====Tingki na hohom====
I . Joujou Tu Parsaoran : (L:Liturgis; R:Ruas)
L : Huria
ni Tuhanta! Dibagasan serep dohot unduk ni roha tu Debata, tahalashon ma
parsaoranta di tongatonga ni bagas ta be. Parpunguanta sadari on ima Passion II
di Bagasjoro ni Tuhanta on. Haleaon, insakinsak, reherehe, tijur, tali dohot
pastap-pastap, ditaon Ibana. Alai ndada holan i, ingkon sahat do Ibana tu hau
pinorsilang, asa sae sude utang ni dosanta.
R : Hita do tama manaon i. Ai ala ni
pangalaosionku do Ibana tartullang, jala ala ni hajahatongku do Ibana mabugang.
L : Antong, pabulus ma rohata mangendehon, Jesus
mual ni ngolungku sipangolu tondingki. Marende ma hita:
1. Marende No. 81: 1 – 2 “Jesus mual ni ngolungku” BL.185
♫ Jesus mual ni ngolungku, sipangolu tondingki.
Ai dibunu Ho musungku, i
ma hamatean i.
Ho manaoni hamagoan,
patupahon hangoluan.
Alani hupuji Ho, tung
marribu hali do
--------Jongjong ruas-----
♫ Haleaon, insakinsak, reherehe tijur pe.
Tali dohot pastappastap
tung ditaonhon Ho sude.
Paluahon au na pogos,
sian tangan ni sibolis
Alani hupuji Ho, tung
marribu hali do.
2. Votum-Intro-Tangiang:
L : Marhitehite
Goar ni Debata Ama dohot Goar ni AnakNa Tuhan Jesus
Kristus dohot Goar ni Tondi Parbadia.
Amen. Songon pangkaholongina
di angka
na di Ibana na di portibion, laos songoni i do dihaholongi nasida ro di
ujungna.
Haleluya...
Martangiang ma hita : Ale Tuhan Debata, Amanami na di Banuaginjang,
Parasiroha na sumurung! Na mandok mauliate ma hami tu Ho sian nasa rohanami ala
dilehon Ho AnakMu na sasada i tu hamatean humophop hami, asa unang mago na
porsea di Ibana, alai asa hangoluan na saleleng ni lelengna di nasida. Tatap ma
hami, ale Amanami di bagasan AnakMu Jesus Kristus, na gabe habadiaon dohot
hatigoran di hami. Sai sesa ma dosanami saluhut, ala ni pelean na sun denggan,
na pinelehonNa i humophop hami, sai paeleng ma pinggolMu tu tangiang nami, jala
asi ma rohaM di hami marhitehite AnakMu, Tuhan Jesus Kristus Tuhannami. Amen.
----Hudul ruas----
3. Marende BE. No. 83:
4 “Na Lao Do birubiru”
BL.214
♫
Saleleng na
mangolu au, naeng ingotonku Jesus.
Sude na
binaenMi di au, hataM naeng hupatulus.
Ho naeng
haholonganku do, huhut ihuthononku Ho
di dalan
hangoluan. Tung ingkon Ho, nampuna ahu,
mangolu
manang mate au. Sai Ho do tioponku
4. Barita Paonomhon: Jesus di Getsemane
L :
Jadi dung diendehon nasida endeende pujipujian i, ruar ma nasida tu
dolok Jetun. Disi ma didok Jesus tu nasida: saluhut do hamu naeng targasip mida
Ahu di na saborngin on. Ai na tarsurat do: Lombutanku ma Parmahan i, gabe
marserak ma birubiru na sapunguan i.
R :
Alai ninna si Petrus ma mangalusi Ibana: Agia sude nasida targasip mida Ho,
anggo ahu, na so tupa targasip.
L : Alai ninna Jesus ma mandok Ibana: “O Simon,
Simon nunga dipangido sibolis naeng segeonna hamu songon dahanon. Alai Ahu do
manangiangkon ho, unang mintop haporseaonmi. Jadi dung mulak sogot roham,
pargogoi ma roha ni angka hahaanggim!”
