Jahowa
Mangalehon Hadameon
(Allah
Memberikan Damai Sejahtera)
Hagai 2: 1 – 9
a)
Huria ni Tuhanta na hinaholongan dibagasan Jesus
Kristus, dijalo Panurirang Haggai do tona sian Debata laho manguluhon angka
pasipasi ni Israel. Ia Buku Haggai on disurat dungkon mulak angka na
dihabuangan I tu Bona Pasogitna. Alai naung tarulang do tano nasida,
bagasnasida nang bagas joronasida I, asa denggan ma dipature nasida, dung
pigapiga leleng diula nasida so pola terasa panghhorhonna tu hadumaon nasida,
tong dope nasida marpogos. Jala laos so dapot nasida do parbue ni tano nasida.
Ala ni i di bindu na parjolo dipasahat do sipaingot tu angka uluan ni bangso
Israel- Serubabel dohot si Josua, angka panggomgomi luat dohot angka malim
bolon. DIgogohon do tu nasida asa mamuhai ulaon paturehon bagasjoro, asa ala ni
pengabaian di na laho restorasi bagas joro I do manghorhon hapogoson ala sai
holan manarihon restorasi nib agas nasida be. On ma paingothon hita songon na porsea ingot sumarihon bagasjoro ala
inganan parsombaon dohot pamujion ni Debata do i.
b)
Huria ni Tuhanta, taparrohahon turpukta on; n
aro do si Haggai laho pasahathon tona atas goar ni Debata. Ia tona I ima asa
tongtong mangula, sai idaoanmu do sangkap ni Debata na badia. Na boi idaonta
dison adong tolu hal na dipasahat Debata tu tonga bangso Israel dohot tu
hita:
Ø
Naparjolo, Naung marujung do hadumaon na robi.
Ia parjolo do disungkun si Haggai: “Ise ma sian hamu na mangolu na hea marnida bagasjoro
dihabadiaonna najolo? Jala boha do idaonmu sinuaeng? Nda so marimbar do
sinuaeng asa sian najolo?” DI nasida naung maringan di Jerusalem andorang
dilengsehon bagasjoro I jala andorang dipabali bangso Israel, naung mansai
godang do parningotan nasida taringot tu bagasjoro i. Uju I ra mansai metmet
dope nasida songon dakdanak marnida hamuliaon ni bagasjoro i, hape nuaeng idaon
nasida pambahenan pe soada sian pasipasi nibangso i najolo maduma hape gabe
manika ateate. Sungkunsungkun ni si Haggai mambahen gabe lam lungun rohanasida.
Tung soada do hape dirohanasida bagasjoro i, mansai gale do marnidasa, sian
sungkunsungkun ni si Haggai on, paboa naung didodo Debata do rohanasida. Ai
didok do di 1 Raja-raja 8:39 Sai manangi
ma Ho di banua ginjang, ojahan ni habangsam, jala marpangulahi roham, huhut
marlulu dohot mangalehon tu ganup hombar tu saluhut dalanna marguru tu panandam
di harohaonna, ai sasada ho do tumanda roha ni jolma manisia luhutna. Ai ndang
buni roha ni jolma i sian adopan ni Debata, naung jumolo do Ibana mangantusi
hita sian hita mangantusi taringot tu dirinta sandiri. Tatangkasi be ma jolo
dirinta, naung taantusi do dirinta sandiri, taantusi do amanta dohot inanta,
ianakkonta, natorasta, haha angginta ? Atik do ala so tatanda jala ndang
taantusi gabe maon sai tubu parsalisian, partontangan nang parbadaan. Molo
tajaha di Johannes 20: 24-29 taringot si Tomas dungkon haheheon ni Jesus sian
hamatean. Ndang porsea ibana di hahaheonNa, na naung hehe Jesus ia so jumolo
jamaonna bogas ni bugang ni Jesus. Dung ro pe Jesus so pola muruhanna si Tomas,
laos ampehononNa do tangan ni si Tomas di bogas ni bugang na di pamatangNa jala
tangkas do disi keraguan ni si Tomas na maruba haporseaonna gabe marhaporseaon
na togu. Marhite pangalaho sisongon I ma, Debata ndang marnida bangso Israel na
marningot bagasjoro ni si Salomo I alai sabalikna, dipatuduhon Debata do tu
nasida ia na tau do Debata di na hilalaon bangsoNa I na so mararti be bagasjoro
sinuaeng. Alai dilehon Debata do di nasida pangkirimon songon point na paduahon
on.
