Jamita Evangelium Minggu III D. Trinitatis – 6 Juli 2025

Gabe Tinompa na Imbaru  (Menjadi Ciptaan Baru)

Galatia 6: 11 – 18

1. Huria ni Tuhanta nahinaholongan dibagasan Jesus Kristus, adomg sada turi-turian sian amanta Pdt. Gery: Ninna di na sahali mardalan ma si kancil di lambung ni batu.Tarbegesa ma soara na tangis, dilului ma. Dapotsa ma sada bagudung na madabu tu holang-holang ni batu i so boi haruar. Sai di elek bagudung i ma asa olo si kancil manaek tu ginjang. Didok ibana: ahama poang na boi bahenonmu mangurupi au, ai dagingmu pe metmet do. Burju do si kancil i, di togu ma si bagudung i. Mansai mandok mauliate do si bagudung i, huhut muse didok: molo hasusaan ho muse, hu urupi pe. Tong do didok si kancil i: ah boha ma bahenonmu mangurupi au. Alai, dung sadia leleng mardalani ma si bagudung i. Dibege soara na tangis di ida ma hape si kancil i. Na tarjorat do pat na, di jorat jaring ni parjaring. Ro ma si bagudung mandok: on ma na hudok i, kedan. Hu urupi pe ho. Dang porsea si kancil, didok dope: boha ma bahenonmu mangurupi au. Alai didok si bagudung ma: so diboto ho kawan na tajom do ngingi kon mangharat tali joratmi. Hatop ma si bagudung manimbung tu toru di harati ma tali i, malua ma si kancil.
2. I ma soso soso ni si Paulus di bindu 6 on: ingkon marsiurupan, bertolong-tolongan. Uju i hira marsiharatan do huria i, ala deba sian Jahudi, deba sian na so Jahudi. Masiintipan do nasida di angka hasalaan. Alai didok si Paulus; Tugas ni naporsea manang halak Kristen ndada masiintipan di na sala laho masidabuan (menjegal) justru masihaehean, saling membantu do. Molo adong tarsor na mardosa, dang si dabuhononhon i. Alai angka na gumogo ma ingkon mangurupi. Unang adong na merasa na so adong guna ni halak na asing. Songon sorha ni padati do ngolu on, sipata di ginjang sipata di toru, sipata mangurupi, sipata siurupan. Unang adong merasa jagoan, na menganggap na boi imana sandiri menyelesaikan persoalanna, so mangharingkothon halak na asing. Jala unang adong halak na menganggap na so boi imana mangurupi halak na asing. Kita membutuhkan orang lain. Sude do ingkon saling membutuhkan jala sude do ingkon olo mangurupi. Ido huria na marsada songon pamatang ni Kristus. Ala ni i, wajib do hita masiurupan. Ido dalan mangulahon patik ni Tuhan Jesus.
3. Alai dipaingot hata ni Debata do sadarion hita: taulahon ma i sian roha na sintong. Taingot ma di jolo ni Debata do i taulahon. Di ida Debata do sude na taula i, jala ingkon pertanggung-jawabhononta do i di jolo ni Debata. Di ida do motivasi, ruhut parbagasan ni rohanta na mangulahon i, sian roha na denggan ala ni Debata do manang holan asal di ida jolma do, ingot ma, dang boi gabusanta Debata. Ala ni, taula ma na denggan sian roha na ias holan ala ni Tuhan Jesus. Domu tusi ma disosohon asa tung sian nasa roha hita mempertanggung-jawabkan sude na taula di jolo ni Debata.
4. Di taringoti Apostel Paulus do pangalaho ni halak na mamaksa halak Kristen asa marsunat. Sangkap nasida mangalului goar di tonga ni halak Jahudi asa diargai halak Jahudi. Dang holan i, nasida ima angka halak na menghindar sian panaonon ala ni Kristus. Molo ditulak nasida sunat jala holan porsea tu Jesus boi masa do tu nasida angka naso tama sian halak Jahudi. Nang pe sai disosoi nasida halak Kristen marsunat, hape nasida sandiri pe ndada halak na talup mangulahon patik. Na 2 hal on boi gabe jebakan tu hita halak na porsea. Ima gabe halak na mangalului goar holan tu dirinta pola sahat manundali Kristus manang lomoan rohanta mangalului na ringkot di ngolunta sian na mamingkirhon boha do hita sasintongna mangolu songon halak Kristen di bagasan Kristus.
