NAPOSO
NA DENGGAN ROHA JALA HAPOSAN
(Hamba
Yang Baik Dan Setia)
Daniel
6 : 1 – 6
1.
Huria
ni Tuhanta na hinaholongan; Buku Daniel i ma sada buku na masuk tu horong
apokaliptik di Padan na Robi na marisihon angka pangungkapon. Dung dipatorang
sejarah dohot pengalaman ni si Daniel rap dohot donganna na tolu nari di bindu
1-6, manigor marudut ma muse di bindu 7-12 disurathon angka pangungkapon
taringot tu ari sogot na dipasahat marrumangkon ceritera na mansai tangkas
adong pardomuanna tu situasi dohot pengalaman ni ngolu nang partondion nasida.
Daniel sandiri na gabe tokoh utama ni buku on patolhashon barita i tu bangso
Israel nang angka bangso na humaliang di hatiha i laho pabotohon ngolu
parugamoon na sintong maradophon angka ugamo na adong di sekitar na. Menarik
situtu do buku Daniel on, ai nang pe dipamasuk buku on di horong ni angka
panurirang alai godang do parasinganna sian angka pandohan na dapot di
bagasanna. Hira na so adong do dapot jahaon pandohan: "Songon on do
pandok ni Debata...." Berbeda sian angka panurirang na di Padan na
Robi i na dijou Debata pasahathon hata dohot tonaNa tu bangso Israel dohot
bangso na leban, Daniel mangula di istana harajaon di Babel, di tingki ni raja
Nebukadnezar sahat tu Raja Darius na sian Parsi. Dungkon angka pangungkapon na
jinalona, godang do dapot angka panindangion di buku on, termasuk nang sian
angka raja na marhuaso dung diiida na masa tu si Daniel nang donganna na tolu
i. Asing situtu do latarbelakang panjouonna i, jala hira holan Daniel do na
dipamasuk gabe panurirang songon on. Daniel diboan do si Daniel rap dohot raja
Joyakim nang angka na pistar na asing sian Juda tu Babel dung ditungkum huta
Jerusalem. Dihallung nasida do nang angka ulaula ni bagas joro tu Babel.
2.
Boi
do dapot roha boasa gabe tu horong ni angka panurirang masuk Daniel on, ala
tangkas do disurirangkon ibana marhite angka pangungkapon na jinalona taringot
tu na naeng masa di tingki na naeng ro. Nang pe nian molo sinigatan tangkas ndada
holan tu angka na naeng masa hatana alai dohot do mengkritik angka raja na
marhuaso di tingki i. Alani i do ra umbahen adong pande bisuk ni PL na mandok
buku Daniel on Pseudonyme Weissagungen (nubuat samaran). Na marlapatan,
angka naung hea masa diproyeksikan tu na naeng masa dope muse di tingki na
naeng ro. Asa molo tajaha buku Daniel on gabe manigor lao do rohanta tu buku
Pangungkapon.
3.
Turpuk
na naeng pahebahebaonta on marmula sian pangiburuon ni angka parhapistaran,
induk nang pangarajai ala sogo rohanasida mamereng si Daniel. Bersekongkol ma
nasida mambahen jorgong padapot si Daniel. Hombar tu uhum na adong di hatiha i
manang ise na mangalo raja ingkon madabu ma uhum tu ibana. Sai adong na sogo
roha manang pangiburuon hinorhon denggan na taula, manang dumenggan na taula,
umpistar hita mangulahon dohot mamboanhon sadasada ulaon. Naeng luluan nasida
sindir ni si Daniel alai ndang dapot nasida. Asa disangkapi ma pajongjong
aturan nang uhum na imbaru. Ditingtingkon oraora, paboa na so jadi manang ise
di bagasan tolupulu ari on mangido manang aha, nang tu debata dia nang tu
jolma, nda holan tu ho, ale rajanami, ingkon timpalhononhon ibana tu godung
parbabiatan (ay.8). Sai disangkapi jolma do angka celah na didia ma naboi
pamatehon hita. Memang semakin tinggi pohon semakin besar goncangannya. Lam timbo
pangkatta manang jabatanta lam godang do musu na naeng mamolgak hita, ala ni i lam
malo ma hita jala marbisuk mamboanton
sude na ulaon i.
