MANGEAHI
HALUAON DIBAGASAN TUHAN I
(Mencari
Perlindungan Pada Nama Tuhan)
1
Johannes 2: 18 – 27
1.
Huria
ni Tuhanta na hinaholongan dibagasan Jesus Kristus. Buku 1 Johannes on dipasahat
tu halak Kristen di luat Epesus na mangadopi angka parpoda haliluon na marharoroan
sian golongan gnostik dohot golongan doketisme. Golongan na dua on na godang
mangasahon utokutok parbinotoan, na boi tangkupon ni ratio manang pingkiran do
dalan tu hangoluan i. Godang do angka poda haliluon diajarhon nasida na
mangaliluhon haporseaon ni halak Kristen uju i. Diajarhon manang dipodahon
nasida do na so sintong Debata mardaging jolma di bagasan hadirion ni Tuhan
Jesus songon Anak ni Debata. Ndang dihaporseai nasida Tuhan Jesus na mate di
hau na pinorsilang i. I do alana tung tangkas do 1 Johannes on papatarhon
hadirion ni Jesus Kristus na ro di bagasan daging, i ma sian Debata (1 Joh
4:1-6). Pangondolan sian turpuk on i ma: na so tarsirang do Anak (Jesus) sian
Ama (Debata). Hombar do i tu hata ni Jesus na mandok: Sada do Ahu dohot Ama i
(Joh. 10: 30). la í na so pasangaphon Anak i, ima na so pasangaphon Ama i, na
marsuru Ibana (Joh. 5: 23). Na apala mansai ondol muse didok Jesus: Ahu do
dalan i dohot hasintongan dohot hangoluan. Ndang adong na sahat tu Ama i, ia so
marhite sian Ahu (Joh. 14: 6). Hasurungan ni halak Kristen do i sian angka
ugamo na asing. Na ro do Debata tu portibi on, gabe daging, jala saor tu jolma
i marhite anakNa Jesus Kristus. Anak i ma na gabe mangondihon hita tu Ama i.
Tanda holong ni roha ni Ama i do i tu portibi on, ai nunga gok dosa jolma i,
asa malua nian jölma i sian ikatan ni portibi on, gabe daging ma Ibana, naung
rap dohot jolma i. Hangoluan na salelenglelengna do di bagabagahon Ama i tu
ganup namanghaporseai Anak i. Sian Debata do hangoluan i, jala ditanda jolma ma
hangoluan i di bagasan Anak i. Anak i do napabotohon hangoluan tu jolma i, ala
naung di bagasan Ibana do hangoluan i. Marhite na tajangkon Jesus i, gabe sahat
ma tu hita naung pinarbaga ni Ama i. Ala ni i do ndang tarsirang Debata sian
Anak i, naung patuduhon tu hita dalan tu hangoluan i, soara ni Debata do na
mandok: on do Anak haholonganku, lomo do rohangku mida Ibana; tangihon hamu ma
Ibana (Mateus 17: 5.b). Dungi didok Jesus do muse: Nunga sahat tu Ahu nasa
huaso na di banuaginjang dohot na di tano on (Mateus 28: 18.b). Laos i do na
pinasahat ni si Johannes nang di turpuk Epistel on, asa halak Kristen i
paholang diri sian angka na mangaliluhon haporseaon tarmasuk sian anti Kristus
i.
2.
Ayat
18-19: Hamanaton mamereng partingkian. Ai boi do masa bulu soban, gabe musu
dongan. Tung tangkas do dipatuduhon si Johannes kekompakanna tu huria i di
pandohan na songon natoras tu ianakhon do dibaen di bagasan pandohan ale anaha!
