(Tuhan Adalah Raja)
Pangungkapon
22: 12-21
- Huria
ni Tuhanta dibagasan Jesus Kristus. Jotjot do dipasiding halak Buku
Pangungkapon on ala hira sude do mandok; maol antusan isina. Ala i on ma
na rumingkot: “Tuhan Jesus na dibaritahon di Pangungkapon on, laos Ibana
do Tuhan na mangolu jala mangula
najolo nang ro di hatiha on. Boi do tutu godang na maol antusan angka na
disurathon di Pangungkapon on, alai tagamon ndada pola ambatambat i laho
manghilala dohot manghaporseai hangoluan pinatupa ni Tuhan i.
- Di
tingki ni si Johannes (panurat ni Pangungkapon on), hira di sude kota di
propinsi Asia do adong huria. Alai tutu, tardok minoritas do halak Kristen
hatiha i. Dihasomalhon jolma (na so kristen) do uju i parpunguan mangan
dohot minum jala mangihut tusi somal do sahat tu na mabuk suang songon i
ragat do nang parmainanon (seksual). Jotjot do tarrimas angka sipelebegu i
molo so olo angka halak kristen i mangihuthon hasomalannasida.
- Angkup
ni i diadopi haak Kristen do hamaolon siala so olo nasida marsomba tu
Kesar. Ianggo di halak sipelebegu, ndang pola maol nasida manambahon Kesar
gabe debatanasida asing ni angka debatansida naung adong. Mardomu ma i ala
dihilalanasida mansai “marpanumpak tu na uli” pergantian niKesar uju i.
Andorang so bangkit Kesar na imbaru, sanga do porsuk diae angka sipelebegu
i, pinatupa ni angka pegawai na mngkus jala kejam. Alai, dung bangkit
Kesar Roma na imbaru, mansai tegas do Kesar n aimbaru i mengawasi angka
pegawaina asa unang marlomolomo mamongkihi angka penduduk. Gabe mariaria
situtu do roha ni angka penduduk (sipelebegu). I do alana ndang pola
persoalan di nasida manomba Kesar gabe sada debata di nasida. Alai di
halak Kristen, na mangokui jala marsomba sasadasa Tuhan Debata, ndang
mungkin oloan nasida marsomba tu Kesar. DI situasi na songon i gabe
ditafsirhon parhuaso ma i songon pemberontakan tu pamarenta. Adong dua ancaman
siadopan ni halak Kristen di na so olo nasida marsomba tu Kesar. Parjolo;
managam rimas ni pamarenta. Paduahon; hamaolon sian angka sipelebegu (na
mayoritas penduduk) ala so olo sadalan dohot nasida. Asa na borat do
niadopannasida. Asa di tingki keadaan krisis do disurathon buku
Pangungkapon on. Tingki krisis, ala tongon di tingki masa pangaleleon tu
halak Kristen ala ni parsihohotanna. Dilele alai ndang mandele nasida.
- Marhite
na taselami hamaolon na niadopan ni huria i nang panurat ni buku
Pangungkapon on, tagamon ummura do hita mangantusi na dibaritahon ni buku
on. Dohot jempek dohonon, di usaha penafsiran ni buku Pangungkapon on
naeng ma marpartalian tu sejarah gereja. Sejarah ulaon ni Debata di
portibi on nang pangihuthonon ni angka na porsea di Ibanaa di ragam ni
hamaolon nang parungkilon. Tardok laho manogari halak kristen do
Pangungkapon on asa margogo jala marsihohot nasida di sitaonon i manghirim
siteanonnasida, marhite sada jaminan; na bahenon ni Debata do hombar tu
pambahenanna be, jala di tangan ni Debata do penghakiman. Haporseaon na
songon on ma nian borhatborhatta laho mangantusi dohot manghaposi hata ni
Jesus di turpuk on. Ibana na pasahathon hataNa najolo, jala laos ibana na
pasahathon hataNa tu hita ombas on. Ibana na margogoihon huriaNa najolo,
laos Ibana margogoihon huriaNa nuaeng on, ai na mangolu jala mangula do
Tuhanta u di tongatonganta.
- Ay.12-13:
asa tumangkas naintusan ay.12 on, dumenggan molo tatangihon isi ni ay 11
na mandok: “tong ma didatdati siula hajahaton mangulahon hajahaton....
Ndang na marlapatan pandohan on na ditolopi Debata hajahaton, manang asa
ditorushon parjahat hajahatonna. Lapatanna disi ima: “manang ise na
mangulahon hajahaton ingkon jaloonna do upamna. Alai angka na tigor
diulahon ma hatigoranna, dung i idaonna jala jaloonna do hasilna. Molo
dung ditangihon na disoarahon di ay.11 i, marudut ma muse tu ayat 12; “Ida
ma gira ma Ahu ro! Boanonku ma upa silehonon tu ganup (ima tu angka siula
hajahaton songon i nang tu siula hatigoran). Hombar tu na niulana be”. Di ay.13
digoari Kristus do dirina (marhite soara ni Surusuruan i) na Ibana do
Mulana jala Punsuna, Parjolo jala parpudi, Bonana jala Ujungna (Alfa dohot
Omega; huruf parjolo dohot parpudi di abjad Yunani). Dipadimpos haporseaon
ni huria i, ai nunga adong Ibana tagan so si Abraham, jala parsidohot
Ibana manguhumi tano on sogot. Bonana dohhot ujungna ! Dunghon ni i,
dipatuduhon i do na Ibana Tuhan ni sejarah. Na singkop do huasoNa, lobi
sian huaso ni jolma di portibi on.
