Epistel Jumat Agung, 29 Maret 2013

Mangihuthon Jesus Sahat Ro Diujungna

Jesaya 53 : 1 – 9

      A.      Patujolo

Diujung partingkian habuangan Babel do disurathon turpuk on (Deutro-Jesaya psl.40-55), i ma dinalaho mulak nama bangso Israel tu Jerusalem. Ai nunga gale harajaon Babel, bangkit harajaon Persia ginomgoman ni raja Sirus (Koresy). Dipatunduk do Babel jala dipabotohon tu sandok Israel na tartaban di Babel asa mulak ma tu Jerusalem. Sude ulaula na badia na dibuat raja Nebukadnesar sian  bagas joro na di Jerusalem, ingkon dipaulak jala dipasuang tu ingananna hian (ptds. Esra 1 :1-11; 6:3-5)

Barita haluaon ni bangso Israel i do na disurirangkon si Jesaya. Naung diapuli Debata bangsoNa, ai nunga marujung parungkilonna, nunga salese dosana, binahen ni huaso hagogoon ni Debata (Jes. 2:1-2). Debata sandiri do na patupahon haluaon di bangsoNa. Na dipangke Debata do raja Sirus, songon ulaula, patupa lomo ni rohaNa, marhite na mangalehon gogo tu Ibana (41:1-2), manaluhon raja Babel (45:21). Ai na boi do Debata mamangke saluhut na tinompaNa pasauthon lomo ni rohana.

      B.      Hatorangan

1)                  Tung Ise m Naporsea di jamitanami ?; Sangajo do si Jeremia mamuhai turpuk on dohot marhite sungkunsungkun na songon i, ala diboto ibana saluhut angka ayat na mangihut i maol tarjalo roha ni jolma. Molo didok di turpuk on ingkon marsitaonon do Mesias i, jala mate tartullang  di hau pinarsilang. Hape ndnag songon i anggo Mesias na niantusan ni halak Jahudi. Konsep pemahaman ni halak Jahudi mandok ingkon na gagah berani do Mesias, raja parmonang, manaluhon saluhut musu ni Jahudi, tarlumobi halak Rom ( 1 Kor.15:25). Jala ingkon sangap do Mesias, mangarajai di portibi on songon pahlawan parmonang na patundukhon saluhut bangso (Heber 10:13). Hape ndnag songon i cara na tinontuhon ni Debata sidalanan ni Jesus songon Mesias paluahon joolma. Ingkon masitaonon do Ibana, jala mate tarsilang. Pilit do i sian pangidoan ni roha ni jolma tarlumobi Jahudi.  Ala ni i do didok si Jesaya di turpuk on, tung ise ma porsea di jamitanami ? Saleleng holan dibagasan jamita dope i, ndang adong na manghaporseai. Dung pe dihamamasana, hehe Ibana sian na mate, ipe asa porsea jolma na Ibana do Mesias i.

2)                  Tangan ni Jahowa, tung ise ma naung tumandasa ? (ay.1). Molo di hata Heber, tangan ni Jahowa di dok : “zero’a Jahwe’; ima tangan na marhuaso. Na boi manuan, patubuhon manang mambutbut. Tangan na baoi pangoluhon, manang mamungkul. Ndada tangan fisk manang tangan pardagingon nanidokna disi. Tangan ni Jahowa ndnag boi diida mata, alai huasoNa dohot pangulahonNa tangkas tarida. Ala ni i didok si Jesaya: “Tangan ni Jahowa tung ise na naung tumandasa ?”. Ai anggo dihangoluan on umbiar do jolma tu tangan ni sordadu na maniop sinjata, manang tutangan ni pareman na boi mamungkul. Hape tangan ni Jahowa boi patubuhon dohot pangoluhon, manang sabalikna. Tangan ni Debata do na mangatur saluhutna, na niida manang na so niida nijolma pe. Di sitaonon ni Jesus i pe, tangan ni Debata do na mangatur, alai ndnag diida, jala ndang ditanda jolma huaso ni tangan ni Jahowa. Tangan ni Jahowa ima simbol ni huaso dohot hagogoon ni Debata na so boi niida ni jolma.

3)                  Di ayat 2 dohot na mangihut, ima angka hatorangan taringot tu Mesias i, ulaonNa dohot huasoNa. Saluhutna i disurathon si Jesaya dibagasan bahasa simbolis, ima:

v Simbur tubu songon tunas(ay.2). Ndada pamatang ni Jesus na nidokna dison simbur tubu, alai ulaonNa, huasoNa tarlumobi missiNa hatop rarat, simbur tubu songon tunas. Pengaruh ni Jesus mansai hatop berkembang mempengaruhi huaso harajaon dohot hajolmaon. Ndada holan jolma na marsahit na pintor terpengaruh dibahen Jesus, alai tergoncang do nang huaso ni si Herodes, dohot si Latus ala ni Jesus. Tolu taon sambing do tingki pangulaon ni Jesus, alai nunga sude bidang ni ngolu masyarakat dipengaruhi jala disirai.

v Ndang adong hinauli ni rupaNa manang hamuliaonNa (ay.2). Sian segi fisik dohot haportibion, ndang adong keistimewaan ni Jesus. Ai so adong kursi kerajaan di Ibana, jala ndang adong sinjata ditanganNa. Ndang adong pahean harajaon nalohot dipamatangNa na boi mambahen Ibana songkal idaon. Ndang adong tahuluk harajaon, manang simbol kepahlawanan di Ibana. Sasude sian segi phisik ndnag adong pola na istimewa di Ibana. Ala ni i didok di turpuk on, “Ndang adong rupaNa umbahen sihalomohon Ibana” (Ay.2). Dipasiding jolma do Ibana..... (ay.3). Ala dalan haporsuhon, dohot haleaon do dipillit Debata sidalanan ni Jesus, angka na pinasiding ni jolma i do didalani Jesus, ala ni i do didok turpuk on, dipasiding jolma do Ibana. Anggo dalan na somal dihalomohon jolma, i ma hasangapon dohot habongkaon, alai anggo Jesus, haleaon dohot haserepon do dipillit mulai sian hatutubuNa sahat tu hamamateNa hapogoson dohot haporsuhon do dipillit. Ala ni i ddidok si Jesaya gabe sipasidingon Ibana.

Angka ima gombaran hataridaan kepribadian ni Jesus songon Mesias, Ebd Jahwe. Hape ndada holan i gombaran kepribadian ni Jesus. Ai na so boi diida ni mata, Ibana do nampuna nasa huaso dohot hagogoon. Ibana do sitompa langit dohot tano dohot nasa isina. PenampilanNa laea, pogos, gale hape Ibana do pargogo na so hatudosan.

4)                  Anggo diahalak Jahudi di tingki i, dongon i do nang di toropan halak di tingki on, mata pardagingon do na gabe ukuran mananda jolma. Laos i do ukuran ni halak Jahudi mananda Jesus. Alai sederhana do Jesus i diida, ndnag adong pengawal na marsinjata na manghaliangi Ibana. Ndang adong jabatan harajaonNa, ala ni i do barani pulut halak Jahudi mamusa huhut mamparsilangkhon Ibana. Ndang adong dosa diulahon Ibana. Alai Jesus i sandiri ma habaoron ni dosa dohot hajahaton ni jolma. Ibana sandiri gabe sasaran emosi dohot keganasan ni jolma. Ala ni i do didok si Jesaya, “tongon do angka sahitta diusung Ibana, jala angka pardangolanta diporsan”. Di hau pinarsilang i do diporsan dohot dipasidung Jesus nasa dosanta.

5)                  Songon birubiru do Ibana na tinogu tu pamotongan (ay.7). Di teologi ni halak Jahudi, molo mardosa sada halak, ingkon mate do na mangulahon dosa i. Alai asa unang mate angka pardosa i, ingkon korbanhononna ma sada anak ni lombu manang birubiru. I ma gantina mamorsan dosa i ( 3 Musa 3: 1-12). Manang diugamo Kanani, molo mardosa sada halak, ingkon adong do pinahan na so mardosa mamorsan dosa ni jolma. Songon i do na masa tu Jesus, umbahen digoari Jesus do birubiru ni Debata, ido na masa tu Jesus, umbahen digoari Jesus do birubiru ni Debata, na mamorsan dosa ni portibi on. Songon birubiru na pinelehon ni halak Jahudi mamorsan dosana. Songon i do Jesus mamorsan dosa ni sandok portibi on (1 Joh.2:2). Alai saonnari, ndang be ringkot birubiru manesa dosa, ala nunga dipasae Jesus dosanta.