Marhite hajonohon ni ibana tu huria i dipasahat poda, pangajarion tu huria i
paboa na sahat tu angka partingkian parpudi. Na marlapatan tingki
marbilangbilang, waswas, tingki penentuan di sikap maradophon angka anti
Kristus. Jaman na lam berkembang do, laos songon i do nang angka pamingkirion
pe. Lam malo do jolma manabunihon sangkapsangkap ni rohana, sinangkap do sipata
na burjuna hape na mangotootoi do. Sai nidongan donganan hape nunga musu, boi
dohonon na manjaga iba berengon hape na mambahen mara do songon nidok ni
peribahasa: "Pagar makan tanaman". Pangalaho ni anti Kristus pe
songon i, ai mian do nasida di tongatonga ni huria i, sai sinangkap na
papunguhon hape tung na paserakhon do. Sinangkap patogu haporseaon di Kristus i
hape na mangaliluhon do, ala ni i do ingkon manat hita. Boi do songon nidok ni
ay. 19 i na di tongatonga ni huria do anti Kristus na papunguhon i, alai ndang
sauduran dohot hita, marłapatan ndang dohot na di Kristus i, alai tung na
paserakhon do. Patudos tu Mateus 7: 15, panurirang pargapgap na ro songon
birubiru. I ma nå naeng patar di ngolu ni halak Kristen, parasingan ni anti
Kristus dohot halak na mangihuthon Kristus.
3.
Ayat
20 - 22: Marhite naung dijalo huria i pamiahion sian na Badia i, marlapatan
naung rap manjalo asi ni roha dohot pasupasu sian Debata marhite hagogoon ni
Tondi Parbadia i. Jolma naung miniahan ni Debata i ma jolma na manjalo pasupasu
asi ni roha sian Debata. (1 Sam 10: 1). Alai halak naung manjalo asi ni roha ni
Debata tongtong mangadopi tantangan sian portibi on. Tantangan na sian portibi
on i ma na ro sian pargabus, na olo mangagohon na sintong. Hasintongan naung
jinalo ni halak Kristen i, i ma Kristus (Joh. 14: 6). na maralo tu gabus na
sian portibi on. Di ayat 22 didok ia pargabus i, ima halak na mandok ndang
Kristus i Jesus i; na mansoadahon na di bagasan Anak i do Ama i, jala Anak i di
bagasan Ama i. Lam tangkas ma di huria i, naung mangoku naung manjalo sian asi
ni roha ni Kristus di tanda-tanda ni halak naung gabe anti Kristus i, i ma
angka halak na mansoadahon Kristus i do Jesus i, na mansoadahon Ama i di
bagasan Anak i, jala Anak i di bagasan Ama i. Nang pe maol laho mamereng i,
songon nidok ni si Paulus di 2 Tes 2: 7, hajahaton i songon dalan hahomion.
4.
Ayat 23-24 Naeng togu huria i di bagasan hasintongan
naung hinangoluhonon nasida di bagasan Kristus i. Na mangolu di bagasan Kristus
i, i do na mangolu di bagasan Ama i; alai sabalik na do, na mansoadahon Anak i
ndang di Ibana nang Ama i. Tangkas didok di Mateus 10.: 32-33, "Ai ganup
na manghatindangkon Ahu di jolo ni jolma, i do hatindanghononku di jolo ni
Damang na di banuaginjang i; alai na mansoadahon ahu di jolo ni jolma, laos
soadahononku do i di jolo ni Damang na di banuaginjang i!
5.
Ayat
24 – 25; Angka anti Kristus ima na gabe musu na niadopan ni halak Kristen, ai
poda haliluon do nabinoanna, namamboan jolma i nian tu na paholang diri sian
Jesus na gabe Anak ni Debata huhut siboan hangoluan i. Laos marhite i ma
diondolhon mian ma di bagasan hamu na binegemuna sian mulana i. Alai na gabe
"kunci utama" tu angka poda i ima hatorason di haporseaon do.
Molo ndang matoras haporseaon i, mura ma i ditait poda haliluan; alai di angka
naung matoras haporseaonna, ndang na boi i tartait tu haliluon.
6.
