JAHOWA DO MANGALEHON AEK
HANGOLUAN
JOHANNES
4:4 -14
- Huria
ni Tuhanta dibagasan Jesus Kristus. Dipatuduhon do dibagasan turpuk on
parjumpangan na mararti jala na marimpola. Boasa nidok songon i ? ima ala
parsalisian do naung leleng masa di halak jahudi maradophon halak Samaria.
Halak Samaria najolo Ima Israel Utara naung unduk najolo tu Asyur jala
gabe saor tu bangso sileban, hinorhon ni i ndang murni be nasida bangso
Israel, jala parsombaoan naisda pe di bahen do di Gerizim. Bangso Israel
Selatan ma na targoar halak juda manang halak Jahudi, nasida ndang mangokui
bangso Samaria ala naung saor i nasida tu bangso na asing. Parsombaon ni
halak Jahudi hot do di Jerusalem. Ia Jesus na marharoroan sian halak
Jahudi gabe sitotas nambur dipartomuan dohot halak Samaria ima na di
turpuk on sada ina Samaria di sada sumur.
- Martua
ma halak na pajumpang dohot Jesus. Laos ido na tarida dibaritahon
dibagasan turpuk on tu sada ina samaria. Tardok na martua ma ina samaria
on ala boi pajumpang dohot Jesus. Tangkas do naung lima hali muli ina
samaria on, laos i do dosa na pribadi nang bangsona Samaria. Alai marhite
parjumpanganna dohot Jesus, dipungka sada jembatan pardomuan halak Jahudi
dohot Samaria. Dipungka sada komunikasi na mararti jala marimpola di diri
ni ina Samaria i, godang do sungkunsungkun ni ina i, na boi dialusi Jesus dohot
tangkas jala palumbanghon roha nang pikiran ni Ina Samaria i. Dapotan
pangajaran ina Samaria i, dapotan haluaon, dapotan aek hangoluan.
Parjumpangan i disisi ni Jesus laho bermissi ndada holan nanaeng minum
pasombu uas na, alai tangkas ina Samaria i do na uasan di aek ima aek
hangoluan i ima Jesus i.
- Jesus
memproklamirkan diriNa ima mual hangoluan, sian Ibana do ro hangoluan ima
aek i. Naso marnauas do angka na mangido sian Ibana. Songon aek napinangke
ni na mangolu di portibi on ima sada kebutuhan na mansai vital dungkon udara. Aek mansai
ringot tu parngoluon di portibi on. Tu angka suansuanan, tu angka
binatang, tu manisia. Didok na malo ia manisia i ima marisi 80% aek.
Mansai ringkot do di manisia aek on tu hahipason dohot hagogoon. Laos
songon i ma metafora ni partondion i, mansai ringkot di aek hangoluon na
ditawarhon Jesus tu boru Samaria i nang tu hita jolma nang angka na
porsea. Ia aek na di portibion boi do marrumang angka na diparbaga jolma
tu hagiot ni pardagingon nang tu hisaphisap ni daging. Alai aek hangoluon
na dilehon Jesus ima na mamboan hangoluon na manongtong dibagasan Ibana.
Angka na manjalo hangoluon ima na manjanghon Jesus dibagasan diriNa. Ndang
uasan hita na manjanghon Jesus i, ala sian Ibana jaloonta do ragam
pasupasu las ni roha, na patoguhon haporseonta dohot las ni rohanta.
Dibagasan Ibana patar habadiaon na pabadiahon hita jolma pardosa on.
- Huria
ni Tuhanta nahinaholongan, diparade jala ditawarhon portibi on do angka na
tabo daion, alai holan parsatongkinon do labana jala panghorhonna tu hita
jolma. Hira na mangan dohot na minum i do i, tongkin do muse male jala
mauas pangkilalaanta. Ima pangalaho ni portibi on, sai na mauas, jala male
do hape, sai songon i ma siklusna jala marulakulak. Godang do angka
parsoalan, hinabernit, nang parsorionta di portibi on, bolas mamabhen jut
rohanta, sipata sai uasan do hita siala ni hasusaan i. Uju mauas hita
talului ma aek hangoluan i, ima Jesus Kristus i ns mangalehon dalan, las
ni roha dohot gogo tu hita. Asa tartaon hita laho mangadopi hamaolon
dibagasan ngolunta. Tapajonok ma tu Jesus, tapangido ma sian Ibana Aek
Hangoluan i asa sanggup hita mamolus pardalanan ni ngolunta sahat ro
di hasusuda ni bohalta. Amen.