6)                  Molo taida di ayat 8, tangkas dipaboto sitaonon ni Jesus; ima uhum na ingkon jaloon ni jolm manisia. Pardangolan na niadopan ni Jesus, diujungi ma i marhite hamamateNa. Marhite ayat on boi ma antusan na marsirang do Ibana dohot portibi on, alai parsirangan i ndada ala na Jesus borhat tu luat manang inganan na asing, alai justru ala ni hajahaton ni bangso i do ingkon tinggalhononNa portibi on marhite hamatean. Balik do na masa di portibi on. Halak na tigor di adopan ni Debata, mate do ibana di uhuman ni jolma. Ise pe sian bangso i, ndang adong na manjujur (memikirkan). Tarida do i, sian tindakan ni jolma na tinobusna i, na tinggal diam jala hohom menikmati las ni roha na binoan ni Jesus marhite hapariron dohot pardangolanNa.

7)                  Laos dipaandar di ayat 9, singkop pardangolan ni Ibana, ai mate pe Ibana alai tong do dibagasan pardangolan. AI rap dohot halak parjahat do tanomanNa. Parjahat ima halak naung terbukti angka hasalaanna, jala asa pola diuhum ibana. Rap dohot halak na ora; na mora maol do masuk tu Harajaon ni Debata, ala memang halak na mora tidak bisa dikubur dengan orang yang dihukum mati (tradisi kejahudian). Meskipun Tuhan di Kerajaan Sorga terangterangan memihak kepada orang miskin dan tertindas. Hombar tu pangantusion nasida, ia hamatean ni Jesus, dipatudos do dohot hamatean ni angka pembunuh, perampok, penculik dohot angka na asing na menipu (mangotootoi) dongan jolma, hape Jesus ndang hea mambalos sude angka pardangolanNa.

      C.      Sipahusorhusoron.

         i.            Debata mamillit dalan haporsuhon manuju hasonangan. Nang pe mabiar do jolma tu haporsuhon i, alai i do dipillit Debata sidalanan ni Jesus, asa unang be dipangke sibolis  haporsuhon padaohon jolma sian Debata. Marbalik do dalan na tinontuhon ni Debata sian hagiot ni portibi on. AI portibi on selalu menawarhon hasonangan. Hape hasonangan si songon i mamboan jolma tu hamagoan. Isarana; narkoba na menawarkan hasonangan hape hasonangan si songon i mamboan jolma tu api naroko.  Jesus mamillit dalan  haporsuhon (Via Dolorosa) laho mamboan jolma tu hasonangan dohot hamonangan. Hita halashon do haporsuhon si songon i, ninna si Paulus di Rom 5:3, Nang pe ndang dihalomohon rohanta haporsuhon i, alai di tingki tertentu ndang boi so masa haporsuhon tu ganup jolma.

       ii.            Molo tapatupa parningotan di hamamate ni Jesus, ndang cukup holan parningotan historis sambing, alai naeng do adong parningotan futuris, ima hamateanta di tingki na naeng ro, paboa ndnag marhuaso be hamamatean i maniop hita. Andorang so sahat hita tu hamatean i, nunga ingkon jolo dapot bagian hita di sitaonon ni Kristus, ima sitaonon ala ni hatigoran, nang pe ndang  ingkon pola siluluon sitaonon sisongon i, alai na pasti ro do i di tingkina be. Nang pe ndnag apala  tahalaomohon i sian segi pardagingon, alai unang ma ingkon lari hita sian kenyataan ai hira sisoada do sitaonon i tahilala, dung salpu tingkina. Molo naeng donganta Kristus di hamonangan, ingkon donganNa do hita nang disitaonon.

      iii.            Somalna hita jolma mamereng tu pudi, ima tu pengalaman na salpu. Alai anggo Jesus di sude pengalaman dohot parniahapanNa selalu mamereng tu jolo, ima tu hamonanganNa sahat tu tingki Eskatologis. Ala ni i do umbahen na tahan Jesus mandalani na porsuk i, ai diboto Ibanaa ndang so taonon i ujungna alai hamonangan do dohot hasonangan. Ala ni i do di ari parningotan ni hamamate ni Kristus i, naeng ma sude halak Kristenmamereng tu jolo, di tingki na ro, ima haheheon ni saluhut angka na mate. Angka na porsea di Kristus hehe tu hasonagan. Ala ni i do umbahen sungkunsungkun si  Jesaya mandok; ise ma porsea di jamitanami, ala toropan angka jolma tarihot tu pengalaman dohot pingkiranna sandiri, ndang diboto, dia rencana ni Debata tu tingki na ro. Haporsuhon do dalan tu hasonangan.(bnd. BE. No.242. Rahis Jala Maol). Amen !.

BAHAN SERMON PARHALADO Epistel Minggu Palmarum(maremare)

Mamelehon Na Ummuli tu Tuhan Jesus

Yohannes 12 : 1 – 8, 12 – 13

      A.      Patujolo.

Ia turpukta on ima barita taringot tu Jesus na dimiahi sahalak parompuan. Barita na tarsurat diturpuk on manggombarhon tingki na parpudi na niadopan ni Jesus andorang so tarsilang Ibana. Minggu palmarum ima sada minggu dibagasan rongkoman minggu passion, na marlapatan minggu na marningot partinaonan ni Jesus. Dibagasan minggu passion diarahon do hita, mamparungkilhon jala mangauhon sitaonon ni Jesus.

      B.      Hatorangan.

      1)      Ayat 1-2  : Barita taringot tu Jesus na dimiahi si Maria di Betania ima lanjutan ni Barita taringot si Lazarus na pinabangkit ni Jesus sian na mate. Andorang so bongot Jesus (Onom ari andorang so Paskah) di huta Jerusalem dipatuduhon Jesus do diriNa tu Betania, ima huta ni si Lazarus, iboto ni si Marta dohot si Maria, dohot huta ni si Simon na huliton (naung pinamalum ni Jesus). Betania ima  sada huta na so pola dao sian Jerusalem (+ 3 km), dompak Timur dolok Jetun. Tu jabu ni si Simon na huliton i  do ibana bongot (Mat.26:6-13). Betania Lapatanna : inganan, huta ni angka na pogos manang na menderita (bnd.Luk.7:37-38)

2)    Ayat 3 : Na menarik di turpuk on ima ala pamiahon i dipatupa sada parompuan  na margoar si Maria mangalapu pat ni Jesus marhite miak Nardus na arga na so marsaor. Ianggo parompuan na nidok di turpuk on, ima parompuan na mardosa na tong tarsurat di Markus 14:3-9 dohot Lukas 7 : 36-50, na margoar Maria Magdalena. Marhite pamiahon on gabe idaonta ma sada peristiwa na mansai asing sian pamiahon na somal di Tradisi ha-Jahudi-on. Ndang didok Jesus na sala tradisi ni Jahudi. Alai gabe dapot ma pangantusion na sintong di pamiahion i. Molo dimiahi malim, raja dohot sada inganan, ndada asa gabe eksklusif halak manang inganan na miniahan i. Alai naeng pangkeon ni Debata do laho patariparhon asi dohot holong ni rohaNa tu portibi on. Sasintongna nian, molo dipabangkit sada raja marhite pamiahion naung dipasahat Debata do tu ibana ulaon mangaramoti bangsoNa jala mangalehon keamanan, keadilan dohot ngolu na sejahtera. Jala molo dimiahi sada malim, naung ditodo Debata do ibana laho patolhashon hasintonganNa tu bangsoNa jala huhut gabe perwakilan laho pasahathon tu Debata pangoloion ni Jolma. Hape  molo taida di sejarah bangso Israel, ndang apala hombar be pangalaho ni naung miniahan tu tujuan khusus ni Debata, I ma gabe saluran manang ulaula ni Debata mamboan dame dohot las ni roha tu jolma secara universal. Angka raja, malim naung miniahan i nunga madabu tu sikap eksklusif, na menganggap dirina mansai asing sian jolma hatoropan, na menganggap dirina na badia situtu jala ala ni i ndang boi saor sembarangan tu sude jolma. Andorang so sahat hita tu lapatan ni pamiahion na di turpuk on, ra tubu ma saungkunsungkunta: boasa dipasombu   Jesus parompuan i mamiahi Ibana ? Na sekaligus do pamiahion ni parompuan on gabe kritik tu hasomalan ni Jkahudi ? Alana adong tolu unsur na memang marasing sian hasomalan ni Jahudi di peristiwa pamiahion on, ima : bagas n i si Simon na huliton hian, Betania dohot sada parompuan na margoar si Maria. Sian sudut tradisi, tolunsa on ndang layak gabe inganan ni peristiwa na songon on balgana.

