Padiri
Roha Dohot Hosa Mangalului Jahowa
(Mengarahkan Hati Dan Jiwa Untuk Mencari Tuhan)
Heber
10: 19 – 25
a)
Huria ni Tuhanta
na hinaholongan dibagasan Jesus Kristus, Sosososo siulahonon di hangoluan
siganupari do turpuk jamita on. Sada joujou asa marbenget ni roha di bagasan
haporseaon, haholongon dohot panghirimon. Tu sandok halak Kristen di sude
partingkian do na ingkon mamarrohahon joujou on. Di bagasan Jesus Kristus naung
maniop tohonan na tolu i i ma Raja, Malim dohot Panurirang disosohon do joujou
on, lumobi ma tahe di na gabe Malim Na Bolon Jesus Kristus i marhite
panghophoponNa di hau Silang i. Joujou on asa bongot hita tu inganan ni Debata
Jahowa marhite haporseaonta na togu i. Dijouhon do tu hita asa papatar diri
songon halak na marpanghirimon di Kristus, jala asa sai tapatuduhon haholongon
ni roha di angka dongan Kristen, marhite na masipajujuan tu haringgason
mandohoti parpunguan ni halak Kristen. Diondolhon do hinaringkot ni na
papatarhon haporseaon, benget ni roha marpanghirimon dohot mangulahon
haholongon jala na so marnaloja mangulahon na denggan.
b)
Hatorangan ni
turpuk:
1.
Ayat 19-20:
Marhite Tuhan Jesus na ungkap do dalan di hita laho bongot tu jolo ni Debata di
adopanNa na badia i. Jesus do na mangungkap dalan di hita gabe boi jonok tu
Tuhan Debata. Marhite Jesus i diungkap do dalan na imbaru di hita na so adong
hian dalan i di Padan Na Robi dohot diungkap do dalan tu hangoluan na
margogoihon hita, jala diriNa sandiri do dalan hangoluan i (ptds Joh 14:6).
Marhite Silang ni Jesus de i masa, i ma dung didok sian silang i "nunga
marujung", "Ale Amangsahat tu tanganMu ma tondingku", marhite
hamamateNa maribak ma hirehire na di bagasjoro na badia i (Ida Mat 27:51-53
dohot Kolosse 1:20-22). Nunga dipadomu be marhite Silang Na i Debata na badia
dohot angka jolma na porsea na pinarbadiaanNa. MudarNa na durus sian hau
pinarsilang di dolok Golgata i do panghophoponNa mangungkap dalan di hita. I do
asa didok daging ni Jesus i do rimberimbe i (tabir) na mambuka lan hangoluan di
hita. Hinorhon ni i di bagasan dalan na imbaru jala dalan hang habaranion na ma
hita pajumpang jala manjumpanghon Tuhan Debata. Ndang mabiar be hita masuk tu
inganan na ro Debata disi marhitehite Jesus. Sahat tu tingki on buka do dalan i
tung so adong ambatambat tu angka na naeng masuk tusi. Saleleng di bagasan
daging dohot mudar i dope Jesus ndang patar hadebataonNa, alai dung diribakhon
rimberimbe (selubung) i ma dagingNa i gabe tarida ma patar hadebataon ni Jesus
i. Jala di hau Silang ido diribakhon rimberimbe i Masa i saluhutna ala holong
Na na mamboan sude jolma tu dalan manuju parmianan ni Debata Jahowa. Ala ni i
ingkon tongtong ma hita marhiras ni roha manang di bagasan habaranion di jolo
ni Tuhan Debata Ama i marhitehite Jesus Kristus. Tongtong ma hita mardalan sian
dalan na pinatuduhonNa i ma di bagasan Tuhan Jesus Kristus.
2.