Ø
Napaduahon: Hajongjongan ni Debata
manghorhoron habaranion. Molo taparrohahon di ayat 4-5, naung maruba do
sian na mengakui kekecewaan na nihilalaon ni bangso I angka nasida do pasipasi
na disosoi asa barani. Mansai mura do ro pandelean molo nunga tubu rasa kecewa.
Pola ma datdatan paulihon bagasjoro molo so songon masa najalo i be ? Alai
tuani ma Debata na sai tongtong paingothon tu nasida asa barani, unang mabiar,
jala marsihohot. Songon na nidok di 5 Musa 31: 6 “Pir ma tondimuna jala
marsihohot, unang tahuton hamu jala unang godoron rohamuna maradophon nasida,
ai Jahowa, Debatam sandiri donganmu mardalan, ndang tagamon marsombusombu Ibana
mida ho manang tadingkononna ho.” DIpasahat si Musa do tu saluhut bangso
Israel, marningot habaranion nasida na marharoroan sian Tuhan i. Molo so
didongani Debata, sai dibagasan biar do nasida nang di saluhut. Laos songon I
do ruas ni Tuhana I molo so Debata na mandongani dibagasan biar do hita.
Ø
Dipaingot si Musa do bangso Israel; tung margogo
pe nasida jala barani siala Debata do na mangaramoti. Molo so Debata na
mangaramoti, gok biar do jala tahutan mandalani saluhutna. Bangso Israel na
gabe hatoban hian, sai mian dope di roha mentalitas hatoban, na mardalan tur dii
halaongonan dohot angka musu nang alo nasida bangso sileban na sai marusaha
mangalengsehon nasdia disegala sisi. Alai gabe muba do saluhutna I, soada be
biar di roha nasida. Uju Debata na jongjong ditongatonga nasida mandongani,
naung meret do timbangan na mangalehon paruntungan di nasida. Debata na
mandongani manang songon na didok si Haggai; Tondi ni Debata mian ditongatonga
nasida, asa margogo jala barani nasida laho mangula nasa ulaonna. Boi masa doi
hal sisongon I dibagasan ngolunta, na mian do Tondi ni Debata ditongatonganta,
di rohanta mandongani hita. Asa tangkas songon na nidok di 2 Timotius 1: 7 “Ai
dilehon Debata do tu hita tondi hagogoon, tondi haholongon, tondi pangarajaion
diri, ndada tondi hatahuton.” Ia Tondi ni Debata na mian dibagasan hhita
mangalehon habaranion, donganta do Debata na maringan ditongatonganta. Songon
bangso Israel do hita, ndang adong be alasan gabe mabiar siala Debata na
mandongani hita. Ai didok do di Rom 8: 31 “Onpe, aha ma dohononta disi? Molo
Debata donganta, ise ma alonta?” Jadi songon bangso Israel, sai tongtong ma
hita mulaulaon na naung dipasahat Debata tu hita.
Ø
Napatoluhon : Pangkirimon di hasangapon na
umbalga. Naung diida Debata do holso ni bangso Israel I, alai ditogutogu do
nasida asa tongtong mangula siala Debata na mandongani nasida. Naung dipasahat
do I di Pangungkapon 21: 1-4, hasangapon na umbalga I ima di Jerusalem na
imbaru, na maringan ma disi Debata dohot angka na porsea, ndang adong be disi
arsak, tangis, biar n iroha nang hamatean pe. Angka si las ni roha na ma
ditonga ni habadiaon Jerusalem I, mansai godang do na maringan disi. Laos
dirinta do bagasjoro-Na i. Jutaan dohot milyaran jolma na mangolu dibagasan
harmoni, hasadaon dohot Tondi ni Debata, disesa, dipalua jala dipasangap.
Gombaran ni hamuliaon na mansai uli, tung boha ma hita boi manggobarhon I? on
ma panggohi na tumimbo sian Bagasjoro ni Debata; ia bangsoNa I do na gabe
bagasjoro inganan parmiananNa. Tudos songon na nidok di 1 Korint 6:19-20 “Ndang
diboto hamu: Dagingmuna do joro ni Tondi Parbadia, na di bagasan hamu, naung
jinalomuna sian Debata; ndada hamu nampuna dirimuna. Ai arga do hamu ditobus:
Dibahen i pasangap hamu ma Debata marhitehite dagingmuna dohot marhitehite
tondimuna; ai Debata do nampuna i.” Amen.