R :
Alai ninna si Petrus ma mandok ibana: “Tuhan, na hobas do ahu mandongani Ho tu
hurungan, nang tu hamatean pe!”
L : Alai ninna Jesus ma: “Hudok ma tu ho, Petrus:
Ndang martahuak manuk saborngin on; so jolo tolu hali soadahononmu na so
tinandam Ahu. Dung i sahat ma Jesus rap dohot nasida tu porlak sada margoar
Getsemane. Jadi didok ma tu angka sisean i: “Hundul ma hamu jolo dison saleleng
disan Ahu martangiang.”
R :
Dungi ditogihon ma si Petrus dohot anak ni si Sebedeus na dua i gabe marsak
situtu ma Ibana jala bobonosan. Jadi didok ma tu nasida: “Mansai marsak situtu
do rohangku, hira na mate do. Dison ma hamu dungo rap dohot Ahu.”
L : Dungi laho ma Ibana saotik tu jolo,
dipatungkap ma bohiNa tu tano martangiang, ninna ma: Ale Amang, namun na
tarbahen salpuhon ma siinumon on sian Ahu! Alai tahe, unang marguru tu
rohangKu, rohaM do!
R :
Dungi mulak ma Ibana tu angka siseanNa jala tarpodom do nasida didapot, jadi
didok ma tu si Petrus: “Ndang margogo hamu hape dungo rap dohot Ahu nanggo
sangombas? Dungo ma hamu jala martangiang asa unang hamu bongot tu pangunjunan,
ai na girgir do nian tondi i, alai gale do ia daging.
L :
”Dungi laho ma Ibana paduahalihon martangiang ninna ma: “Ale Amang, molo na so
tarbahen salpu on, nda ingkon huinum, sai saut ma lomo ni rohaM!”Dung i ro i
Ibana, tarpodom nasida didapot, ai mansai dokdok salibonasida.
R :
Jadi ditadingkon ma laho martangiang patoluhalihon mandok hata ondeng. Dung i
didapothon ma muse angka siseanNa jadi didok ma tu nasida:” Datdatanmuna dope modom dohot maradian?
L : Nunga dapot tingkina nuaeng, sahat ma Anak ni
jolma i tu tangan ni pardosa. Hehe ma hamu, laho ma hita! Ndi! Nunga ro na
pasahathon Ahu!”
5. Marende, No. 249: 1 “Ngot Ma Ho, O Tondingki”
♫ Ngot ma ho, o tondingki dungo martangiang.
Asa unang musu i, tole so tinagam.
Bisuk ni setan i, do manait tu dosa lan na
bonar roha.
6. Barita Papituhon: Haroro Ni Angka Soldadu
L : Alai
diboto si Judas siparjehe i do inganan i, ai jotjot do marpungu Jesus tusi
dohot angka siseanNa. Ia si Judas diarahon ma angka soldadu dohot angka naposo ni sintua ni malim,
didapothon ma tusi mantat sulusulu, palito dohot sinjata. Diboto Jesus do
saluhut na naeng songgop tu Ibana, jala ruar ma Ibana, didok ma tu nasida: “Ise
do na jinalahanmuna i?” Gabe ninna nasida ma mangalusi Ibana.
R : Gabe
ninna nasida ma mangalusi Ibana: “Jesus halak Nasaret i do!”
L : Dung i ninna Jesus ma mangalusi nasida: “Ahu
do i!” Alai dohot do si Judas si parjehe i jongjong di lambungnasida. Asa dung
didok tu nasida: “Ahu do i”, sumurut ma nasida, angka martinggangan ma tu tano.
R : Dung i diulahi ma manungkun nasida: “Ise do
na niluluanmuna?” Jadi didok nasida ma: “Jesus, halak Nasaret i do!”
