Jamita Epistel XIV Dung Trinitatis, 6 September 2026

MANGHAHOLONGI DEBATA DOHOT DONGAN JOLMA  

(Kasih Kepada Allah Dan Sesama Manusia)

5 Musa 11 : 13 – 21

 

1. Huria ni Tuhanta na hinaholongan, Sitolu horong do parsagi ni Padan na Robi mangihuthon parsagi halak Jahudi. I ma horong Buku ni si Musa (Tora), Buku ni angka Panurirang (Nebiim) dohot Buku Pamujion (Ketubim). Haroroan ni horong parjolo marbona tu 4 (opat) panguhalan (teori sumber-sumber). la goar ni panguhalan i, sumber Yahwis, Elohis, Deuteronomis dohot Priest. Ganup Surat i tubu di pangalaho masa na marasing be. Asa di horong buku parjolo ni Padan na Robi do hapeahan ni buku 5 Musa i. la isi ni horong parjolo (Tora) marpamusatan tu panindangion haporseaon ni parbangsodebataon nasida (huria na parjolo i), gomparan ni si Abraham. Unokna, nasida manghaporseai na pinillit ni Debata do nasida gabe bangso hamalimon di tongatonga ni portibi on. Alani, ganup suhisuhi ni ngoluna gabe hapataran ni pangalaho ni bangso ni Debata. Marragam do rumang ni angka Surat i. Adong na marrumang barita masa, poda, uhum, ende pamujion, dna. Buku palimahon sian buku horong parjolo (Tora) digoari do buku 5 Musa. Kitab Ulangan di hata Indonesia, Deutronomy di hata Inggris, jala di hata Gorik digoari Septuaginta (LXX). Di terjemahan hata Batak siapari digoari buku Pangaratarataion. Na mangaratai poda haporseaon ni bangso i uju laho mamasuhi tano Kanaan niuluhon ni si Yosua dung salpu ombas ni si Musa. 4 (Opat) horong do parsagi ni joujou ni isi ni 5 Musa 11:

ü                                   Manghaholongi Debata siala haluaon ni bangso i sian gomgoman ni halak Misir Patoguhon pangajarion siradoti tona ni Debata (ay. 1-9);

ü                                   Manghaholongi Debata marhite na mangaradoti tona ni Debata (ay. 10-17);

ü                                   Mangajarhon halongangan pinatupa ni Debata tu sundut na umposo (ay. 18-25);

ü                                   Gabe pasupasu manang torutoru do basabasa ni Debata (ay. 26-32). Hapeahan ni ojahan ni jamita di parujungan ni hibung parjolo (2 ayat)

2.                                                                                                                                   Nuaeng tapandar ma hatorangan ni turpuk on asa lam torang taantusi:

a)                                                                                                                                            Ayat 13: Manangihon Tona: manghaholongi dohot mangoloi Jahowa. Di halak Israel na mansai ringkot di parngoluon ni partondion nasida ima marhite na manurathon di sada perkamen (ima inganan panuratan na sian hulit ni binatang) digoari do i Mezuzah. Disurathon ma disi angka Patik. Dibagasan Mezuzah i adong ma dibahen dua bagian ni Buku 5 Musa (Kitab Ulangan). Di bagian naparjolo ima sian 5 Musa 6: 4 – 9 ima songon semboyan ni haporseaon di halak Jahudi na digoari “Shema”. Disosoi do marhite patik i asa ditangihon bangso Israel hata ni Tuhan i jala diulahon sian nasa roha dohot ateate nasida, jala asa diajarhon i marulakulak tu angka iananghon nasida nang di angka partingkian, jala mambahen i gabe songon tanda, songon na di tohang ni jabu nasida. Napaduahon ima sian 5 Musa 11: 13-21, ima na manaringoti parsitutuon laho mamparrohahon parenta ni Tuhan i dohot bagabagaNa. Sada ciri khas ni ganup Mezuzah ima sai di gurithon huruf Ibrani ima “Shin” manang huruf “S”, manang na sederhana i nang na denggan jala uli di gorga. Shin ima singkatan ni goar ni Tuhan, ima Shaddai lapatanna Maha Besar. Jadi naung somal do di halak Jahudi laho manjama Mezuzah uju bongot dohot haruar sian sada bagas. Mezuzah on na marlapatan songot sipaingot di “Shema” jala parenta laho manghaholongi Tuhan Debata sian nasa rohana. Manghaholongi Debata sian nasa roha dohot ateate ima na ingkon ulahonon ni halak na porsea. Songon naung ditonahon Tuhanta Jesus di Mateus 22: 37 – 40 Jadi didok Jesus ma: “Sihaholonganmu do Tuhan Debatam sian nasa ateatem, sian nasa hosam dohot sian nasa roham! I do patik raja jala parjolo. Alai dos do arga ni na paduahon on: Sihaholonganmu do donganmi doshon dirim! Patik na dua on do mangkangkam nasa patik dohot hata ni panurirang.” Dipanggulmiton ni angka na porsea i patuduhon burju ni rohana mangulahon patik ni Debata. Manghaholongi Debata dohot mangulahon patikNa ima songon dua sisi mata uang na so tarsirang. Ingkon niulahon do na dua i; manghaholongi dohot mangulahon patikNa. Taringot tu namangulahon patik on dipatudos Jesus do tu halak na bisuk sian umpama dua horong halak na oto dohot na bisuk. Molo halak na bisuk ima na pajongjonghon jabuna di atas ni batu; ima gombaran ni halak na manangihon Hata ni Debata jala na mangulahonsa. Molo halak na oto ima halak na pajongjonghon jabuna di atas ni pasir, nasida manangihon Hata ni Debata alai ndang diulahon. Molo ro habahaba nang udan pintor sega do jabu na dipajongjong di atas ni pasir, ima manggombarhon na boi do mura putus asa, gale, mandele, jala mandate halak na so mangulahon Hata ni Debata. Alai na pajongjong bagas di atas batu, ro pe habahaba, galumbang, por udan, ndang meret manang gabe sega jabu I, ala hot di atas batu, ima na mangulahon Hata ni Debata.

b)                                                                                                                                           Huria ni Tuhanta; haotoon ndada na so marparbinotoan, alai na so mangulahon hasintongan do. Dipapulik nasida do hasintongan, tudos tu halak na sai manghalomohon dalan nah atop (instan) jala na holan marpos  ni roha tu angka na di portibi on. Di parngoluan siganup ari, torop do jolma binereng songon na denggan do parngoluonna sian duru, jala sukses, songon na badia, godang na binotona, alai uju ro angka parungkilon; sian bagas, sian parkarejoan, sahit panahit na ro; boi ma patar berengon na togu do haporseaonna di atas ni batu manang ndang di atas ni pasir ? Ia batu i do na manggombarhon hahotan hasintongan ni Hata ni Debata na so tarpasiding portibi on. Angka na unduk jala burju mangulahon hata hasintongan, ima Hata ni Debata ndang mura di palindaklindak sibolis i asa tarela. Ndang mura mura muruk, kecewa, ndang ganggu rohana molo ro pe angka barita na so denggan, ima angka na marbisuk.

