Ev: Jeremia 17:
12-18 Ep:
Kolose 1 : 24 – 29
Jahowa Do
Panghirimonta
(Tuhan Pengharapan
Kita)
1) Huria ni Tuhanta na manongtong panggomgomion ni Debata tu hita, disi do
panghirimonta. Nang pe nian dibagasan ngolu on sai adopanta do angka na mambahen
jut roha, na mambahen hansit roha, kecewa. Jala boi do gabe ro tu rohanta na
didia do Debata na manongtong i, songon na mago do. Alai dibagasan trupuk na
paboahon panurirang Jeremia na tongtong sadar do ibana di panggomgomion ni
Debata. Pos do rohana di hagogoon ni Debata i
hot do mangula asa ro ma lumbalumbana tu bangso Jehuda di halelengse
bolon na naeng masa di bangso i. Alai dipahe Debata do halelengse nasida haduan
songon sada bukti ni panggomgomionNa na manongtong i. BahenonNa do sogot bangso
Jehuda gabe marlas ni roha siala Bagas Joro, alai tu joloan ni ari mambahen bangso i mangandungi
jala tumatangis siala ni halelengsena i.
2) Huria ni Tuhanta, saleleng di parngoluon on, ndang dao hita sian hamaolon, arsak
nang panaritaan. Ganup jolma sai adong be do na niarsakhononna, na niholsohononna.
Adong do masa na ditundali, dihianati, ditulak angka jolma na dihumaliangta.
Dipangalaho sisongon, ingkon tiruanta do nabinahen ni panurirang Jeremia.
Dipasahat ibana do saluhut parngoluonna tu Debata na gabe panghirimonna, songon
topik minggunta: Jahowa do Panghirimonta – Tuhan Pengharapan kita. Dia ma na
mambahen asa marpanghirimon hita tu Debata ? ima:
Ø Asi ni rohaNa na so halompoan. Dihaholongi Debata do hita so marbatas, sai
dilehon do na dumenggan di ngolunta. Dihamaolon na taadopi, saii tahasiholi do
Debata na mangurupi hita jala mangalehon na dumenggan songon na sinangkapanNa.
Ø Huaso dohot panggomgomionNa. Saluhut na di portibi on ditoru ni huaso ni
Debata do, ndang adong na buni sian adopanna agia manang aha pe. Ndang adong na
so tarpatupa Debata, ido umbahen sai marpanghirimon hita tu Debata.
Ø Hot do padanNa i.Ai nunga di pasahat tu hita jolma padanNa i ima Padan na
Robi dohot Padanna Imbaru (Kitab Perjanjian Lama dan Kitab Perjanjian Baru).
Disi ma boi botoonta na sai dipasaut do bagabagaNa i tu jolma. Sude naung
dipadanhonNa i tarpatupa, ndang adong na so saut. Dipadanhon Ibana do
hatigoran, hadameon dohot hangoluan na na dumenggan on. Dipadanhon Ibana do
pangurupion, hagogoon dohot hangoluan na manongtong na gok p anghirimon di
angka na porsea di Ibana. Padan on ma na gabe dasor tu hita asa unang gabe
mandele jala mandate.
3) Huria ni Tuhanta , molo tadok do Tuhanta i na gabe panghirimonta, asa
taparrohahon ma Hata ni Debata na maniroi hita laho patupahon dohot mangulahon:
ü Tong tong marhaporseaon na togu: pasahathon sude parngoluon tu Debata. Pos
ni roha jala marhaposan tu Ibana na tuk paturehon. Adong do sangkap na uli na
denggan di Debata, nang pe sipata ndang taantusi dope dohot tangkas. Ala ni
ringkot ma hita hot martangiang jala pasahathon diri hibul tu Debata asa di
ajari hita, diurupi di pardalanan ni ngolunta. Sai marsitutu ma hita mambahen Debata
na gabe panghirimonta, ndang mura mandele, alai olo mangadopi angka hamaolon
dohot habaranion, siala taboto do Tuhanta i na mandongani hita.
