PARTANGIANGAN BONA TAON PARHALADO 2025

PARTANGIANGAN BONA TAON

PARHALADO HKBP SA-RESSORT MORIA BSP

DOHOT KELUARGA

 DI BAGAS KEL. St.Ipan Situmorang,SH/S.br.Simanjuntak

Jumat, 17 Januari 2025 | Pkl.15.00 wib

-----Tangiang nahohom---

 

I.  ACARA PARTANGIANGAN.

1.     Pangaradeon Diri

U  :  Hamuna dongan sapunguan nahinaholongan, tama do hita mandok mauliate dohot puji-pujian tu Tuhanta Debata na patariparhon hita tu bona ni taon 2025 on. Denggan ni basaNa dohot pangurupionNa, i do na paloashon hita marhahipason jala marparsaoran apala di ombas on. Dibahen i, tapuji ma holong ni rohaNa i na tongtong patar di ngolunta.

2.     Marende BE. No.565 : 4  “Las Rohangku Lao Mamuji”

v  Rap ma hita mangandehon, sangap diGoarNa i

Tapangiar soaranta, lao mamuji Tuhan i

Sun do holong ni rohaNa, na so marnamontok i

I do pasadahon hita salelenglelengna i

U  :  Ibana tahe marmahani hita di taon na salpu. Ibana nang marmahani hita nuaeng, nang dohot di taon 2025 sibolusanta on dope. Ibana ma maniroi asa tau hita mambahen las ni rohaNa marhitehite angka ulaon na denggan. Antong, hamuna ale angka dongan sapunguan, dibagasan  las ni roha ma hita marsomba tu joloNa, ai Ibana do Parmahan di hita jala dipasahat tu hita tuaNa i na sian anakNa Tuhan Jesus Kristus i. Taendehon ma, “Jahowa Siparmahan Au”.

3.     Marende BE. No.188 : 1 – 2   “Jahowa Siparmahan Au”            BL. 131

v  Jahowa Siparmahan au, ndang hurang manang aha

Ai nasa jea di padao do sian dorbiaNa

Tongon dibaen na lomak i, lao pangoluhon tondingki,

dibaen asi rohaNa    

  

v  Ditogu au tu na tio, aek mata hangoluan

Dibaen do tondingki sio, di dalan hasonangan

Sabam rohangku do tongtong, saleleng au di tano on,

baen sangap di goarNa

 

4.     Votum – Introitus – Tangiang

U  :  Marhitehite Goar ni Debata Ama, dohot Goar ni Anakna Tuhan Jesus Kristus, dohot Goar ni Tondi Parbadia, na tumompa langit dohot   tano on.

R  :  Amen.

U  :  Sai mangaranapi do matangku dompak angka dolok.

R  :  Sian dia do ulaning ro pangurupion tu ahu ?

U  :  Sian Jahowa sitompa langit dohot tano on sambing ro pangurupion ianggo tu ahu.Ndang tagamon loasanNa tarsulandit patmu. Ndang tagamon nok mata ni sijaga ho. Sai jagaon ni Jahowa do ho sian nasa parmaraan,  sai jagaonNa do tondim.

R  :  Sai jagaon ni Jahowa do ho laho ruar dohot laho bongot, olat ni on ro di salelengna.

U  :  Mandok mauliate ma hamu tu Jahowa, siala saluhut denggan  basaNa. Jahowa do na paloashon hamu ruar sian taon 2024, laos Ibana do na paloashon hamu bongot muse tu taon 2025 on.

R  :  Alani i, sai pabotohonongku do denggan basaNa i tu pangisi ni portibi on

U  :  Paboa hamu ma ditonga-tonga ni angka parbegu. Jahowa do Raja. Hot ma antong portibi on. Hot ma hita di taon na imbaru on, ndang humordit. Ai tangan ni Jahowa do na maniop hita. Haleluya!

       Martanging ma hita !