3)    Ayat 4 – 6 : Adong ma tubu reaksi sian sahalak sisean ni Jesus na margoar si Judas Iskariot. Laos ibana do memprovokasi angka sisean na asing, jala ndang boi diantusi angka sisean ni Jesus na masa i (bnd. Mat.26:6-13; Mark. 11: 1-10). Ala didok do arga ni miak i arga tolu ratus hupang, bahen silehonlehon nian tu angka na pogos. Sai songon na parasiroha tu na pogos do si Judas on, sai hira jolma na sari di na marhahurangan. Dasor ni sogo ni rohana ndang apala marpardomuan tu tradisi ha-Jahudion, alai ala pertimbangan ekonomi do. Miak Nardus (bhs. Indonesia: Alabaster, Narwastu) mansai arga situtu do i, molo dietong argana  300 hupang (bhs. Indonesia: dinar) upa ni sahalak buruh di Palestina saleleng 300 ari. Molo Markus 6 : 37; holan 200 dinar pe nunga sungkup  mangalehon 5000 halak sahali mangan. Lapatanna, nunga boi taida nuaeng, arga ni  miak Nardus na niusehon si Maria tu pat ni Jesus. Disada sisi boi do hatop antusanta muruk ni si Judas dohot angka siseanna, Marhite miak i nungaboi torop angka na pogos tarurupi. Nuaeng  na gabe sungkunsungkun ima; Toho do si Judas naeng manarihon angka na pogos ?, manang motivasi na asing do dipingkliran nasida ? Sasingtongna ndang apala halak na pogos na rumingkot di rohanasida, alai rohanasida sandiri do na so boi manjalao pambahenan ni parompuan i jala so mampu mangantusi pardomuan angka peristiwa naung niida nasida dohot sitaonon na naeng adopanNa, ndang n apogos disarihon si Judas, alai panangko do ibana.

4)    Ayat 7 – 8 : Adong do tolu pokok penting na naeng dohononna dison, ima : Diondolhon Jesus do hinauli ni pambahenan ni parompuan i (the nobility of her deed); Molo sian gogo ni arta laho manuhor miak na arga i do ndada boi pangasahon si Maria na tardok na pogos di luat Betania na tardok luat ni angka na pogos. Molo menurut angka penafsir ndang boi dapot hatorangan sian dia do hepeng ni parompuan i manuhor miak na arga i. Alai boi ma dohononta. Ala dipahibul parompuan i do rohana dohot ngoluna paradehonsa. Molo sahalak na pogos paradehon miak na songon i argana, tontu do na ummarga do di ibana Jesus sian nasa na agong di ngoluna. Pandohan “na uli” dison ima terjemahan ni hata Gorik na marlapatan : estesis sekaligus marlapatan etis. Ndang holan uli (estesis), dohot do denggan (etis).

Tongtong do adong na pogos ditongatonga nasida, alai Jesus ndang manongtong rap dohot nasida; Ndang na naeng patuduhon ketidakpedulianNa tu angka na pogos hataNa on. (bnd.Luk4:19-19; Mat.19:21), Naeng diajari Jesus do angka siseanna i taringot tu na mangurupi angka na pogos. Hapataran holong ni roha ni Debata do molo olo hita mangalehon rohanta mangurupi angka na pogos. Alai binsan sadihari dope rap nasida dohot Jesus asa diparhaseang i laho patuduhon holongna tu Jesus. Lapatan ni pamiahon songon paradehon hamamate ni Jesus, manang mambahen adat pananomon do tu Ibana. Nian ndang mate tarsilang dope Jesus di tingki hatiha ni ayat on, alai Jesus patuduhon gombaran patujolo ni adat pananomon tu Ibana di na ro tingkina mate tarpajal Ibana. Somal do di adat ni halak Jahudi mamiaki marhite miak na hushus tu bangke ni halak naung jumolo monding songon sada pangaradeon tu pananomon (Mark 16:1) dohot na mamiahi sahalak malim dohot raja na pinabangkit. Na pinasangap ni parompuan i Tuhan Jesus marhite pangusehonon miak i (songon patuduhon hasangapon (pasingkop;menggenapi) ni Jesus songon Malim, Raja na naeng mangadopi hamatean manaluhon sorop ni sibolis nang hamatean i). Pangoloion ni Jesus tu Debata sahat ro di na manaon jal amate di hau pinarsilang, ido hagoghoon, huaso, dohot hamuliaonNa. Jala ima na so dapot niantusan ni angka sisean di pambahenan ni parompuan i. Jala mungkin do parompuan i sandiri pe ndnag songon i bagas diantusi ibana lapatan ni pambahenanna. Holan ketulusan ni rohana do mangonjar ibana patupahon i. Hape di na so pamotoanna nunga seolaolah dohot parompuan i patupahon pelantikan ni Jesus jala huhut mengakui manang mamparhatutuhon ulaon ha-raja-on dohot ha-malim-on ni Jesus. Ido barita nauli didok Jesus dison. Gabe ingoton ni jolma do i di ganup tingki dohot inganan adong masa parbaritanaulion. Diistilahkan sahalak penafsir do on “in memory of her” (dibagasan parningotanhu di ibana)di hata Gorik : anamnesis; mengingat, memorial, mengenang. Maol do tarhalupahon jolma pambahenan ni parompuan i ai dipatuduhon i do sada model na khas; boha hita jolma mangokuhon habalgaon ni hasangapon ni Tuhan Jesus Kristus.

5)    Ayat 12-13 : Bongot do Jesus tu Jerusalem, disambut  natorop do Ibana marhite angka soara olopolop dohot na mambahen ulosnasida, nang angka ranting ni hau tu dalan na binolus ni Jesus patuduhon las ni rohanasida. Alai ala asing do di pingkirannasida taringot tu Mesias jala penyambutannasida i spontan di na sangombas i, huroha ndang apala sian panandaon na tangkas na binahennasida i. Ternyata nasida do muse na marsurak asa diparsilangkon Jesus. Ala ni i , mansai tangkas do marasing na bianhen ni parompuan i tu pambahenan ni angka natorop. AI sian nasa roha ni parompuan i do (manang sian nasa ngoluna) do mamparsangapi Jesus umbahen diusehon miak na hushus i.

     C.      Sipahusorhusoron

v  Lapatan ni mamiahi Jesus di ngolunta di tingki nuaeng ima mamparhatopothon na Ibana sandiri do na gabe raja dohot malim di hita na tuk manogunogu hita dohot angka na pogos marhitehite hita na porsea di Ibana asa tarjou mangurupi angka dongan na dibagasan hasusaan, hamaolon di materi nang di partondion pe. Nunga torop jolma naung mate panggora ni rohana, talehon ma rohanta mangurupi na dua horong na pogos on sian nasa rohanta (pogos di arta nang partondion).

v  Goar ni minggunta ima minggu Palmarum (maremare), naeng dohononna disi ima : maremare laho menyambut barita pambahenan ni Jesus menggenapi (manggohi) ulaon ha-raja-on dohot ha-malim-on i ndada songon na binahen ni angka natorop, alai songon na binahen parompuan i do. Lapatanna ngolunta ingkon hibul pasahathonta tu Ibana, jal aingkon ummarga di hita Tuhanta Jesus asa nasa na adong di hita di portibi on.

v  Andorang so sahat hita tu ari parningotan na balga i, dilehon do tu hita kesempatan merenunghkan songon dia ma tutu panandaonta tu Jesus; songon angka sisean i do hita, manang songon parompuan i ? Naeng ma nian songon parompuan i, na mangalehon hibul rohana manjangkon Jesus. Songon hataridaan ni panjangkononta, jaloonta ma ulaon na badia i dibagasan roha mauliate dohot pangkirimon na mangolu. Marhite penderitaan ni Tuhan Jesus nunga dipaujung sude penderitaanta. Lapatanna molo tung pe adong penderitaanta ala ni Tuhanta, taingot ma na marujung tu hamonangan do saluhutna i. Amen.