c)                                                                                                                                            Ayat 14-15 : Marparbue do angka siula Hata ni Debata. Dipatorang do di turpuk on upa sijaloon ni angka na burju mangulahon Hata ni Debata; dilehon udan ima mabornohi tano nasida. Mansai gorang do dipatorang di padan na Robi, na diparenta Debata angka panurirangNa laho manutup langit, jala ungkaponNa do langit i laho parohon udan laho mamasumasu. Molo ari logo (kekeringan) ima sada uhuman, jala molo ro udan ima patandahon pasupasu ni Debata. Ima songon saran na dilehon Debata marhite udan mamasumasu tano nasida asa marparbue angka suansuanan, jala gabe pangomoan di nasida, ima mambahen las roha ni bangso Israel gabe mangolu angka pinomparnasida. Marhite udan i do patubu eme nang anggur nasida asa adong sipanganon ni bangso i. Laos marhite udan i do patubu angka duhutduhut di ladangnasida bahen hangoluan di angka pinahanna, nabolas mangan jala bosuran sude nasida. Molo nunga mangomo jala lam ganda na sinari ima na mambahen las n iroha, ima angka na martua. Halak na martua i pe didok par-Psalmen do na manghalomohon Patik jala dipingkiri rohana arian dohot borngin, ima di Psalmen 1: 3 “Songon hau do ibana, na sinuan di topi ni batang aek, na marparbuehon parbuena di hajujumpang ni tingkina bulungna pe ndang olo malos, jala sude na niulana manjadi do.” Ima halak na mananda Debata, na jonok tu Debata, mangulahon HataNa. Digombarhon i do songon hau na di topi ni aek, sai adong sumber hangoluon ni hau i asa hot mangolu jala marparbue. Marasing do molo so jonokhon ni aek, isarana na holan mangarop di cuaca udan alai molo so ro udan, mahiang, logo ari boi do gabe ganggu jala ndang hot haoojak ni hau i jala  mate. Cuaca dohot logo ni ari songon metafora ni angka pergumulan ni ngolu. Jadi hau na ditopi ni aek ndang margantung tu cuaca asa menghasilkan, asa marparbue. Laos songon i ma gombaran na sai tongtong manghasiholi patik ni Debata. Ala ni i marparbue do angka siula Hata ni Debata jala na martua tung pe ro angka habahaba ndang berpengaruh di ngoluna ala hot do parsaoranna dohot Debata.

 

d)                                                                                                                                           Ayat 16 – 17 : Mangaramoti diri jala unang tarela. Mansai denggan do sipasingot ni Debata tu bangsoNa i asa mangaramoti dirina jala asa unang tarela.Dison do dipaboa Debata songon konsekuensi molo so diula nasida Hata ni Tuhan i. Tung godang do na mambahen lemba rohanasida nang hita pe angka na porsea i di portibi on. Binahen ni perkembangan jaman sinuaeng on, godang do jolma ndang manjomothon dirina be, nunga tarela binahen ni hisaphisapna nang pardagingon dohot sibolis i. Pangalaho na gabe roha diri nama sinuaeng on; boha do asa tarbarita dirina sian medsos, marhite flexing, ngolu na materialis, hedonis, pangalangkupon, panipu, sipaotooto, koruptor, panangko, jala mardebatahon debata jaman nuaeng. Saluhutna i parohon rimas ni Debata tu angka na so satia mangihuthon Debata. Uhuman ma na ro, jala soada be pasupasu, ndang ro be udan, boi gabe mahiang, jala mago nasida.

 

e)                                                                                                                                            Ayat 18-20 : Dipaingot bangso i asa diparatehon Hata i jala diajarhon tu ianakhon. Sada metode asa ingot tu utokutok ni jolma ima marhite na manurathon. Mansai ringkot do manurat angka siingoton, asa lohot tu parningotan. Jadi nunga diajari Debata bangso i asa manurathon angka patik nang Hata ni Tuhan i di tohang bagas nasida. Ia uju masuk manang haruas sian bagas nasida sai tongtong dibereng jala dijaha hat ani Tuhan i, ima mambahen asa ingot nasida. Saonnari metode motivasi tu angka ianangkon parsingkola asa marsitutu marsiajar, ima manurathon aha do sintasintana nasida di meja belajar manang disurathon balgabalga di kamarna. Jadi uju marsiajar ibana, idaonna ma torus sintasintana i jala dung masuk tu kamarna pe berengona ma muse na pinarsinta ni rohana i, asa ima na memotivasi ibana marsitutu laho marsiajar. Laos songon i do taringot tu na mangajarhon Hata ni Debata i, asa ingot nasida di Hata ni Tuhan i na margogoihon hita. Nuaeng tantanganna ima antara na mangharinghothon masa depan iananghon marhite marsitutu marparsiajari parsiajaranna di sikola manang mamaparsiajari Hata ni Tuhan i. Sasintongna mansai ringkpt do na dua i na so boi tarsirang, asa molo tung pe dihaburjuhon mamparsiajari pelajaranna, naeng ma tong dihalaputi mamparsiajari Hata ni Tuhan i. Dison ma peranan ni natoras laho mamodai, paingothon inankhonna taringot tu Hata ni Debata. Sonagon Program ni hurianta HKBP orientasi pelayanan ima: “Pengajaran Iman Ditengah Keluarga” Ecclesia Domestica, asa dipatupa natoras partangiangan keluarga songon dalan laho marpungu, marsomba tu Debata, jala mangajari taringot tu Hata ni Debata. Dibagasan partangiangan i do tubu harosuon ni ama, ina, nang inanagkhon, manaringoti Debata dohot manaringoti masa depan keluarga. Ai godang nuaeng dakdanak ndang diboto aha do sintasinta na tu tingki na naeng ro, gabe sintasinta ni natorasna do. Ido umbahen parpunguan di tonga ni bagas marhitehite partangiangan keluarga i mendorong jala memotivasi keluarga asa marsitutu marsomba tu Tuhan, jala disi ma Tuhanta i mamasumasu marhite na mangalehon tiur ni roha, pingkiran laho mandalani ari sogot jala mandapot hagogoon.

f)                                                                                                                                             Ayat 21: Asa leleng mangingani Tano na niuarihon ni Debata. Leleng mangolu sada basabasa ni Debata do i tu hajolmaon. Ia angka jolma najolo mansai ganjang do umurna. Sinuaeng on, muramura do ro sahit, nang angka musibah na manghorhon marmatean angka na marumur poso dope. Leleng mangolu na pinarsinta ni torop jolma. Aha do mambahen jolma mamparsintahon leleng mangolu ? ima ala naeng sonang rohana. Songon di angka negara maju godang do angka na marumur Panjang, ala denggan tertata jala terintegritas hamajuon panggomgomi nang negara dohot bangsona. Alai dibagasan turpuk on na mambahen sonang rohana jala leleng mangolu ima na mambahen Hata ni Tuhan i na gabe ojahan dibagasan ngoluna. Hata ni Tuhan i do na mangalehon las ni rohanta dohot hagogoon. Ala ni i jotjot ma tataringoti taringot tu Hata ni Tuhan dohot Tuhan i dipardalanan ni ngolunta. AI marhite i do taruli pasupasu hagogoon, pos ni roha hita mandalani ariari ni ngolunta.