L : Dung i
didok Jesus ma: “Ahu do i! Asa molo Ahu dilului hamu, loas ma laho angka on! Ai
naeng do jumpang na nidokna i: Ndang adong na mago hubahen agia sada sian angka
na nilehonMi tu Ahu.”
R : Alai nunga dipabotohon parjehe i hian
partinandaan tu nasida, ai didok do, “ia i na huumma, Ibana ma i, i ma tangkup
hamu!” Asa pintor didapothon ma Jesus, didok ma: “Tabi di Ho, Guru!” Laos
diumma.
L : Alai ninna Jesus ma mandok Ibana: “Marhua ho
tuson anggia? O Judas, pangummaon do hape dibahen ho, pasahathon Anak ni jolma
i? “Dungi ro ma nasida, dilaluhon ma tangan nasida tu Jesus manangkup Ibana.
R : Dung i, adong ma sada sian nasida angka
dongan ni Jesus mangalaluhon tanganna, disintak ma podangna, ditampulhon ma tu
naposo ni sintua ni malim sahalak, dipisikhon ma pinggolna.
L : Jadi didok Jesus ma tu ibana: “Pasarung
podangmi, ai na manintak podang, mago ma bahenon ni podang! Ai na so tarbahen
Ahu do di roham mangido sian Damang asa dipadiri di Ahu saonari lobi sian
sampuludua loksa surusuruan?
R : Alai songon dia ma disi saut hata ni surat i
na mandok “Ingkon masa do songon i? Uju i ma didok Jesus tu angka na torop
i:Hira na dompak panamun do hamu hehe, marpodang jala marlombutlombut manangkup
Ahu.
L : Ariari do Ahu nian hundul mangajari di
bagas joro, so adong ditangkup hamu Ahu. Alai na masa do sudena on, asa jumpang
hata ni angka panurirang i. Dung i ditadingkon saluhut sisean i ma Ibana laho
maporus.
7. Marende BE No.474 : 1 “Ingkon Jesus
do donganku”
♫
Ingkon Jesus do
donganku, sahalangku lilu do.
Raphon Jesus boi au
monang , talu musu I na ro.
Ndang mabiar au disi,
Tuhan Jesus donganki,
Sai ihothononku
Jesus, oloanku nama i.
8. Barita Paualuhon : Jesus di Jolo ni
Sintua ni Malim
L : Jadi bongot ma ibana rap dohot Jesus tu
alaman ni malim i. Alai disungkun sintua ni malim i ma Jesus taringot tu angka
siseanNa dohot taringot tu podaNa i. Jadi dialusi Jesus ma ibana ninna ma:
“Patar do hatangki dihatoropan.
R : Na tongtong do Ahu mangajari na sailaon
dibagasan parguruan nang dibagas joro pe, parpunguan ni saluhut halak Jahudi.
Ndang adong manang aha huhatahon marsibuni.
L : Boasa Ahu disungkun ho? Nasida naung umbege
hatangki, i ma sungkun! Ai diboto nasida do na huhatahon i.” Dung didok Jesus
songon i, Dipastap sada oppas na jongjong disi ma Ibana, huhut ma didok:“Songon
i pangalusiM tu sintua ni malim i?
R : Dung i ninna Jesus ma mangalusi ibana: “Ia na
hurang na hudok, hajongjonghon na hurang; alai anggo na hona do, boasa
pastaponmu Ahu? Asa disuru si Hannas ma Ibana naung tinali i tu sintua ni malim
si Kayapas, disi do marpungu siboto surat dohot sintua ni natorop.
L : Alai anggo angka sintua ni malim ro di sandok
rapot godang mangalului panindangion gapgap dompak Jesus, na tuk mambahen Ibana
marutang hosa. Alai nang pe hehe torop sitindangi gapgap ndang adong jumpangsa
na tau mambahen Ibana uhumon.