5. (Ayat 12-14): Hamuliaon di bagasan Kristus ima na mangaloas hita mangolu manghobasi Kristus. Di bagasan parngoluan on songon halak na porsea hita adong do 2 kepentingan na sai marsirampusan (tarik-menarik) alai bertolak belakang. Na parjolo ima kepentingan ni Kristus, na paduahon kepentinganta sandiri. Jotjot do hita mangalului sangap di dirinta. Hasangapon i di dapot sian na boi taulahon songon prestasi manang pencapaian asa arga hita di jolo ni halak, molo so i, gabe halak na munafik do hita disi. Na sada nari ima kepentingan ni Kristus; angka naung di bagasan Kristus ima namangolu di Kristus jala hamuliaonna ima hamuliaon ni Kristus ndada hamuliaon dirina sandiri. Na tinaringotsn ni Apostel Paulus ima angka halak na mamaksahon sunat. Didok ibana ia nasida ima na mangalului na ringkot di dirina asa marhasangapon, hape nasida sandiri dang singkop mangulahon patik i. Angka dia ma na mamboan hasangapon tu dirinta di hasiangan on? Ima saluhut na bersifat lahiriah ima na sai talului asa marhasangapon hita (patudos falsafah ni halak Batak hagabeon, hasangapon, hamoraon) ido dilului na deba. Hape andul marasing sian pangidoan ni Kristus tu hita ima ngolu na mangalului sangap ni Kristus marhite na mangulahon lomo ni rohana. Alai sai jotjot do tarela hita manangko hamuliaon ni Tuhan i ala ni bulus ma rohanta mangihuthon Ibana dohot mangulahon jala mangaradoti patik dohot hata-Na. Tatiru ma songon Apostel Paulus aha pe namasa tongtong do ibaana marlas ni roha dibagasan Tuhan ala hamuliaonna holan dibagasan Jesus kristus.
6. (Ayat 15-16): gabe tinompa na imbaru dibagasan Kristus, ima na pauba ngolunta. Saluhut angka pardagingon (bersifat lahiriah) ima angka na ringkot tu haportibion na so boi dais tu partondion holan Tuhanta do na boi manjama angka partondion i. Ido alana didok Apostel Paulus di sunat manang daong, dang gabe marlapatan ala holan persoalan pardagingon manang fisik. Gabe tinompa na imbaru lapatanna panghorhonna tu parngoluan ni partondionta jala ingkon botoonta ia partondionta i do na paubahon ngolunta. Uju sorang hita tu portibi on ndada holan fisik alai hata ni Debata mandok Naung Maringan Do Pangalaho Dosa di Jolma i. Di bagasanna adong hamuliaon ni Debata alai adong hurangna. Didok hata ni Debata saluhut do jolma i mardosa jala naung mago hamuliaon ni Debata ala jolma i naung dibagasan huaso ni dosa. Dang boi dipalua huaso ni dosa marhite parsunaton, etika, peraturan, ritual ala saluhut na i na bersifat pardagingon. Holan sada do dalan asa boi hita malua sian huaso ni dosa ima gabe tinompa na imbaru di bagasan Kristus Jesus.
7. Songon topik ni Minggunta patoluhon dung Trinitatis: GABE TINOMPA NA IMBARU (menjadi ciptaan baru) dang alani parsombaon, pelean, pambahenan na denggan manang etika alai alani huaso ni mudar ni Kristus dohot ulaon ni Tondi Porbadia na patubuhon hita muse asa gabe tinompa na imbaru ma hita. Angka na dibagasan Kristus ima na tinompa na imbaru, naung salpu do na robi, jala nungnga ro na imbaru. Ima na marlapatan di ngolu partondionta lapatanna na mansai mararti di parngoluanta. Ndada holan tu ari sogot na nidok-Na di hangoluan na manontong di surgo, alai tu sadarion diparngoluanta siganup ari. Mansai ringkot do partondion na sehat jala segar asa margogo hita mangadopi parsorion ni ngolunta siala gale do daging i, alai girgir do tondi i. Ala ni ma ingkon ungkap do rohanta di pambahenan ni Kristus di hau pinarsilang i tu hita, asa jaloonta ma ngolu na marhasonangan na gok las ni roha gabe tinompa na imbaru. Amen.