3.                                                                                                                                   Huria ni Tuhanta na hinaholongan dibagasan Jesus Kristus, Alai na gabe tantangan di jaman sinuaeng on, mansai torop do jolma manghalomohon angka barit ana viral, na adong di medsos dohot manaringoti angka na so pola marguna. Godang do jolma di medsos asa ditangihon alualuna, holsona, nang parngoluonna. Bahkan adong do na so maila paboaboa hinaroa ni dongan, keluarga, manang paroaroahon na tardo kalo manang musuna. Di Medos pe boi do dibahen gabe media laho berdebat, marbadai jala sai adong do na mengkoment dohot na tagi patangitangi nang pihutihut baritana. Hape ndang pola adong labana di hita i. Ima sada sian godang angka barita na so apala penting jala ringkot laho mangurupi hita gabe  jolma na berkembang jala marguna. Marhite turpuk on disosoi do hita laho manghasiholi Hata ni Tuhanta i, na marguna laho pauliulihon parngoluonta. Tudos songon na nidok ni Ap.Paulus tu si Timoteus na tarsurat di 2 Timoteus 3:16-17 “Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran, asa rimpas halak ni Debata, hobas tu nasa ulaon na denggan.” Ngolu ni na porsea gumodang ma manaringoti taringot tu Tuhan i; ima na marimpola jala marguna di ngolunta. Ala sian Tuhanta i do ro ragam pasupasu na mangalehon hasonangan dibagasan ngolunta nang tarlumobi hasonanganta na manongtong marhitehite Tuhan Jesus Kristus i.  naung jumolo do Tuhanta i manghaholongi hita asa sian hita, ala na tinompaNa do hita, diramoti ngolunta sahat tu na manongtong i, di angka na porsea. Ala ni i tangkas ma tapatuduhon holongta tu Debata marhite hasatiaonta mangaradoti Hata nang PatikNa. Topik ni Minggunta  mandok : MANGHAHOLONGI DEBATA DOHOT DONGAN JOLMA  (Kasih Kepada Allah Dan Sesama Manusia) tapatuduhon ma holongta tu Debata dohot dongan jolma marhite na mangulahon Patik nang Hata ni Tuhanta i. Ai dibagasan patik i do hita disosoi laho manghaholongi Debata (Patik I-IV) dohot  manghaholongi dongan jolma (Patik V-X). Jala tudos na nidok di evangeliumta i di Lukas 10 : 27 “Ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim!” Amen.

Jamita Evangelium XIII Dung Trinitatis, 30 Agustus 2026

HATAMI DO LAS NI ROHANGKU  

(Firman Tuhan Menjadi Kegirangan Bagiku)

Jeremia 15 : 15 – 21     

 

1. Huria ni Tuhanta na hinaholongan, dijou Debata do si Jeremia gabe panurirang patolhashon hataNa tu bangso Juda (dohot tu Israel) paingothon nasida taringot tu dosa manang hajahaton na niula nasida na salpu i, jala sekaligus manosoi asa unang be nian diulahon nasida angka hajahaton di adopan ni Debata. Ditogihon Debata do bangso Israel na jolo haruar sian parhatobanon jala dipadiri gabe pasupasu tu angka bangso na humaliang, asal ma tongtong nasida hot mangulahon angka patik dohot uhum, naung pinasahat ni Debata marhite si Musa, jala na so jadi manirpang mangihuthon dalan ni angka bangso na leban (pat. Jos. 24:15). Alai ternyata, ndang hot nasida manghaporseai Debata, ditadingkon jala dilaosi nasida do angka patik i, marsomba jala manutung daupa nasida tu debata baal, tu angka debata ni bangso na leban, gabe marlaok ma haporseaon nasida (Jer. 1:16). Marulakulak do dipaingot Debata pangalaho nasida marhite angka panurirang, termasuk marhite panurirang Jeremia, alai ndang ditangihon bangso i jala ndang marhamubaon. Gariada lam jogal do tahe rohanasida, dimusui nasida do si Jeremia jala disangkapi naeng mamunu ibana (11:18-23). Tumangian do nasida di hata ni angka panurirang pargapgap na sai tongtong manghatahon angka janji-janji (bagabaga) palsu na pasonangsonang sipareon, tumimbangkon si Jeremia na tangkas mengkritik bangso i (14:13-18). Tarhirim do Debata marnida pangalaho ni bangso i gabe pola didok: "ndang tagamon marpangulahi rohangku tu bangso on" (15:1) jala pasonggophononNa ma tu nasida opat torutoru (15:3). Alai gabe lam marungkil ma si Jeremia, lumobi umbege hata ni Debata na mandok na ingkon uhumonNa ma bangso Israel. Marungkil ibana ala gumodangan do angka hajahaton i terjadi di kalangan elit ni bangso i. Ingkon angka pemimpin ni bangso i ma nian na hona uhum, hape gabe sude masyarakat ni bangso i secara keseluruhan (tontu termasuk angka na metmet na so mangulahon dosa) mangae uhuman na sian Debata. Ima parungkilonna jala ala ni dokdokna pola do manolsoli si Jeremia, boasa ingkon ditubuhon ibana tu hasiangan on hape ingkon mangadopi angka na paet i (15:10). Asa bagian ni pergumulan ni si Jeremia do turpuk jamita on. Tauji ma tatangkasi.