        Ale Tuhan Debata ! Sian asi ni rohaM do umbahen sahat hami tu taon na imbaru on. Ho do na mangaramoti hami saleleng mamolus taon 2024. Asi ma roham di hami, sai dongani ma hami dibagasan taon 2025 on, asa sonang sohariboriboan hami mamolus taon na imbaru on. Pasupasu hami ro di angka ulaon na denggan na huula hami marhitehite Goarmu. Ramoti hami marhite-hite TondiM molo ro pangunjunan tu hami,  asa unang dililuhon sibolis dohot hagiot ni portibi on hami. Pargogoi hami mangadopi tondi ni zaman on, asa tung pos situtu rohanami maniop baga-bagaM, di na nidokMu: Sai na dongananMu do hami sahat  ro di ujung ni tano on. Tangihon ma tangiang pangidoannami marhitehite Anak haholongan ni rohaM, Tuhan Jesus Kristus, Tuhannami. Amen.

5.     Marende BE. No.214 : 1  “Sonang di lambung Jesus”                BL. 161

v  Sonang di lambung Jesus, Sonang na ro tusi

Unang be ho mabiar, Lao mandapothon i

Tongtong dijouhon Jesus, Sai ro ma ho tu Au

Tadingkon haholomon, Jala haposi Au

                    Sonang di lambung Jesus, Sonang na ro tusi

Unang be ho mabiar, Lao mandapothon i

 

6.     Manjaha Hata Ni Debata  ( Psalmen 61 : 2 – 9 )

U  :  Sai tangihon ma, ale Debata, alualungkon, sai parateatehon tangiangkon.

R  :  Sian ujung ni tano on do ahu joujou tu Ho di hagogondok ni rohangkon, sai togihon ma ahu tu atas dolok batu, na so tardongdong anggo ahu.

U  :  Ai Ho do haporusanku, partanobatoan na gonting maradophon musu.

R  :  Sai loas ma ahu maringan dibagasan undungundungMi salelenglelengna, sai marondingonding tu linggom ni habongMi ma ahu.

U  :  Ai anggo Ho, ale Debata, nunga dibege Ho angka bagabagangku, nunga dilehon Ho tu ahu jambar ni angka na mangkabiari goarMu.

R  :  Sai ambai ariari tu ariari ni Rajai, asa marsundutsundut angka taonna i.

U  :  So marhabangso ma ibana salelenglelengna di jolo ni Debata, sai padiri ma asi ni roha dohot hasintongan mangaramoti ibana.

R  :  Asa huendehon goarMu salelenglelengna, manggarari angka bagabagangku ganup ari.

U  :  Ido sahatna! Martua ma na tumangihon hata ni Debata jala na umpeopsa.

U+R:  Amen

 

7.     Tangiang Pangondianon

 

8.     Marende BE. No.464 : 2 – 3   “Huboan Ma Diringku”            BL. 313

v    Ho Sipalua ahu, sun hinagogoMi

     HataM do huhaposi, na so boi muba i

    Reff :      Pagalak ma rohangku, dison managam ahu

TondiMi ma suru, na boi manggomgom au

v Ias do au diburi Ho, ale Tuhanki

     Naeng dohot parulanku, hombar tu HataMi

                         Reff :    Pagalak ma rohangku, .....

 

9.     J a m i t a  :

 

10.  Marende BE. No.69 : 1 + 3 + 6    “Ungkap Bahal Na Umuli”       BL. 84

~~ Papungu Pelean ~~

v    Jesus, sai urupi hami dohot di taon baru on.

Paimbaru gogonami, mangihuthon Ho tongtong.

Pasupasu ma muse na porsea sasude.

v    Taon parasi ni roha on, baen di au sandok taon on.

Lam pahot ma hasesaan, ni dosangku di au on.

Holan Ho do Jesuski, tuk pasaehon dosangki.

v    Sai ramoti au Tuhanku, sipat taon na‘mbaru on.

Usung ahu di tanganMu, molo suda bohalhon.

Asa las rohangku lao, ia ro panjouM di au.

11.  Tangiang Pelean, Ale Amanami, Pasupasu

 

 

II.    ACARA RAMAH TAMAH

III.  WARTA

 

 

SELAMAT TAHUN BARU 2025