BAHAN SERMON MINGGU Palmarum (Maremare) Evangelium, 24 Maret 2013

Pilippi 2 : 5 – 11

Topik : Songon Parrohaon ni Kristus Jesus

A.      Patujolo

Sada sian tujuan ni Apostel Paulus manongos surat on ima laho mangajari dohot mamodai ruas ni huria na di Pillipi asa mulai pahembanghon ragam ni pangalaho na denggan songon halak Kristen. Dijujui Apostel Paulus i do nasida di parngoluon dohot parulaan nasida, papatarhon: Hasadaon (persekutuan), toruk ni roha (kerendahan hati), las ni roha (sukacita) dohot hasatiaon (kesetiaan). Tung gomos do diondolhon Apostel i (sihol ni rohana) asa jumpang di huria i hasadaon. Ala ni porluna mangeahi hasadaon. On do umbahen manang piga hali sai disosohon Apostel i. Diboto Apostel Paulus, molo nunga piga hali sai disosohon Apostel i. Diboto Apostel Paulus, molo nunga mulai adong parbolatbolatan, boi do i hatop mangararati, ujungna manghorhon hasesega di huria i. Ndang lomo roha ni Apostel i molo gabe sursar hasadaon naung denggan i, holan ala ni roha diri (egoisme), Hasangapon na rumar (kebanggaan karena marga, kelompok, dna), dohot na gabe mardingkan alai holan tu dongan (fanatisme kelompok), gariada didok; asa ganup nasida “mamatahon na ringkot di dongan”. Atik pe ndang masuk tu “surat tongosan na manaringoti ajaran (surat kiriman doktrin) surat na tu huria Pilippi on, alai jumpang hita do di surat on sada pengajaran na arga situtu, na tung mansai balga nilai teologina, ima naginoaran “Kristologi”. Ajaran on patuduhon sada cara laho mangeahi sada tujuan, i ma ngolu na so mementingkan diri sendiri; baliksa, manggombarhon sada sifat ni Kristus; ima toruk ni roha, na ingkon dimiliki ganup halak Kristen, molo naeng sahat huria i tu hasadaon. Dipaboa do disi, toruk  ni roha na tutu, songon Kristus naung patutoruhon diriNa. Marhite on, ganup halak Kristen naeng ‘maniru Kristus’ di ngolu dohot ulaonna siganup ari.

B.      Hatorangan

1)    Ayat 5 – 8 : Sipaingot asa maniru Kristus dibagasan ngolu siganup ari. Dipatorang di ayat on, songon dia Kristus i na patutoruhon diriNa, na so mampartahanhon status-Na, na so mementingkan diriNa, asa dohot halak taruli las ni roha. Dison, diajarhon jala diondolhon do ‘toruk’ ni roha na ingkon “dimiliki” ganup halak Kristen i, molo naeng terwujud hasadaon di tonga ni huria. On do didok:

Ø  Atik pe rupa  ni Debata di Ibana, ndada songon na didobo dirajumi Ibana tudosna i tu Debata. Andorang so jolma Kristus i, dos do Ibana dohot Debata dibagasan ‘ha-Debataon-Na’ (hakekat dohot kenyataan). Dung gabe  jolma Ibana, rade do Ibana maninggalhon (mananggali) ha-DebataonNa i, asa boi Ibana gabe pasupasu tu jolma na di portibi on.

Ø  Dirumari do diriNa (ay 7). Molo dirumari diri-Na, ndang na gabe mago ha-Debataon-Na, alai sai penggunaan hak dohot hasurunganNa i do, songon Debata. Saleleng di portibi on, dipatupa Ibana do godang halongangan dibagasan huaso ni Tondi Parbadia dohot ala parsuruon ni Ama i.

Ø  Disolukhon rupa ni hatoban (ay.7). Ndada holan songon jolma situtu Ibana, alai dibagasan hajolmaon-Na i dipapatar Ibana do rupa ni hatoban. HajolmaonNa i gabe dalan laho papatarhon diriNa gabe ‘hatoban’ ni  sude jolma na di portibi on (pat. Joh.13:1-17). On patuduhon na olo do Ibana songon ‘hatoban’ ,mamuri pat ni angka siseanNa i.

Ø  Gabe suman tu kolma do Ibana (ay.7). Dibuat Ibana do rumang ni jolma gabe bagian ni rumang ni ha-Debataon-Na. Dua ‘kodrat’ gabe menyatu di diriNa, gabe Debata-Jolma Ibana (Allah-Manusia, bnd. Joh.1:14; Rom 8:3; Gal.4:4; 1 Tim.3:16; Heb.2:14).

Ø  Jala rumang ni jolma dapot di Ibana (ay.7). DI na binuatNa i rupa ni jolma di diriNa, dibagasan (jala marhite) rupa ni hajolmaon i ma Ibana ro tu portibi on: dibuhai sian bara ni pinahan sahat ro di Dolok Golgota, jala hea do Ibana marsangap di dolok marhite pamatanghajolmaonNa i. Molo di jolma pardosa i; jolma na biasa do Ibana, ndada boi diida nasida Anak ni Debata do Ibana. Alai molo di angka na porsea i, tung tangkas do diida mata ni haporseaonna ha-Debataon-Na i atik pe dibagasan “pardagingon” ni hajolmaonNa i.

Ø Dipatutoru do diriNa (ay.8): ima sada sifat na mambahen sasahalak tongtong unduk tu atasanna, alai (huhut dibagasan tingki na dos), rade laho manghobasi halak na ditoruna. Songon i do Tuhan Jesus, saleleng di portibi on Ibana, tangkas do dipatuduhon pangoloionNa tu Debata AmaNa i, alai huhut dipapatar Ibana do nang haradeonNa manghobasi tu ‘penguasa manang pamarenta’, tu halak na berwenang di bagas joro, nang maradophon natorasna pe. Gabe hatoban ni sude jolma do tahe Ibana, termasuk nang angka musuna (Mat.20:28; Rom.15:3).

Ø Na gabe pangoloi do Ibana, sahat ro di na mate (ay.8). Pangoloion-Na tu Ama-Na, patuduhonon na olo do Ibana patutoruhon diri-Na. Unduk do Ibana di pangoloionNa i sahat ro di na mate. Ala ni pangoloion-Na i do Ibana gabe mamolus hamatean i.

Ø Na gabe pangoloi do Ibana, pola tung ‘mate tarsilang’ (ay.8). Songon dia bentuk ni haunduhon dohot pangoloionNa i tu AmaNa, ndang holan dipatuduhon marhite na mate, alai ingkon mate tarsilang. Rade mate diparsilangkon. Olo mate di hau pinarsilang. Hape, hamatean na songon on, ima hamatean ala ni uhuman, ala ni hajahaton ni sasahalak, na mambahen ibana sandiri maila, terhina jal atercela. Sandok, mate di hau pinarsilang , i ma sada bentuk hamatean na sai dipasiding jolma ala dianggap (dirajumi) hamatean ni parjahat na sumalin, hamatean na terkutuk, na hona bura. Hamatean na dipatupa holan tu angka jolma parjahat situtu,m naung tarbuang sian tonga ni  masyarakat umum. Tu hamatean si songon on, unduk jala mangoloi do Tuhan Jesus, atik pe so marsala Ibana. Tu  hamatean di hau pinarsilang i, dipatutoru do diriNa. Diundukhon do i, dijalo Ibana do i. Diparade do diriNa tusi. Rade, olo Ibana manuhuk, mamorsan silang na tu Ibana, atik pe sasintongna silang na tu jolma di portibi on do silangNa i.

2)      Ayat 9 – 11 : PemuliaanNya oleh Allah Bapa. Allah sangat meninggikan Dia dan mengaruniakan kepadaNya nama di atas segala nama, dan segala yang ada bertekuk lutut kepadaNya dan mengaku bahwa Yesus Kristus adalah Tuhan. Tuhan meninggikan Dia ke tempat yang paling tinggi. Karena Dia merendahkan diriNya, Tuhan Allah meninggikan Dia. Tuhan Allah meninggikanNya sampai ke tempat paling tinggi. Jika di atas dikatakan, mengosongkan diri dan merendahkan diri adalah tindakan yang dilakukan Yesus Kristus terhadap diriNya sendiri, meninggikan dan menganugerahkan adalah tindakan yang dilakukan oleh Allah Bapa terhadap Yesus Kristus karena ketaatanNya.

C.      Sipahusorhusoron

I.          Marhite tondina i, nunga dilehon Debata tu hita sihol ni roha laho mangoloi angka patikNa jala huaso laho mangulahonsa. Ala ni, tama sude jolma mangulahon i dibagasan las ni roha. Asa saut i mardalan marhite hita songon halak Kristen, naeng ma hita mamangke huaso ni Debata mangalehon tanggapanta tu hhuaso ni Debata naung sahat tu hita, asa boi jumpang hita hagogok ni ulaon ni Debata di ngolunta be.  Ingkon ulaonta do na marpardomuan tu haluaonta be mardongan biar dohot lomos ni roha, i ma unduk tu parenta ni Debata di ngolunta. Tu hangoluanta do lomo ni rohaNa i. Ala ni i naeng dibagasan parsitutuon hita laho pasauthon i.

