. Disi ma hita naung gale jala mandele, menyerah.
Contoh na asing, molo laho hita marubat tu dokter di Ruma sakit, hape ansai
godang antrian, jala ndang olo be hita paimahon ala ni lelengna, disi ma dang
pajumpang be dohot dokter I ala laho do mulak tu jabu. Na dumenggan nian
paimahon do, molo tapaima denggan disi do hita marjuang (tidak menyerah).
SOngon I do hita molo paimahon alus ni tangiangta sian Debata, ringkot do
kesabaran, habengeton. Molo so benget hita disi ma na so unduk jala serep
rohanta. Molo so benget hita jotjot doi ala naung boi ta atur na gabe alus ni
pergumulanta, songon na merasa na umbotoan hita sian Debata. Molo ndang sabar
hita disi ma ginjang n iroha I, asa habengeton I manghaporluhon haserepon ni roha.
Taingot ma haserepon ni roha ni si Job, ndang gabe menyerah ibana alai tongtong pro aktif; ima
haporseaon na togu.
Ø Napaduaho, paimahon dohot panatapan na tangkas, tabereng ma na niula si Habakuk; na jongjong do ibana
di atas ni panatapan. Molo najolo dipajongjong do panatapan (menara) di angka
kota kota asa boi mamereng tu na dao. Molo di tano na tipak, pamerengan nasida
mansai terbatas do, mansai godang do na so tarnidasa. Alai molo di ginjang ni
panatapan I, boi do idaonna mansai bidang jala dumenggan muse. Lam timbo
panatapan I lam godang ma siidaonna.Boi do idaon nasida angka musu n aro sian
na dao. Jadi aha do lapatan ni I di hita nuaeng ? Ima na so bolas hita holan
mamereng angka parsorionta sambing, alai naeng do tataponta panaritaa na lam
umbidang na pinasahat ni Hata ni Tuhan I tu hita. Isarana na tinaon ni
Ap.Paulus, ndang adong partinaonan na umborat sian na tinaon ni si Paulus ia so
holan Jesus. Mansai maol do dalan panaritaan ni si Paulus; digosagosa, mangae
sahit pamatang, dibasbas; ditaon do paraona na matolbak. Alai aha ma nanidok
siPaulus taringot sude panaritaanna I ? Rom 8:28 Alai taboto do, saluhutna do
manumpak tu na denggan di angka na marholong ni roha di Debata, angka na
jinouna sian tahina hian. Tung manatap do si Paulus di ginjang panatapan I, ai
tung soada doi sude martimbanghon n ani ae ni Jesus.
Ø Napatoluhon; paimahon dibagasan benget ni roha. Didok si Habakuk; “…jala tindang ahu di
partanobatoan…” na marlpaatan ditulak ibana do asa hohom sambing. Molo na
manjaga on songon security ma dohonon, ndang marnasoan, asal ma unang tarpodom
jala lemba. Sai adong do dibahen kegiatanna asa jaga jala waspada ise na ro
jala aha na masa. Molo so waspada, ro ma musu laho manoro, ima halelengse ni
huta. On ma cara ni si Habakuk manggombarhon na pinatupana; nang pe naung sego
bangsona di moral nang pangalaho, jala marungkil do ibana binahen ni I ala
dihabuangan bangso Babel do nasida; disi do ibana bingung jala mabiar, alai
tongtong do ibana martangiang tu Debata, ndang lari tu manang dia ibana. Olo do
sipata molo ro parsorion ni ngolu sai ganggu rohanta, naung leleng ditangianghon
alai laos soada hamubaon, boi gabe mandele hita, jala ndang martangiang be,
mang mangihuthon angka parpunguan nang partangiangan dohot parmingguon, alai
songon halak na porsea hita hot ma hita mulaulaonta, angka haringgason I unang
ma moru, ai marguna doi laho pahothon pangkirimon nang pos ni rohanta tu Tuhan
i. Paimahon Debata lapatanna tongtong hita manghaholongi Ibana marhite na satia
mangulahon patik nang HataNa.
c)
Huria ni Tuhanta
na hinaholongan, alus ni Debata na tajaha di ayat 2-3; ndang dipaboa sadia
leleng si habakuk paimahon alus sian Debata, alai sandok sai maimaima do ibana
di Debata jala dialusi Debata do alualuna. Dialusi Debata do marhite gombaran
dohot pangkirimon, asa surathononna di batu aha sidohonon ni Debata tu
bangso i. Molo sinuaeng on boi do tabahen di media sosial songon: facebook,
tiktok, Instagram, di wa dohot lan na asing taringot tu Hata ni Debata asa sude
jolma mamereng jala manjaha, boi do molo adong situs web ni huria mansai
denggan songon dalan paingothon angka sihobasan di huria nang di keluarga.
Ditingkina dipamasa Tuhan I hombar tu sangkapNa. Nang pe sipata lumemba di
rohanta alai ndang adong na boi manegai sangkap nang tingki ni Tuhan i. Asa
benget ma jolma laho paimahon I masa ai ndang adong na so tarpatupa Debata.