R : Alai parpudi ro ma dua halak ninna do: “Didok halak
on: Tarbahen Ahu do mangalohai joro ni Debata jala pajongjonghoni sumuang di
bagasan tolu ari. ”Dung i hehe ma sintua ni malim i, mandok tu Ibana: “Ndang
alusanMu na hinatindangkonnasida dompak Ho?”
L : Alai sai hohom do anggo Jesus. Dung i
dipangkulingi sintua ni malim i ma Ibana: ”Hupatolon ma Ho tu Debata Siparngolu
i, asa dipaboa Ho tu hami manang na tutu Ho, Kristus, Anak ni Debata!”
R : Dung i didok Jesus ma tu ibana: “Songon
nidokmi ma tutu! Alai hudok ma tu hamu: “Olat ni on ma idaonmuna Anak ni jolma
i, hundul di siamun ni hagogoon jala ro di atas ombun ni langit.”
L : Gabe diribakhon sintua ni malim ma paheanna
mandok: ”Na mangaleai Debata do Ibana! Pola luluan dope sitindangi? Nunga dibege
hamu pangaleaina i! Beha do dirohamu?”
R : “Ingkon marutang hosa ma Ibana!” Jadi
ditijuri nasida ma bohiNa, na deba manompuk, na deba mangalinsingi huhut
mandok: “Surirangi hami, Kristus, ise do na mamunu Ho?”
L : Alai sai mangihut do si Petrus mandaodao
sahat tu alaman ni sintua ni malim i. Laos bongot ma ibana tu bagasan, laho
hundul tusi rap dohot angka naposo marnida ujungna. jadi didapothon sada
parompuan ma ibana mandok: Dohot do ho dongan ni Jesus, na sian Galilea
i!
R : Jadi disoadahon ma di jolonasida saluhutna,
ninna ma: Ndang huboto na nidokmi! Dung i di na naeng haruar ibana, diida parompuan
na asing ma ibana, didok ma tu angka na disini: On do sada dongan ni Jesus na sian Nasaret!
L : Jadi
diulahi ma mansoadahon, pola manolon: Tung na so hutanda do Halak i!: Ndang hutanda
Ibana, inang! Alai dung satongkin nari, didapothon angka na jongjong disi ma si Petrus
mandok: Sintong tahe, dohot do ho sada sian nasida, ai pangkulingmi do
patandahon ho!
R : Dung i dipambuburahon ma dirina huhut
manolonnolon: Tung na so hutanda do Halak i, ndang na tutu i, amang!
L : Jadi pintor martahuak ma manuk. Jadi diingot
si Petrus ma na hinatahon ni Jesus tu ibana: Tolu hali soadahononmu Ahu, tagan
so martahuak dope manuk. Dung i laho ma si Petrus tu balian tumatangis situtu.
9. Marende BE.618 :1 “Di dia Ho”
♫ Di dia Ho na tarsilang Tuhanki;
Di dia Ho na tarsilang Tuhanki
O hitir roha marningot bernit tinaonNa i;
Di dia Ho na tarsilang Tuhanki.
10. Barita Pasiahon : Jesus
di Jolo ni si Latus
L : Asa
ditogihon nasida ma Jesus tu jolo ni si Kayapas tu kantor. Alai sogot ma i
manogot i. Ndang na bongot anggo nasida tu kantor asa unang tarsubang nasida
laho manganhon Paska i. Gabe ruar ma si Latus mandapothon nasida, didok ma:
Pangaluan dia do diboan hamu dompak halak on?
R : Dungi
ninna nasida ma mangalusi: Aut unang sibahen na jahat halak on, ndang tagamon
pasahatonnami Ibana tu ho.
L : Gabe
didok si Latus ma mandok nasida: Boan hamu ma Ibana, uhum hamu ma Ibana marguru
tu adatmuna. Alai ninna angka Jahudi ma mandok ibana: Ndang jadi pusaonnami manang ise.
R : Jadi dialuhon nasida ma Ibana, ninna ma: Na dapot
hami do on pabalikbalikhon bangsonami jala mangorai mangalehon guguan tu Kesar
i, dipandok, Raja Kristus do Ibana.