II.          Dipartingkian on, lumobi di tonga ni huria, lam tahasiholi do hasadaon dohot parsaoran na lam tu toguna. Ala ni, naeng lam tangi huria i di poda taringto tu hasadaon on, ima hasadaon na hinalomohon ni Kristus. Ai molo adong parbolatbolatan, manang  gabe tubu ‘perpecahan’, na mangalo Kristus i do i. Sipatujoloon do pamingkirion dohot usaho na mangharingkothon hasadaon, alai hasadaon dibagasan holong na sian Tuhan i. Holong  na songon on do na boi patoguhon hasadaon ditonga ni huria i.

III.          Panandaon di asi ni roha ni Debata naung sahat tu  hita be naeng lam  mangonjar rohanta patuduhon asi dohot holong ni rohanta maradophon donganta, halak na asing di luar ni dirinta. Domu tu son naeng padaoonta; roha diri, naung mangalului kepentingan diri sandiri, ginjang ni roha, ala angka on do na jotjot sibonsiri ni parsalisian, na manegai tu hasadaon. Porlu lam pahembanghon “cara berpikir na positip” na didasari kesadaran “ na so tarbahen hita laho pasauthon ulaonta ia so ala pangurupion ni donganta’. Naeng lam ‘terbuka’ hita laho mamereng kepentingan dohot kebutuhan ni donganta be. Lam hembang pangantusionta di  ‘kesalingketergantungan’

IV.          Maniru Tuhan Jesus di na patutoruhon DiriNa dohot pengorbananNa. Dibagasan usaha na ‘maniru’ ima ruas i  marsiajar mandalani ngolu on. Tu proses on, ingkon rade manang terbuka do hita (songon ruas ni huria manang parhalado), maniru Kristus. Ndang tingkina be patujolohon ‘ambisi pribadi’ manang ‘kepentingan kelompok’, alai naeng ma ganup ‘dibagasan toruk ni roha patuduhon panghobasionna be asa marsangap Debata marhite ulaon dohhot ngolunta. Songon goar ni minggunta Minggu Palmarum (maremare); asa tarimangrimangi panaonon ni Tuhan Jesus. Haoloon laho manuhuk angka parmaraan ala ni hasintongan dohot na patutoru diri  tu angka dongan jolma, gabe sada panjouon ni angka siihuthon Jesus Kristus. Taparade ma rohanta laho manjangkhon Kristus sipalua i. Amen.

BAHAN SERMON EPISTEL, 17 Maret 2013-03-08 Minggu Judika (Luluhon ahu ale Jahowa, psalm 43:1a)

Debata Na Manogunogu Hita

Jakobus 5 : 7 – 11

a.       Patujolo

Surat Jakobus on tarmasuk do na ginoaran surat-surat hatopan (umum) na sian mulana ditongoshon tu halak Kristen na adong di sadasada huria (jemaat lokal) alai na laos manghamham muse dohot angka halak Kristen na adong di luat parserahan (diaspora). Nunga adong di tingki i angka halak Kristen na marharoroan sian ugamo Jahudi na tinggal di luar Palestina. Halak Kristen on ima na marserak dungkonsa masa pangaleleon tu halak Kristen, jala pola mate martir si Stephanus ala ni haporseaon di Tuhan Jesus (Ul.Ap.8:1). Tangkas do boi idaonta di bona ni surat Jakobus on na mangondolhon asa tongtong marbenget ni roha halak Kristen i nang pe mangadopi pangunjunan dohot haporsuhon ala ni haporseaonna. Disude buku Jakobus on taida do songon dia hubungan ni haporseaon na polin i dohot pangulaon na bersifat praktis: haporseaon na marhatauon (tahan uji; 1:2-10), hubungan ni haporseaon na mangolu dohot pangulaon (1:19-27), haporseaon i ingkon tarida di pangulaon na aktif, ndang mate na so marpangulaon (2:14-26). Dibagian panutup (5:7-20) diondolhon Apostel Jakobus do asa ngolu ni halak Kristen i naeng ma marhabengeton dohot marpanghirimon di hamamasa ni haporsuhon dohot pangunjunan huhut sai tongtong manghajugulhon ngolu na martangiang (5:13-20).

b.      Hatorangan

1)      Ayat 7-8 : Habengeton dohot panghirimon na mangolu

Digombarhon Apostel Jakobus do habengeton i songon pangalaho manang sikap na jumpang di sahalak parhauma na benget mangula di haumana huhut marpos ni roha di Debata na manongos udan di tingkina asa denggan tubu suansuanan i jala marparbue mangalehon parbue na tau palashon rohana di halojaonna mangula. Tutu ingkon marsitutu do mulaulaon pola ingkon manaon udan dohot las ni ari jala ingkon sabar do paimahon tingkina laho manggotil parbue ni hauma i. Sipata boi do songon na ngolngolan panghilalaan ni na paimahon jala boi do halak ndang sabar paimahonsa jala ujungna gabe ditadinghon ma ulaonna. Digombarhon Apostel Jakobus do di ayat 8 on, nunga  jonok ari haroro ni Tuhan na paduahalihon i (Parousia) laho manguhumi jolma hombar tu parulannabe jala halak na dangol na porsuk dohot na tertindas paluaonNa sian sitaonon dohot haporsuhon . Nunga pola jongjong dijolo ni pintu Panguhum i, jala diondolhon do asa jumpang kesabaran dohot sikap na marpos ni roha paimahon andigan ma haroro ni Tuhan i.

2)      Ayat 9: Unang marungutungut jala marganggu ni roha. Mangihuthon si Jakobus, ia halak na ganggu, ima halak na so marpos ni roha, mura dipalindaklindak jala dipahuturhutur alogo tudos tu gamulbang ni laut jala halak na sai mardua roha na gaor do i di saluhut angka dalanna (Jak.1:6-8). Halak Kristen naeng ma unang sai bobonosan rohana jala unang sai marungutungut alai ingkon marpos ni roha ma paimahon jala sian serep ni roha pasahathon sude angka holso dohot ponjot ni rohana tu Tuhan i. Ingkon pos situtu do rohanta tu Tuhan i, ai Ibana do na tuk paturehon saluhutna i di haroroNa di ari paruhuman i. Ndang jadi hita ganggu ai na tigor jala sintong do uhum ni Tuhan i. Ndnag adong na lias manang na malua sian pertanggungjawaban di angka parulanna be. Ala ni i unang ma marganggu ni roha manang patujolohon lomolomo ni rohana jolma, alai naeng ma rade pasahathonsa tu Debata paruhum na tigor i.

3)      Ayat 10: Habengeton songon si Job. Hata “Habengeton”: ketekunan (hata Gorik: hupomone), na marlapatan sikap na marhatauhon jala na manahan mangadopsi sitaonon, pangunjunan dohot hasusaan na mansai borat alai hot jala tongtong togu haporseaonna tu Debata. DI surat Jakobus on tung diondolhon asa tongtong marbenget ni roha nang pe dibagasan haporsuhon manang sitaonon. Dipatudos do habengeton i martiruan tu ngolu dohot haporseaon nang ketabahan ni si Job, sada halak na sai tongtong marbenget ni roha mangadopi ragam ni pangunjunan, sitaonon dohot parungkilon. Benget do si Job manaon jala ndang madabu ibana tu na mngulahon dosa nang ro pangunjunan tu ibana sian donganna, sian sibolis dohot nang sian tunggane boruna sandiri. Halak na porsea di Tuhan i mampu marlas ni roha jala mandok mauliate tu Debata nang pe diadopi sitaonon nna dokdok jala sai manahan jala marhabengeton ala gogo dohot asi ni roha ni Debata dipangasahon di ngoluna.

c.       Sipahusorhusoron

ü  Marpanghirimon dohot marhabengeton; apala ido tanda ni halak naung tutu marhaporseaon di Tuhan i. Ngolu na sai manghirim patauhon hhita marlas ni roha jala marsitutu mulaulaon di ngolunta saleleng hita di portibi on. Sadalan do na manghirim dohot na marhabengeton dohot marpos ni roha. Na mangolu do halak na porsea i marpanghirimon jala tongtong rade paimahon, ndang marganggu ni roha jala ndang sai bobonosan dohot marpandelean alai benget jala manahan dohot marhabasaron do paimaimahon pambahenan dohot sangkap ni Tuhan i.,

ü  Mansai ragam do natahirim di ngolunta on, jala ala ni panghirimon i gabe marhabengeton hita mangula angka ulaonta songon sahalak parhauma na sai marlas ni roha managam gotilon parbue ni ulaonna. Naeng tongtong hita marhabengeton di nasa ulaonta jala pos rohanta di asi ni roha dohot pangurupion ni Tuhan i.