ü Mandalani ngou na hombar tu lomo ni rohaNa. Dison do las ni rohanta na
manghirim di Debata ima mangulahon angka na uli na denggan, dibagasan burju ni
roha, haholongon, hatigoran dohot benget rohana di parngoluon siapari. Sai
dipamanat do manjaga parsaoran dohot dongan jolma asa denggan, ima patuduhon
haposanta Debata jala marhaporseaon di Ibana. Mandalani parngoluon on hombar tu
patik dohot Hata ni Debata marhite pambahenan dohot pasarhon haburjuon, asa
tarida ma haburjuon ni Debata tu humaliang.
ü Sai mandok mauliate disaluhut. Halak na sai mandok mauliate do na tau
mandai hasonangan nang pasupasu ni Debata. Alai mandok mauiate i ndada sian
keadaan na denggan, alai dohot do di keadaan na so denggan. Sipata hamauliateon
ni rohanta ala ni angka na uli na denggan, dohot na pasonang rohanta do,
manasai maol do masuk tu rohanta molo hamaolon, nang parungkilon sihmauliatehononta.
Ala memang sai tapadau jala patasisi do angka rumang na boi mambahen mara,
hamaolon, dohot jut ni roha. Hape angka na marhaporseaon boi do tataponna angka
parsorion ni ngoluon pe dalan ni Debata laho mangajari hita angka lomo ni
rohaNa, papitahon haporseaonta asa lam togu. Asa ganup hamaolon disi muse do
adong sangkap ni Debata. Asa tudos ma songon na tarsurat di Jeremia Yeremia
29:11 (TB) "Sebab Aku ini mengetahui rancangan-rancangan apa yang ada
pada-Ku mengenai kamu, demikianlah firman TUHAN, yaitu rancangan damai
sejahtera dan bukan rancangan kecelakaan, untuk memberikan kepadamu hari depan
yang penuh harapan" Jeremiah 29:11 (NET) "For I know what I have
planned for you, says the Lord. I have plans to prosper you, not to harm you. I
have plans to give you a future filled with hope"
4) Huria ni Tuhanta, halak na marpanghirimon ndada holan mamboan sonang di
parngoluon, alai mangalehon upa na mararga nang di portibi on dohot na
hangoluan sogot. Hata ni Debata paboahon
upa na dipadanhon tu hita na sai tongtong manghirim di Debata ima:
Ø Hagogon, habengeton, dame nang las ni roha diparngoluon. Sai lehonon ni
Debata do hagogoon di angka na manghirim tu Ibana. Uju mangadopii ragam
parsorion ni ngolu, ndang mura hita mandele siala pos do rohanta sai bahenon ni
Debata do sangkap na dumenggan. Marhite hagogoon na sian Debata sai dapot hita
do las ni roha dohot dame.
Ø Pangurupion na sahat di tingkina. Ndang tadinghonon ni Debata hita na sai
tongtong manghirim di Ibana. Sai lehononNa do pangurupion di tingkina be jala
dohot marhite dalanNa na dumenggan.
Ø Ngolu na tarpasupasu. Halak na mangolu dibagasan haporseaon dohot
panghirimon, sai hilalaonna do pangaramotion dohot pasupasu ni Debata. Ndada
holan pasupasu pardagingon alai dohot do las ni roha, hahipason dohot parsaoran
na rosu dohot angka dongan.
Ø Ngolu na manongtong di Surgo. Angka halak na satia jaloonna do hangoluan na
manongtong. Padan ni Debata taringot tu Surgo dohot las ni roha na manongtong
dilehon tu angka na tongtong porsea dohot mangihuthon dalanNa.
Ala ni i, huria na hinaholongan, mansai balga do Holong ni Debat tu hita
jolma di portibi on, dilehon dope asi ni rohana. Taon parasian on, mansai bahat
do pe kesempatan na nilehonN atu hita. Ala ni i, talehon ma ngolunta di pauba
Debata. Ngolu na marhamubaon, di Transformasi tu na lam dengganna, ndang
manimbil sian Debata. Mamasuhi Minggu Septuagesima on, sai tajanghon ma haroro
ni Sipalua i, ima Jesus Kristus i marhite hamubaon na signifikan, na marsitutu
mangulahon Hata ni Debata. Amen.