Ayat 21: Jesus i
ma Malim Na Bolon di bagas ni Debata di surgo i. Jotjot do adong na manungkun
di dia do surgo i? On do na sai ditiop panurat on: Surgo i ma inganan na so
tardodo roha ni jolma jala na so tardungdung pikiran ni jolma, alai disi do
maringanan Debata. (Sorga adalah tempat yang tidak terselami hati manusia dan
tidak terjangkau pikiran manusia, tetapi di sanalah Tuhan Allah bertempat
tinggal). Asa ndang dao hape surgo i sian angka na porsea, ai na sadao ni
tangiang do (Hanya sejauh doa). Jala sian dia pe hita martangiang tuk do Debata
na di surgo i manangihon tangiangta. Nunga di surgo i Jesus gabe Malim Na
Bolon, taboto ulaon ni malim i ma na padomuhon jolma tu Debata. Jala tangkas ma
di hita nuaeng, ia Jesus Kristus i ndada holan na patuduhon dalan t Debata di
hita, alai laos Ibana do dalan i na marhite Ibana nunga patar di hita haroro
(kehadiran) ni Debata. Di bagasan Jesus Kristus, sigomgom bagas ni Debata,
diboan do hita sahat tu adopan ni Debata di surgo i. Molo di bagasan Jesus hita
masuk tu bagas inganan ni Debata, rap ma hita dohot angka na badia i, i ma
Keluarga ni Debata (family Dei), pajumpang ma hita nang dohot Jesus na
dipabangkit songon Malim na mangolu jala na mangarajai ro di salelenglelengna.
Na Bolon do malim i i ma na di bagasan habisuhon godang laho mangondihon
(membela) hita di angka na taharingkothon (ptds. Heber 7:25).
3.
Ayat 22: Roha na
sintong jala na bulus manjangkon Jesus di bagasan haporseaon na togu, paboa
Ibana do na tuk paiashon hita sian dosa, di ngolunta parduru (lahir) manang
parbagasan (batin), i do na pinangido ni ayat on. Ai Jesus do na tangkas boi
mangurasi (pajashon) hita. Songon malim na bolon na di bagasjoro na sai
paiashon dirina marhite aek na tio, andorang so diulahon tugasna pasahat pelean
situtungon tu Debata. Ianggo na tutu situtu paiashon hita sian haramunon ni
dosa i i ma Jesus Kristus sandiri. Holan Ibana do na tarbahen paiashon hita
jolma sian roha parbagasan na jahat na gok dosa i. Ndada holan di pardagingon
hita diuras (dipaias), alai tung di sandok ngolunta do dipaias sian angka
pikiran dohot sian angka hagiothagiot ni tano on i ma marhite haroroNa dohot
TondiNa i. Mardomu tusi do disosohon tu hita asa tadapothon Tuhan Debata di
bagasan roha na sintong. Lapatanna, ingkon marhadaulaton do hita tongtong. Asa
mangolu hita di portibi inganan parlapelapean on, songon i di surgo inganan na
salelenglelengna i. Unang ma tarlalap hita binahen ni angka na di tano on. gabe
tahalupahon angka na di ginjang i. Di haronsoton ni ulaon di ngolunta
siganupari naeng ma ingkon tasangahon pajumpang tu Tuhan Debata. Sasintongna na
taboanboan do manang tu dia pe hita inganan ibadahta (parsombaonta) i ma di
bagasan rohanta sandiri; ala ni i unang ma lupa hita masuk tu inganan ibadahta
tu Debata i ma rohanta i.
4.
Ayat 23:
"Momos ma tatiop panghirimon na taparhatopot i, ai haposan do na
marbagabagahonsa!" Di tongatonga ni angka pangunjunan na godang sahat tu
tingki on i ma na naeng mangelaela hita maninggalhon haporseaonta i, siala ni
angka na tahirim na so tagohi dope, disosohon do tu hita asa tongtong togu
maniop huhut mangokui paboa na ungkap do tongtong panghirimonta di Kristus i.
Paboa ndang na tarhirim hita di angka bagabaga na sian Debata naung diula
marhite Kristus Jesus i. Unang ma sampe tapalua dirinta sian na tahaposi jala
tahaporseai i. Boi do godang elaela ni angka na di tano tu hita na naeng
mambuat haporseaonta, i ma marhite na manghusiphon tondi materialistis, i ma
marroha arta na di tano on, gabe lupa Tuhan Debata; boi mansai godang angka na
masa ro tu parngoluonta mambahen humutur mambalambal haporseaonta. Naeng ma
momos tatiop haporseaonta tu na tahirim i, asa manang aha pe na masa na tabolus
tongtong marsihohot hita na so tagamon sumurut manang marpengpeng haporseaonta.