ü  Haporseaonta ingkon marpangulaon; aktif jala ndang pasif na holan bersifat menunggu songon pardabu ni udan sian langit. Alai haporseaon ni halak Kristen ingkon tarida di ulaon na aktif ima haporseaon na mangolu dohot na marpangulaon. Ai na mate do haporseaon i molo so marpangulaon (Jak.2:17 2:17 Haporseaon i pe songon i do: Anggo so adong pangulaonna, naung mate do hadirionna). Ala ni i, ngolu ni halak Kristen ndnag sae holan na holsoan, sai bobonosan di ngoluna alai na rumingkot naeng marsitutu mulaulaon sian bulus dohot las ni roha. Tapasiding ma hamalason dohot sikap hidup apalagi na marsigantung tu “nasib’ manang “sibaran” songon ompunta najolo uju di hasipelebeguon i dope nasida. Sai tongtong ma hobas jala rade hita mangula angka ulaonta, marhabengeton huht ,marlas ni roha manghirim dibagasan Tuhan i. Asa songon Minggu Judika on mandok tu hita : luluhon ahu ale Jahowa; berilah keadilan kepadaku ya Allah; tapangiar soaranta tu Ibana na tuk manogihon mulak angka na marungkil, gabe marlas ni roha. Amen

BAHAN SERMON Parhalado , 17 Maret 2013 Minggu Judika (Luluhon ahu ale Jahowa, Psalmen 43 :1a)

Topik  : Debata manogihon mulak angka na marungkil

Psalmen 126 : 1 – 6

a.       Patujolo

Ia buku Psalmen ima buku na marisihon angka ende nang angka tangiang. Di turpukta on termasuk ma na marrumang tangiang mangido haluaon situtu sian habuangan tu haluaon dohot hangoluan (from death to life). Laos jotjot do dirajumi ia Psalmen 126 on songon ende hananangkok (Psalmen jenis ziarah), laho pabotohon hinadangol ni ngolu na holang sian Debata ala tarbuang sian jolo ni Debata tu habuangan. Gabe siparengkelengkelan nasida. Ndang mararga ngoluna di tonga ni angka bangso.Hansit ma parniahapan nasida huhut tariluilu ala dao sian Debata. Alai dibalik ni i, laos on ma na uhir di roha ni bangso Israel, ima haporseaon dohot pos ni rohanasida di tingki mamolus ragam hamaolon, haporsuhon nang mangadopi hamatean pe tahe. Laos on do nian naeng uhir tu rohanta nang nuaeng di sandok gulmit ni parngoluonta, gulmit ni parhuriaonta nang di parbangsoon pe.

b.      Hatorangan

1)      Ayat 1;  Ditogihon Jahowa do mulak angka na tarbuang sian Sion. Dibagasan na manogihon mulak i, laos disi do Debata patuduhon huasoNa huhut “memulihkan” hajongjongan dohot hadirion ni bangso i naung mago hian gabe jumpang jala nidapot, sian naung ginomgoman ni huaso ni portibi on hian gabe mulak tu huaso ni Debata, sian bangso naung tartaban gabe bangso naung pinalua. Ndang tarantusan nasida songon dia proses na pinaluana i nasida. Sai songon na marnipi, alai ndnag na marnipi (we were like those who dream). Diluar ni utokutok ni bangso i do Debata paluahon nasida. Songon na marnipi, ala mangihuthon pambahenan nasida, ndang tagamon jaloonna  be asiasi sian Debata. Holan na manjalo do tarbahen nasida. Tung so parsidohot do bangso i di proses dohot parsaut ni haluaon i.

2)      Ayat 2-3 ; Gabe gok parengkelan ma pamangan nasida, marolopolop dilanasida. Martaringot be nasida uju ditongatonga ni angka parbegu. Ndang adong na boi tarbahen bangso i, ia so holan mangolophonsa. Gabe diparhatopot nasida ma tutu, godang ma tongon na binahen ni Jahowa dinasida. Ala ni i ndang tarbahen nasida sai hohom jala mauhom ngolu ni angka naung pinalua. Alai sabalikna minar do bohina, las rohana, mengkelengkel, marolopolop, martaringot, sai ido na manggohi ngolu ni na porsea.

3)      Ayat 4; Hataon patuduhon pamotoan na tontu taringot tu hinauli dohot hinabalga ni haluaon i. Dibahen i tubu ma pangidoan sian nasa roha dohot ateate, asa dohot nasida ganup ditogihon Jahowa mulak sian habuangan.  Dipatudos do hamumulak ni na tarbuang i songon angka sunge di tano tungkan dangsina, (dangsina : selatan, sian hata heber; negev: kering yang sering mengarah selatan di Palestina, na maol dapot aek) tung pe songon i keadaanna tarpaulak Debata do nasida sian habuangan i tu haluaon na tutu situtu. On ma sada panindangion haporseaon nasida, na tuk marnida sada parnidaan na imbaru di huaso dohot habalgaon ni Debata.

4)      Ayat 5-6 : dison ma adong jaminan dohot pangapulion sian Debata di haunduhon dohot haoloon ni bangso i mangolophon pambahenan ni Debata. Ndada iluilu ujung ni ngolu ni na porsea, alai olopolop do. Ndada holan di boni sisaburhonon i tuk tatapon ni angka na porsea jala pinalua, alai sahat do tu na marolopolop mangusung angka tibalanna.

c.       Sipahusorhusoron

ü  Taparhatopot ma tangan ni Debata na gok huaso i do paluahon hita. Mudar ni Kristus na badia i do paluahon hita sian gomgoman ni dosa dohot sibolis. Ndang adong tuanta disi. Ai ndang adong “singir” disi, ia so holan asi ni roha ni Debata sambing na tuk paluahon hita, jala tangkas taolophon nasa pambahenanNa. Ala ni i ingkon sian nasa roha ma hita pasahathon ngolunta tu Ibana, tanda naung tangkas taolophon haluaon na sian Tuhanta, jala hapataran ni naung tahilala ndang dibagasan gomgoman ni dosa dohot sibolis be hita.

ü  Ndang mauhom angka naung pinalua, gopas do ibana marpanindangi, marbarita di angka pambahenan ni Debata. Gabe angka parbarita sisungkunon do hape angka naung pinalua. Unang  gabe na dila hita jala padiladilahon. Ingkon gabe pardila na pita do hita, mamboan pujipujian di Debata jala olopolop di donganta.

ü  Sada tanggung jawab ni hita naung pinaulaNa hita marhitehite Jesus Kristus i ima; naingkon tong do hita manabur, gariada tahe mardongan iluilu, dungi manggotil ma hita sogot. Alai unang asal disabur, alai ingkon sian nasa roha do, dibagasan  habengeton, haunduhon dohot nasa hapadoton. Tong do ingkon padot hita pausungusung boni sissaburhononhon. Idaonta do dia hapeahan ni boni na dumenggan. Ingkon dibagasan tangiang na rosu hita jala padot mangarangguthon asi ni rohaNa. Ndang peak songon i tibalan i laho usungon. Alai tu angka na marpadot manjamothon haluaon i, dilehon Debata do tu hita ‘jaminan’ olopolop mangusung tibalan i.

ü  Topik di Minggunta ima : Debata manogihon mulak angka na marungkil; paboa molo sian hadirionta do; jolma pardosa do hita, jala marungkil do hita binahen ni dosa i, jala jambar ni dosa ima hamatean na salelengnilelengna. Alai ala asi dohot holong ni roha ni Debata sambing do tu hita (Joh. 3:16 Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.) umbahen dilehon AnakNa na sasada i , ima Jesus Kristus laho manobus dosanta; asa partohap hita dihangoluan na salelengnilelengna i. Jala tadok ma tu Debata songon goar ni minggunta Minggu Judika ; Luluhon ahu ale Jahowa (berilah keadilan kepadaku). Amen !