Dipadanhon Debata do sada restorasi nah atop di situasi na masa, mansai ringkot
do paimaimahon. Mansai hansit do nian alai haluaon ni Tuhan I gira ma rot u bangsoNa.
d)
Ay.4-5;
sasintongna didok Debata do adong dua dalan ni ngolu ni jolma; adong ma halak parjahat
dohot halak partigor. Molo halak parjahat i didalan ginjang ni roha do, sai
marpangunsandeon do rohana tu dirina sandiri jala bondutonna do sude di dalan
nasida i. Ima dalan ni bangso Babel. Alai dalan ni halak partigor i na
sabalikna, ima dalan haporseaon. Dihaporseai do Debata aha pe na masa di
pardalanan ni ngoluna. Na mangolu do partigor i binahen ni haporseaonna. Alai
aha do lapatan ni na mangolu binahen ni haporseaonna ? Molo di konteks ni
Habakuk ndada taringot haporseaon na secara teologis sambing. Ditonga ni portibi
naung sega di humaliang nasida, dihirim
Debata asa porsea nasida tu Ibana dohot angka padanNa i. Asa tongtong nasida
satia tu Debat nang pe mansai borat
sitaonon nasida. Ndang boi nasida pasiding halelengse ni bangso nasida i uju ro
Babel manaluhon Jehuda, alai boi do nasida gabe na porsea molo tongtong nasida
marhaporseaon. Ayat 4 on mansai ringkot do di hita angka na porsea songon ayat
mas, na gabe siingoton, ala dikutip do turpuk on di Padan na Imbaru, ima:
Ø Roma 1:17 – Sebab di dalamnya nyata kebenaran Allah,
yang bertolak dari iman dan memimpin kepada iman, seperti ada tertulis: “Orang
benar akan hidup oleh iman.”
Ø Galatia 3:11 – Dan bahwa tidak ada orang yang
dibenarkan di hadapan Allah karena melakukan hukum Taurat adalah jelas, karena:
“Orang yang benar akan hidup oleh iman.”
Ø Ibrani 10:37-38 – Sebab sedikit, bahkan sangat sedikit
waktu lagi, dan Ia yang akan datang, sudah akan ada, tanpa menangguhkan
kedatangan-Nya. Tetapi orang-Ku yang benar akan hidup oleh iman, dan apabila ia
mengundurkan diri, maka Aku tidak berkenan kepadanya.
Di surat ni Ap.Paulus tu halak Galatia paingothon
haunduhon tu na mangulahon Patik ndang boi m ambahen halak gabe pintor. Mansai
denggan do patik i alai ndang mampu mambahen pintor halak di adopan ni Debata.
Holan mendiagnosa do patik i alai ndang na pamalumhon angka masalah. Holan
marhaporseaon tu Jesus do na boi papintorhon hita jolma pardosa on. Laos songon
i ma na masa di partingkian si Habakuk, na marsak do rohana tu Debata siala
bangsNa i ndang mangulahon patik ni Debata. Asa tangkas ma alus ni Debata
mandok; “Na mangolu do halak na tigor I binahen ni haporseaonna” ima na
tong masa tu halak Galatia. Mangolu dibagasan haporseaon ima manghaporseai
Tuhani di sandok panggulmiton ni ngolunta, saleleng mangolu hita; mangolu 24
jom, 7 ari nang 52 minggu sataon. Nang songgop ragam hamaolon, sitaonoon nang
haporsuhon tongtong ma hita hot marhaporseaon tu Tuhan i. Mangolu dibagasan
haporseaon ndada na holan porsea na
urupan ni Tuhan i hita, alai uju sangkap ni Debata ima halelengse, manang masa
musibah, tongtong ma hita manghaporseai Ibana. Halak na tigor i mangolu binahen
ni haporseaonna, molo porsea do hita, paimaimaonta do Tuhan i.
e)
Huria na hinaholongan dibagasan Jesus Kristus; Boha
do hita paimaimahon Tuhan i disituasi na maol on, ima holan sada songon si
Habakuk na pasahathon haporseaonn holan tu Tuhan sambing ndada tu keadaan na di
humaliangna. Laos songon i ma hita angka na porsea, unang gabe hasusaan,
hahasinton, nang parsorion ni ngolu i na tapaberengbereng, alai tapaidaida ma
tu ginjang, tu hasangapon ni Tuhan Jesus Kristus i. Natinaon ni Jesus i holan
laho manghophop hita jolma pardosa on asa malua sian dosa, sibolis nang sian
hamatean na manongtong i. Nang pe sipata maol antusanta binahen ni ragam
hasusaan, parsorion ni ngolu, sai unang ma ganggu rohanta nang haporseaonta.
Tongtong ma hita hot marhaporseaon jala manggula nab oi tarula hita. Naung tapasahat
do luhutna tu Tuhan i marhite tagiangta, taulahon ma angka ulaonta na somal na
marguna tu hita nang tu humaliang, salobina Tuhanta I do na pasingkophon. Amen.