Jala hinorhon ni i parsidohot ma hita manean bagabaga na sian Tuhanta i.
5.
Ayat 24: Dijujui
do hita asa mamarrohahon angka donganta na asing. Paboa songon halak Kristen
hita ndada holan na ringkot di dirinta sisarihononta alai dohot do na ringkot
di angka donganta na asing. Ndang adong hita na tolap mangasahon hagogoonta
sandiri laho paluahon dirinta sandiri. Godang do na mamarrohahon haluaon ni
angka donganna na asing gabe lupa ibana na dirina pe ringkot do haluaon. Mura
do madabu hita tu halak Kristen na mamarrohahon na ringkot di dirina sandiri.
Hape ngolu hakristenon na sasintongna ingkon mamarrohahon na ringkot di sude
jolma do. Mangihuthon turpuk on adong tolu di parsaoranta dohot donganta jolma
na ingkon siparrohahononta, i ma:
Ø Parjolo
Ingkon masipajujuan do hita asa rap marngolu na denggan dohot sude donganta
jolma. Hombar tusi ganup hita halak Kristen pataridahon tiruan na denggan,
marhite holong ni roha. I ma marhite parsaoran na denggan hombar tu tata-krama
na uli, ganup mangulahon tugas dohot tanggungjawabna be sadenggandengganna.
Ndang dos ulaonta be di masyarakat, alai molo alai molo ganup mangulahon
ulaonna be sadenggan-dengganna disi do jumpang hita parngoluon na mulia rap
dohot angka donganta. Tama do songon halak Kristen hita pataridahon Kristus tu
angka donganta jolma, i ma marhite hata, pikiran nang pambahenan pe. Naeng do
gabe songon "angka "Kristus na metmet" angka halak Kristen i
manang di dia pe nasida na pataridahon haholongon ni roha tu manang ise pe.
Ø Paduahon
Ingkon pasomalonta do rap patupahon partangiangan. Molo tongon ndang saugamo
hita dohot torop donganta "sahuta" (isara di angka kota),
taharingkothon ma parsaoran na denggan tu angka donganta na "sahuta"
(sa-kelurahan, sa-desa). Jala sai dipungka dohot ditutup ulaon/panghataion
marhite tangiang (hombar tu agamana be). Tongtong ma sai taharingkothon
mandohoti parsaoran dohot dongan sahuria (sa-weik/sa-lunggu/sa-wilayah), so
tung adong nian sian angka donganta sahaporseaon na papulik diri sian angka
parpunguan.
Ø Patoluhon,
Ingkon sai lehononta do semangat tu angka donganta. Tung sada pangalaho na
mansai uli do molo rade hita mangalehon semangat tu dongan. Ringkot do songon
hata ni si Elifas tu si Job na mandok, "Halak na tinggang hehe do muse
binahen ni hatam, jala pat angka na telluktelluk dipatogar ho." (Job 4:4)
Ringkot do saburhononta songon halak Kristen hita sagodanggodangna hata na
pasonanghon roha ni torop jolma. Asa na marhagaleon hian gabe marhagogoon
patulushon sangkap, sintasinta, sihol ni roha nang na nihalungunhon ni rohana
be. Ingkon sai roba pahehehon roha ni dongan ma nian rohanta songon halak
Kristen. Jotjot pasahat hata pujian, hata mauliate, hata na paposhon roha, na
mambahen las ni roha songon i na margogoihon. Tontu halak na martua do manang
ise pe molo dipatupa angka hata na songon i. Mardomu tuson so tung adong sian
donganta sa huria na maniru hasomalan na so denggan, i ma na mamereng (molo
adong) donganta sahuria na so parminggu, gabe ibana pe naeng songon i. Alai
ganup ma mamangke tingki (kesempatan) na nilehon ni Tuhanta i ma ro marsomba
(beribadah) tu Ibana di parsaoran rap dohot angka donganta sahuria, nang dohot
donganta Kristen. So tung adong na hona uhum ni Debata ala ni halembaon ni
rohana.