JAMITA TU PARTANGIANGAN

Sihol ni roha tu Debata

Psalmen 63 : 1 – 8

1)   Uju di halongonan. Na menghindar do si Daud laho tu halongonan ala sai dilele raja Saul ibana (1 Sam 23 : 14 – 15). Dipartabuniannai martangiang ibana tu Debata jala tung tangkas do tarida sihol ni rohana tu Debata, songon halak na masihaholongan naung leleng ndang pajumpang. Hombar tusi gabe adong do penafsir manggoari turpuk on tangiang manogot ni si Daud. Alai anggo ahu ale Jahowa, sai tu Ho do ahu angguhangguk, gari sogot manogotna i nunga dijumpangkon tangiangki Ho (Psalm 88 : 14). Dipatudos si Daud do sihol ni rohana tu Debata songon tano na dangaron na masihol di haroro ni aek. Tung mauas situtu do ibana naeng torus pajumpang jala solhot/mian di Debata. Didok ibana do muse; songon pangkalungunhon ni ursa di angka guluan, songoni panghalungunhon ni tondina di Debata (Psalm 42 : 2). Ai molo mauas ursa, tung so tartaonsa do so ingkon minum. Ndang parduli i tu bahaya na mengancam, asal ma boi ibana minum aek. Tung so boi do adong na mangambati ibana pajumpang tu Debata ala sihol ni rohana.

2)   Ditangiang ni si Daud on laos tarida do panindangion (kesaksian) na mandok: Na so boi ibana mangolu molo so rap dohot Debata, i do na gabe hosa di ibana. Ido na nidokna di ayat 2, molo so pajumpang ibana dohot Debata, gabe songon tano na dangaron (tandus) na so boi panuanan ni manang aha. Dihatindangkon si Daud do tung so marguna ngoluna, jala ndang adong na boi ulaonna molo so rap dohot Debata. Hombar do i tu pandohan ni Tuhan Jesus. Ai ndang tarula hamu agia aha, anggo so mardongan Ahu (Joh 15 : 5b). Songon ranting na so boi mangolu dohot marparbue molo so lohot tu hauna. Bolas tapadomu tu endeonta no.309: Raphon Tuhan Jesus i, pungka ulaonmu.

3)   Ditogutogu turpuhon do hita asa tapahehe parsaoran na rosu (keintiman) tu Debata, i ma na sai torus masihol naeng pajumpang dohot Debata. Pataridahonontai ma i di angka siulaon dohot di hata pe sai jolo pajumpang (marsaor-martangiang/berkomunikasi tu Debata). Ingkon tutu situtu tapataridahon kebergantungan tu Debata, ndang marsasahali, alai manongtong martangiang. Jala tangiang i na parjolo jala na utama/na rumingkot sian ragam ni na ringkot.

4)   Boasa ingkon rosu (intim) hita tu Debata?

a)      Ai lobi sian na hinaholongan ni roha do Debatanta i (Ai dengganan do asi ni roham sian hangoluan; ayat 4). Sude do hita manghasiholi hangoluan (agia lapalapa asal ma di toru ni sobuon, agia malapalap asal ma di hangoluan, ninna halak Batak). Tung mansai ringkot do hangoluan i. Alai Debata, andul sian hangoluan dope, ai Ibana do Bona ni hangoluan i. Jotjot do on ndang tasadari jala jotjot lupa paboa Debata do Bona ni hangoluan. Ai loja do hita jala mangula sian nasa gogo, pikiran nang ro di potensi na adong paurusurus hangoluan on so padohot Debata. Alai anggo si Daud, jumolo do pasaorhon dirina tu Bona ni hangoluan i.

b)      Dung dipaherbang si Daud tanganna tu ginjang martangiang tu Debata, pintor dapotsa do asi ni roha ni Debata.

-       Mahap ma disi tondingku, songon na mangan tabotabo dohot na talmis. Dapotsa ma las ni rohana, butong tondina, puas pangkilalaanna. Ai molo nunga las roha jala puas pangkilalaan, tontu do berkobar-kobar semangat laho mangula siulaon. Sian i ma ro pasupasu pardagingon.

-       Jala las roha ni bibir ni pamanganna mamujimuji Debata. Sian pamangan do haruar hata na mangalea, dohot hata na mamuji pe. Alai halak na sai pasolhot dirina-na sai patujolohon tangiang/penyerahan diri tu Debata, gabe bolong/dao do sian pamanganna angka hata na so gabeak. Holan mamuji Debata nama pangkeonna pamanganna i.

-       Ala sonang ni rohana, gabe didok ibana do: Molo sapala diingot rohangku Ho di atas podonanku, laos torus sabornginna i marhusari ahu taringot tu Ho. Halak na solhot tu Debata pintor sonang jala sinok do modom. Torop jolma na so boi sinok modom ala sai dipaloas persoalan ni ngoluna mandondoni ibana. Gabe laris ma obat tidur. Hape mura do ubatna, ima ; pajonok, pasolhot, pasihol roham tu Debata.

-       Didok muse (ayat 8); Ai Ho do manjadi pangurupion di ahu; jala tarbahen ahu marolopolop di linggom ni angka habongmu. Ai molo solhot hita tu Debata, ise be alonta (Rom 8 : 3). Molo ro pe alonta, Debata do lombulombunta, jala Hatana gabe podang, sinjata andalanta. Debata do gabe rajawali di hita, na manabunihon hita di toru ni habongna, gabe ndang tarhahua manang aha hita. Marhite tangiang boi do ndang mamintor malua hita sian angka persoalan di ngoluon, alai marhite tangiang, marhite na sai tapasolhot dirinta tu Debata, gabe dapotan gogo ni daging dohot tondi hita mangadopi dohot manghamonanghon angka persoalan ni ngolu i. Antong, tung pasolhot ma dirim tu Debata Bona ni hangoluan i, hasiholi Ibana ganup tingki, asa sonang ngolum. Amen.

BAHAN SERMON EVANGELIUM, 10 Maret 2013 MINGGU LETARE ( Marlas ni roha ma hamu, Jesaya 66 : 10a)

Topik : Las ni roha dihamumulak ni halak pardosa

Lukas 15 : 11 – 32

a.       Molo tajaha diturpuk on, na marumpama do Jesus laho mangadopi angka Parise dohot Sibotosurat, na marungutungut ala ro angka sijalobeo dohot halak sipardosa solhot laho manangihon hata ni Jesus (ay.1). Pola didok; “Dijangkhon on do angka pardosa, pola sapanganan Ibana dohot nasida” (Ay.2). Dungi dipaboa Jesus ma umpama taringot tu birubiru na lilu (ay.4-7), dohot taringot tu hupang na so tarida (ay.8-10). Marudut ma muse tu umpama taringot tu anak na mago (ay.11-32) ima turpuk on. Sude umpama i patuduhon songon dia sikap ni Tuhan Debata tu angka jolma sipardosa.

Diturpuk on dipatuduhon Jesus do ise do angka umat baru dohot anggotana di harajaon ni Debata. Ai di harajaon banuaginjang i na pasidohot do Debata sandiri mangatur parngoluon ni hajolmaon dohot manontuhon angka ise parsidohot tu harajaonNa. Di umpama ni Jesus taringot tu anak na mago na diturpuk on, tangkas do diondolhon hinaringkot ni respon ni jolma i molo “masuk tu harajaon ni Debata”. Di parmulaan ni Evangelium Markus pokok utama ni poda ni Jesus ima, “pauba hamu ma rohamuna, jala haporseai hamu ma barita nauli i!” (Mark.1:15). Dungi diumpama ni Jesus di jamita on, ima mangondolhon hinaringkot ni na paubahon roha laho masuk gabe anggota umat ni Debata. Ai diturpuk on, ndada holan mangondolhon kebaikan dohot kemurahan ni sada ama i, alai diondolhon do ringkotna anak sianggian i menyadari hotoonna jala rade manguba cara hidupna. Jamita paubahon roha jotjot do ndang palashon roha ni na umbegesa, ala ingkon okuon do hasalaan. Marlapatan disi, nunga kehilangan  muka hita jala mangokui haroaonta secara moral. Alai tangkas do dipatorang Jesus halak na so rade manjalo keadaan i, ima halak na so hea marparsaoran na mangolu dohot Debata. Taingot tangiang ni halak Parise dohot si jalobeo na di Bagas Joro (Luk.18:9-14)

b.      Molo tauji mamereng umpama ni Jesus on sian marragam sudut, ndaa holan naeng menyadarkan angka Parise dohot Sibootosurat, na merasa sok suci, lebih benar dan yang diterima dihadapan Allah, alai dapot do taida, na songon rimpunan isi ni perumpamaan ni Jesus di turpuk jamita on, ima:

1.       Debata Ama na  parholong roha situtu, ai na marholong ni roha do Ama i, tu anakNa na lintun maninggalhon Ibana. Dihaholongi Debata do nang anakNa  na tongtong dilambungNa, na tangkang jala na sombong, ai didok do dirina na tama haholongan ni Amana. Molo mulak angka sipardosa tu hatigoran dohot hasintongan, las situtu do roha ni Debata dohot roha ni Jesus Kristus manjangkhon nasida.