2. Ay. 15-18: Parsihohoton ni si Jeremia di hata ni Debata. Diboto jala ditanda Debata do si Jeremia sian bortian do pe. Ala Debata do na manompa jolma jala taokui, Debata na Mahatahu (Omniscient) diboto do hagaleonna dohot halobianna (termasuk dohot hahurangan dohot halobian ni sude jolma), sian mulana do pe nunga didok tu ibana na so jadi pasombuonNa si Jeremia di ulaon na dokdok i. Alai dipangido Debata sian ibana pangoloion dohot haradeon na tangkas. Si Jeremia pe sadar do na so mampu mangulahon tugas na balga i molo sian dirina sandiri. Sipata mandele do ibana, boasa torop halak mamusui ibana, bahkan naeng mamunu hape tona ni Debata do na pinasahatna jala baen hadengganon ni bangso i. Alani do umbahen didok di ayat 15 on, "diboto Ho do i ale Jahowa", lapatanna diboto Jahowa do sahat tu na sabagasbagasna diri ni si Jeremia dohot angka pangalaho na tarida nang na buni ni bangso i, ai ditanda Ibana do pingkiran nang dohot rohanasida. Ndang adong rahasia ni jolma na boi ditabunihon sian Debata, ai diida jala diboto Ibana do sude. Sambolus idaon, sai hira naung putus asa do si Jeremia. Hape ndang apala songon i, alai bergumul ibana mamereng hamaolon i (pt. 12:3). Alani i dipasahat ibana muse tangkas sian Debata angka pangidoanna: sai ingot ahu, sai luluhon ahu... Ingot (zakar), luluhon (paqad) ima pandohan manang istilah na mandok campur tangan aktip (active intervention) mengatasi masalah naung seolah-olah buntu (tidak ada jalan keluar). Di pandohan on termaktub pangantusion, holan Debata do na boi patupahon jalan keluar tu keadaan naung buntu i, ndang mampu be si Jeremia. Ndang mampu ibana mangadopi penguasa (pemimpin) ni bangso i, termasuk dohot angka pemimpin agama, sai tumangian do nasida di soara ni angka panurirang palsu i. Dipangido ibana pangurupion ni Debata asa mampu ibana manaon angka insakinsak ala ingkon pasahatonna tona ni Debata tu bangso i (pat. Psl 119:8). Tontu diboto si Jeremia do angka hamaolon manang marabahaya na ingkon adopanna tu jolo, alai rade do ibana mangulahonsa mangoloi parsuruon ni Debata. Alani do umbahen didok, "unang butbut ahu hombar tu lambas ni rohaM". Lapatanna, dipangido ibana do lambas ni roha ni Debata manganju hahuranganna lumobi ala dang mampu ibana merubah pangalaho ni bangso i. Songon hataridaan ni haoloonna suruon ni Debata dinyatakan si Jeremia do parsihohotonna di hata ni Debata (ay. 16). Dihasiholi ibana tongtong hata ni Debata, jala disohali (dipangan); “Dung jumpang ahu * hatamu, gabe husohali do i, jala hatamu do lomo dohot las ni rohangku ala naung targoar ahu tu goarmu, ale Jahowa Debata Zebaot.”Pandohan on patuduhon pangantusionna di ulaonna. Dipangan patuduhon na tangkas maringan hata i di dirina jala mampanghorhon songon mangalehon gogo tu jolma. Hata ni Debata do tongtong lomo ni rohana jala i do na gabe gogona nang pe adong angka na maol i (pat. Jos.1:8-10). Ala tangkas ibana mangoloi hata ni Debata ndang rade rohana rap sahundulan dohot angka pangarehe, ndang terpengaruh nang pe lam torop halak mandao sian Debata. Nang pe tabo begeon hata ni angka panurirang pargapgap i jala torop jolma laho mangihuthon nasida alai si Jeremia tongtong do hot manangihon soara ni Debata aha pe resiko na mungkin taononna. Ala ni sikap i gabe sipata punjung do ibana, ndang adong halak na olo sauduran dohot ibana. Ala mangoloi hata ni Debata jala mangulahon parsuruonNa nunga gabe konflik ibana tu jolma. Nunga gabe hira bugang na so hataoran (na so boi malum) parniahapanna. Mansai paet panghilalaanna jala sipata muncul di pingkiranna pambahenan na kurang adil. Sian perasaan hajolmaon sai hira na dipaotooto ibana dihilala, jala diboan tu dalan na maol antusan. Ai hira na so marhuaso (berkuasa, berpengaruh, mampanghorhon) do hata ni Debata tu roha ni torop jolma. Bagas situtu do pergumulan i. Alusna dapot di bagian na mangihut.

3. Ay. 19-21: Rade do Debata manjalo hamumulak ni jolma. Idaon sambolus hira na holan alus tu pergumulan ni si Jeremia do bagian na mangihut on. Alai molo taihuthon sian mulana, ndada holan tu si Jeremia ditujuhon soara on, alai tu sude umat (bangso) do na dipadiri Debata gabe angka naposoNa manorushon sangkapNa mamasumasu portibi on. Hira perwakilan sambing do si Jeremia di turpuk on, mewakili sude nasida na rade mulak mandapothon Debata. Nang pe naung diancam nasida ingkon uhumonNa, nang pe naung didok na ingkon ambolongkononNa nasida, alai dalan ni Debata paingothon jala manogunogu asa hot bangsoNa i mangulahon naung niuarihon ni ompunasida. Hot do padan ni Debata tu nasida, alai nasida pe ingkon hot do mangoloi Debata (pat. 2 Musa 34:6-7). Dialusi Debata do pangidoan ni angka naposoNa (bangsoNa), ndang dipadao pinggolNa sian nasida. Tongtong do holong roha ni Debata, jala di tingki dirimasi Ibana bangsoNa, tujuanna pe na naeng papatarhon holong ni rohaNa do. Sian mulana pe angka na denggan do sangkap Debata songon pambahenan ni Ama tu angka anakhonna. Lapatanna, molo sai mulakulak dipaingot nasida, na marlapatan do i, na mulakulak do asi rohaNa tu bangso naung tinodoNa i. Alai tangkas do syarat na ingkon ulahonon nasida:

Ø                                      Na parjolo ima, mulak nasida tu Debata gabe mulak ma Debata muse mangaloas nasida marhalado di joloNa.

Ø                                      Na paduahon, ingkon tangkas rade mangulahon na denggan jala manghagigihon na roa, gabe pamangan ni Debata ma nasida, na marlapatan, sihatahon tona ni Debata.

Ø                                      Na patoluhon, na so jadi nasida mulak tu angka debata sileban jala na so jadi marlaok ngolu parugamoon nasida (sinkritisme).

Pasahaton ni Debata do tu nasida asi ni rohaNa secara personal dohot tu bangso i secara keseluruhan. Secara personal, gabe togu do pribadi nasida. ndang tarhutur haporseaonna. Secara parbangsoon, gabe bangso na kuat ma nasida, ndang tartaluhon musu be, tung pe mansai gogo musu i. Debata do mandongani nasida, ai ndang adong bangso manang houm pe di portibi on na boi manaluhon Debata. Paluaon ni Debata nasida sian tangan ni angka parjahat, sian konspirasi politik ni angka bangso na leban. Debata tongtong di jolo nasida patuduhon dalan dohot mangalinggomi asa boi mardalan nasida hombar tu sangkap ni Debata.

4. Huria ni Tuhanta na hinaholongan dibagasan Jesus Kristus, hombar tu perkembangan dohot perubahan na masa di portibi on, lam torop do jolma na so mabiar be mangulahon na jahat, jala bahkan na mungkin mandok tu dirina bahwa na niulahonna i ndang termasuk hajahaton. Torop do halak na marondingonding tu angka ajaran na palsu, na sai berusaha membela dirina jala mungkin mandok na sintong naniulahonna. Di sude ulaon dohot bidang do boi masa i, termasuk nang di kalangan ni angka pelayan nang pemimpin agama. Godang do halak na terbuai tu angka janjijanji palsu na pasonang-sonang roha, hape sudena i holan kepentingan ni diri sambing. Naeng ma nian kepentingan huria (agama) na parjolo, demi haulion dohot hademahon ni huria i. Molo di huria nunga masa angka janjijanji palsu, kkn dna, boha do bahenon ni huria i gabe siboan tona ni Debata tu portibi on. Apala i do na tangkas dihadapi si Jeremia. Nunga tangkas pemimpin agama nasida di tingki i holan manarihon diri dohot kepentinganna sandiri. Tumangian di soara ni panurirang pargapgap sian soara ni si Jeremia. Alani marhite turpuk on dipangido, asa lam kritis ma hita (huria, pelayan, ruas) mamereng huhut paihutihut angka na masa jala barani menyuarakan kebenaran nang pe mungkin godang tantangan manang godang halak na mamusui hita.