4.
Ala
ni angka na porsea dibagasan Jesus Kristus, tatiru ma si Daniel, tung malo pe
jala marbisuk ibana saluhutna I siala parsihohotonna marsaor dohot Debata. Molo
tajah di ayat 14 diboto angka musuna I do ibana na sai martangiang tolu hali
sadari. Ido mambahen sai marbisuk jala mahapistaran si Daniel jala tongtong
dipatuduhon ibana integritas nihaporseaonna na so boi sumurut. Nang pe di ayat
na mangihut dipaboa do na masa dibahen nasida tu si Daniel ala parsihohotanna
manomba Debata ndada tu dewa dewa gabe hona uhuaman do si Daniel. Alai sai dilului
Raja Darius do dalan laho paluahon si Daniel alai ndang dapotna. Ujungna diuhum
ma si Daniel dipamasuk ibana tu liang ni parbabiatan (gua singa). Alai dihuntam
Debata do pamangan ni babiat i, so dihauha si Daniel di parsadarian i. Alai
molo roha ni si Darius sai mamingkiri si Daniel do. Di sogot manogotna i pintor
humalaput do si Darius laho marnida keadaan ni si Daniel di parbabiatan i. Hape
soadong na binahen ni babiat I manang
aha tu si Daniel, gabe las do roha ni Raj Darius marnidasa selamat. Dung i
didokkon rajai ma, ingkon boanon baoa angka na mangasungkon si Daniel; jadi
ditimpalhon ma nasida tu bagasan godung parbabiatan i, ro di anaknasida dohot
jolmanasida.Ndang dope tolhas nasida tu pantar ni godung i, nunga ditimbung
singa nasida, jala diropuhi saluhut holiholinasida.
5.
Huria
ni Tuhanta Topik ni MInggunta mandok: NAPOSO NA DENGGAN ROHA JALA HAPOSAN (Hamba
Yang Baik Dan Setia). Nuaeng boha do
hita asa songon si Daniel sahalak naposo ni Debata na denggan roha jala haposan
?
Ø Naparjolo, ringgas
martangiang songon si Daniel, tapatuduhon ma sai sihol rohanta solhot dohot
Tuhan I marhite tangiangta tu Tuhan i. Mrhite tangiang I do asa dipargogoi hita
manaon jala mamolus ragam partingkian nang hamaolon. Molo so Debata na
mandongani hita boi do hita pintor gale jala lomos roha, ndang binoto mangula
manang aha.
Ø Napaduahon,
Mangulahon Hata ni Debata; tapatuduhon ma parsihohotanta di haporseaon na
niihutan marhite na mangulahon Hata nang patik ni Debata, sian I do patuduhononta
burju ni roha nang gabe haposan ni Debata.
Ø Napatoluhon,
patuduhon integritas diri halak na porsea, na so munggilunggil tu siamun nang
tu hambirang, tongtong patuduhonon hasatioan jala haposa ni Debata. Nang pe
naung dilehon Tuhanta jabatan nang pangkat dohot kedudukan tinggi, ndang na
gabe lupa diri hita di sudena I ala ni asiasi ni Debata na mambahen hita gabe
haposanna. Dipangke do hita marbarita na uli marhite integritas haporseaonta
asa torop halak tumanda Tuhanta Jesus Kristus Siparmonang i.
Ø Molo ro angka
hasusaan, nang hamaolon, tongtong ma hita mangasahon bisuk dohot hapistaran nang
hagogoon ni Tuhanta Jesus Kristus i. tahamonangkon ma paraloanta mangalo dohot
mandopang nasa musu i. Tuhanta Jesus naung manaluhon sorop ni sibolis dohot
hamatean I do lombulombunta jala dolok partanobatoanta. Sai monang do sogot
angka na mangasahon hagogoon ni Tuhanta Jesus Kristus i. (Johannes 16:33
Asa mardame hamu di bagasan Ahu, umbahen na huhatahon angka i tu hamu.
Haporsuhon do jambarmuna di portibi on; alai pos ma rohamuna: Nunga talu
hubahen portibi on.) Amen.