2.       Sada Ama dua anakna. Ro anak sianggian mangido harta warisan manang panjaean sian Amana. Dungi diboan ma i tu pangarantoan jala dipasuda, dipansuasaehon paolooloi hisapna (ay.30). Hape masa do haleaon potir di pangarantoanna i, gabe rapar ma ibana so mangan. Dilului karejo, alai disuru ma ibana marmahan babi, pola gabe sipamgamon ni babi i dipangan ibana. Di tongki i songon kancang panjang do i na margoar “roti Johannes”,  boi do i panganon ni jolma, alai ditingki hapogoson dohot hadangolon do. Jala adong do na mandok, molo nunga sanga dipangan halak Israel sipanganon “chamba” ima tanda naung sadar jala mulak tumanda dirina sandiri. Songon anak na mago i, sadar ma ibana (ay.17) jala mulak tu Amana.

3.       Dung ditanda dirina, ditopoti muse ma dosana. Hape Amana i pe naung manghirim hian do di haroro ni anakna i. Ai dung ro (ay.20), asi ma rohana marnida ibana, hatop ma ditomu, dihaol jala diumma. Ima patuduhon na rade do Amana i manjalo hasesaan ni dosa ni anakna i. Dipatupa muse do pesta na balga, jala dilehon ulos, songon tanda penghormatan, dilehon tintin songon tanda hajongjonganna, kedudukanna na tongtong timbo di jolo ni amana i. Dungi dilehon muse sipatu patuduhon naung jolma na merdeka ibana ndang jolma hatoban be. Sude i sahat tu ibana ala na sadar ibana jala rade paubahon roha huhut manopoti dosana.

4.       Ia anak sihahaan na hot tinggal di jolo ni amana, gabe muruk do, mandok : “Ahu do na tongtong di huta mangurupi ho diulaonmu, satia tu nasa podam, so adong arta na hupasuda, so hea dibahen ho songon i tu ahu, ninna mangapian manang mangihuru tu pambahenan ni amana i tu anggina i. Diapoi amana do ibana didok, “Anaha, tongtong do ho rap dohot ahu jala di ho do sasude na di ahu i” (ay.31). Gabe sadar ma muse ibana jala mandohoti pesta i.

c.       Molo tapaihutihut proses hamubaon ni anak na mago i, pinomat adong ma opat hal na terjadi :

                                 i.            Sadar do anak na mago i di dosana. Kesadaranna diboto “magona” disadari hahurangan na niulana. On do tahap na parjolo di sada halak molo naeng muba rohana. Somalna do natuatua mandok “Ee....., tung so ditanda ho do magom”. Halak na so tumanda magona ndang tagamon olo muba. Anak na mago i sadar, ditanda magona i ma “mahiandu”, marmahan babi, langkat ni indahan ni babi pe ndang tarbahensa mangallang” (ay.15-16)

                               ii.            Imajinasi, dibayangkon ibana keadaan andorang so mardosa ibana (mansuasaehon artana) dohot dibayangkon hasonangan molo mulak ibana muse tu natorasna. “Torop digaji damang” (Ay.17). Molo so hea do sasahalak merenungkan, membayangkan na dumenggan sian keadaan masa kini ni ngoluna, maol do ibana manguba manang paimbaruhon ngoluna.

                              iii.            Keputusan, dibuat anak na mago i do haputusan tu dirina sandiri “Hehe ma ahu” (ay.18). Dipingkiri ibana aha sidohononna, aha alusna. Ima menyerah tu amana jala patuduhon panolsolion ni rohana. Jadi ndang holan hata, alai dihatahon dung i diulahon muse na nihatahonna.

                             iv.            Proaktif, anak na mago i ndang lalap ibana manolsoli sambing di dosana. Ndang madabu ibana tu pandelean. Alai hehe ibana, mulak tu dalan na sintong. Mulak sian parjagalan tumadingkon nasa dosa. Adong do halak na reaktif, gabe mangalo natorasna do ibana. Adong na so parduli di sidangolonna, gabe “minum tuak” do panombosanna. Anggo anak na mago i proaktif do ibana.

d.      Sian turpuk jamita on, na songon sipahusorhusoron ni rohanta (renungan) taboto ma nuaeng :

ü  Ise na mananda dirina marhite na paubahon roha, mulak marhaburjuon di ngolu haKristenon, di ibana do holong ni roha ni Debata Ama i. Nian ingkon tongtong do hita di ganup tingki paubahon roha. AI saleleng di portibi on dope hita tongtong do sai tarela hita tu hisap ni roha, songon anak na mago i. Ai sai taingini do na uli, lomo do rohanta mandai na tabo, menikmati na sonang. Jadi naeng do tongtong sai paubahon roha hita, asa sai imbaru tongtong rohanta, dung i mangolu ma hita di roha partondion, ndang di roha portibi on. Na mangolu  di roha partondion ima na mangulahon na hinaholongan ni Tuhan i, na mangaradoti patikNa na mangulahon nidok ni HataNa, dung i mangolu ma di bagasan Tuhan i.

ü  Ditingki parpudi on, adong do anak na menganggap jala menuntut hak, na mandok tanggung-jawab ni natorasna do ibana, jadi nasa pangidoanna pe ingkion oloan ni natorasna. Pola adong na loja jala maheu di ngoluna ala paolooloi anakhonna i. Di umpama ni Jesus di turpuk on memang, dilehon do kebebasan tu anakna i, diloas laho mangaranto, dilehon arta parjambaranna. Alai na mago anakna i molo dao sian amana, molo dioloi hisap-hisap ni rohana, ndang ditangihon poda ni amana. Jala dipaimaima amana i do kesadaran ni anakna i. “Biar ma dakdanak i, menemukan dirina sandiri”, menyadari ise ibana jala siala kesadaran ima ibana maju, lam berkembang.

ü  Boi do adong songon i sikap ni natuatua tingki on tu anakhonna. Dilehon tu anakna kebebasan. Ndang pola sai ditiroi jam belajarna dijabu, ndang pola diselidiki boha ibana di parsingkolaan. Dao do ibana sian jolo ni natorasna manang ndang sajabu. Jala digohi natoras do saluhutna kebutuhanna di jabu dohot di sikola. Alai sotung dipansuasaehon kebebasan manang holong na nilehon ni natorasna i. Sai diparsintahon natoras na do asa jolma na marguna angka anakhonna. Songon na nidok ni Johan Wolfgang; “Nasa jolma na mangolu na so marguna, ima naung mate na so tingkina”, patudos tu ayat 24

ü  Na sintong do Debata dinasa pambahenanNa. Tapadao ma dirinta sian kecemburuan na palobihu. Diumpama on manuntut do anak sihahaan i tu pambahenan ni amana tu sianggian i. Diida ibana malobihu do pambahenan niamana tu sianggian i sian tu ibana sandiri. Alai na taida di umpama i, nang ibana pe dianju jala dihaholongi Amana i do gabe sude nasida marlas ni roha. Kecemburuan boi do tupa masa songon i di ngolunta. Kecemburuan ni na marhahaanggi gabe masa na saling menuntut hak asa dos dohot abang-adekna. Kecemburuan sosial ala merasa tidak adil, ndang lengkap jala cukup diibana songon na di donganna. Nang pe sasintongna di ngolu ni halak siihuthon Kristus soal kedua do arta portibi on, ndolu porsea jala mangulahon lomo ni roha ni Tuhan i do ianggo na parjolo jala na utama. Kecemburuan boi do menimbulkan malapetaka, mambahen mago hita. Kecemburuan boi do menimbulkan pemberontakan, perlawanan, perkelahian, Alai dihaholongi  Debata do nang na di bagasan kecemburuan i. Asal ma muba rohana dohot do ibana mandai holong ni Tuhan i. Na marhamubaon ni roha  na paimbaruhon diri di jolo ni Debata, ido angka na manjalo pasupasuNa. Amen.