5. Huria ni Tuhanta na hinaholongan, sai tarpaimaima do hita andigan do hurianta lam barani manindanghon suara kenabian di tongatonga ni bangso on. Kemampuanta dohot komitmenta, angka hata manang tona na sahat tu huria hira songon na somal i do pe. Sai gumodang tapaboaboa angka na uli naung tabahen asa dipuji halak hita, nang pe molo ditangkasi "holan hata” do i, alai tujuanna ima demi kepuasan diri sandiri, pasonangsonang pinggol ni natorop. Hape nunga ingkon lam barani hurianta nian gabe siboan pingkiran dohot arahan na cerah di portibi on, khususna di bangso on, berani tampil di jolo mangalo angka na jahat, ndada holan melalui mimbar (jamita) alai secara faktual di masyarakat. Lam bolak do hagolapon i jala lam torop do na dihuphupi. Alani huria ingkon tangkas mangalo hagolapon jala mengusir hagolapon asa tiur roha ni jolma mandalani ngoluna.

6. Huria ni Tuhanta na hinaholongan dibagasan Jesus Kristus, songon si Jeremia on, boi do memang tarduru halak sihatahon na sintong. Tapaihutihut do peristiwa na masa tu angka donganta na sai tongtong konsisten memperjuangkan keadilan di portibi on (bangsonta). Sipata boi do hita bertekad ingkon gabe pejuang keadilan, hak azasi, alai molo tabege mara na masa tu halak na songon i gabe mabiar hita. Adong do deba na mate dibunu, adong na dipenjarakan, adong na ingkon menghadapi tuduhan palsu. Alai nuaeng dipaingot hita asa hot hita di prinsip mangulahon dohot mempertahankan na denggan, nang pe mungkin masa na maol i tu hita sandiri. Debata do mangurupi hita, ndang pasombuonNa hita, jala ingkon monang do.

7. Huria ni Tuhanta na hinaholongan dibagasan Jesus Kristus; topik ni minggunta mandok: HATAMI DO LAS NI ROHANGKU  (Firman Tuhan Menjadi Kegirangan Bagiku), suraon di partingkian on ruas ni huria na so manghalomohon Hata ni Tuhan I patut do si sungkunon rohanta be. Molo tajom pe Hata ni Tuhan i jala masuk tu roha ni ruas i jamita na pinasahat ni angka parjamita, naeng ma dihamauliatehon. Ala ido na manggorgori haporseaonta asa lam togu mangadopi perkembangan jaman on. Unang ma gabe sogo rohanta umbege Hata ni Tuhan i, manang losok rohana tumangihon  Hata ni Debata. Alai las ma rohanta tumangihon Hata ni Tuhan i na mangalehon hagogon, apulpaul, las ni roha, habisuhon dibagasan ngolunta. Songon na nidok  parpsalmen di Psalm 119:103 “Tumonggi do bagabagami didai aruarungku sian situak ni loba di pamanganku.” Hata ni Tuhan i do na mambahen tonggi ngolunta jala gok las ni roha. Alai sabalikna molo sai hata ni portibi on do na sai tahasiholi jala sai tatangihon boi do lam paet panghilalan nang ngolunta. Ala ni i Hata ni Tuhan i ma na tahasiholi, marhite na ringgas manjaha Bibel, ringgas tu partangiangan , tu parmingguon. Ai Hata ni Tuhan i do mambahen hita margogo mamolus ariari ni ngolunta. Ai di dok do di Psalm 119:105 Hatami do sulusulu ni pathu jala hatiuron di dalanku. Di portibi na gok haholomon on do hita mangolu, alai ndang dohot angka na porsea i di haholomon i.Sai margogo do angka na porsea i ala Hata ni Tuhan i, ndang sumurut jala mose, tongtong do marlas n iroha jala mandok Mauliate. Ima na manghilalahon pangurupion ni Tuhanta Jesus Kristus i, songon na ni hilalahon Ap.Paulus di ulaon pamaritaon na uli i tongtong do ibana marlas n iroha jala margogo mangadopi ragam hamaolon i. Naeng ma tongtong las rohanta angka siihuthon Jesus i siala Hata ni Tuhan i na mian dibagasan rohanta. Amen.

Jamita Epistel XIII Dung Trinitatis, 30 Agustus 2026

HATAMI DO LAS NI ROHANGKU  

(Firman Tuhan Menjadi Kegirangan Bagiku)

2 Timoteus 4 : 6 – 8    

 

1.     Huria ni Tuhanta na hinaholongan, ia Surat 2 Timoteus on masuk do tu na nidokna Surat Parmahanion na tinongos ni si Paulus tu si Timoteus martujuan patoguhon dohot pahothon rohana asa dihobasi ulaonna dohot denggan. Jadi parmahanion i laho manungguli si Timoteus taringot tu tanggung jawab nuaeng nang tanggung jawab na naeng ro.Sahalak Ama ni huria i na margoar Tertullianus hea do mandok: “Mudar ni na martyr ima boni ni huria i.”Angka apostel i na gabe mate martyr di na laho mamaritahon Barita na Uli i di abad na parjolo. Digoari do nasida martyr siala dipelehon do sandok ngoluna sahat tu na mate holan laho mamaritahon Barita na Uli. Adong do na diparsilanghon tarbalik, adong do na mate di dangguri. Adong do na ditutung. Di Sejarah ni pamaritaon na uli ni angka na mate martyr i paboa hasatiaon nasida sahat ro diujung ni ngoluna.

2. Huria ni Tuhanta, ia turpukta on sian 2 Timoteus 4 ima songon surat parujungan ni si Paulus na marisihon sipaingot manang poda. Sai songon na adong do ganggu ni roha ni si Paulus marnida hiras ni roha ni si Timoteus laho mangadopi tanggung jawab na balga, na naeng dipasahat tu ibana manggantihon si Paulus. Tangkas do arop ni roha ni si Paulus i, songon na tarida di 2 Tim.1:6, Ala ni i hupaingot ho, asa diparatarata ho silebonleba ni Debata, na tu bo i, di na huampehon tanganki tu ho. Suang songon i pamereng ni si Paulus di si Timoteus taringot tu na maila ibana marhobas di ulaon Huria, Onpe unang ho maila, manghatindanghon Tuhantai... (2 Tim.1:8). Tagamon do maila si Timoteus di ulaonna i ma manghatindangkon Tuhan ? Tagamon do ganggu rohana na maruli pasupasu do ibana sian Debata molo diula ibana tanggung jawabna songon parhalado? Sude angka i na boi do tubu di roha ni si Timoteus. Ala ni, taida ma pandohan ni si Paulus di turpuk on hombar tu "manongtong di ulaon na denggan".