- Ay.14-16:
di ay.14 jumpang hita “parhatuaon” na papituhon (na parpudi) di
pangungkapon on. Martua ma angka na padaohon dirina sian dosa, na
diumpamahon marhite “na mamuri abitna”. Angka halak na songon i ma na gabe
parjambar di hau hangoluan jala masuk sian angka harbangan tubagasan huta
i, Jerusalem na imbaru i. Dung i, diulahi muse mandok angka siulahon dosa
(21:8), laos ditambahon muse ‘angka biang’. Na nidokna disi i ma angka
halak na ramun. Sude na i (angka na digoari di ay.15) gabe di balian ni
Jerusalem na imbaru i ma i. Di ay.16 didok Jesus, na Ibana haroroan ni isi
ni Pangungkapon on. Mangondolhon paboa “pemberitaan resmi” na sian Ibana
i. Ihut tusi didok “Ahu do urat dohot marga ni si Daud, bintang sipais na
marsinondang”. DI Jesaya 11: 1 dohot 10 disuriranghon do na ro Mesias sian
tungko ni si Isai (Ama ni si Daud). Naeng ondolhonon ni Pangungkapon on do
na naung digohi Tuhan Jesus do naung disuriranghon di padan Narobi i.
Naeng porsea angka huria i paboa Jesus do Mesias naung pinaima ni halak Jahudi.
Gelar na paduahon di ay.16 i ma “bintang sipaias na marsinondang”. Ra na
marpardomuan do i tu Mesias ba nidok ni halak Jahudi di 4 Musa 24 : 17 “Bintang
ni si Jakob”. Digoari Jesus songon “bintang sipaias na marsinondang”. Na
marlapatan Ibana do siboan halaon. Ndad huaso na asing na boi paluahon
tung sasadasa Tuhan Jesus do.
- Ay.17
Didok Jesus “gira ma Ahu ro” (ay.7 dohot 12). Aha ma alus ni angka jolma
na manghaporsea i Ibana ? joujou na marsaor sihol dohot lungun ni roha ma:
“Ro ma ho!” Tondi i do na mangula di huria i, jala digombarhon do huria i
songon “oroan” na manghirim di Jesus, mandok “ro ma ho!” Laho mangantusi
pandohan ni Jesus “gira ma Ahu ro”, ndang pangkeon kalkulator mangetong i,
songon na binahen ni torop halak sian najolo nang di tingki na parpudi on.
Gabe torop halak na bingung. Na hea do tarbarita najolo na ro ma ajal ni
hasiangan on di tgl 9-09-1999 jala pukul 9 hape ndang tutu masa. “Gira ma
Ahu ro”, mangihuthon ukuran ni Debata do i. Na ringkot hadungoonta do
ganup tingki. On ma sikap ni halak na manghasiholi campur tangan ni Jesus
di ngoluna. Diuduti muse: “Sai ro ma na mauas, dijalo na giot roha i ma
aek hangoluan i, dalan basabasa!” Di Buku Johannes jumpang hita do ia “aek
hangoluan” ndada holan di tingki na naeng ro lehonon ni Jesus, alai dohoht do di
partingkian on. Molo songon i, ndang holan sekedar taendehon boti endenta
nomor 539 i, alai nuaeng sian nasa roha dohot tondinta ma songon hataridaan
ni haporseaonta di Ibana: “Sai hutagam do Tuhanku, sai masihol rohangki/
Diharoro ni Tuhanku, songon na nidokna i/ Sai mardongan olopolop huriaM
managam Ho/Maranata ro o Tuhan. Amen, sai tibu ma ro.”
- Ay.18-21:
on ma na parpudi di Bibelta i nang sian turpukta on, laho paingothon hita
sian panimpuli ni Pangungkapon on.
Tudos dohot Buku Pangungkapon on na manimpuli sude angka buku di
Bibel on taringot tu rencana haluaon na sian Debata na dbuhai sian Buku 1
Musa. Siala ni i ma dipaingot manang diparentahon gomos dison asa gabe
perhatian serius na manjahasa dohot na marparhusorhusorhon Hata ni Tuhan. Paingothon
asa unang manambai angka hata naung tarsurat di Buku pangungkapon on, jala
sude Buku na di Bibel i, ima naeng patuduhon ia Bibelta i naung cukup do i
manogunogu joma laho mananda Debata tu haluaonna dohot sangkap ni Debata
di hangoluan dohot pangulaonNa di portibi on. Manambai lapatanna ndang
manghaporseai hasongkalon dohot bisuk ni Debata di nalahopapatarhon
sangkapNa. Apalagi adong na mengklaim naung dipasahat Debata tu sasahalak
na imbaru asa ditambai tu pangungkaponNa di Bibel i, ima sikap ginjang ni
roha, na laho paboahon na so singkop na naung dipasahat jala diajarhon
Tuhan i sangkapNa di Bibel i. Halak na sengaja mangorui angka hata na
tarsura di Bibel i, ima halak na manulak laho unduk totalitas tu Debata na
naung pasahathon dohot papatarhon lomo ni rohaNa dohot tangkas jala singkop
tu pasarisarihon manisia. Tudos do i dt halak na manulak laho mangokui
Debata na berdaulat penuh di hangoluan. Beta ma hita na porsea markomitmen
laho paundukkon dirinta ganup tu Debata marhite haunduhonta di na laho
mangulahon HataNa. Unang lupa asa tongtong marsigantung tu huaso dohot
bisuk ni Debata. Amen.