L : Jadi dibongoti si Latus muse kantorna, dijou
ma Jesus, didok ma tu Ibana: Atehe, Ho do Raja ni Jahudi? Ro ma alus ni Jesus:
“Na sian roham do na nidokmi, manang na nidok ni halak do i tu ho taringot tu
Ahu?”
R : Gabe dialusi si Latus ma mandok: Bangsomi
dohot angka sintua ni malim i do pasahathon Ho tu ahu. Aha do na binahenmu?
L : Jadi dialusi Jesus ma: Ndang sian portibi on
harajaonKu, aut sian portibion harajaonKu, ndang tarbahen so mangalo angka
naposongKu asa unang sahat Ahu tu tangan ni angka Jahudi.
R : Alai ndang sisongoni harajaonKi. Dungi ninna
si Latus ma mandok Ibana: Asa Raja do Ho? Jadi ninna Jesus ma mangalusi: Songon na nidokmi ma tutu, Raja do Ahu!
Umbahen na tubu Ahu jala umbahen na ro Ahu tu portibi on, asa huhatindangkon
hasintongan i.
L : Ganup na sian hasintongan i, tangihonon ni i
do soarangKu. Ninna si Latus ma mandok Ibana: “Aha ma i hasintongan
i?” Jadi dung didok songoni, ruar ma ibana muse manopot angka Jahudi mandok tu
nasida: “Ndang jumpang ahu manang dia salana.”
R : Dungi ditogu si Latus ma Jesus, didokkon ma
linsinganna. Jadi didandani angka soldadu ma sungsang duri bahen tumpal,
diampehon ma tu uluNa; Baju dapdap ma dialithon tu dagingNa.
L : Dungi ro ma nasida tu joloNa mandok: Tabi di Ho
ale Raja ni Jahudi! Laos dipastapi ma Ibana. Dungi ruar ma muse si
Latus, didok ma tu angka Jahudi: Ida hamu ma, hutogihon do Ibana tu jolomuna
asa diboto hamu na so adong jumpang ahu salana.
R : Laos ruar ma Jesus manjujung sungsang duri
jala marbaju dapdap. Jadi didok si Latus ma tu nasida:Ida hamu ma jolma i! Asa
dung diida sintua ni malim dohot angka naposo Ibana, dijouhon nasida ma: Parsilangkon,
Parsilangkon ma Ibana.
L : Boan hamu ma Ibana, parsilangkon hamu ma; ai
ndang jumpang ahu salana. Gabe dialusi Jahudi ma ibana, ninna ma: Padao, padao
ma i; Parsilangkon ma Ibana!
R : Dungi didok si Latus ma tu nasida:
Parsilangkononku ma Rajamuna? Jadi dialusi angka sintua ni malim ma: Ndang adong
rajanami dungkon ni Kesar i. Marguru tu patiknami ingkon marutang hosa Ibana,
ai dibahen do diriNa anak ni Debata.
L : Umbege i si Latus, lam ganda ma biarna.
Dungi diulahi muse tu kantorna, didok ma tu Jesus: Sian dia do Ho? Alai ndang
dialusi Jesus ibana.
R : Dungi didok si Latus ma tu Ibana: Ndang
angkupanMu ahu manghatai? Ndang diboto Ho marhuaso ahu paluahon Ho jala
marhuaso parsilangkon Ho? Jadi dialusi Jesus ma: Ndang adong huasom mangago
Ahu, aut unang ni lehon i tu ho sian ginjang.
L : Dibahen i gumodang do dosa ni na pasahathon
Ahu tu ho. Jadi olat ni i ma dilului si Latus dalan paluahon Ibana. Alai
manjujui ma angka Jahudi, ninna do: Molo dipalua ho on, ndang aleale ni Kesar ho!
Ai na mangalo Kesar i do ganup na mambahen dirina gabe raja.