3. Ayat 6: Apostel Paulus mangkilala ujung ni ngoluna; Di jolo ni Ayat on, i ma ayat 1-5 dipasahat si Paulus do apoapo tu si Timoteus asa burju diradoti ibana tohonanna. Dung i ma didok ibana taringot tu dirina. Jala di bagasan ayat 6 on ditaringoti ibana dirina, dimulai marhite hata na mandok pasahaton ma ibana songon pelean. Marasing situtu do i taida sian na pinasahatna tu si Timoteus (ayat 1-5). Hata na di ayat 6 on patuduhon jonok nama ujung ni pangulaon ni si Paulus nang songon i ngoluna. Didok, na dapot ne ma tingki haluluangki (LAI: kematianku).

4.      Ayat 7-8: Pangulaon ni Apostel Paulus; Mansai patar do dapot hita identitas ni si Paulus taringot tu ulaonna sahat tu na mandok hata ibana tu si Timoteus:

Ø   Dipasidung ibana paraloan na denggan

Ø   Nunga dipaujung ibana parlojongna

Ø   Ramot dibahen ibana haporseaonna

 

Na tolu angka i taida gabe gaya hidup ni si Paulus di na manghatindangkon barita nauli ibana. Molo tapahombar i tu suratna na asing, i ma na tu huria Pilippi, tangkas do motivasi gaya hidup na di ibana i. Didok di Pilippi 3: 14, Hubalupahon na di pudingku, hueahi angka na di jolo. Dompak pandang i do hupuspus, dompak upaа bamonangan na sian panjouon ni Debata sian ginjang, di bagasan Kristus Jesus i. Hibul ni roha manghangoluhon tugas manang tanggung jawab i didompakhon ibana tu upa hamonangan na sian Debata. Laos i ma na taida di ayat 8 i di na nidokna naung rade di ibana tumpal hatigoran na sian Tuhan i.

 

5.                  Ayat 9-10: Tona parpudi sian Paulus; Adong 2 na ringkot idaonta sian angka Ayat on:

ü     Arop roha ni si Paulus asa ro si Timoteus. Tontu adong do tujuanna umbahen didok si Paulus songon i. Jala marpardomuan tu sifat ni si Timoteus i ma na parila jala na ganggu i roha ni si Paulus ala haposoon ni si Timoteus, naeng do pasahatonna hatana parpudi sahali. Mansai ringkot do tutu pagomoshon angka hata naung pinasahat tu dongan na naeng tadinghononhon. Asa tung diingot ulaonna, tanggung jawabna, unang gabe manimbil, jala asa hot di angka na denggan. Hombar tusi do gabe didok ibana;

ü     Asa unang ditiru si Demas (ay.10), naung manadingkon ulaon mamaritahon barīta nauli, ala naung bolong rohana di portibi on. Molo didok 'holong rohana di portibi on' ndang mandok na mabiar si Demas gabe laho ibana tu Tesalonik tumadingkon si Paulus. Hata i marlapatan na adong do na ringkot secara pribadi ulaonna di Tesalonik, jala ulaon i gabe pangambati di diri nú si Demas mangulahon ulaonna di huria. Naeng unang songon i si Timoteus, alai marsihohot ma songon si Kreskes na tu Galatia jala si Titus na tu Dalmatia.

6.     Huria nahinaholongan dibagasan Jesus Kristus; dipangidohon do tu hita halak Kristen, suang songon i Huria asa marhite turpuk on, lumobi Ayat 7 asa manongtong di angka ulaon na denggan. Na boi maol do patupa angka na denggan, lumobi ma mampartahanhon na denggan. Alai atik pe sai maol i diula hita jolma, tung marguna situtu do i, pola marlaba hita ala ni i sian Debata. Alai tutu ndang na mandok ala ulaon na denggan i gabe dipasupasu hita, alai ala olo hita pataridahon na denggan i. Di haoloonta i do hita dipasupasu.

7.     Di tingki mangulahon angka ulaonta i pe hita sai adong do angka ujian, adong do paraloan, adong do na naeng mangela hita asa ganggu hita disi. Alai taingot ma na nidok ni Jesus i, Ndang tarbahen so ro angka gasip; alai marjea ma na parohonsa (Luk.17: 1). Lapatanna, sai adong do halak na mangiburu tu hita, gabe dilului ibana dalan mambahen asa susa hita. Ndang pola humordit hita ala ni i, alai ingkon lam margogo ma, ai ndang tarbaben so hona lele nasa na naeng marparange na daulat marhitehite Kristus Jesus (2 Tim.3 12).

8.     Naeng do taingot "ndang adong di hita dison (portibi on) huta na hot; alai dilului rohanta do na ro sogot" (Heber 13:14). Aha do na mangonjar partigor i manahan di ulaon na denggan? Ala dilului rohana huta na ro sogot i. I do na margogoihon angka na porsea i manongtong mangulahon na denggan di portibi on. Antong, marlaba do hita molo manahan hita di ulaon na denggan jala mansagihon i tu angka dongan. Ala marhite na tasagihon angka na denggan na di hita i, gabe dohot ma rade di donganta i tumpal hatigoran silehonon ni Tuhan i, songon naung diparade Ibana di hita.

9.  Huria ni Tuhanta na hinaholongan dibagasan Jesus Kristus; Ingkon papujipujionta do Debata, jala ingkon las situtu rohanta mandok mauliate, ala di taon 2026 on boho ma 165 taon umur ni hurianta HKBP. Balgana i pambahenan ni Debata di hita. Nunga diroro hita sian haholomon ni gomgoman ni sibolis, jala dipaunsat hita tu hatiuron ni HarajaonNa, gabe tajalo haluaon naung singkop diparade Tuhan Jesus di hita, jala partohap di hangoluan na saleleng ni lelengna i. Alai, ndang holan marlas ni roha. Dipaingot Debata di sude ruas ni HKBP marhite hataNa naung tabege nangkin, di tugas utama siulaonta. Aha ma i? Ima marbarita nauli. Sian on ma digubah endenta i: Sahat Ula Tohonanmi, na somal diendehon uju manjalo tohonan, paingothon, ia tugas utama ni huria dohot partohonan ima: Baritahon Hata i. Nunga dihilala si Paulus naeng marujung ngoluna. Ala ni i tangkas ma dipodai sisean haholongan ni rohana i, si Timoteus. Di jolo ni turpuk on nunga disosohon ibana asa setia si Timoteus mangulahon tohonan najinalona sian Debata. Jala di turpuk on, gomos ma muse dipaingot si Timoteus taringot tu tugas utamana di portibi on, ima: Marbarita nauli. I do tugas utama ni huria dohot angka naposo ni Debata (satung lalap hita mangula angka ulaon na asing gabe lupa di tugas utama on). Itu adalah keharusan, bukan pilihan. I do Amanat Agung ni Jesus tu sude na porsea (Mat. 28, 19-20; Mark. 16, 15). Jala molo so taulahon i, marjea ma hita (tajaha 2 Korintus 9, 16), lapatanna, ndang adong arganta be, tumoru sian rapanrapan, santabi. Ima nuaeng nang dipaingothon Debata tu hita sude ruas dohot parhalado di HKBP di ari Ulangtahun on: Unang lupa marbarita nauli. Unang lalap diulaon na so tugas utama, gabe lupa hita di tugas utama. Sahalinari: Boasa dipajongjong Debata HKBP? Ima asa laho marbarita na uli.

