Psalmen
126 : 1 – 6
- Huria
ni Tuhanta dibagasan Jesus Kristus. Ingkon sai mulak do hita tu panogihonon
ni Debata. Ditorop hurianta nunga somal dibege turpuk on marhite hata ni
ende koor: “Di na mulak na tarbuang”. Ringkot do patorangonta asa lam
diantusi na umbege hata ni ende i tumangkas lapatan ni angka hata ni ende
koor i. Sahat tu saonnari sai na tinogihon Debata do hita, mula sian “haholomon”
ni portibi on, mulak sian “hasomalan na taula” na so lomo ni roha ni
Debata. Mulak tu ngolu na imbaru, ngolu na mamarangehon jala mangulahon
angka lomo ni roha nii Tuhanta. Tu ngolu na hombar tu HataNa na badia i.
Ala na tinogihon Debata do hita, hita pe unang ma holan manarihon na
ringkot tu dirinta. Songon di na martangiang hita jotjotan do holan
mangido jala manarihon na porlu di “ahu”, di “keluarganami”, di “anakhu”
dohot “hutanami”, “huarianami”. Tuhan Jesus na mardalani do Ibana mambahen
na denggan jala pahisarhon torop halak (Ul.Ap.10:38). Ai ndada asa
dihobasi halak Ibana umbahen na ro, Ibana do balik gabe panghobasi
(Mat.20:28). Jesus ndada mangolu du diriNa, holan di diriNa. Alai ngoluNa
ima marguna tu halak, marguna tu portibi on, mamboan las ni roha tu angka
hajolmaon. Adong opat siparrohahononta sian ay.6, ima: parjolo, laho
mardalani marhobas, ima laho tu angka dongan mambagibagi las ni roha i
(songon nidok ni Jesus: Mat.28:19; Mark.16:15 dohot Luk.19:10). Paduahon,
tangis pausungusung boni, ima na rade menderita, hona hata ala mamboan
barita na uli. Patoluhon, mangusung boni sisaburhonon, ima manuan asa lam
torop inganan hatubuan ni boni, angka na porsea na manjanghon barita Nauli
dohot kehadiran ni Debata di ngoluna (Mat.10:7; Ul.Ap.8:4). Paopathon,
mangusung angka tibalan. Mamboan hasil manang parbue ni barita Nauli, asa
torop muse na manghalashonsa. Sude hata on naeng mangarahon jolma asa
dohot nasida mandai angka denggan basa ni Debata di ngolu on.
- Huria
ni Tuhanta na hinahoholongan. Angka halongangan do sude di pardalanan ni
ngolunta on, anggo sai marpos ni roha hita tu Tuhanta. Tutu halongangan i
jotjot taantusi jala sahat tu hita dung jolo tabolus lan parungkilon. Dung
jolo loja hita mangula, loja berjuang dibagasan pos ni roha tu Tuhan
Debata. Godang do “natangis” di Bibel, isarana, si Josep anak ni si Jakob,
Hanna, David dohot na asing, dung i si Petrus, Jesus, Maria dohot do angka
na asing. Taida do boha nasida diujungna dung dihamonanghon na di
parungkilhon ima na mambahen tangisna i. Marragam do angka siala umbahen
masa “mariluilu”, isarana: iluilu arsak ni roha, iluilu muruk dohot angka
na asing. Didok di Ulaon Ap.14:22 “ingkon bolusonta do lan haporsuhon,
laho bongot tu Harajaon ni Debata”. Manjalo ragam na uli sian Tuhan hape
jotjot do dung mamolus haporsuhon di ngolu on. Songon i do na masa di
pambahenan ni Debata manobus hita sian portibi on. Halongangan tajalo do
sian pambahenan ni Kristus na so tatagam. Ai uju pardosa dope hita nunga
dihaholongi, dipalua marhite mudarNa. Jala uju musuna dope hita nunga
dipadenggan hita tu Debata (Rom 5:8-10). Alai ingkon rade do hita tangis,
rade mariluilu molo naeng tangkas do di hita las ni roha manang olopolop
di tingki nam angihut. Unang ma di hirim ndang loja ibana mangula alai
mandapot hasil mansai godang. Di pandohan hata Inggris mandok “No Pain No
Gain” (Tak ada hasil tanpa usaha). Anggo so diula do manabur (manuan
sisuanon) unang ma managam ibana manggotil (manapu hasil suansuanan). DI
bagasan pangalaho na songon i do boi tahilala jala tajalo angka
halongangan sian pambahenan ni Tuhan Debata.
- Marolopolop,
marlas ni roha ma hita di parmudumuduon ni Tuhanta i. Olopolop las ni roha
sada namansai porlu do di ngolunta, ido na tahirim jala na patuduhon
holong ni roha, jala ndang adong ise pe di portibi on na mangaloas dao las
ni roha sian ibana. Jotjot do las ni roha tabahen ditongatonga ni lungun
manang jut ni roha. Asa di tingki marhansit ni roha hita hehe ngolu
partondionta mambahen hita maras ni roha. Olopolop ndada dalan haruar sian
sitaonon. Jala unang ma talului las ni roha sianpelarian siala ni arsak ni
roha. Diujungna holan sian Tuhan Debata do dapot hita las ni roha na tutu,
ndada sian parbue ni na taula. Las
ni roh ana sintong jalana godang di ngolunta ima marhite na niula ni
Debata di ngolunta on, jala sai tahirim do i sian ibana. Alani i ma ingkon
sai pasahat diri do hita tu Tuhan Jesus, tu panghophoponNa, tu
panobusionNa di hita marhite silangNa na badia i. Disi do dapot hita las
ni roha na manongtong saleleng mangolu hita. Amen.