Ndang taboto sadihari ari ni
Tuhan i, i ma haroro ni Kristus mulak muse tu portibi on, paduahalihon. Ala ni
i ingkon tapangke ma tingki parasian dope di hita nuaeng sadenggandengganna
patuduhon ngolu hakristenonta na sasintongna i. Binsan sadihari dope sadá
ulaonta na ingkon do (kewajiban) mangulahon angka na denggan tu manang ise pe
jala marhite dalan aha pe, donganta Kristen nang na so Kristen pe. Jala unang
ma mansadi hita mambahen angka na denggan i.
6.
Ayat 25: Unang
adong nian ruas ni hurianta na mabiar manang maila ro marminggu tu gareja. Molo
tung adong pe hahurangan, hagaleon manang tagamon hasalaan ni sasahalak
donganta sahaporseaon, denggan do ndang pola diparengkeli manang dipalealea
ruas na asing. Lumobi di hurianta angka na hona RPP (Ruhut Parmahanion
Paminsangon) torop do nasida dung sataon manang dua taon (songon ruas parguru),
tajalodo muse mulak tu huria. Holan naung pinabali (diharuarhon) sian huria do
na tagamon ndang tarjalo be (isara muli tu halak Silom, manang pinda tu ugamo
na asing, na maralo poda ni hurianta) molo so marbalik nasida muse tu poda
haporseaonta i. Jala unang adong nian ruas ni hurianta na martabuni patuduhon
hakristenonna. Ro ondop marminggu tu bagas Gareja i do sada patuduhon
hakristenonta. Jala usahahononta do tongtong ro tu gareja (marminggu) nang pe
ndang sai tabo tahilala jamita, manang adong tahilala pangulaon ni sasahalak
(deba) parhalado na so pala pas tu tohonanna (ulaon haparhaladoonna). Na pasti
marhite haringgasonta marminggu tu gareja disi do tapatuduhon dirinta songon
halak Kristen tu angka halak na asing (lumobi na so saugamo dohot hita) Unang
adong be nian na so ro marminggu tu gareja ala sai naeng mamilliti dongan. Molo
tardumenggan parngoluonna (timbo status sosialna) gabe so marminggu tu gareja
na torop ruasna angka na pogos. Manang molo pejabat, pengusaha besar ibana gabe
so sonang rohana marminggu di gareja na ruasna holan angka rakyat biasa. Hape
Kristus Tuhanta i nunga manghophop saluhutna marhite SilangNa na badia i. so
mamilliti na sangap, na mora. Unang adong be nian na so ro marminggu tu gareja
hinorhon ni ginjang ni roha. I ma na manghilala na so ringkot be ro ibana
marminggu tu gareja ala ni pistarna. Ai dietong dao ummalo ibana sian angka
parjamita (ise pe) di gareja i na dao na binotona di toru ni angkalna. Ginjang
ni roha ala dumenggan ngolu manang godang sinadonganna ndang na denggan i;
lumobi ma ginjang ni roha ala ni hapistaran, hamaloon (intelek) na tumimbo.
Sabisukbisuk ni jolma na di tano on na oto do ianggo di adopan ni Debata. Jala
sagogo-gogo ni jolma pe di tano on gabe halak na gale do molo ro pangunjunan tu
ibana. Ndang adong mangolu di hakristenon alai so hea marparsaoran dohot
donganna sahaporseaon di bagas gareja. Ai molo ro hita tu gareja ndada holan
naeng manjalo alai dohot do mangalehon. Jadi molo dihilala adong na hurang di
gareja ingkon rade do ibana ro marparsaoran tusi laho mangurupi paturehon
manang paulihon.
7.