10.  Huria ni Tuhanta, ndang adong na  marisuang manang angka naung salpu boti sian parngoluon ngolu on, suang songon i do taringot tu hamatean, ndang adong hamatean na marisuang uju naung mangalehon na dumenggan sian na adong di hita dibagasan parngoluan on. Molo tung pe naung jumolo angka na tahaholongi sian portibi on, ia taboto do Debata do na mangaramoti hita sahat di hasusuda ni bohalta. Naeng ma denggan tauarihon parbue ni hat ani Debata na sai tongtong marsaringar tu angka pinomparta nang tu humaliang hita. Ala Hata ni Tuhan i do na sai tongtong manggorgori haporseaonta asa lam togu jala mangolu songon naung niuarihon Ap.Paulus tu Si Timoteus nang tu angka halak na porsea uju i. Hata ni Tuhan i do na songon panondang, sulusulu di pardalanan ni angka na porsea i,  songon na hinatindnaghon parpsalmen di Psalmen 119: 105 “Hatami do sulusulu ni pathu jala hatiuron di dalanku.” Hata ni Tuhan i do mambahen hita margogo mandalani ariari ni ngolunta, songon Topik ni Minggunta na mandok: “HATAMI DO LAS NI ROHANGKU” (Firman Tuhan Menjadi Kegirangan Bagiku). Amen.

Jamita Evangelium XII Dung Trinitatis, 23 Agustus 2026

 

TOGU  MARSITIOPAN TU HATIGORAN

(Teguh Berpegang Pada Kebenaran)

Efesus 4: 7 – 16   

 

1.                  Huria ni Tuhanta na hinaholongan, Las do rohanta di angka usaha ni halak Kristen dibangsonta laho manjaga hasadaon sian ragam dedominasi gereja, nang pe sai adong do deba denominasi na so apala olo gabe pasidohot di hasadaon ni angka huria na ginoaran oikumene. Hasadaon ni angka na porsea i, paboa na dipasada Tuhan i do huriaNa laho mamaritahon Barita Na Uli i tu sandok portibi on, songon Amanat Agung ni Tuhanta Jesus. Pdt. DR. Ekadarmaputera mambuat sada hata mutiha taringot hasadaon na uli, mandok: On essential, unity. On non-essential, liberty. On everything, charity (Untuk hal-hal yang pokok, persatuan. Untuk hal-hal yang kurang pokok, kebebasan. Tetapi untuk segala hal, kasih dan belas kasihan). Na boi do hita marasing, ndang di sude hita sarupa, alai di angka inti ni haporseaon ingkon sada do hita. Jala diginjang ni saluhutna parasingan i sai hot ma haholongon i.

2.                  Ima na disosohon Ap.Paulus dibagasan turpuk on jala las ni rohana di holong ni Tuhan i na pasadahon saluhut jolma sian parasinganna be nang di parhataan, houm, bangso, dohot inganan gabe sada keluarga ni Debata, sada di haporseaon, di pandidion dohot di haholongon marhitehite Tuhanta Jesus Kristus. Ima na sai tongtong diondolhon, hasadaon songon pamatang ni Kristus, na marsada marhite ragam ni ruas ni pamatang na marasing be fungsina, rumangna, inganan, alai sada dipamatang, songon dia ma pangalahona i, ima:

a)                 Sada alai ragam asiasi. Sada do huria i na songon pamatang ni Kristus, alai Tuhanta i do na mangalehon asiasi na marasing. Ala ni i tung so boi do pasaehon sada parsualon dohot denggan holan marhite sada rupa manang sada asiasi, alai marhite ragam asiasi nang rupa nang pambahenan do. Ia angka asi ni roha i, ima na hombar tu sangkap ni Tuhanta Jesus, ai Ibana do na umboto kemampuanta ganup. Alai angka parasingan i ndada laho manirang hita manang mambahen parbolatbolatan, alai asa saluhutna rup masijangkonan, masilehonan, mangharingkothon, mangalinggomi. Sialani i unang ma adong na mandok dirina sumuang sian na asing molo tung nihilalaon hasurunganna humebat sian na deba. Manang sabalikna, unang ma menek rohaniba molo tung pe silehonlehon na di hita i songon na neang idaon sian na asing. Na marasing ima fungsina, alai saluhutna sarupa do derajatna. Ndang adong na boi manirang sian na asing. Na marasing i naeng ma sai tarihot, jala pinatomu tiniop denggan asa hot marhasadaon.

b)                 Hasadaon i, ima hasadaon ni ruas; asa gabe marngolu pamatang i, lapatanna, na mangolu do pamatang i molo marfungsi uluna dohot denggan. Suang songon i ma, tagan, pat, siubeon, ateate dohot lan na asing. Gabe mangolu ma pamatang i dohot denggan siala angka ruas ni pamatang i marfungsi dohot denggan. Suang songon i ma gombaran ni sada huria gabe huria na mangolu molo aktip do angka parhaladona, nang angka sikola minggu, remaja, naposobulung, angka ina, ama dohot lansia nang panitia pembangunan. Siala ni i unang ma adong sian ruas i na marusaha asa mintop ruas na asing, boi do gabe marsahit huria i na gabe songon pamatang ni Kristus. Alai saluhut ruas ni huria nang punguan kategorial nang angka seksi di tonga ni huria i ingkon tongtong marusaha asa saluhut marfungsi dohot denggan, ima ala pinatomu di hasadaon ni holong ni Kristus i. Ima huria na mangolu, ido umbahen asa dipasiding ma badabada, manang parsalisian, rup masitumpahan ma, diambolongkon ma hosom, teal, elat late, pangiburuon. Alai molo adong ruas na so aktif, manang deba seksi na ngalingali sisilon, ima na gabe ulaonta sude ruas ni huria asa tongtong marusaha laho manghehei, jala manosoi asa marfungsi angka seksi nang unit pelayanan ditonga ni huria i.

c)                 Saluhut angka asiasi i sian Tuhanta Jesus na pinasahatNa hombar tu asi ni rohaNa jala tu sangkapNa. Siala ni i, saluhut silehonlehon i dihamauliatehon ma jala dipargunahon holan tu na laho pasangaphon Tuhanta Jesus. Jala ingkon tongtong dilapati saluhutna silehonlehon i holan marguna i laho manghobasi angka jolma, jala na manghobasi ima naung ditobus jala dipalua Jesus Kristus. Asa unang ma adong na gabe patimbohon dirina ala jinalona asiasi i. Angka na marginjang ni roha ala ni asiasi i tudos ma i tu na nidok parpsalmen di Psalmen 68: 19 “Nunga manaek Ho tu ginjang, ditaban Ho do na hona taban, nunga maruli silehonlehon Ho di tongatonga ni manisia, nang angka na marbalik, asa maringan disi Debata Jahowa.” Asa unang ma adong halak na manangko hasangapon ni Debata marhite asiasi i. Kristus naung bongot sian banuaginjang i jala manaek muse dungkon hamonanganNa, tongtong hot manghaholongi jolma manisia jala raphon manisia i. Jala digohi Ibana do portibi on marhite hasangaponNa sian Tondi Porbadia i. Ibana do na mangalehon saluhut asiasi i tu angka na porsea.

