Jamita Evangelium Minggu OKULI – 23 Maret 2025

PAUBA ROHA ASA UNANG MAGO

 (Bertobat Agar Tidak Binasa)

Lukas 13: 1 – 5    

 

1. Huria ni Tuhanta dibagasan Jesus Kristus. Sude do jolma manarita ala ni angka sitaonon jala boi sungkunsungkun tu roha, siala ni dosa do hita manarita ? Uju ro angka parsorion, sungkunsungkun ma rohanta ala ni naung taula i do asa ro angka panaritaan i ? Dibagasan turpuk on diajarhon Jesus do ia panaritaan i ndada ala ni dosa sambing. Dipatorang Jesus do na masa dua hal, ndang dipatorang boasa masa sisongon i, siala jotjot do hita ndang mangantusi siala na boi masa panaritaan i. Dua musibah ima: na parjolo: Dipamate si Latus halak Galilea ala memberontak do nasida tu parhuaso di Jerusalem. Napaduahon, adong 18 halakna mate ditinggang palaspalas ni siloam na di Jerusalem. Ndang diparsoada Jesus dosa nasida, alai naso adong imbarna dosana dohot na manungkun i. Adong do i sahat nuaeng pemahaman ala ni dosana do i masa na bernit i, alai asing do panatapan ni Jesus taringot disi. Na parjolo; angka musibah naung masa di ngolu ni jolma, ima songon sada singotsingot na ro ma haduan na umborat . Napaduahon; angka sitaonon na naung masa i ingkon gabe pinsangpinsang tu sude jolma na naung marnidasa. Alai didok Jesus do asa marhamubaon ni roha hita (bertobat) asa unang marmara hita salelengna.
2. Ganup jolma hea do mardosa, nang disengaja dohot na so disengaja. Ndang adong sada pe jolma di portibi onna lias sian dosa, sude do mardosa. Siala ni i ro do Jesus tu  portibi on laho manobus dosa ni jolma. Marhite mudar ni Jesus na badia i manesa dosa ni sude manisia. Songon angka na porsea hita, tongtong ma hita unduk jala satia, asa tongtong marhamubaon ni roha dohot na mangulahon Hata ni Tuhan i dohot denggan. Trupuk on patoranghon taringot tu hamubaon na ringkot diantusi halak Kristen. Panjouon ni turpuk on asa sude boi mandalani ngolu na imbaru dohot Tuhan Debata.
3. Ay.1; “ro uju i” ndang laho patoranghon partingkian alai udut ni turpuk na dijolona na gabe sibahason na mangihut. Sian turpuk on paingothon angka halak Jahudi on ma tingkina nasida marhamubaon ni roha. Molo so i, siaphonon do nasida songon dua na masa uju i. Parumpamaan i na patuduhon Debata nampuna porlak i dibagasan AnakNa laho mangalului parbue ni halak Jahudi na digombarhon songon hau ara. Naung dilului Ibana do saleleng tolu taon alai ndang na jumpangan sada parbue pe. Asa naeng tabaonNa do alai Anak ni Debata songon pangurus porlak anggur i martangiang mangondingi nasida. Asa marhamubaon ni roha jala marhasil marparbue. Di turpuk on di gombarhon do halak Jahudi i songon hau ara. Uju ndang dapot ni Debata parbuena naeng tabaonna ma nasida. Alai Anakna Jesus Kristus songon pangurus ni porlak i mangelekelek tu nampuna porlak i asa uang ditaba. Ala so marnabuma roha ni halak Jahudi i, ro ma Jesus mangalehon hosaNa; mate-mangolu-jala naek tu Banuaginjang, jala ro ma Tondi Pangapul ima Tondi Parbadia.

Pauba Roha Asa Unang Mago (bertobat agar tidak binasa). On ma topik ni minggunta di Minggu Okuli (sai mangaranap matangku dompak Jahowa-Pslm.25:15a). Angka na porsea i sai mangaranap do matana dompak Jahowa, manjalo pangurupion nang dalan sian Tuhan i. Asa di ngolu na gok haholomon di portibi on manahan angka na porsea i mangihuthon Tuhan Jesus. Sai dilehon Tuhanta i dope partigkian di hita jolma asa marhamubaon, ima tingki parasian i, asa arga ma di ngolunta asini roha ni Tuhanta i paimaima haroronta tu jolona, paima hamumuba ni rohanta mangihuthon dalanNa. Asa tapillit ma hangoluan na manongtong dibagasan Kristus marhite hamubaon ni roha. Hamubaon ima proses na sai marhusari jala mangula dibagasan ngolunta. Hamubaon ima transformasi na torus mardalan manguba parange, pangalaho nang ngolunta na hombar tu lomo ni roha ni Debata. Unang ma pilit dalan hamagoan na ditawarhon portibi on. Ragam do dalan ni sibolis laho mangaliluhon dalan ni ngolunta marhite ragam hamajuon tehknologi, nang parngoluon di jaman si nuaeng on. Asa manant ma angka na porsea i so tung lemba jala tarlalap binahen portibi on. Dungo, waspada asa tongtong marsihohot mangaranap dompak Jahowa, tongtong mangasahon gogo nang bisuk sian Debata. Tarjou do hita asa tarida parbue ni haporseaonta I, tarida parbue ni tranformasi ni ngolunta