Sipahusorhusoron
tu Jamita: Topik ni minggunta mandok: Padiri
Roha Dohot Hosa Mangalului Jahowa (Mengarahkan
Hati Dan Jiwa Untuk Mencari Tuhan) ima marhite:
ü Jaminan Pasupasu sian Debata Jahowa naung
dibagabagahon i do sijaloonta marhite naung tahaporseai di bagasan haporseaon
na togu i ma panghophopon ni Tuhan Jesus Kristus marhite SilangNa i. Jaminan
Pasupasu i i ma na tajalo tingki di ngolunta on, nang di hangoluan na saleleng
ni lelengna i. Tudos ma i songon angka jolma mandohoti asuransi di ngoluna, ai
adong do asuransi kesehatan, asuransi kecelakaan, asuransi kematian, dohot na
asing. I ma na diulahon asa manjalo jaminan pangurupion molo masa gangguan ni hahipasonna,
molo adong mara bahaya na so tarpasiding manang molo marujung ngolu, ai ndang
boi hita jolma manontuhon ari ujung ni ngoluna. Manghaporseai Jesus di bagasan
ngolu on nunga paradehon Jaminan Pasupasu di hita di naung pinarbagabaga ni
Debata Jahowa di angka na porsea halomoan ni rohaNa. Alani i bulus ma rohanta
marhaporseaon na togu, jala momos ma tatiop haporseaonta na tahirim i. Momos
maniop haporseaonna, hot di panghirimon ni ngoluna, i do patupahón jaminan
keamanan ni ngolu pardagingon nang partondionta di jolo ni Debatanta i. Pajonok
diri tu Debata Jahowa, maniop, manghangoluhon jala mangulahon hataNa i do dalan
di hita manjalo jaminan pasupasu i.
ü Hajojonokta tu angka donganta i do sada mambahen boi
hita mangalehon dorongan manang semangat tu ibana asa tongtong pasolhot diri tu
Debata jala diulahon lomo ni rohaNa Taboto do haringgasonta marparsaoran
(martangiang) tu Tuhan Debata jala haradeonta mangulahon angka na nidok ni
Tuhan i marhite hataNa disi do dapotan tua hita di ngolunta on, dipaias hita
sian hadosaon marhite AnakNa Tuhan Jesus Kristus, jala panean hita di angka
denggan basaNa tagan di ngolunta on, alai na lumobi ma tahe panean hita di hangoluan
na salelenglelengna i. Di na marhaporseaon na togu hita di panghophopon ni
Kristus i, tarjou do hita nang patupa pargogoion tu angka donganta na gale
marhaporseaon, asa unang lam mandate roha nasida ujungna mate haporseaonna i.
Lapatanna, ndang adong be panghirimonna tu Tuhan Debata, jala ndang
marpanghirimon be di hangoluan na so ra suda i. Adong do manang na piga rumang
ni pamargogoion na boi tapatupa di parsaoranta dohot donganta sahaporseaon
manang di huria, i ma patoguhon marhite ngolu haporseaon (Rom 1:12; Pilippi
1:4), patoguhon marhite pangantusion na bagas di hata ni Debata (Rom 15:4; II
Timoteus 4:2), patoguhon marhite na patuduhon pambahenan na denggan (Pilemon
1:7; Ulaon Apostel 10:36), patoguhon marhite Hata ni Debata (Ulaon 15:30-32; 1
Tessalonika 4:16-18), Ai mansai godang do di ngolunta on, isara ni ngolu
keluarga, ngolu sosial-ekonomi, ngolu parsaoran tu masyarakat humaliang, ngolu
mangula di sada kantor manang perusahaan, dohot lan na asing dope na boi
pagalehon manang manegai haporseaon na sintong jala tingkos. Asa torus manorus
do di hurianta ingkon patupahon pembinaan, pemberdayaan dohot angka na sarupa
tusi laho mamargogoihon angka ruas ni hurianta i (sikola minggu, remaja,
naposobulung, ina, ama dohot lansia). Ganup ma hita masihehean jala
masitungkolan tu ngolu haporseaon na sintong i, asa jumpang na sada mambahen
las ni roha di donganna na sada nari. Di pamargogoion i naeng ma ganup hita
masitangiangan, na gogo manangianghon na gale, parhaporseaon na togu
mampargogoi parhaporseaon na lomos. Asa saluhutna donganta sahaporseaon gabe
angka parhaporseaon na mangolu jala sian bulus ni rohana be manghaposi Tuhanta,
jala olo tongtong mandapothon Tuhan Debata marhite na mamelehon roha, gogo, tingkina
tu parsaoran dohot Tuhanta i, gabe dapotan tua dohot hasonangan na
salelenglelengna i. Amen.