R : Asa dung dibege si Latus hata i, ditogihon
ma Jesus haruar, laos hundul Ibana di habangsa paruhuman i na diinganan na
margoar: Pantar batu alai anggo di hata Heber: Gabbata.
L : Ima na masa di ari parhobasan Paska, mareak
hos ni ari. Asa dung diida si Latus, na so marguna hatana, lam ganda tahe
gaorna, dibuat ma aek mamuri tanganna dijolo ni natorop i huhut mandok: Lias do
ahu sian mudar ni on, hamu do na sari disi!
R : Dungi ninna sude natorop i ma: Marsapata tu
hami dohot ianakkonnami ma mudarNa i! Alai peam do dipalua panguhum i di pesta i
sada halak na tarhurung, marguru tu na tinodo ni natorop.
L : Alai adong ma tarhurung uju i sada halak
parjahat na sumalin na margoar si Barrabas. Jadi di na pungu i nasida, didok si
Latus ma tu nasida; Ise do dipangido hamu paluaonku, si Barrabas manang na
targoar Kristus?
R : Alai sai disosoi angka sintua ni malim rap
dohot sintua ni bangso i natorop, asa dipangido nasida, malua si Barrabas, alai
pusaon do anggo Jesus.
L : Dungi ninna panguhum i ma mandok nasida: Ise
sian na dua i dipangido hamu paluaonku? Dungi didok nasida ma: “Si
Barrabas!” Dungi didok si Latus ma tu nasida: Antong aha ma bahenonku tu Jesus, na
targoar Kristus?
R : Gabe saluhut nasida mandok: Parsilangkon
ma!, Parsilangkon ma!, Parsilangkon ma! Alai ninna panguhum i ma: Ai aha ma na jahat
dibahen?
L : Jadi lam gogo ma dipajoujouhon: Parsilangkon
ma!, Parsilangkon ma!, Parsilangkon ma! Dungi saut ma dipalua si Barrabas. Alai
anggo Jesus dilinsingi, dungi dipasahat ma asa diparsilangkon.
R : Jadi dung diida si Judas parjehe i, na naeng
hona uhum nama Jesus, disolsoli ma rohana, dipaulak ma na tolupulu rupia tu
angka sintua ni malim dohot tu sintua ni bangso i, ninna: “Sala do ahu, hujehehon
do hape na so marpipot!”
L : Alai didok nasida ma: “Ndang ro di hami! Ho do
na sari disi!” Jadi ditimpalhon ma perak i tu bagasan joro i, laos sumurut sian
i laho maningkot.
R : Alai dibuat sintua ni malim ma hepeng i,
ninna ma: “Ndang jadi padomuon i tu arta ni joro, ai tuhor ni mudar do i!” Jadi mardos
ni roha nasida manuhorhonsa tu ladang ni pande hudon, bahen parbandaan ni halak
dagang. Ala ni i umbahen margoar i ladang mudar ro di sadari on.
11. K o o r :
Ø Remaja
Ø Ina
Kamis
Ø Mannen
12. Marende, No. 171 : 1 “Tandai ma ahu”
BL.49
♫
Tandai ma
ahu, sungkapi ma dohot rohangku.
Uji ma au, pamanat huhut
ma langkangku. Ala AnakMu ma i Debata.
13. J a m i t a :
14. Marende BE No.619: 1 – 3 “Di Golgota”
===Pelean===
♫ Di Golgota husolsoli do sude dosangku na
jorbut i
Ias au dibaen mudarNa i, puji Jesus i; Puji
ma GoarNa puji ma GoarNa
MudarNa paias rohangki puji Jesus i.
♫ Malua au sian dosangki, nunga tung sonang
martua au
ditano on dongananNa au, puji Jesus i; Puji
goarNa ……
----Musik----
♫ MudarNa do mamuri au, nunga ias songon hapas
au
Unang ramun diramoti au, puji Jesus i.
Puji goarNa ……
15. Panutup: Tangiang & Pasupasu.