d)                 Sipajongjonghonon do Huria ni Tuhanta i. Ndada bentuk fisikna na nidokna dison alai na rumingkot ima angka na porsea i. Aha ma guna ni i ? ima molo tajaha di ay.12-16, ai dilehon do angka silehonlehon i jala na marasing i tu sangkap dohot lomo ni rohaNa. Dia ma i ? ima di ay.12 “patureturehon angka na badia i, laho mangulahon tohonan i, pauliulihon daging ni Kristus”. Dia ma lapatan ni i ? ai jaloon nasida do angka silehonlehon na marasing be laho pauliulihon, pamorahon, mambohali, manogunogu saluhut ruas ni huria asa margogo laho manghobasi Tuhanta Jesus i. Saluhut ruas ni huria, ndang mardiaimbar, sopola dipaasingasing, ingkon tongtong rup pauliulihon. Ulaon di na laho pauliulihon huria on ima ulaon na bolon na sai torus diulahon so marhaujungan.

e)                 Dia ma guna ni i? Molo tajaha di ay.13 mandok: “Paima sahat hita saluhut tu hasadaon ni haporseaon nang parbinotoan di Anak ni Debata, gabe jolma na tang jala matoras situtu, mangihuthon hagogok ni rimpas ni Kristus.” Ingkon tongtong do huria i Kristus i pauliulihon saluhut ruas ni huriana asa saluhutna, so mardia imbar, hot tongtong rup magodang jala tang marhaporseaon songon siihuthon Kristus, ndada marsasahalak alai secara kolektif, sude ruas ni huria i.

f) Namangihut, ido umbahen, huria songon parpunguan ni angka na porsea i ndada kuantitas na rumingkot alai kualitasna i do. Lapatanna lam magodang, lam tang marhaporseaon, lam tumajuna haporsaon, lam togu jala ndang muramura dilindos angka parsualon an sian bagasan nang sian duru ni huria i. Na tau manirang na denggan dohot na roa. Molo pinasombu dakdanak na metmet, ingkkon pamasukonna do angka benda-benda tu pamanganna. Ido mambahen mara, alai tuani ma adong do natorasna na mamatamatai. Alai dungkon balga dakdanak i, nunga bototoonna dia do na mambahen mara jala dia do na marguna tu dirina sandiri. Laos songon i ma gombaran ni haporseaon i. Kristen dakdanak ndada ala ni pamatangna manang umurna, alai na sai ringkot dope manginum susu, ai muramura dope i pinalindaklindak ni angka sipaotooto na ro, jala mura do dielaela sibolis i ibana; hagiot ni pamatang, asa na boi do madabu jala mambahen mara di ngoluna. Alai angka naung tang marhaporseaon, dia do ajaran na sintong manang na so sintong; angka parpunguan dia ma na boi ihuthonon; angka pahean dia ma na patut sipangkeon; jala sipanganon dohot siinumon dia ma na tu hahipason, angka parkarejoan na tama, gaya hidup, pergaulan dia ma na patut siihuthonon dohot lan na asing.

3.                  Huria songon parpunguan, ingkon do tongtong lam magodang. Lam magodang ala dipauliuli, asa lam magodang ingkon ma gabe huria na Inklusif, Dialogis dohot terbuka, songon Motto ni HKBP tu haimbaruon dohot di kemajuan di pelayanan. Ndang adong kemajuan molo so adong pembaharuan. Ido umbahen ingkon terbuka tu angka na imbaru, asa parpunguan, angka parmingguon lam tu ulina. Angka bentuk dohot metode pelayanan lam menarik dohot efektif so pola pasiding ciri khas, tradisi dohot pangajarion na marlangku. Unang ma sai tadok, naung sian najolo taulahon, gabe hot tongtong songon i. Manjaga tradisi memang mansai denggan do i, alai naeng ma marguna asa torus lam tu majuna jala lam magodang unang ma mardalan di tempat, ndang majumaju manang stagnan (mardosdos songon simarunapunap). Ruas ni huria naung tang marhaporseaon ima na mampu pataridahon angka parbue ni haporseaonna dipanggulmiton ni ngoluna. Didia pe ibana maringanan, aha pe naniulahonna saluhutna i pataridahon naung maringan Tuhanta Jesus dibagasanna. Mampu gabe angka anak ni Debata na satia jala gabe warga negara na burju.

4.                  Alai sian saluhutna i, na rumingkot ima ingkon lam magodang dibagasan holong. Huria na lam magodang ima na tarida di parpunguanna na lam masihaholongan sama nasida ruas ni huria. Alai, on ma siparungkilhononhon di partingkian on, uju metmet dope huria i, mansai denggan jala rosu do parsaoran i. Alai dungkon leleng lam tu balgana huria i, jotjot do masa lam moru na masihaholongan i jala ndang jarang gabe marujung tu parbadaan, parsalisian nang na gabe marsirang. Ala ni i tapahusorhusor ma turpuk on tu hasaon ni huria i.

5.                  Alai na lam magodang ima na mampu manarihon holong ni Tuhan Jesus i tu angka jolma na di humaliangna. Marhite ima angka jolma manghilalahon holong ni Tuhanta Jesus i. Angka siihuthon Kristus manang halak Kristen naung tang marhaporseaon dipargogoi Tuhanta asa gabe pasupasu, gabe panondang jala gabe sira tu angka na dihumaliangna marhite pambahenan na gok holong.

6.                  Asa saluhutna i tercapai, hita saluhut angka na porsea i naeng ma lam sadar di sude angka talenta, potensi, silehonlehon ni Tuhan (karunia-karunia yang berbeda-beda) na adong ditonga ni huria i ima holan sian asi ni roha ni Tuhan i. Naeng ma saluhutna hita na tarjou gabe pangula di tonga ni huria, parhobas, angka naposoNa. Siala ni i sude ma hita ingkon unduk tu Kristus, asa boi hita diatur (disusun) dipadenggan, dipauliuli, dipahot, tarihot nasada tu na asing na olo masilehonan roha, pikiran, pambahenan, masitogutoguan, masijangkonan. Huria na lam tang, na lam tu dengganna, lam tu ulina, ndang gabe guntur, sursar, manang sibahenna be. Ido alana ringkotna di huria i Aturan dohot Paraturan, adong SOP, dohot adong uluanna, adong manajemenna na denggan. Sude angka perangkat ni hurianta sian Aturan Peraturan, RPP, Konfessi HKBP, Katekhismus, Agenda dohot angka na asing i marhapatean tu hasintongan dohot hatigoran na sian Hata ni Debata. Ala ni i TOGU  MARSITIOPAN TU HATIGORAN (Teguh Berpegang Pada Kebenaran) ni Kristus. Amin.