Ayat
27-28; Di gariup naung manghaporseai Jesus i nunga di ibana pamiahion na
jinalona sian Jesus. Pamiahion di hata Indonesia didok: pangurapan. Di hata
Junani didok "to krisma" meminyaki, peminyakan suci. "Peminyakan
suci" i, marharoroan sian Jesus. Ala ni i ndang porlu be adong poda na
asing ala nunga polin marharoroan holan sian Jesus, holan mian di pangajaran ni
Jesus ma saluhutna, unang tu angka poda na asing i. Naung ias jala angur do
jolma binahen ni Jesus i, antong unang be adong na dipalindaklindak ni angka
poda haliluon na mamboan tu haramunon i. Nunga patar holong ni roha ni Debata
tu hita: sian naung sinuruNa i AnakNa na sasada i tu portibi on, asa mangolu
hita marhitehite Ibana (1 Johannes 4: 1). Apostel Paulus mandok: “Arga do
hamu ditobus, unang ma olo hamu parhatobanon ni jolma (1 Korint 7: 23). Manang
piga hali di turpuk on diondolhon hata "mian". Parjolo,
mian ma di bagasan hamu. Paduahon, mian ma nang hamu di bagasan Anak i
dohot di bagasan Ama i. Patoluhon, na mian do di bagasan hamu Paopathon,
mian ma hamu di bagasan Ibana......... Sudena i ima patuduhon hinaporlu dohot
hinaarga ni na manghaporseai Jesus, ai hiras ni roha do pinarbuehonna. Hiras ni
roha, dihata Indonesia didok: keberanian percaya. Molo mian hita di bagasan
Jesus i tubu ma habaranion manghaporseai so pola mabiar tu manang aha pe.
Songon hata ni Jesus na mandok tu angka siseanNa, "pos ma rohamuna, Ahu
do! Unang hamu mabiar" (Mateus 14: 27). Sian i idaonta ma: rap dohot
Jesus, ndang adong sihabiaran, ndang adong siholsohonon. Pandohani: didok
Jesus do di tingki paborhathon angka siseanNa; unang ma holsoan rohamuna
disidohononmuna i, ai di na sangombas i do lehononNa tu hamu hata sidohononmuna
(Mateus 14: 19). Paridohan i do na sahat tu hita di pesta hatutubu ni Jesus
sadarion rap dohot Jesus dapotan haluaon. Rap dohot Jesus, dao nasa biar ni
roha. Rap dohot Jesus, talu do nang angka musu. Rap dohot Jesus, na so jadi
tarila, ai didok na tarsurat i do ndang sipailaon na porsea di Ibana (Jes. 28:
16.b; Rom 9: 31.b).
7.
Huria
ni Tuhanta na hinaholongan, tingki na lam mubauba, roha dohot pingkiran lam tu
timbona, mamboan ngolu ni jolma i asa lam manat manjaha partingkian. Marragam
dipatupa jolma nuaeng manait roha ni jolma asa simpati tu sadasada pamingkirion
hombar tu lomo ni rohana be na mungkin manait roha manimbil sian naung
hinaporseaan hian. Lumobi tu komunikasi na lam mengglobal, sosial masyarakat na
lam majemuk, na boi saling mempengaruhi di budaya nang haporseaon pe. Ala ni i dipaingothon,
asa manat mananda angka pargabus, pargapap na nidokna anti Kristus, na boi ro
songon birubiru hape babiat panoro do. Di angka naung miniahan ni Tuhan i, i ma
naung manjalo asi ni roha ni Kristus i tung tangkas do boi mananda halak
pargabus, i ma na mansoadahon Kristus i do Jesus i na mansoadahon di bagasan
Anak i do Ama i, jala na mansoadahon di bagasan Ama i do Anak i. Ndang adong haluaon
sian na asing ia so holan sian Tuhanta Jesus Kristus i. Songon topik ni
minggunta na mandok: MANGEAHI HALUAON DIBAGASAN TUHAN I (Mencari Perlindungan Pada Nama Tuhan).
